Chilli Pepper

Ch-18

StarField Entertainment,

M နိုင်ငံ၏ အနုပညာလောကအား လွှမ်းမိုးထားသည့် အကြီးမားဆုံး Entertainment ထဲက တစ်ခု ဖြစ်သည့် ဤ company ဟာ Ben ၏ Agency ဆိုလည်း မမှားပေ။ အထပ်ပေါင်း 20 ကျော်သည့် ဤ အဆောက်အအုံကြီးဟာ မြို့တော်၏ လူအစည်ကားဆုံးနှင့် အချက်အချာအကျဆုံး နေရာ၌ ဝံ့ဝံ့ကြွားကြွား တည်ရှိလို့နေလေသည်။

အချိန်ကား ည 7 နာရီခန့်ရှိပြီ ဖြစ်လေသည်။ သို့သော် မကြာခင် Tour လုပ်ရတော့မည့် Ben အတွက်ကတော့ လေ့ကျင့်ရေးဆင်းနေရဆဲပင်။ ညဘက် အိပ်ချိန်နည်းလောက်အောင် vocal တစ်လှည့် ၊ အကတစ်လှည့် ကျင့်နေရသော်လည်း Ben ပင်ပန်းတယ်လို့ မထင်မိ။ သူ့ကို ချစ်ကြသူများနှင့် သူကလည်း ချစ်သည့် ပရိတ်သတ် များအား ဖျော်ဖြေရမှာမို့ သူ အကောင်းဆုံးတွေကိုသာ ချပြချင်သည့် စိတ်တစ်ခုထဲ ရှိပေသည်။

သူနှင့်အတူ သူ၏ background dancer တစ်ဖွဲ့လုံး ယနေ့အတွက် 5 ပုဒ်မြောက် choreography ကို လေ့ကျင့်ပြီးသည့်အခါမှာတော့ သူတို့၏ trainer ဖြစ်သူ Jerry မှ သူတို့အား ခဏတာ break ယူမည် ဖြစ်ကြောင်း ဆော်ဩလာလေတော့သည်။

*ကဲ! အားလုံး ညစာစားပြီး ခဏ break time ယူဖို့ အချိန် ၁ နာရီခွဲရမယ် ! ဒီလောက်ဆိုဖြစ်လား Ben?*

Jerry ဟာ အခုတလော ပုံမှန်ထပ် စိတ်ဆက်နေသည်ဟု ထင်ရသော သူ၏ အဆိုးအဆာ idol အား ကြည့်ကာ မေးလိုက်တော့ ဆရာသမားက သူ၏ ဖုန်း မျက်နှာပြင်အား ကြည့်ကာ မှုန်ကုပ်နေသည့် မျက်နှာနှင့် ခေါင်းသာ ငြိမ့်ပြလာလေသည်။

ထို့နောက် သက်ပြင်းတစ်ချက်ချကာ ဘေးက ရေသန့်ဘူးအား တစ်ခါတည်းနှင့် တစ်ဝက်နီးပါး ကျိုးအောင် သောက်ချလိုက်သည်ကြောင့် Jerry မျက်ခုံးအသာပင့်ကာ ခပ်လှမ်းလှမ်းက မန်နေဂျာဖြစ်သူအား လှမ်းကြည့်လိုက်တော့ သူလည်း မသိဘူး ဟူသည့် အထာနှင့် ပုခုံးသာ အသာတွန့်ပြလာလေသည်။

ထို့ကြောင့် သူလည်း ကိုယ်တော်ချောအား ထိုအတိုင်း လွှတ်ထားကာ အနားယူရန်သာ ဆုံးဖြတ်လိုက်တော့သည်။

*အာ!! Boss ပါလား? မင်္ဂလာပါ *

သို့သော် အားလုံး လှုပ်လှုပ်ရွရွဖြစ်ကာ နှုတ်ဆက်သံကြားလိုက် ရတာမို့ တံခါးဝကို ကြည့်လိုက်သည့်အခါ သူတို့၏ Boss ဖြစ်သူကြောင့် Jerry ပင် အမြန် ခါးကိုင်းကာ Boss ဖြစ်သူအား နှုတ်ဆက်လိုက်လေသည်။ အခန်းထဲရှိ လူအားလုံးဟာ Boss ဖြစ်သူလာတာမို့ အားလုံး မတ်တပ်ရပ်ကာ ဝိုင်း နှုတ်ဆက်ကြသော်လည်း ကိုယ်တော်ချော Ben တစ်ယောက်ကတော့ ဂရုကို မစိုက်ပေ။ သူ၏ ဖုန်းကိုပဲ ကြည့်ကာ မသာမယာမျက်နှာနှင့်သာ ထိုအတိုင်း ထိုင်နေလေသည်။ မသိလျှင် ရည်းစားဆီက အပြစ်ခံထားရသည့် သူလိုပင်။