سهيت بـ نظرة عيونك واثاري هالعيون بلاد

3

عند نايف الساعه 9 طلع من الفندق وشاف جواله والاتصالات كثيره من امه وريان وحلا و روان
اتصل على عبدالعزيز ووصله صوته: هلا يابو النوايف
نايف؛ هلا ياعبدالعزيز
عبدالعزيز؛ كيف وضعك؟
نايف: قابلتها وقالت لي.. كمل السالفه
عبدالعزيز بقهر؛ جعلها الجلطه بنت ابليس ماتستحي
نايف: وش اسوي قلبي يحبها وعقلي يكرهها
عبدالعزيز؛ اول شي صور محادثاتها معك، ثاني شي عطها بلوك من كل الحسابات، ثالث شي اخذ رقم جديد وارسل صور المحادثه لـ اخوها يوسف
نايف؛ هههههههههههههه ياخي انت من وين تفكر اسمي باين في كل المحادثات تبيني افضح نفسي؟
عبدالعزيز؛ هذا الصدق، نايف انسها ولا تفكر فيها وهي ماتستاهل
نايف: ان شاء الله، انت متى بترجع؟
عبدالعزيز: بستقر هنا لين القى نقل للرياض
نايف؛ طيب يلا مع السلامه
عبدالعزيز؛ مع السلامه، انتبه لـ قلبك
سكر وشاف ريان يجي عنده؛ نايف وينك خوفتنا عليك!
نايف: بزر انا تخاف علي؟
ريان؛ مب انا اللي خايف امي
نايف: طيب روح وقل لها انه بخير
ريان؛ حبيبي امي تقول اذا شفته جيبه معك لاترجع بدونه.
نايف؛ طيب يلا امش، ابوي وينه؟
ريان؛ في الشركه عنده اشغال واخذ فيصل معه، ترا روان عندنا
نايف؛ زين يلا.
ـــــــــــــــــــــــــــــــ
بيت ابو فيصل كانو جالسين يسولفون لين دخل نايف وريان
ام فيصل: وين كنت يا نايف
نايف وهو يبوس راسها؛ شغله خلصتها وجيت
روان: ما استقبلتني؟
ابتسم بهدوء: ولو كيف تبينا نستقبلك يا استاذه روان؟
روان؛ عادي استقبلني بأي شي
نايف: ينفع كتاب جديد؟
روان بابتسامة؛ اي ينفع عادي
ام فيصل؛ كيفك الحين يمه؟
نايف: الحمدلله
ريان: قم العب معي قيم ببجي يلا
نايف: مالي خلق والله العب انت وحلا.
حلا: لا العب معنا انت، ريان مايعرف يلعب
ريان؛ انا ماعرف؟، انتي اللي ماتعرفين.
ام فيصل؛ خلاص انتو ازعجتوه، نايف اذا تعبان روح غرفتك ارتاح

قام وراح لـ غرفته دخل وسكر الباب، حس بـ ضيقه مب طبيعيه حس انه يبي يبكي، جلس على السرير وصار يكرر انفاسه العميقه ودموعه تنزل، شاف المصحف فوق الطاوله قام وتوضى وصلى ركعتين وبدا يقرا المصحف لين حس انه هدا شوي، نزل المصحف ونام فوق سجادته.

دخلت ام فيصل الغرفه بعد ما دقت الباب ولا سمعت رد، شافته نايم فوق السجاده والمصحف جمبه، ابتسمت ورفعت المصحف فوق الطاوله وصحته: نايف؟
تحرك بشويش وشافها قدامه: هلا يمه
ام فيصل؛ قوم يمه صل الفجر
نايف؛ اووف الفجر؟، كم لي نايم انا؟
ام فيصل؛ مدري متى نمت انت؟
نايف: البارح اول ما دخلت الغرفه نمت
ام فيصل بابتسامة: يلا حبيبي توضى وصل يلا
قامت وطلعت وقام يتروش ويتوضى وصلى ونزل للحوش، حس بشعور جميل وهو يشوف شروق الشمس همس بهدوء: انسى يانايف والله انها ماتستاهلك ولا تستاهل ضيقك عليها تجاهلها، بس كيف اتجاهلها و قلبي يحبها الله ياخذها.

