ဖြူတယ်။သန့်စင်တယ်။ ပြီးတော့ ဆွဲဆောင်အားပြင်းတယ်။
နီကိုတင်း ... ။
မဟုတ်သေးဘူး။
နီကိုတင်းထက်ပြင်းတဲ့ မျက်ဝန်းကြည်ကြည်တွေ ... ။
မိုးစိုနေတဲ့ ဆံနွယ်စတွေက မျက်နှာချောချောထက်မှာခပ်ဖွာဖွာ ... ။
ဘားထဲက လက်နွေးနွေးကိုဆွဲထွက်လာခဲ့တုန်းက ဘာရည်ရွယ်ချက်ခပ်ရှုပ်ရှုပ်မှ မပါ ... ။
သူငယ်ငယ်ကတည်းက အမြဲမှတ်မိနေတဲ့ သူ့အမေရဲ့မျက်ဝန်းထဲမှာ မြင်ရတတ်တဲ့ မှိုင်းပျပျအကြည့်မျိုးတွေကို ပိုင်ဆိုင်ထားတာမို့ သူဟာ အဲ့ဒီမျက်ဝန်းကြည်ကြည်တွေကို တချို့သောအရိပ်တွေဆီကနေ ခေါ်ထုတ်လာချင်ခဲ့ရုံ ... ။
အခုတော့ တဖြည်းဖြည်းနဲ့ သူ့ရည်ရွယ်ချက်တွေက ရှုပ်ချင်လာရပြီ။
သူစိမ်းတစ်ယောက်ဆွဲခေါ်တိုင်းလိုက်ပြီး ပြောတိုင်းယုံတဲ့ အတီးအတယုန်ညိုလုံးကို ဘယ်အိမ်ကများ စိတ်ချလက်ချနဲ့ ဘရွတ်ကလင်းရဲ့ဘားမှာ တစ်ယောက်ထဲလွှတ်ထားလေသလဲ။ အနောက်တိုင်းမှာ အရက်ဝယ်တိုက်ရင် ဘာအဓိပ္ပာယ်လဲတောင်မသိတဲ့ ဒီလူက အူလည်လည်နဲ့ သူ့ကို အရက်ဖိုးပြန်ပေးမလို့ လိုက်လာတာ...။
သူတစ်လှမ်းတိုးတိုင်း နောက်တစ်လှမ်းဆုတ်နေတဲ့လူကို ကြည့်ရင်း ပိုပိုစချင်လာတယ်။ နောက်ဆုတ်ရင်းဆုတ်ရင်းက လှေကားပြုတ်ကျမတတ်ဖြစ်နေတဲ့ ပိန်သေးသေးကိုယ်ကို တမင်ခါးက ပွေ့ယူလိုက်တယ်။ နီရဲတက်လာတဲ့ နားရွက်ဖျားတွေက သူ့ကျီစားချင်စိတ်တွေ ပိုတိုးလာအောင် နှိုးဆော်နေသလိုပဲ။
"အဲ့ဒါမင်းနဲ့အိပ်ချင်တယ်လို့ ဆိုလိုတာ ... ချစ်သောရဲ့"
တစ်ကိုယ်လုံးကျုံ့သွားပြီး မျက်ဝန်းကြည်ကြည်တွေက သူ့ကို အံ့ဩသွားဟန် မော့ကြည့်လာတယ်။ အဲ့ဒီမျက်ဝန်းလွှာတွေဟာ သိပ်ကိုကြည်လင်တဲ့သလင်းကျောက်တွေလိုမျိုး ... ။ တောက်ပတယ်။ လှတယ်။ ပြီးတော့ အကြည့်မလွှဲနိုင်လောက်အောင်ပဲ။
အင်္ဂလိပ်လူမျိုးတွေ တရင်းတနှီးသုံးတတ်တဲ့ အသုံးအနှုန်း ... ။
Dear ... ချစ်ရပါသောတဲ့ ။ သူ့အတွက်တော့ Dear ဆိုတဲ့မူရင်းထက် ရှေ့က ယုန်ညိုလုံးက ချစ်သောနဲ့ပိုလိုက်တယ်လို ခံစားရတယ်။
