الشرع الحرام

part 32

الشرع الحرام ❌
بقلمي ...ايات احمد

احبك حب نهر من يعشك ابلام

يفرح من تشك برويحته وصدره

لا تسأل احبك أسأل الروح

هي أعلم اظن بمحبتي وادرى

احبك حب تسامح حب الزغار

مثل فلاح عاشك طيبة الشجرة

واحبك حب مضيف ايحب الدلال

دارك عشك شيخه ويفهم بكدرة

واحبك من كبل لا تعشك الناس

جان اول عشك من دمي خط سطرة

واحبك حب مشاعر فوك السطور

واذوبن بالسطر لو بس علي تطره

واحبك حب صحاري امفطرة تنوح

دنكت راسها وما حنت الكطرة

واحبك حب جهال اتحب العياد

تحب الضحكه والبسمات بالفطره

....

مساء العافيه
اتمنالكم قراءه حلوه مثلكم❤️

.........

سبحت ولبست وضليت كاعده بلحمام ولله ماينطلع بيهن شسووي كل مااجي افتح الباب اخجل مااكدر
تالي الا هوو دگ الباب
ها يابه شسوويتي موو وصيت ع اكل وصار ثلج شني نمتي
هههههه لا موجوده
جاا ماتطلعين
توني كملت هسه راح اطلع حجيتها وفتحت القفل بتوتر
صار هوه كدامي
اجت عينه بعيني وراسا دنگت
سكت ثواني وهو يباوع بيه ورد نطق

ولي فيكَ ما لم يقل قائل
وما لم يَسِرْ قمرٌ حيث سارا
فلو خُلق الناس من دهرهم
لكانوا الظلام وكنتَ النهارا"

ابتسمت فرحانه وهمست
ماتدري شكد جنت احن لهالحضات الحمدلله الذي رجع وجمع بينا بعد مايأست الرجعه
تقرب بناحيت وحجى بقهر
ـ اذيتج موو؟ اسف ع الالم العشتي
ـ هشش حجيتها وخليت ايده ع حلگه
لاتحجي هيج ميخالف انه استاهل الاذيه ولله 
سحب ايدي وباسها
ـ الله اليشهد صح النيه جانت اكسرج وااذيج بس روحي اتاذت اضعاف اضعاف بعدها
ـ عادي انه مسامحتك
ـ بس انه مستحيل اسامح روحي
اذا انتي نسيتي وحشيتي ذيج الليله فانه ماراح انساها العمر كله
بس وعد لاعوضج واخليج تعيشين حنيه اضعاف القسوه الشفتيها مني بكل ليله نگضيها سووه

وفعلا هذه الي صار من ليله وحده مرت كدر يطفي كل ذره خوف وقلق ومو بس هيج عشت اسبوع كامل من احلى الايام المرت بحياتي ايام كلها دلال وحب وونسه على اخر حبايه بحيث نكضي النهار كله نووم ونكعد العصر نبدل ونطلع نتفرفر مانرد لتالي الليل وساعتها نبديها سهره انه واحمد للفجر حرفيا عشت احلا ايام حياتي بهالفتره
بس لاسف حسيتها نگضت برمشه عين وليوم جاي نلم غراضنه حتى نرجع شافني احمد مطنگره ذب البيده وسحبني من ايده وگعدني مقابيله وحجى
ـ شبيها حلاوتي ضايجه
ـ صراحه افكر شيصير لو نعيش طوول العمر بوحدنا لاگالت لمياء ولاحجت شيماء هسه راح ارد للكراب والمشاكل من جديد
ـ لتخافين ممطولين ببيت اهلي فتره واطلعج وعد اصلا حتى لگيت بيت
كمزت من مكاني فرحانه
ـ الله عليك تحجي الصدك
ـ يي ولله خايبه انه هم مالي خلگ المناگر يوميه
وقررت اعزل وحاجيت ابو مؤمن البارحه وگلي اكو بيت بصفهم للايجار فارغ فبس نرجع ان شاء الله اروح واشوفه واتفق ويه صاحبه ونتحوول
ـ يااارب يطلع خووش بيت حتى اصير انه وزنوبه جارات
ـ ان شالله بس حلالي ماوصيج هالكلام ماريده يطلع لحد ماتضبط الامور وانه بكل الاحوال ماعزل اقل شي شهر حتي لايكولون علموود رجع مرته  وعزل بوجهه وهم رايد اوصيج بشغله
ـ تؤمر حبيبي كوول
ـ مايامر عليج ضالم ..رايد منج تگضين لسانج وماضلين سليطه لسان نفس گبل هاي اكثر صفه تنرفزني بيج فاذا جنتي رايده علاقتنه تطوول وتمشي بلامشاكل لازم تسيطيرين ع روحج ولاضلين تكاونين برايح والجاي خليج قوويه واخذي حگج من اكبر  عين بس بنفس الوكت باسلوب فهمتيني
ـ هاي هيه حاضر
ـ يي عفيه هيج اريدج ومااوصيج بس هالفتره اجاهلي شكد ماتكدرين لان احنه ايامنه معدوده بذاك البيت فمااربد اطلع بمشكله خووش
هزيت براسي وكملت البيدي فرحانه ممصدكه راح اخلص من ذاك البيت الكئيب