المراهَقة المتأخّرة [مكتملة]

Part 1:

✌︎ المراهَّقة المتأخرة ✌︎
           ★ ℬ𝓎 : 𝒰𝓂𝒶𝓃ℯ ℳ𝒶𝓇𝒾𝓅ℴ𝓈𝒶  ★
𝑃𝑎𝑟𝑡 : 1

فواحد البيت متوسط الحجم كانت ناعسة واحد البنت وهيا مكمشة فبعضها فوق واحد ناموسية صغيرة…

دخلات عليها واحد المرأة لي كتبان باقا شادة فراسها رغم تجاعيد لي فوجهها… مشات كتحل فالخامية وهيا كتنكر…

زهرة : وا ديك صكعة يا نتي نوضي راه غادي يفوت عليك الحال (مشات لحداها وبدا كتنغز فيها باش تفيق) فاطمة وا تي نوضي
فاطمة الزهراء عرات على راسها وهيا مخيبة ملامحها : وا مي راه قلت ليك شحال من مرة بلي راه سميتي فاطمة الزهراء ماشي فاطمة ولا فطوش

نزلت عليها بقرصة من الفخض حتا ناضت قافزة وهيا كتحك فجنبها لي كيحرقها… خنزرت فيها وهيا حاطة يدها على نصها

زهرة : ومحشمتيش يا الكلبة كتناكري معايا ، على شكون لي سماك يا بنت الكلبة؟!

فاطمة الزهراء : نتي نتي أمي غا متبقايش تقرصي را هادوك موحال يكونو صباع وا اناري قرصتك مسمومة

يلاه تكات باش تحيد السندالة تاعها لي غادة تشير عليها بيها حتا لقاتها طارت من حداها هربانة للحمام

زهرة رجعات لبسات سندالتها في رجليها او هيا كتنكر : يا حتا تخرجي والله لبقات في لحمار بوك لاهيلا ولا قد لقب قد السطل

خرجات زهرة من البيت ومشات باش توجد ليها لفطور... اما عند فاطمة الزهراء لي دخلات لحمام غسلات وجهها ، او خدات الشيتة تاع السنان كتحك في سنانها او هيا تشوف في المراية

كانت بنت ذات عيون كبار مشفرين او بشرة بيضاء او شعرها لي شاد الرزوات كان باللون البني

سالات او خدات المشطة مشطات ديك الشعكاكة عندها او خرجات مشات لبيتها جمعات فراشها ، عاد توجهات عند جداها باش تفطر

دخلات لكوزينة لقاتها واقفة عاطياها بالظهر او دايرة لعكفة على راسها او سايرة تقلب في واحد المسمنية

تمشات على صباع رجليها باش متحسش بيها غير وصلات حداها او تلاحت عليها معنقاها... غير حسات بيها وهيا دور عندها مبادلاها العناق وكارزة عليها

فاطمة الزهراء كتحاول تفك منها : وا مي تي طلقي مني براكة راك خنقتيني بريحة الزيت... ياكما تخيلت ليك با سيدي راني فاطمة والله

زهرة كتبعد فيها منها : يخ يخ شو كي خضرة معندش بوك مع لحووب
فاطمة الزهراء : تي قولي ستحليتيها اشمن حب (صغرت عينيها فيها) ناقصك الحنان أزهيرو

زهرة تنهدت او شافت بعيد او بدات داوية او كتعبر : ايه ياماتي مع الحاج... كنت نحبو او كان يحبني مكانش الدوز ليه الماكلة بلا بيا كان يموت عليا (هزت عينيها فيها وهيا كتهضر بيديهل) گاع الدريات كانو يغيرو مني حيت ديتو ليهم را كان زيني فتان او باقي الآن هانتي (بدات كدور في بلاصتها) شوفي لاطاي حوتة او الطولة او تجريدة غير عارضة أزياء او صافي