🍂رفقا يا قدر 🍂( طور التنزيل)

part5

بسمة ناعمة
البارت 5: كانت متكية فبلااصتها سااهية كااتفكر... ماقدرااتش تقرر بمرة خاايفة تقبل بهااد الزواج وتندم حيت تخلات على قرايتها وزرباات... وخاايفة ترفضو وتفرط فيه وتمشي لاا قراية لاا زواج وهي عاارفة بللي اي وحدة خطبها فداك الحي غااتقبل بيه من غداا... تنهدات كاتشوف فالتيلي.. مللي عيطلها طلبات منو يزيد يعطيها الوقت حتى لغدا وتجااوب... ابتااسمات مللي شافت ميسااج طلع فالواتسااب.. شي حد من صحاابو مصيفطليه.. أصلا كايصيفطوليه غير الدراري صحاابو.. ماعندوش حس لبنت فالتيلي من غير مو وخواتاتو... تنهداات حشماانة من رااسها.. هو رااجل ووفي ليها... ولوكان مااكانش صافي معاها مايعطيهاش التيلي ديالو ويقولها شديه شحال مابغيتي.. عطاهلها بالواتساب والفايس بسميتو... ماحايد حتى حااجة.. حيت هو بصح كايبغييها وماكايدير حتى حااجة من وراها...
طلعات راسها كاتشوف فالسقف لمظلم.. واش إلى تخلات على خالد وعلى زواجها بيه غااتكمل قراايتها... غايوقف معاها باها ويطلق لفلووس.. غايكريلها فين تسكن ويصيفطلها المصرووف.. وهو حتى لاكاارط دالطوبيس ماكايديرهالهاش...؟؟!! وهااهي قرات وكملاات وااخا هااد الشي من ساابع المستحيلاات.. غاتخدم...؟؟ بالإجاازة شنو غاايطلعلها؟؟ تفكراات ولااد حومتها للي واخدين إجازتهوم من إمتا ومااخدمووش... حيت ماعندهوومش لفلووس للي يوقفو معاهوم.. زعما هي حسن منهووم؟؟ لا هي كفس منهوم... حيت هما كايبقااو رجال ويجيبوها من فم السبع... وكايصورو طرف دالخبز... ولكن هي غير ولية لاحول لها ولا قوة... الخ
حل ديالهاا هو تزوج بشي رااجل يسترها ويكون بيها... وهااد الراجل هو خاالد... اصلا بااقي مااتقدم شي حد لخطبتها من غيرو.. او واخا يخطبها شي حد ماغايكونش بحاال حبييبها... عقدات حجباانها مللي تفكراات غاتسكن مع عائلتو... ماعارفاش كيف دايرين ولا كيفاش غاتعيش معاهوم؟؟ دغيا طلقات الغوباشة مللي تفكرات ماماه... مسرارة بحال ولدها وحتى ماماها كاتعاود عليهوم ناس مزياانين... وزايدون خالد فجنبها وكيف داابا حتى تما ماغايخللي حد يآذيهاا... ضورات راسها كاتشوف فختها ناعسة حداها تفكرات مللي عاودااتلها قباايلة.. نصحااتها باش تقبل.. وأكداتلها بللي إلى لقات شي حد بحال خاالد تزوج اليوم قبل من غداا... واخا باقة صغيرة باغة تزوج وتهرب من تقمشيش باباها...
طلعات عليها لغطا وغمضاات عينيها مستسلمة للنعاس.....
أما هو باات فاايق كاايقلب فالتيلي العادي للي عندو.. واخا قالتليه بلي ماغاتجااوبو حتى لغدا ماقدرش ينعس... صافطلها روشاارج عادية باش تقدر تجااوبو على ميسااج فالتيلي... حيت ماعندوش الواتساب فهذاا... كايقول ربما تلقا جواابها داابا وتجااوبني... هنظة بالنسبة ليه هي البنت للي تمنى.. درويشة وخاطيها الصداع رزينة وظريفة وااخا زهواانية وعينها زاايغة هو للي يعرفها مزياان وعاارف كيف داايرة هي.. ومتأكد بللي الزواج غايثقلهاا... المهم هو أنو متأكد منها بنت صباارة وعقلها كبيير... وللي عاشتو فدار بااها علمها الحيااة كيف داايرة... وبكثرة ماباغيها دوا مع واليديه قبل حتى ماتجااوبو.. كانو مبرزطينو على الزواج وهاهو لقاا البنت للي بغاا... عشرة سينين طويلة وغاتنتااهي بالحلاال.. ابتااسم كاايفكر فيها نااعسة حدااه فداك البيت... غرفة نوم عاادية زوينة ورااقية.. مقادها بفلووسو وعلى ذوقو وذوقها حيت مللي كان يصبغها ويأثثها كان ياخد رأيها وبأبيل فيديو تقريبا هي ختارت كلشي... المااريو والكوافوزات وحتى لخشب دالناموسية مصبوغين بالكرونة... ولبلاازما كبيرة لاصقة فالحيط مقاابلة معااه... وطابية كرونة مفرشة تحت الناموسية وعابرة البيت كاامل...
