أحفاد الجارحي ..ج5.. ترويض الشرس ..آية محمد رفعت

المشهد الختامي تمهيد لاشباح المخابرات

#المشهد_الختامي.
(الإهداء للقارئات الغاليات"مروة جمال"،"كاترين عبود"،"مريم كامل"،"هدى ابرهيم" ، شكرًا جزيلًا على دعمكم المتواصل لي، وبتمنى أكون دائمًا عند حسن ظنكم..بحبكم في الله...قراءة ممتعة 💙)

التصفيقات تعلو بقاعةٍ يزنها عددًا ضخمًا من رتبات الشرطة، الجميع يترقبون لحظة التكريم، ومن بين الصفوف كانت تجلس رجال عائلة "الجارحي" بأكملها لجوار بعضهم البعض، اشعل نداء اللواء بإسم "عدي الجارحي" الأجواء، وخاصة حينما صعد لأعلى المنصة لاستلام الدرع وشهادة التقدير، وقف قبالة الجميع عينيه مُعلقة على الوجوه تبحث عن غايتها، فترك المنصة وهبط يحمل جائزته حتى وصل للصف الخاضع لعائلته، فاختار الوقوف أمام أبيه، وقدم له ما يحمله، زوى ياسين حاجبه باستغرابٍ من تصرفه الغريب، ففجأه عدي مرة أخرى حينما انحنى يقبل يده وهو يخبره ببسمةٍ هادئة:
_الجايزة دي من حقك إنت، الفضل يرجع لحضرتك بعد ربنا سبحانه وتعالى للي وصلتله، اصرارك ليا بالرجوع هو السبيل اللي وصلني هنا، مساندتك ليا من البداية وفي كل خطوة أخدتها هي السبب، حمايتك ليا من بعيد وبدون ما أخد بالي ، حبك اللي كنت بتخبيه ورا قسوتك عشان أكون راجل يعتمد عليه، كل جوايز الدنيا قليلة لتكريمك يا بابا.
أدمعت عين ياسين تأثرًا به، فمد يده يجذبه للوقوف قبالته، ومن ثم دعاه لاحضانه، فشمله بين ذراعيه بحنان واحتواء جعل عدي يبكي كالصغير على كتفه وسط صفقات الجميع المتحمسة لما يحدث بين الأب وابنه، وبالأخص يحيى وعمر وباقي الشباب، كان الجميع متأثرًا بهما، ومن بين احتضانهما القوي لبعضهما البعض شعروا بيد تلف حول ساقهما، فلم يكن سوى حفيده يضمهما بسعادة كبيرة، انحنى عدي لابنه فخلع عنه قبعة الشرطة ليزين بها رأس الصغير الذي رفع يده يحيه تحية الشرطة فضمه عدي إليه وحمله بين ذراعه ليقف باستقامة جوار ياسين الجارحي، الذي مسد بإبهامه على خد الصغير مرددًا بحبٍ:
_هيجي اليوم اللي هكون فيه في نفس القاعة بس التكريم هيكون لحفيدي البطل.
ابتسم ياسين وردد بحماسٍ:
_اليوم ده مش بعيد يا باشا.
ضحك وضمه إليه، فتساءل الصغير بحماس:
_فين الجوكر والاسطورة.
مال عدي إليه يهمس له:
_المخابرات رتبتها مش مكشوفة لأي حد، في فرق بين الداخلية وبينهم.
وابتعد وهو يسأله بعد جملته المغرية لرغبته في سحبه لمجاله بعيدًا عن المخابرات لعملهم الشاق المخيف:
_ها لسه مصمم؟
أكد له بهزة من رأسه وهو يردد بخبث:
_أنا بحب أكون غامض ومش مكشوف لحد!
*******
اجتمع جميع أفراد العائلة خارج القاعة الضخمة، يباركون لعدي ويلتقطون الكثير من الصور بتلك الذكرى المبتهجة، فقال عمر بفرحةٍ:
