المراهَقة المتأخّرة [مكتملة]

Part 31:

✌︎ المراهَّقة المتأخرة ✌︎
           ★ ℬ𝓎 : 𝒰𝓂𝒶𝓃ℯ ℳ𝒶𝓇𝒾𝓅ℴ𝓈𝒶  ★
𝑃𝑎𝑟𝑡 : 31

غير قالها تمات داخلة زهرة لي كانت واقفة غير عند لباب كتصنت عليهم او تسناهم يجبدو سيرتها باش دخل ،دخلات ضاحكة من لوذن تال لوذن فاطمة الزهراء غير هزات راسها او بانت ليها باقا دايرة ديك شلاضة في وجهها بغات تاكل جنابها بالفقصة عيات تغمز فيها او تحنحن باش تفهم راسها ساعة والو ،سلمات على كولشي من راس تال راس كولشي سلمات عليه بالحنك وصلات عند مامات كمال بقات تسلم عليها او تعاود

زهرة : ياخيتي يا فاطنة او شحال توحشتك (كتسلم او داوية ) كي دايرين لوليدات او مولا دارك (قاطعها كمال )
كمال : كولشي لاباس الحمد لله غير دوزي امي زهرة بركي حدا عريسك
زهرة هزات فيه راسها مخنزة : يعطيك لغمة قول ليا ختي زهرة قالاك مي

دارت شافت في سي براهيم او بدات كتلبد في عينيها حشمانة زعما توجهات كلسات حداه او مهزاتش فيه راسها

كمال نغز فاطمة الزهراء او دوا حدا وذنها او هو حابس الضحكة : عشنا او شفنا زهرة حشمانة غتوقع شي حاجة في دنيا

ضرباتو بمرفقها لكرشو باش يسكت : تا سكتنا خليها غير حادرة راسها حسن متهزو يبقاو يشوفو ديك الشوهة لي دارت في وجهها ناري تفقصت

بقاو شي يشوف فشي حتا هضرو صحاب براهيم او تافقو على كولشي او حددو موعد عقد ، قالو بلي غيديرو غير حفلة صغيرة بين لعائلة الساعة زهرة حلفات لا تفاكات قالت ليهم والو باغا الطلع في لعمارية او تفرح براسها شافو حتا عياو او بغاو يديرو ليها خاطرها

كولشي تفرتك او حتا كمال مشا بعدما تافق هو فاطمة الزهراء بلي حتا هوما غيديرو لعرس مع زهرة في نهار واحد واخا عيات تنكر عليهم متسوقوش ليها كولشي مشا غير هي او مها

فاطمة الزهراء كتهضر بحنية : مي فراسك واخا كتعصبيني او ديما فاقصاني كنبغيك بزاف او منقدرش نعيش بلا بيك!
زهرة حلات يدها : زيدي عنقي ميمتك زيدي انا شكون عندي من غيرك را غير عوينة وحدة لي نكساب هي نتي

تلاحت عليها معنقاها او بجوج ساكتين حتا بدا كيتسمع تنخصيص فاطمة الزهراء بقات كدوز  يدها على راسها بشوية او كتسنا فيها تسكت شافتها مبغاتش تسكت بعدتها عليها بشوية او بدات كتسمح ليها في عينيها

زهرة كتهضر او عينيها دامعين : وصافي اميمتي سكتي بناقص من هاد زواج كاع نبقاو غير مع بعضياتنا شنو بان ليك

غير سمعتها شنو قالت ناضت من حضنها بالزربة بحالا ماشي هي لي عاد كانت كتغبن

فاطمة الزهراء : شنااهو!! تي داك لعذاب لي ضربتو انا او بوركابي تاعي باش نلقاو ليك عريس نضربوه في الزيرو !لا لا اختي واخا نتي متبقايش باغا تزوجي غنزوجك بزز غير باش منحسش براسي تشمتت او ضربت تمارة على والو (باقا كتهضر حتا حسات بشربيل زهرة وسط عينيها)

زهرة : ايوا الله يقلل حياك ابنت ولدي هادشي لي غنقول ليك ولا قد لقب قد السطل مدي ليا شربيلي او زيدي غبري من قدامي

مدات ليها شربيلها ساخطة او توجهات لكوزينة الدير الثلج على الضربة حيت فلقاتها