في قبضة يديه

الحلقه 27

في قبضة يديه ١٨+

 
الحلقه ٢٧

لاتنسون التصويت ومتابعة الحساب
وردة الشيخ محمد

افكر في كيفية البقاء معك وقتًا اطول أين اجد
مكانًا يحوينا ولا يضيع بعضنا من الاخر ؟.
طبت مرت اخوي عبير وهي تصرخ وتمشع بشعرها
وتاخذ بيدها بالكاع وتجر بحجابها
ركضنه عليهه نريد تفتهم شبيها
ماتحجي بس تصيح راح ..
طب وراها اخوي مدنج راسه
- خير احمد شصاير
احمد:- عمي انطاك عمره
- لا حول ولا قوة الا بالله
احمد:- امر الله بعد شنسوي ،
اجن نسوان اخوتي على هالصوت وصارن يبجن وينصارخن وياها
وملاذ واكفه بصفي متجتفه وتباوعلها طابكة حاوجبها
مديت ايدي على ايدها ولزمتها عصرتها الي حيل
وبقت مرت اخوي تصارخ شالنها البنات وطبن جوه للبيت
صاح احمد:- ضبي هدومج وجهالج وخل اخذج الهم يلا يابه
وهي لازالت تصرخ طبو للبيت وانه واكف بره
نص ساعه وطلعت عبير وبيدها جنطتها وجهالها تسحل بيهم وتبجي تشهك وتون انقهرت عليهه الوالد عزيز
- الله يصبرج خويه
باوعتلي ماحجت دنكت على مَلاذ شفتها تباوعلي مخنزرة فلتت ايدي حيل وخذت كتبها وجنطتها وطبت للبيت :- شبيها هاي
اخوي خذه جهاله ومرته وراح
ونسوان اخوتي رجعن للسبات كل وحده خذت جهالها وطبت الغرفتها ولا كأن صاير شي
رحت وراه مَلاذ شفتها كاعده بغرفة امي
تدرس
- شبيج
مَلاذ :- مابيه شي
- احجي اسمعج
مَلاذ :- عون الحوبه تبطي ماتخطي قسماً بذات الله لو تنزل دمعة من يتيم ومظلوم بسبب كسران كلبه الله يهجم كلب ظالمة هجم يمرده مرد
دنكت عليها بحالة ركوع ومسحت دمعتها النزلات عون :- شصاير عوينتي منو الزعلج
مَلاذ :- محد زعلني انا ماازعل انا انهضم وارفع راسي للسما بس اكول يارب ..
عون :- اذتج
مَلاذ :- الدمعه التنزل وراها الف حچايه احنه مانبجي عَبث ..
ماصارتلي اسبوع يمكم وانه الغريبه عليكم الي مامسيتها بحجايه تفوت وتمشي تهضمني بالحجي ها اليتيمه ها اكلج خاف انتي لقيطه اهلج وين
فتحت عيوني وضميت شفتي بحلكي متأذي ومصدوم :- هيج حجتلج
مَلاذ :- ماحب اسكت كلتلها وبوجهه الله يحرك كلبج ب اعز ناسج مثل ماحركتي گلـــبـي ب اعز ناسي
عون :- ليش دعيتي عليها مو تنرد الج ليش يابه ليش
مَلاذ :- ليششش؟؟ ليش همه عادي يأذونا بالحجي؟؟؟ ليش احنه مانكدر نأذيهم ؟؟؟ وادعي واتحسب ؏ كل واحد اذاني مدام عندي رب يسمعلي ادعي وبحركة گلـــبـي ادعي
عون :- بس ماترتاحين هيج يبا ، الدعوه ؏ الداعي ثلثها ليش تأذين نفسج
مَلاذ :- مااتحمل انا الي يأذيني مااسكتله وااذي ، الي يأذيني بالحجي ااذي بالحجي الي يأذيني بالفعل ااذي بنفس مااذاني ماكو احد احسن من احد
عون :- وتنزلين المستواهم ؟ يلوكلج ؟
مَلاذ :- اي انزل المستواهم اكسر راسهم واصعد المستواي بيها شي ؟
فركت ايدي اجيبها منا تجي منا ،
مَلاذ :- فـ اما اليتيم فلا تقهر ...
ووكفت ؏ حيلها :- عون اكو ناس مو مال تسكتلهم يتمادون ..بدعوه وحده بحركة كلب الله حرك كلبها مثل ماحركت گلـــبـي وهي تسميني اللقيطه
مَلاذ :- - ذنبهُ عظيم، مَن أطفأ شَغف إنسان ما في هذهِ الحياة وتركهُ يُصارع التساؤلات ويبحث عن عُيوب في نفسه تُفسّر سوء قَدره .
سكتتني بقيت واكف بحيرة
بين الاريد اغير نظرتها
وبين الاريدها تهدأ
عون :- مَلاذ
مَلاذ :- نعم
تقربت منها وتربعت كدام كتبها ، ولزمت كصيبتها :- لاتتشمتين ب احد مهما كانت مصيبته ومهما سوالج
مَلاذ :- اتشمت تدرين ليش؟
ضحكت وكملت :- ههه لان اكو ناس تأذي غيرها وتنسى الله يكدر يهلكها ؏ البطيء ، نست الله اقوه منها ومن شرها ، ف اضحك واتشمت اريد ابين الها عدالة رب العالمين ..
عون :- تفكيرج خطأ مَلاذ ، لان مثل ما الله اخذ حقج يكدر ياخذ حقهم من الشماته الي سويتيها الهم ، لان هالكاس الي نشربه للناس راح نشرب منه
مَلاذ :- كل واحد ونظريته كل واحد بتصرف بـ يلي يشوفه صحيح ومقتنع بي .. ممكن اكعد ادرس؟
بقيت متخصر الها تباوعلي عيونها ماترمش ، هزيت راسي وطلعت
بعدها جامدة
من نلتقي وننجمع جامدة وجهة يذبل ويتعب كأنما مظهرها الداخلي يطلع بس كدامي
ومن تكون يم امي الضحكة تارسه وجهه
لو الخطأ مني انُ انا جدي زيادة عن اللزوم ومااشاقيها نفس امي
لو هي تاخذ راحتها يمي اكثر ، بالمعنى الروح ترتاح للي تبجي يمه ..
بقيت كاعد ع الدرج
بعد جم يوم وتبلش المدرسه ، حياتي جداً مملة
روتينية مابيها طعم
بس شعور بداخلي يريد ابقى يمها
احساس دافي يمشي بشراييني من تكون موجودة
شوي وطب اخوي
بيده ولده اثنينهم :- ها شني
- والله وديت المرة ورديت هوسه ازدحام بيتهم