Melancholy Lake

Hide and Seek Arc2

Unicode
ကုမ္ပဏီ  ထဲသို့  တုံ့ဆိုင်းစွာ ဝင်​ရောက်လာသည့်   လုချီရဲ့ ကတုန်ကယင် ဟန်ပန်က   အလုံစုံ​သောတို့၏ အာရုံကို  ဖမ်းယူနိုင်လိုက်သည့် ပုံပင်။
ဟိုတစ်စု သည်တစ်စု  တီးတိုး​သော ကဲ့ရဲ့ပြစ်တင်သံ​တို့ဟာ   များလှသည့်  လူအင်အား​ကြောင့်  သိပ်မတိုးသဲ့လှ။
အကြည့် ဖြင့်​ဝေဖန်​သော  စွဲချက်တို့ကြား  လုချီဟာ လက်ဆုပ်လက်ကိုင်ပြစရာ သက်​သေမရှိပါပဲ နှုတ်ဖျားက တရားခံ။
အပြစ်ကင်း​ကြောင်း  သက်​သေပြနိုင်ရန်သာ  စိတ်​ရောကိုယ်ပါ    တွန်းအား​ပေး​နေပါ​သော်လည်း   လက်​တွေ့တွင်​တော့  မှန်သည် မှားသည် ဖြစ်​စေ ငြင်းဆန်လို​သော ခွန်အားမျိုး မရှိ။
ချို့တဲ့​သည့် မိသားစုမှ ​ပေါက်ဖွားလာသည့် သူမနှင့်  သည် နိုင်ငံ၏  ယိုယွင်း​နေ​သော  တရားဥပ​ဒေ ။
ရိုးသားမှု မရိုးသားမှုဟာ အကျုံးမဝင်​တော့ပဲ    ကျော​ထောက်နောက်ခံတစ်ခုတည်းဖြင့်   ​​ပြောင်းလဲ​နိုင်​သည့်  ​ငွေ​ကြေးဖြင့် သတ်မှတ်​သော ကိုယ်ကျင့်တရား။
ပြန့်ကျဲ​နေသည့် အ​တွေး​တို့ကြောင့်လား   ​မတရားသည့် ​လောကကြီးအ​ပေါ်  စက်ဆုတ်မှု​ကြောင့်လားမသိ။
​ကွေးညွတ်သွားရသည့်   လုချီ၏    နှုတ်ခမ်းစွန်းဟာ  ​ နှစ်မြို့မှု​ကြောင့်​တော့ မဖြစ်နိုင်။
ချီတုံချီ​ချ  ​ခြေလှမ်း​တွေကို  အဆုံးသတ်ဖို့  အချိန်ကိုက် ပွင့်ဟလာသည့်  ​ဓါတ်​လှေကား  အတွင်းသို့  ဝင်ကာ  ​​နေရာယူသည်။
ဝန်ထမ်း​ရေးရာ ဌာနရှိရာ   အလွှာကို ​  ရွေးနှိပ်လိုက်ပြီးပြီးချင်း   စို့နစ်လာ​သော  ရင်အစုံ​ကြောင့်    နံရံထံ ကိုယ်ကို   မှီ​လျော့လို့  တုန်လှုပ်မှုအား  ဖြေ​ဖျောက်မိသည်။
လက်​ရေးမူ နှုတ်ထွက်စာကို  တင်းတင်းကျပ်ကျပ်ကိုင်ရင်း  မက်​မောရသည့်  သူမ၏  ဘဲ​လေး ဘဝဟာ  အဆုံးသတ်ရ​တော့မည်  ​ဖြစ်ကြောင်း  ပုံ​ဖော်ကြည့်မိတိုင်း  မျက်ရည်ကြည်တစ်​ပေါက်က  သွက်လက်စွာ  ပါးပြင်​ပေါ် ဖြတ်​ပြေးသည်။
မီး​တောက်တစ်ခုမှ  လွင့်စင်လာသည့်   မီးပွားများစွာဟာ   သူမ၏  အရည်ပြားတို့အား  ​လောင်ကျွမ်း ပစ်လိုက်သကဲ့သို့ နာကျင်မှုနှင့်  အတူ  သူမ၏   ရည်မှန်းချက်တို့ ​သေဆုံးဖို့ရန်  မိနစ်ပိုင်းအလို။
ဝန်ထမ်း​​ရေးရာဌာန  အခန်းအတွင်းသို့  ဝင်သွားလိုက်သည်နှင့်  မိုင်ကုန်ဖွင့်ထားသည့်  အဲရားကွန်း​ကြောင့်  ​အေးစက်​နေသည့်  ​လေထုဟာ  ပထမအ​တွေ့အကြုံ။