فالصبااح بكري السبعة ونص دالصبااح... كانت خارجة من دارهوم مقادة حاالتها وغادية لليسي... غير سدات الباب وتمشات بخطواات محسوببين وقف عليها... خرجات عينيها كاتشوف فيه مخلوعة: اويلي ماالك على الصبااح؟؟
جااوبها بابتساامة: قولي بعدا صبااح الخير..
هندة: صبااح الخير... ماالك مبكر ياك لبااس؟؟
خاالد: عندي شي خدمة... واحد الداار خااصني نقادلها سطالاسيون ديال الضوو... وفقت بكري بااش ماانطولش فيها... ( حك فوق عينيه) أصلا ماانعستش... الليل كاامل وانا فاايق...
هندة مصغرة عينيها: وعلاش مانعستش؟؟ ياك ما مريض؟؟
خاالد بهمس: آه مريض بييك... (سكت شوية كاايشوف فيها مبتااسمة وكمل): ماعطيتينيش جواب نهائي وخلليتيني الليل كامل كانستنا..
نقزات مقااطعاه: ياك انا قلتليك حتى لغدا ونجااوبك... ماقلتش ليك ستنااني..
تكا على حيط الدريبة للي واقفين فيها: ماقدرتش ننعس واخا علمتيني... أحمم.. (شاف فالساعة) هاا غدا وصل يالله فرحيني خلااص خلليني نمشي لخدمتي نااشط
ابتااسمات: رااه باقي السبعة مزاال ماطلع النهاار..
حرك راسو رافض: لااا... رااه مانتحرك منها ومانخلليك تمشي حتى تقوليلي...
عضات على شناافتها منزلة راسها للأرض: فكرت مزياان... أوو... واافقت...
غوت حااط يدو على وجهو كاايضحك فرحاان وهي خرجات عينيها ونقزاات سداتليه فموو: أويلي النااس نااعسة...
على غفلة منها شدها من وجهها بيديه بجووج وبااسها بالجهد فحنكها حتى فلعصها... رجعاات اللور شادة فحنكها مصدوومة: أويلي جعرتي...
جاوبها ضااحك: كانقسملك باالله إلى حااس براسي غانطير بالفرحة... هذا راه أحسن صبااح عندي...
يالله غايشدها يبوسها عااود هرباات مبعدة عليه: شوف مادير والو وبلا ماتفرح بززاف غادي عاد ندوي مع ماما تقولها لبابا ونجااوبك...
خاالد بلا مبالاة: مللي وافقتي نتي هما غايواافقو... مااشي مشكل حتى إلى ماوافقووش نطلبهوم نزااوكهوم... ويلا ماابغاوش (سكت وهي نطقاات): ويلا مابغاوش شنو؟؟
ضحك: غاانخطفك... ههههه... والله مانخلليك... انا كان همي هو نتي توافقي داابا صاافي...
كان وااقف فراس الدرب حاط رجلو على الحيط كاايتكيف قاالب الشابو وعااقد غوباشتو... وااخا شمكاار وصعييب زوين ومسراار ماضاربش لحمو.. وماكايخسرش الهدرة.. بليتو هي الكيف ومآذي بيها غير رااسو... وحلمو هو يمشي الخااريج وهاد الشي للي ممرضو فحيااتو... كان مركز عينو على واحد الزنقة غير شافها خرجات من تما تحرك بالزربة تاابعها... فرمشة عين كان قدامها خلعها.. حطات يدها على قلبها قاافزة: منين خرجتيليا عااود؟؟ شي نهاار تقتلني...
حط يدو فجيبو كاايتمشى معاها: ماشي اول مرة نديرهالك.. باقي ماولفتيش ولا شنو؟؟
نسرين: ماولفتش... كاتفيق بكري بززاف... ماعرفتش علااش؟؟ انا لوكان ماهاد لقراية والله مانفيق...
