المراهَقة المتأخّرة [مكتملة]

Part 32:

•بعد مرور أسبوع...

واقفة فاطمة الزهراء او كمال حدا الطموبيل لي كراها باش يمشيو عند العدول، كيتسناو في لالة الزهرة

فاطمة الزهراء ساطت: أوف هاد مي تعطلات غنمشي نخرجها خلاص

يله تمات قاصدة الباب بانت ليها زهرة حلاتو او جايا خارجة  لابسة جلابة في الغوز او ماشطة شعرها المشعكك او مخلياه مطلوق او حاطة فوقو فولار في البيض او لابسة طالون بيض من طالونات فاطمة الزهراء او لي جاها مزير، اما وجهها دايرة فيه ألوان قوس قزح

يله جات تخطي خطوة برا دار تلوات ليها رجلها كانت غتجي على وجهها كونما فاطمة الزهراء شداتها بالزربة

فاطمة الزهراء : امي تي مالك على هاد الحالة درتي الشوهة شوفي بنادم كي كيطل او يضحك

غير سمعاتها شنو قالت توگدات او هزات عينيها في شراجم الجيران لقاتهم گاع كيطالو سكتات جزء من الثانية او هي الطلق حلوقها

زهرة كتهضر بالجهد باش تسمعهم : فاطمة الزهرااء بنتي حنا فين غادين ابنتي؟ ياك حنا غادين نتزوجوو (هزات عينيها في واحد جارتها كطل عليها)  وا هانتي أالغالية انا غنتزوج او بنتك بقات بايرة (دارت شافت في فاطمة الزهراء) زيدي يله خلاص غنكون تعطلت على سيدي براهيم

توجهو لطوموبيل لقاو كمال ديجا راكب او حاضيهم او يضحك ركبات زهرة حدا كمال لقدام او فاطمة الزهراء رجعات لور و كلسات... وصلو عند العدول لقاو ديجا براهيم تم جا شد في زهرة او دخلو او تبعوهم حتا هوما...

خارجين من عند العدول كل واحد شاد في يد مرتو فاطمة الزهراء او كمال مشاو الطوموبيل او كلسو او بقاو حاضين عصافير لحب شنو كيديرو، كان براهيم شاد لزهرة في يدها او داوي او هي كضحك بحال شي مراهقة

كمال ضحك من منظرهم او دار شاف فيها او هضر: هاد الحالة مدرناهاش تا حنا (شد ليها يدها) اجي نعاندوهم شوية (ضحك ضحكة لي ذوباتها) كنبغيك أفاطمة الزهراء انا فرحان حيت أخيرا تحقق حلمنا او خلاتنا زهرة نتزوجو

فاطمة الزهراء عينيها دمعو: تانا كنبغيك الخضار تاعي

يله قرب باش يبوس ليها راسها او هي تحل زهرة الباب بالجهد

زهرة كتجر في فاطمة الزهراء باش تهبط تكلس اللور : ا حصلتكم شنو كنتو باغين الديرو الحرايمية اممم ادويو غبت عليكم دقيقة كنتو غتولدو لولاد هنا ايوا الله ينعل لي ميحشم

كمال ضحك على هضرتها او ديمارا عاد هضر:  وا نتي حلال عليك او حنا حرام علينا
زهرة خرجات فيه عينيها: وا شتي على هاد الهضرة والله لا بقيتي شفتي كمارتها حتا نهار ديرو العرس

كمال: شنااهو؟
زهرة كتقلي ليه السم بعينيها: كيفما سمعتي (هزات عينيها في المراية شافت في فاطمة الزهراء او هضرات) الخضار تاعها...

كملو نگيرهم كيف العادة او خبيرتي انا مشاد مع الواد الواد او بقيت  مع فراشاتي الفنات❤❤️‍🔥

أو هكا غنكون ساليت قصتنا القصيرة كنتمنى تكون نالت إعجابكم أو فوجات عليكم ❤🫶
خليو ليا رأيكم كيف جاتكم ❤
أو تسناوني بقصة جديدة مغايرة عليها في القريب ان شاء الله ❤🫶