كان نزل من الدرج وشافه بالحوش وراح له؛ نايف؟
رد بهدوء بدون لا يلتفت: نعم؟
فيصل؛ وش تسوي؟
نايف؛ مثل ما عينك تشوف
فيصل: وش بلاك؟
نايف ما رد عليه
فيصل: نايف لا تكذب علي وتقول انك تحبها ومدري ايش ترا انت كذاب بـِ معنى الكلمة، لو انك تحبها ماكان كنت تسعى وراها من مكان لـ مكان عشان ترقمها لا تحسب اني غبي ولا اعرف حركاتك اضبط نفسك وامنعنا من الردى.
وقف بغضب: نعم نعم؟؟، هي نفسها اللي داقه علي ما ادري من وين جابت رقمي، هي داقه وتقول نبقى اصدقاء بس، وانا المدمغ اللي حبيت وحده ما تستاهل وحده رخيصه ولما اعترفت اني احبها قالت لي بعد انها تحبني واخر مره سألتها قالت انها تكلمني للتسليه وتضييع الوقت وانها تحبك انت بس.
فيصل؛ لا تكذب ابتهال ماتسويها ولا تكلمك وهي تكلمني.
نايف: اص اص يرحم والديك لا تتكلم معي في ذا الموضوع اللي يجيب المرض واذا ما انت مصدق امسك جوالي وشوف ذا مب رقمها ولا؟؟
اخذ فيصل الجوال وصار يقارن الرقم اللي عنده وعند نايف بس فيه اختلاف مب نفس الرقم ابد
فيصل: الرقم اللي عندك مب نفس اللي عندي يعني اللي تكلمك مب ابتهال؟
نايف: الا هي بس يمكن انها تكلمك بـ رقم وانا بـ رقم ثاني.
فيصل: نايف لا تتبلا عليها وحط في عقلك انها من نصيبي.
راح ووقف نايف بـ قهر طلع وتوجه لـ دوامه يبي يفرغ قهره كله بالشغل.
ـــــــــــــــــــــــــــــــ
بيت ابو فيصل دخل وشاف ام فيصل فالمطبخ
ابو فيصل: وش فيك معصبه؟
ام فيصل: لا ولا شي ما كأنك تدري؟
ابو فيصل وهو يجلس: لا ما ادري وش انا مسوي؟
ام فيصل؛ لا تزوج فيصل ابتهال
ابو فيصل: وليش فيه سبب مقنع؟
ام فيصل؛ نايف؟
ابو فيصل: ادري يابنت الحلال بس فيصل يحبها!
ام فيصل؛ ونايف يحبها بعد، يعني بـ تكسر قلب نايف اذا زوجتها فيصل وبـ تكسر قلب فيصل اذا زوجتها نايف لا تزوجها واحد منهم
ابو فيصل؛ قد عطينا الرجال كلمه خلاص عاد، نايف ايام وينسى ويعيش حياته بعدين حبه ترا حب مراهقه مب حب حقيقي
ام فيصل؛ وانت وش دراك انه مراهقه، تراه رجال عمره 25 ماله داعي تقول مراهق
ابو فيصل بابتسامة؛ اتفاهم معهم اذا جاو اهم شي لاتزعلين يانظر عيني
ام فيصل؛ بس هذا اللي انت فالح فيه كلام بس
ابو فيصل؛ حتى وانا ابي اراضيك تعصبين اكثر، بس ابشري خليهم يجون واتفاهم معهم
ام فيصل؛ لا تتفاهم ابد ارفض فكرة الزواج وخلاص.
ابو فيصل؛ لا يعني لا، البنت لـ فيصل والتفاهم راح يكون مع نايف
ام فيصل؛ وش ذا الكلام؟، ترا اللي انت تسويه تفرقه ياخي ظلم؟!!!
ابو فيصل وقف: لاتتدخلين بيني وبين عيالي
وقفت ومسكت يده: الا بتدخل كلهم عيالي مثل ماهم عيالك
ابو فيصل بأستهزاء: نايف من عيالك؟، ولا من عيال الشوارع؟.
ام فيصل بصدمه؛ وش قاعد تقول انت
ابو فيصل؛ كلامي واضح، نايف مب ولدي ولا ولدك الى متى وانتي تكذبين على نفسك وعليه؟، قولي لي وين لقينا مب عند باب المسجد؟، مب انتي اللي ازعجتيني عليه تبين تاخذينه؟؟
ام فيصل؛ انجنيت انت، نايف ولدي
ابو فيصل؛ متى صار ولدك؟، ماهو ولدي ولا هو ولدك يابنت الحلال قولي له الصدق، ماتدرين يمكن اهله الحقيقيين يدورونه
ام فيصل بغضب؛ فهدد؟ اتركنا من الكلااام الفاضي..
قاطعها وهو يحط يده على فمها؛ ماهو كلام فاضي الكلام هذا اللي انا اقوله صدق نايف مب من عيالي ولا من عيالك وابتهال لـ فيصل ونايف ماله شغل واذا انتي تبين يبقى نايف موجود تفاهمي معه وخليه ينسى ابتهال وازوجه اللي احسن منها.
طلع من المطبخ وانهارت ام فيصل تبكي.