_أنا فخور بيك.
ضمه عدي إليه بسعادة، وأخذ يتبادل المباركات من أحمد الذي ضمه مرددًا:
_مبروك يا وحش.
بينما أضاف ياسين:
_أول مرة نحضر الاجواء دي بس مختلفة ومميزة حقيقي.
ضحك رائد وهو يضيف:
_اتعود على وجودنا في كل تكريم.
أضاف جاسموبحماس:
_حقيقي حاجة تستدعي الفخر.
ضحك مازن وهو يضيف بمشاكسة:
_المرة الجاية تيجي وأكون أنا اللي هتكرم بعون الله..
شاكسه معتز:
_والله خايف زيارتنا تكون لنجدتك من الحبس يابو نسب.
صاح بغضب:
_متقولش أبو زفت.
جذب حازم الكاميرا وصاح بهم:
_اقفوا مظبوط بقى عايز أصوركم زهقتوني بجد.
بدأ الشباب في تنسيق وقفتهم انصياعًا لمطلب حازم فجأة تفاجئ الجميع بانضمام مراد ورحيم إليهم بعدما تم تكريمهما بشكل سري للغاية، فوقفوا جواره وكلا منهما يشدد على كتفه فضمهما إليه وجذبهما لصورة جماعية ضمتهم بها، فابتعد بهما عدي عن الأنظار وقال بحزن:
_ياسين مصمم يدخل المخابرات يا رحيم.
أجابه رحيم بجديةٍ تامة:
_هو عايزها بارادته فمش هتقدر تغير قراره يا عدي.
قال وعينيه هائمة بابنه الواقع على بعد ليس بكبير عنهما:
_خايف عليه، شغلكم مش سهل.
ابتسم مراد وردد قائلًا بنزقٍ:
_وإنت يعني اللي شغلك سهل!
وربت على كتفه وهو يتابع برزانة:
_ابنك هاوي لشيء بلاش تحرمه يحقق حلم كنت هتتحرم إنت منه في يوم من الأيام يا عدي.
_النهاردة بس أقدر أفكرك باللي عدى، يمكن حاليًا تستوعب خوفي عليك.
كلمات تلفظ بها ياسين الجارحي بعد اقترابه منهم، توغلت أعين عدي حزنًا، وهز رأسه ومازالت عينيه تراقب ابنه الذي يلهو برفقة ابناء أعمامه، قائلًا:
_فهمت، وفخور بيك جدًا.
ابتسم ياسين وردد بمكر:
_خلي ابنك يكون فخور بيك إنت كمان.
ووزع نظراته بين أصدقائه وهو يتابع بخبثٍ ماكر:
_وسيب الجوكر والاسطورة يبدأوا معاه، عشان يكونله قصة كفاح خاصة بيه ولقب يتنسب له، ومش أي لقب ده مهما كان حفيد ياسين الجارحي!
............. يتبع أشباح المخابرات........ #الأقوى_قادم... #ترقبوا........ #آية_محمد_رفعت..
#سلسلة_الجارحي_تمت_بحمد_الله...
لقائنا القادم مع رواية من أقوى الاعمال المقدمة لحضراتكم، وفي قرارات مهمة جدًا أخدتها وبتمنى تقروها معايا بتمعن..
١_الاقتباس اللي نزل وخاص بتدريب ياسين عدي الجارحي، واقتباس رحمة ويحيى تم نقله لرواية اشباح المخابرات(لإن تكملة المشاهد فيها حرق لاحداث مهمة جوه رواية اشباح المخابرات ❤)

٢_فيما يخص مشهد ولادة رحمة، والمشهد المطلوب الخاص بالمسابقة اللي تم انشاءها على البيدج (وبعد كتابة المشاهد محستش إنها هتضيف للرواية بشيء لإن في كومنتات لناس زعلانه بتطالب بمشاهد لولادة آسيل، فأنا كده مش هعرف أراضي حد نهائي، وهنرجع للمط في الاحداث وهخرج عن المحدد لروايتي القادمة).