عبدو: ولفت لفيااق بكري... (ابتااسم): الراس عمر بالمشاكيل وانا صغير.. دخلني الهم والتخماام... كانفيق قافز على النبوري.. كانقول مشا عليا الحاال للخدمة... حتى كانوقف وكانتفكر بللي ماعندي خدمة وكاانرجع نتكا.. كانلقا النغاس طاار وندير بنااقص.. نفيق نشري كارو ونستنا حبيبتي نصبح عليها..
شاافت فيه: لوكان نقصتي منو يكون حسن...
شاف فيها ورجع شااف قدامو: مللي نقطع لبحر غانقطعو كااع ماشي غير ننقص منو..
تنهدات كاتجاهل هاد الموضوع وهو شاف فيها مغمض عين بسبااب اشعة الشمس للي يالله شرقاات: بحال ديما ملي كاندوي فهاد الموضوع ماكاتبغيش تجاوبي...
جاوباتو وهي كاتمشى وتشوف قدامها: ماعندي باش نجاوبك... هاد الموضوع بالضبط ماعندي باش نفيدك فيه...
حرك راسو فاهم كلاامها وجبد شي صرف من جيبو: خودي شدي طاكسي الطوبيس غايكون مشاا...
شافت فيه: عندي بااش نمشي...
شدلها يدها بزز وحط فيها الصرف: مللي نقولليك خودي خودي.. انا راه ماشي ديما سخي (ابتااسم) تعلمي تستاغلي الفرص...
ابتااسمات مرجعاها ليه: عبدو... انا عارفاك محتااج وماخداامش حاليا... وعارفاك نتا ديما سخي.. ويلا سهل عليك الله وخدمت شي خدمة زوينة غااتهلاا فيا.. نتا ماشي قمشاش نتا ماعندكش وصاافي... (غوبشاات): مللي نشوفك خداام غانشد من عندك لفلووس... دابا إلى شديتهوم غانتسمى أناانية...
حطاتهوم فيده وسدااتها عليهوم وتحركاات قاطعة الطريق للجهة الأخرى خلاتو واقف كاايشوف فيها وعينيه حمرين... هاد لمخلووقة كاتستااهل الخير وكاتستااهل تعيش الرفااهية... ابتااسم بحب: كاايبغيها ويحمااق عليها ومايقدرش يتخاايلها مع وااحد آخوور
رجعات للدار بالعشية وهي معولة تدوي مع ماماها... من بعد مشاورات مع صاحبتها وختها وخاى مع رااسها.. خرجات بآخر إستنتااج وهو الزواج بخاالد.. من بعد ماتوضات وصلاات وكلات شي حااجة... قدرات تنفاارد بالأم ديالها ومعااهوم ختها فبيت بووحدهووم... اصلا ماغاتلقااش معاها مشكل حييت ديجا معاودالها على خالد وبللي كااتدوي معااه...  جلسو بثلااتة بيهوم قراب من بعضهوم ونطقات بهمس خاايفة يدخل عبدو على غفلة ويسمع شي حااجة: ماما... عرفتي خاالد..؟؟
سكتاات كاتسناا جوابها..
حفيظة: آه مالو...؟؟
هندة: أحم.. بصراحة رااه باغي يجي للدار..
صغرات عينيها ونطقات بتساءل: يجي للدار؟؟ شهقاات مللي فهماات وشاافت فيها: وااش زعما يجي يخطب...؟؟
هندة بابتساامة: آه امااما غايجي يخطب وشنو غايجي يدير مثلا؟؟
حفيظة: ولااهيلا... هههه.. واش قالهاليك هو؟؟
هندة حطات يدها على راسها: الله يهديك أمااما وانا منين جبت هاد لهدرة إلى ماقالهاليش هو؟؟
حفيظة بتعجب: صدق رااجل هااد خاالد والله.. (شافت فيها): واخا قلتيليا كاندويو فالتيلي كااع مانويتو يفكر فالزواج..
هندة بغوباشة: علااه مالي مانستااهلش..؟؟
حفيظة: ماقلتش هااكا... ولكن قلاال الرجاال للي غير يدويو مع شي بنت يقصدو لحلال... (سكتاات شوية ورجعاات نطقات): وشنو قلتيليه؟؟
حناات راسها: بصراحة وافقت ولكن راه قلتليه حتى نتشاور معاكوم..
