زينب : كعدت على صوت الباب طلعت فتحت الباب لكيت الضابط حسن
_ صباح الخير
_ رديت مستغربه ، صباح النور !
_ اضل واكف بالباب؟
_ ااا .... تفضل
دخل لغرفة الخطار واني دخلت وراه مستغربه شكو اجه اليوم اني كتله بعد يومين ياله نزوج
_ صاير شي ؟
_ لا ماكو شي سلامتج بس اليوم ردت اخذج اعرفج على اهلي ونروح نشتري كم شغله من السوك خاف محتاجه شي
_ شكرا مامحتاجه شي
_ عادي حتى لو مامحتاجه اشتري ملابس جديده راح تزوجين انتي
_ راح اتزوجك علمود الجهال والبيت
_ اي ادري بس يعني كدام اهلي اكيد منكللهم هيج
_ شوف اروح وياك اتعرف على اهلك وارجع
_ براحتج ....... حضري روحج نروح هسه
_ اروح ابدل واجي انتضرني
هز راسه بمعنى اي
رحت للغرفه بدلت ملابسي كلهن سود
لفيت الشال ولبست العبايه وطلعت
لكيته منتضرني بس شافني ابتسم وحجه
_ يله خلي نروح
طلعنا من البيت فتح الباب الامامي مال السياره
_ يله صعدي بالسياره
ركبت السياره وهوه هم الطريق كله يوصيني
_ لاتخلين اهلي يعرفون انتي راح تزوجيني علمود الجهال والبيت
هزيت راسي بمعنى اي
وصلنا للبيت نزلنا من السياره تلكونه الجهال بس شافوني اجوي يبوسون بيه كال حسن
_ ها ولكم لعد واني ؟
ابتسمت والجهال كاموا يضحكون دخلنا ليجوه طلعت مره جبيره بالعمر وياها نسوان ثنين متوسطات العمر وبنات ثنين شابات
اجني سلمن عليه جنهن يعرفني من زمان ولا حسسني اني غريبه اني ضليت بس اوزع ابتسامات حجت المره الجبيره
_ اني ام حسن وهذني جنايني هاي مرت الوسطاني اسمها صابرين وهاي مرت الصغير اسمها هبه
ابتسمت وحجيت
_ والبنات ؟
_ هاي الجبيره اسمها هاجر بنت صابرين والصغيره اسمها فاطمه بنت هبه
_ الله يحفضهن يخبلن فدوه
حسن : يله تعالي تعرفي على اخواني وولدهم
دخلنا لغرفة الخطار لكيت زلم ثنين وولد ثلاثه
بس شافونا كلهم كاموا سلموا عليه
حسن : هاذا اخويه الجبير ماجد وهاذا الصغير انور
وذوله الولد حسين و فهد ولد ماجد ومهند ابن انور