٣_كان سهل عليا انزلكم المشهد البسيط ده تاني يوم من نزول الخاتمة الاخيرة لكني كنت مشتتة في حوار المشهد الختامي، لإني لو كنت حطيت المشاهد الخاصة بالولادات وغيره كنت هضيع التمهيد المهم لاشباح المخابرات، كمان أنا كنت مريضة جدًا وعيوني وارمة ومش قادرة اتابع معاكم الاحتفال الخاص بريفيوهات الانتهاء من السلسلة الجميلة دي ❤

٤_عملنا تصويت على الجروب لاني مش بعرف أخد قرار من غير الرجوع لحضراتكم وتم اختيار إن نبدأ نوڤيلا صرخات انثى الخاصة بعلي وفطيمة من رواية الجوكر والاسطورة(يسهل على أي حد قرائتها دون قراءة السلسلة لاني هبدأها من جديد كأنها نوفيلا جديدة) ، وده بناء على اختياركم لان رمضان داخل وطبيعي هنوقف الرواية في رمضان فكده هيكون مش لصالح عمل قوي زي #أشباح_المخابرات، وبناء على تصويتكم تم اختيار النوفيلا اننا ننزلها الشهر اللي قبل رمضان (ولقراء الواتباد اللي مقدروش يختاروا معانا في التصويت هحطلكم في التعليقات تعليق باسم اشباح المخابرات وتعليق بنوفيلا صرخات انثى وحطوا لايك على اللي حابين نبدأه الشهر ده مع العلم بإني بوقف كتابة في شهر رمضان يعني لو اختارتوا أشباح المخابرات هتنزل كام فصل وهنوقفها في رمضان)

٥_رواية أشباح المخابرات للمرة المليون رواية جديدة كليًا مش شرط قراءة سلسلة الجوكر والاسطورة ولا سلسلة الجارحي عشانها.

٦_أي مشهد نزلكم قبل كده هتلاقوه جوه اشباح المخابرات كفلاش باك أو نقطة اساسية في الرواية، وعلى فكرة الرواية ضخمة جدا جدا.

٧_سلسلة احفاد الجارحي غالية على قلبي جدًا، وعلى الرغم من حبكم ليها الا إني كنت بشوف فيها شوية ثغرات وعيوب حاولت باستماتة اعدلها في الجزء والنوفيلا يارب أكون قدرت ❤

٨_ختمت معاكم الجزء الخامس ب 52 فصل على مدار العام (عشر فصول المقدمة "لحظات خاصة، ثلاثون الجزء الخامس" ترويض الشرس"، واثنا عشر ختامية آل الجارحي) ، فبتمنى أكون تركت بصمة داخلكم ولو صغيرة وأهمها عن التجمع الرمضاني وفي نفس توقيت دخول رمضان المبارك فمن كل قلبي كل عام وحضراتكم بألف صحة وسعادة ❤

أخيرًا..
بتمنى إن اللي قدمته يكون نال الاستحسان وهنتظر أرائكم على الرواية كاملة، سواء بريڤيو على جروبنا ملوك الابداع في الروايات آيه محمد، أو بكومنت لطيف، تقديرًا على مسيرة استمرت عامًا وشهرين... هننتظر تصويت قراء الواتباد فيما يخص العمل القادم بعد ما قراء الفيس اختاروا نقضي الشهر ده بنوفيلا صرخات انثى ونبدأ أشباح المخابرات من ثالث أيام عيد الفطر المبارك هنشوف تصويتهم أيه وبناء عليه هنبدأ من الاسبوع القادم العمل الجديد، بحبكم في الله وبتمنى الاعمال القادمة تنال الاستحسان، وتكون دائمًا عند حسن الظن ❤