Come To My Side (Myanmar Translation)

Chapter-34 (part one)

ည ၁၀ နာရီ၊ မိုးတွေလည်း ရွာနေခဲ့သည်။

ကွမ်းရှီးဟာ တစ်ခုတည်းသော luggage ကို ဆွဲပြီး မြေအောက်ကားပါကင်ကနေ တက်လာခဲ့သည်။ ဒီနေရာက ကွမ်းရှီး အမည်ပေါက်အိမ်တွေထဲက တစ်လုံးဖြစ်ပြီး ပရိဘောဂအပြည့်အစုံထည့်ပြီးသား ဖြစ်တာကြောင့် အထုပ်ဆွဲပြီး တက်နေလို့ ရသည့်အိမ်မျိုးဖြစ်သည်။ သို့ပေမဲ့ သူမ ဒီမှာ တစ်ခါမှ လာမနေဖူးတာကြောင့် ဖုန်တွေတက်နေပြီဖြစ်သည့်အပြင် နေ့စဉ်သုံးပစ္စည်းတွေလည်း မရှိချေ။

သူမ ဟိုအိမ်မှာ ဆက်နေလို့မရတော့မှန်း ကိုယ့်ဘာသာကိုယ်သိတာကြောင့် ဒီနေ့ညကစပြီး ဒီမှာပဲ တစ်ယောက်တည်း နေတော့မည်ဟု ဆုံးဖြတ်လိုက်သည်။

အထဲရောက်တာနဲ့ ကွမ်းရှီး အိတ်ကို ဘေးထားကာ ယန်ချင်းဆီ ဖုန်းခေါ်လိုက်သည်။

ယန်ချင်းက သူမအတွက်ဆို ၂၄နာရီ ဆက်သွယ်လို့ရရမဲ့သူမျိုး ဖြစ်သည်။ သူမနဲ့ဖုန်းပြောပြီးတာနဲ့ ချက်ချင်း အိမ်သန့်ရှင်းရေးလုပ်ဖို့ လူခေါ်ပေးကာ မရှိမဖြစ်လိုတဲ့ အသုံးအဆောင်တချို့ကိုပါ ဝယ်ပြီး လာပို့ပေးခဲ့သည်။

အိမ်အကူဟာ ကွမ်းရှီးအတွက် master bedroom ကို အရင် သန့်ရှင်းရေးလုပ်ပေးကာ နောက်မှ အပြင်မှာ ရှင်းစရာရှိတာ ဆက်ရှင်းနေလေ၏။

ယန်ချင်းဟာ အပြင်မှာ အိမ်အကူနဲ့ ပြောစရာရှိတာ ပြောပြီးတဲ့နောက် တံခါးခေါက်ကာ အခန်းထဲ ဝင်လာပြီး "ဥက္ကဌကွမ်းက နောက်ကျရင် ဒီမှာပဲ နေတော့မှာလား။"

ကွမ်းရှီးဟာ ခုတင်ဘေးမှာ ထိုင်နေရင်း အေးစက်စက်လေသံနှင့် ပြန်ဖြေလိုက်သည်။ "မနက်ဖြန်ကစပြီး ငါတာဝန်ယူထားတဲ့ ပရောဂျက်တွေအကုန် လက်လွှဲပေးဖို့ ကုမ္ပဏီကို လာခဲ့မယ်။"

ယန်ချင်း လန့်ဖျပ်သွားကာ "ဥက္ကဌကွမ်း...... ဒါ ဘာကို ပြောချင်တာပါလဲ။"

ကွမ်းရှီး ဘာမှဆက်မပြောပေမဲ့ ယန်ချင်းလို ဉာဏ်ကောင်းတဲ့လူက အများကြီးထပ်မေးစရာမလိုဘဲ နားလည်နိုင်စွမ်းရှိကာ အံ့ဩတကြီးနှင့် ပြောလာခဲ့သည်။ "ဥက္ကဌကြီးက သဘောတူမှာ မဟုတ်ဘူး။"

ကွမ်းရှီး "သူ ဒီနေ့ အိမ်မှာ မရှိဘူး။ မဟုတ်ရင် ငါ အိမ်ပေါ်က ဆင်းလာတဲ့ကိစ္စကိုလည်း သူ ခွင့်ပြုမှာ မဟုတ်ဘူး။ ဒါပေမဲ့ နောက်ကျရင် ငါ့ကိစ္စကို ငါ့ဘာသာငါ ကြည့်လုပ်မယ်။ မင်းက ငါ ပြောတဲ့အတိုင်း လုပ်ရင်ရပြီ။"