تنهدات متأسفة وماعاجبهاش الحاال: سااكن مع دارهوم ياك أبنتي؟؟ غاتكونو دويتو فللموضوع... فين غايسكنك؟؟
هندة: مع دارهوم أمااما... خدمتو ماتسمحش ليه يسكن بوحدو... (ابتااسمات بحماس): ولكن رااه كايدفع الكونكوراات للشركاات حيت عندو ديبلووم قدييم ضرووري يقبلووه فشي حااجة..
حركاات رااسها: أممم... مافيها بااس.. كايباانو ناس مزياانين والله يعمرها دار... (طلعات راسها): ولكن انا كنت بغيتك تقرااي وتوصلي... كنت بغيتك أبنتي تخدمي وتعيشي شوية الحياة...
هندة بحزن: حتى انا كنت بغيت نقراا ونخدم ونعيش ونساافر ونعيشكوم معايا حتى نتوما... ولكن الله غالب... السبرديلة هي اللخرة كانقرا بيها مثقبة... حتى سرواال صحيح ماعندي... ولقرااية راه خاصها فلووس ومصاريف.. وأنا ماعنديش للي يوقف معاايا...
سكتات حفيظة مالاقية باش تجاوب بنتها كلشي عندها فيه الحق.. حتى كملاات هندة كلاامها بضحكة،: ولكن ماتخاافيش... خالد مللي غايخدم فشي بلااصة مزياانة غايعوضني على هااد الشي كاامل...
ابتااسماا حفيظة شادة فيدها: يكوون خير ابنتي... راك عارفة انا مالقيت ليك قدر.. من نهار تخلاقيتو وانا كانغوت ونخااصم بااش نجيبلكوم حقكوم... حتى من حوايج العيد إلى مااغوتش ومااوصلنااش للطلاق ماكانش كايشريهوملكوم...
هندة حطات يدها الثانية على يد ماماها: أنا عارفة للي كاين وشايفة كلشي بعينياا... (ضحكات مرة أخرى باغة تبدل الموضوع): دابا خاصنا كيفااش نقولوهاليه..
نطقاات ختها وهي باقة خاشية راسها فالتيلي: يقولو شفتها نهار جيت نقادليك داك الفيز..
حفيظة باستفهاام: أشمن نهار؟؟
إلهام بلا مبالاة كاتشوف فالتيلي وتمضغ المسكة وتلعب بيدها لوخرى فشعرها،: نهار للي خلاها بابا بوحدها هي ويااه... كنا يالله سكنا هنا داك السيد كاع مانعرفوه.. وخلاه معاها بااش يمشي للقهوة يقمر مع راساتو..
حفيظة بالزعااف: سكتي يسكت حسك راه باك هذاك...
قلباات إلهام عينيها ورجعات شافت فالتيلي: بابا غير بالسمية...
يالله جات حفيظة تجاوبها حتى قاطعتها هندة: صافي خلليها عليك... المهم الحل للي عطاتنا مزياان.... غانقولو يقولليه غير شافني داك النهار..  وخلا حتى دازت هاد السينين حيت كان عاد كاايجمع راسو...ونتي اما قوليليه راه كنت خارجة انا وياها وجا قالهالي..
حفيظة: ويلا قاليه أنا مااقلتليها والو؟؟
إلهام من بعيد: هي غاتوصيه أما الله يهديك...
..... 
دواات حفيظة مع راجلها للي ماكان عندو حتى إعتراض واتاافقو على نفس الكذبة يقولوها... وهو فرحان كثر من خاالد بأول نسييب ليه وحيت غايتهنا من مصاريف لقراية ديال هندة...
أما عبدو غير جاالس كاايشوف بصمت وحتى حد ماعارف فااش كاايفكر... وماعطاش نهائيا راي ديالو فهاد الشي...
....
خالد علم عائلتو للي كانو يستناو غير نهار ولدهوم يتوكل على الله... حيت ديجا دوا معاهوم فالموضوع... وجدو داك الشي للي غايحتااجو وللي غاياخدو معاهوم...  من بعد ماقررو نهار الخطبة...
نهاار دالخطبة اول مرة غايجيو دارهوم يشوفوها ويدويو مع واليديها... كانت لابسة قميص جوهرة خدوودها حمرين دايرة مااكيااج خفييف جاات زوينة ومسرارة حيت مامولفااش بالمااكيااج بززاف على عكس ختها للي كاتحماق عليه وكاديرو واخا باقة صغييرة... كانت مقادة فولارها ولابسة بلغة فرجليها... جالسة فوق الكرسي حدا ماماها فالكوزينة.. هازة التيلي كاتقرا فميساجات خاالد وعااضة على شناافتها مبتااسمة...
