في قبضة يديه

الحلقه 21

في قبضة يديه ١٨+

 
الحلقة الـ٢١

لاتنسون التصويت ومتابعة الحساب
وردة الشيخ محمد

غلام :- ليش احسك متعوب ؟ شو مادري بارد على جامد مادري هي ملامحك تسولف البيك
عاينت عليه وهزيت راسي دنجت ،
مَرات من گد السوالف المَضمومه بالروح
تطلع على مَظهرك
حتى لو تنسأل " شبيك ؟ " وتكول مابيه شي محد يصدكك ..
جريت حصوه من الگاع وذبيتها نگر :-
عون :- الملامح تنقري وينشاف بيها الضيم ..
مااحس الا صوفر وصاح :- اااااالله ااااخ اي والله چا تضرب شعر ومواويل خرب عمي ..
سحبت نفس ورفعت راسي ودنكت:- ياريت حياتنا بس شعر .. ياريت
غلام :- كلامك كله على بعضه شعر
عون :- ههههههه تجي بصياغ الكلام لاتبالغ  غلام ،
ادرس لجل روحك ترتاح مو لجل الصيت بين الوادم الصيت والمال والجيب الثكيل يروح مايبقى غير شهادتك واخلاقك ..
غلام :- ناجح ناجح لاتخاف عليَّ واخلاقي فول
عون :- شلون تحس بطعم النجاح وانته لا دارس ولا قاري ولا فاتح المادة وتعتمد على هذا وذاك ، خايب تدري انه لو ما الدراسة چان علگت رگبتي بالحبل اليجر الهوش! واسحب ࢪوحــي .. مايعرف قيمة الدراسه غير الفاگدها..
غلام :- ماحب الدراسه انه ماحبها وجاي هنا اداوم عشان  ولفي انعل ابو الدراسه لابو طاريها
عون :- احسك تسب عَرضي وعَلي ..
غلام :- هههههههههه هنيالك تعال خل اعگد هدومك بلكت تنفك چبستي واكعد ادرس واحبها
رفعت راسي للسمه
ونسمه الهوا الباردة لفحتني بنص حرارة الشمس
عون :- الي ببالي ايدي ينرسم عليها الدم .. دم انسان ..وقلب ينبض بين ايدي ... الي ببالي حلم وامنية مو صعب تتحقق ... الي ببالي شي كلش جبير ماتحس بقيمته بس من تعيشه .. الي ببالي شي عظيم ..
غلام :- ناوي تروح طبيه ؟ مالگيت غيرها ! حتى اي خطأ يروح بيها المريض ماتخاف تخلي حياة انسان بذمتك ؟ وجوه ايدك !!
باوعتله ..
عون :- مالگيت غير الطب يطلعني من الجحيم العايش بي ،  الطب هو رغبتي بـ انهُ اشرد من فوضى العالم والي يجي منه ..الطب ابداع وفن انساني مو مهنه وصيت..
سحبت نفس قوي بروده صارت بصدري والفرحة  احتلت گلبي وانه احجي عن حلمي :-شعور من اخلي حياة انسان جوه ايدي يزيدني عزيمه فـ لازم ادرس حتى انقذ حياته واكون وسيلة بنجاته وافرح اهله برجعته .. ببالي مشاريع مو مشروع الي ببالي شي جداً جبير ..ماعندي شي اسمه لا .. بقاموس حياتي ..
غلام :- تشوف روحك كدها ؟..
عون :- ماكو انسان مو كدها ،كل انسان يكدر ينجح ويواجه اتعس الظروف بحياته ، والنجاح مامقيد بالدراسه فقط !
غلام :- چــا بيمن هي الدراسه توصل الواحد للنجاح
عون :- الدراسه وسيله ووحده من طرق النجاح ومُكمله اله ..بينما النجاح مرات يكون بزرع بسمه ؏ الناس ونشر المحبه بيناتهم كل شي تحققه بنفسك هو انجاز تضيفه ب انجازات حياتك
اتقرب مني
غلام :- حلم امي تشوفني لابس لابكوت ابيض بس كله تكلي حلم وادري حلم لكن تمنيت .. الله مطيح حظي حتى امي تغلط علي ماتدري انه متحمل فساد وخيسة ابوي وقذارته علمودها ..
عون :- امك تستاهل تفرحها ، اذا ماتفرحها تفرح منو ؟ شوكت تفكر بعقلانية اكثر من الهمجية والتخلف العايش بي
غلام :- انته وينك عني من زمان ؟
عون :- انا موجود بس محد ملاحظ وجودي ، مرات احس نفسي حايط مخفي محد يندلني ، يمكن شخصيتي ماتوالم المجتمع المحيط بيه ، يمكن تفكيري اعمق من سطحياتهم ..
غلام :- شلون يعني ؟!
عون :- مادري ! .. يمكن جدي زيادة عن اللزوم .. لو تفكيري اكبر من تفاهتهم ؟ اكثر الاحيان اشوف اكثر الناس تافهين .. تصرفات اكثر الناس بنظري صارت لاتُطاق جهل وتخلف مغطى بغلاف الثقافه الظاهرية .. !
غلام :- مو جدي بس
عون :- اتفلسف .. محد يحب واحد يتفلسف
غلام :- لابالعكس اتمنى اصادق احد يعلمني شلون احجي وشلون ارتب كلامي
عون :- بزمننا الناس تلجأ للتافه وللي يخلي الانسان يفقد قيمته ترا حتى الشقه والضحك بالاوقات الغير مناسبه تخسرك قيمتك وتخليك انسان تافه وصغير ، ماتتخيل ضرورية الجدية بحياتنا وشخصيتنا
غلام :- بالعكس الضحك يخلي المقابل يحبك
عون :- كلشي اله وقته ، وكلشي اله ناسه ، مو كل واحد اشاقيه واضحك بوجهه .. ولا احد يستاهل انطي فرصة ان يستصغرني ويتعده حدوده وياي بس لان ضحكت بوجهه
غلام :- ماجاي افهمك
عون :- خلي الكل واحد مقامه من الضحك من الشقه من الاسرار من كل شي بحياتك حتى الي بكلبك كل واحد ومكانته وضروري تخلي بحياتك جدية حتى محد يتعده حدوده وياك نقطة راس سطر
غلام :- ليش ؟؟ خو امشي واشاقه واضحك ويه الكل