Ben လွှမ်း၏ ကြီးမားလှသည့် ခြံဝန်းကြီးအရှေ့ရောက်တာနှင့် ကားဟွန်းတစ်ချက်တီးလိုက်သည့်အခါ သံတံခါးကြီးဟာ သူ့အလိုလို ပွင့်လာလေတော့သည်။ ထို့ကြောင့် Ben လည်း ကားကို တစ်ခါတည်း ဂိုထောင်ရှိရာသို့ မောင်းဝင်သွားလိုက်တော့ အလုံပိတ်တံခါးနှင့် ကားဂိုထောင်ဟာ အဆင်သင့် ဖွင့်ထားသည်ကို တွေ့လိုက်ရလေသည်။ ကြိမ်းသေတာပေါ့ ကိုကို့၏ ကားဟာလည်း ထိုနေရာ၌ အဆင်သင့် ရပ်ထားပြီးသား ဖြစ်ပေသည်။
ထို့ကြောင့် Ben လည်း ကိုကို့၏ ကားဘေး၌ပဲ ဝင်ရပ်လိုက်တော့သည်။ ထိုအခါ ကားဂိုထောင်၏ တံခါးဟာ သူ့အလိုလို အောက်သို့ ပြန်ကျကာ ပိတ်ကျသွားလေတော့သည်။
တစ်လက်စတည်းမှာပဲ Ben တစ်ယောက် ကားထဲက မထွက်ခင်ကတည်းကပင် ခံစားနေရသည့် အေးစက်သည့် အငွေ့အသက်များကြောင့် ကားပေါ်က မဆင်းချင် ဆင်းချင်နှင့်ပင် ဆင်းလာခဲ့ရတော့သည်။ သို့သော် ထိုအချိန်မှာပင် သူ့ထံသို့ ကိုစေက ဖုန်းခေါ်လာလေတော့သည်။
*ဟုတ်ကဲ့ ကိုကို*
*မင်း အိမ်ထဲဝင်ရင် ငါ့ကားနောက်ဖုံးထဲက မင်းရဲ့ ကြံရာပါကိုပါ ခေါ်လာခဲ့ *
တီ!
တစ်ခါတည်း တစ်ခွန်းတည်းအပြတ်အမိန့်ပေးကာ ဖုန်းချသွားသည့် ကိုကို့ကြောင့် Ben ပင် ခဏတာ ဆွံ့အသွားလေတော့သည်။ သို့သော် စက္ကန့်ပိုင်းအတွင်း သူ၏ အသိစိတ်ဟာ အလုပ်ပြန်လုပ်လာတာမို့ Ben အလန့်တကြားနှင့်ပင် ဘေးက ကိုကို့ကား၏ နောက်ဖုံးကို သွားဖွင့်လိုက်ရလေတော့သည်။
*Holy fu*k!*
သို့သော် ရုတ်တရက် မြင်လိုက်ရသည့် လွှမ်း၏ ပုံစံကြောင့် Ben ပင် ရုတ်တရက် ဆဲရေးမိလိုက်တော့သည်။
ကျဉ်းမြောင်းလှသည့် ကားနောက်ဖုံးလေးထဲ ကလန်ကလား ခြေတံရှည်များအား အစွမ်းကုန်ကွေးထားကာ မျက်လုံးအစုံကို မှိတ်ရင်း အသက်ကို ပုံမှန်ထပ်ပို၍ ပြင်းပြင်းရှူနေသည့် လွှမ်း၏ ပုံစံဟာ မြင်ရသူကိုပင် မသက်မသာ ခံစားရစေပါသည်။ မဟုတ်မှ သူ မလာမချင်း ဒီကောင့်ကို ဒီတိုင်းထားထားတာ များလား?
*ချီး! နောက်ဆုံးတော့ မင်းလာပြီပေါ့! ခွေးကောင်!*
ထိုအခါ တံခါးလာဖွင့်ပေးတာ သူမှန်းသိသွားသည့် လွှမ်းဟာ သူ့အား ကြည့်ကာ ဆဲရေးလာလေတော့သည်။