خاالد: فرحان فرحاان بززاف غادي نطير بالفرحة.. والله مامتيق بللي غادي تولي حلاالي...
تنهداات بصوت مرتاافع الشي للي خلا مها ضور تشوف فيها بنص عين: أممم يعلم الله آش كااتقراي فداك التيلي..
طلعات راسها شافت فيها مبتااسمة ورجعاات شافت فالتيلي مجاوباه على الميسااج: حتى انا فرحاانة وخاايفة... إمتا تجيو؟؟
خاالد: تخاافي وحبك غايجي لدااركوم على قبل لحلاال...
قرات هاد الميسااج وصاافط واحد آخور: هاا حنا خارجين...
طلقات التيلي من يدها ونااضت من بلااصتها مستريسية دياال بصح: مٌا رااهوم جاايين...
ضارت لعندها حفيظة مرة أخرى: وااش خرجو من الداار؟؟
هندة: آه.. آه خرجو... رااه دابا قربو يوصلوو... (ضارت كاتشوف فالباب): بٌا باقي ماجااش...
قربات لعندها كاتشوف فداك الشي للي محطووط.. لقاتها مقادة لمسمن والبغرير والحرشة وآتاي والكعك... إبتاسمات وعنقتها جنب باستها فحنكها: يخلليلي الحناانة... غاتحمرلي وجهي حدا نااسي..
طلعات حفيظة كتاافها مغوبشة وعي باقة خداامة كااتقاد داك الشي فالطباسل: أمم.. دغيا رجعتيهوم نااسك يااك؟؟ (شافت فيها مطلعة حجباانها): بحااليلا كاتسنااي غير فوقاش تهناي منا... غاطيري بالفرحة...
حنات هندة رااسها طالقة منها: الله يهديك اميمتي.. وااش فنظرك انا نسخاا بيكووم؟؟ راه الوقت والزماان للي داروها بياا...
ابتااسمات حفيظة ونغزااتها بااغة تضحكها وماتخلليهاش مقلقة فنهارها: أمم.. زعما غير الزماان... ماكاتبغيش هااد عريس الغفلة؟؟
ابتااسماات ماقادراش تشوف فيها وحفيظة كاتضحك حتى دخل باها محمل بالساشياات حطهوم فوق الطبلة كايشوف فبنتو: ماعرفتش واش جاايين ولا مزال؟؟
بقات كاتقلب التيلي فيدها ماعارفاش باش تجاوب حشمات تقولو جايين ويقولها باش عرفتيها حتى نطقات مها: راه عيطاتلها ختو.. قالتلها خرجو من الدار راه يكونو قربو يوصلو..
ابتااسم وضرب بيدو على كتفها: مزياان... نتمنااو يدوز كلشي بيخيير الله يرضي عليك أبنتي.. (حرك صبعو جهة الساشياات) حنا الحلوى والكروااصة وشي تخربيق قادوهوم فالطبااسل... وداك الشي يكوون متول أحفييظة الله يرضي عليك.. (شاف فبنتو): غادي نمشي نلبس جلاابتي لوخرى... مزيانة يااك؟؟
حركات رااسها: مزياانة أباا غير لبسها...
خرج وخلاها واقفة كاتشوف فيه.. كايباان عليه فرحاان بززاف.. واش هاد الفرحة حيت غايتهنا منها ولا فرحان حيت بنتو غادير دارها وتزوج...؟؟ ولكن هو كاع ماسول على هاد الناس كيف داايرين؟؟ يمكن كايعرفهوم حيت هما قراب لبعضيااتهوم.. وسامع بللي ناس مزياانين...
فيقها صوت مها وهي كااتحط الحلوى فالطبااسل: واشوفلك لحماادي جاب الحلوى الغالية غير ديال اللوز والكركااع...
تحركات جهة الساشيات كاتقلب لقات الحلوى بالأشكاال والكرواصة الفرماج والزبدة والعسل... تنهداات كاتحمد الله ماغاتحشمش حدا خالد وعائلتوو... اصلا ماكانتش خاايفة من هاد القضية بااها من ناحية السريط ماتخممش.. وحتى الصالون فاش غايجلسو مفرش بالسداادر ومها للي فرشااتو بالتزقريم والجميع قدرات تفرشو فراش زوين ومتييول...

رأيكم  توقعاتكم كترو من الجيم