المراهَقة المتأخّرة [مكتملة]

Part 25:

✌︎ المراهَّقة المتأخرة ✌︎
           ★ ℬ𝓎 : 𝒰𝓂𝒶𝓃ℯ ℳ𝒶𝓇𝒾𝓅ℴ𝓈𝒶  ★
𝑃𝑎𝑟𝑡 : 25
مشا دخل عندو لقاه واقف كيشوف في واحد الصورة فيها زهرة او ولدها او فاطمة الزهراء لي كانت فيها مزال صغيرة بزاف دار عندو او سولو او عينو عليها

ابراهيم : شكون هادو في التصويرة اوليدي واش هادي هي زهرة(حط يدو على صورة فاطمة) باينة غتكون هي هادي فاش كانت صغيرة
كمال خطف ليها صورة او باينة فيه تعصب : عمي رجع كلس رجع او خلي عليك تصويرة في التيقار (كمل الهضرة في خاطرو) هاد الشارف حتا هو ما بان ليه يحط يدو غير على التويشية تاعي ناري

قاطع هضرتو فاطمة الزهراء لي كانت داخلة هازة طباسل تاع لحلوة او الفواكه الجافة حطات كولشي فوق الطابلة او خرجات عند زهرة لي كانت واقفة عند باب الصالون او باين عليها التوتر

فاطمة الزهراء : تي زيدي دخلي اويلي امي تي راك خبرة في هادشي مالك اول مرة تزوجي

قندشات يله غتبدا تهلل تفكرات عريس لغفلة لداخل تهندت او دوات تحت سنانها

زهرة : غير تسناي يمشي هاد الشارف لي جايبة ليا بحالو او ديك الساعة غنرد ليك صرف هادشي لي كديري غير صبري

بدات كضحك او تشجعات خدات نفس عميق عاد دخلات هازة خنافرها للسماء

هز راسو فيها بانت ليه مافيهاش مواصفات ديك لي كانو كيوصفو ليه او لي صيفطوه عندها بقا غير حاضيها حتا كلسات او حطات الصينية فوق الطابلة.. شاف فيها او نطق

ابراهيم : السلام عليكم
زهرة هزات فيه عينيها بخجل : وعليكم السلام سي
ابراهيم : ابراهيم سميتي ابراهيم
زهرة : كيف داير اسي براهيم

باركين بجوج حدا بعضياتهم جرو الصينية جيهتم كبو ليهم او بداو ياكلو او عينيهم عليهم

فاطمة الزهراء كتشوف في زهرة وز داوية : تا شو ليك زهرة لحنيكات توردو ناري ناري ميسحابش ليا مي كتحشم
كمال كيهضر او  فمو عامر : سكتي سكتي خلينا نتفرجو فيهم. شي شوية اجي بعدا هاد لحلوة عندكم بنينة
فاطمة الزهراء بافتخار : ورا صوبتها انا اشنو يسحاب ليك راني حادگة

بقاو حاضينهم او داوين حتا قاطعهم براهيم لي كان كيشوف في فاطمة الزهراء

ابراهيم بتساؤل : اجي نتي ابنيتي شنو كتجي زهرة فاش جيت لقيتك عندها او انا لي عارف معندها حد

كمال يله غيجابو سمع زهرة نطقات عض لسانو من لداخل بفقصة حيت فرشات كولشي

زهرة بإستغراب : اشمن احنيني معندي حد بحبابي تبارك الله او هادي راها بنت ولدي الله يرحمو فاطمة الزهراء
براهيم شاف في كمال : نت قلتي ليا معندها حد كيفاش بنت ولدها اذن هادي ماشي هي زهرة لي جيت على ودها
كمال بدا كيخرج او يدخل في لهضرة : انشرح ليك دبا هو ماشي ولدها غير كانت مربياه او مات او صافي بقات معاها بنتو فهمتي العميم اما هي را معندها حد (غمز زهرة فاش شافها غير كدور في عينيها ما فاهمة والو)
ابراهيم ناض وقف : لا لا هادي ماشي هي زهرة لي نعتو ليا سمحو ليا غنمشي بحالي
كمال وقف حتا هو :  يهديك الله را هادي هي زهرة تا مالنا غنكدبو عليك