المراهَقة المتأخّرة [مكتملة]

Part 17:

✌︎ المراهَّقة المتأخرة ✌︎
           ★ ℬ𝓎 : 𝒰𝓂𝒶𝓃ℯ ℳ𝒶𝓇𝒾𝓅ℴ𝓈𝒶  ★
𝑃𝑎𝑟𝑡 : 17
بقات غير كتشوف فيها او ترمش هزات عينيها في الساعة بانت ليها يله 6:45 ساطت صاخطة

فاطمة الزهراء كلسات : مالك امي شنو بغيتي عندي شحال من مرة قلت ليك شوفي الموري لكبير ماشي الصغير تي را يله 6 مالك ضربك حمار ليل سيري رجعي تنعسي او خليني نكمل نعاسي الله يستر عليك

بدات غير كدور في عينيها او مرضاتش دغيا لقات ليها جوابها دارت يديها على جنابها او نطقات

زهرة : شكون قالك انا فيقتك باش تمشي لمدرسة تگعدي عجني واحد الدلكة تاع المسمن باش نفطرو تي باردة لكتاف باغا تزوجي او نتي متعرفي ديري تا زفتة شنو باغا تولي معيور في لسان الجيران؟ نوضي انا غنمشي لكوزينة دبا نلقاك عندي

بقات غير مبلقة عينيها، شافتها خرجات تنهدات او نطقات

فاطمة الزهراء  بصوت خافت : اممم خممتي غير ليا انا لي غنولي معيورة عند الجيران مشفتيش نتي لي عاد نويتي الديري الضحك في راسك اودي الله يهديك او صافي

ناضت مشات لحمام غسلات وجهها او توجهات عندها لكوزينة لقاتها حاطة ليها لقصرية او دايرة فيها دقيق او كولشي، غسلات يدها او بركت في الأرض او بدات تعجن او زهرة شادة عصا لكراطة كل مرة تنغزها بيها باش تسربي خلاص

ما سالات ديك لعجينة حتا غفر ليها الله ذنوبها تبخات ليها راسها بالنكير، ناضت وقفات كتنفض في حوايجها لي كاع الطلاو عجينة

زهرة كطلع او تهبط فيها : كاع لي كيعجنو كيطليو حالتهم هكا اودي ابنيتي شنو غنقول ليك الله يعطيك غير لعز اما الدل راك غارقة فيه

غسلات يدها او تمات خارجة او داوية تحت منها

فاطمة الزهراء : ناري مصبحة على النگير باين النهار كيف غيدوز من الديبار

مشات لبيتها بدلات حوايجها لبسات سروال او قبية او مشطات شعرها عاد مشات تقلب على شكارتها هزات كتوبتها عاد رجعات كلسات فوق ناموسيتها او شادة تليفونها كتفرج في واحد لفيلم بينما وصل وقت لمدرسة
بقات كتفرج حتا ضربات 8:00 عاد ناضت لبسات سبرديلتها او خرجات من لبيت لقات زهرة طيبات لمسمن او وجدات اتاي كلسات حداها حتا كلات مزيان عاد ناضت سلمات عليها او خرجات من دار لقات مراد يله جاي عندها باش يمشيو بجوج

مراد كيضحك : واحد صباح الخير
فاطمة الزهراء سلمات عليه : صباح النور
مراد : اشنو جاك حتا فقتي بكري وقعات شي معجزة في الدنيا او لا كيفاش
فاطمة الزهراء بعصبية  : شوف غتزيد قدامي او سكتنا را طالعة ليا لقردة غتزيد شي كلمة غنخلطك هنا

ضرب الطم او تمو غادين في صمت حتا دخلو لمدرسة، لقاوها يله صونات دخلو او توجهو لقيسمهم