أحفاد الجارحي ..ج5.. ترويض الشرس ..آية محمد رفعت

هام جدا

هــــــــــام جــــــــدًا..

مساء الخير على حضراتكم، النهاردة نوهت عن البوست ده لأهميته، لأني هتكلم على كذه نقطة مهمة طرحها القراء على أغلب البوستات، وكمان في موضوع متعلق بالسلسلة حابة أشاركم فيه

أولًا.....

لما أخدت قرار كتابة نوڤيلا خاصة بياسين الجارحي وآية كنت حابة اتكلم فيها

عن حياتهم وبالتالي من عنوانها (لحظات خاصة) كان باين انها هتخصهم بس، وأنا قولت برضه انها متكون منفردة ومفيش ظهور لباقي أفراد العيلة، وطبعًا مع ابداء القراء تشددهم ان النوڤيلا تكون جزء كامل ويكون فيه ظهور للعيلة واحترامًا لحبهم للرواية ورغبتهم بأن يكون في جزء خماسي للسلسلة رضخت لرغباتهم وقولت هضم النوفيلا مع الجزء ، بس حسيت ان الجزئية اللي حابة اضفها لياسين وآية هتتظلم وسط احداث الجزء وأنا متعودتش أكروت عمل ليا لمجرد إني هطرح جزء زيادة، عشان كده تم التواصل لحل أخير ريحني وحسسني برضا تام عن اللي هقدمه وهو أن هيكون في جزء خماسي لأحفاد الجارحي بعنوان #ترويض_الشرس!... وهنزل نفس النوفيلا اللي حبيت ومازال حابة أطرحها لما تضم من مشاعر دافئة وقصة اسطورية بحبها وبحترمها جدًا بنفس العنوان السابق #لحظات_خاصة..... وطبعا اللي هينزل الاول هو الجزء زي ما اتفقنا بس المنطقي ان النوفيلا اللي تنزل الأول لان احداثها قبل الجزء وبامانة عندي رهبة أبدأ بيها الاقى حد من القراء يطلع ويقولي احنا عايزين الجزء وانتي بتماطلي والخ...... كلام انا في غنى عنه ولكن يكفي انكم تعرفوا ان لسه في نوفيلا قبل احداث الجزء...

ثانيًا...

اتفاجئت بعدد من القراء بينتظروا الخاتمة بتاعت الدهاشنة لحد دلوقتي، وأنا نوهت ان الخاتمة كانت شاملة مشهد عودة روجينا للسرايا وولادة تسنيم وتجمع العائلة وإني لما لقيت معايا وقت زودت احداث الفصل الاخير وضميته بالخاتمة مع بعض وتعمدت كتابة تمت بحمد الله عشان الكل يلاحظ ضم الخاتمة ونزلت بوست على الجروب قبل كده بس مشفهوش عدد كبير للأسف.. فالرواية يا جماعه مكتملـــــة...

ثالثًا..

في ريفيوهات كتيرة جاتني لرواية #الأربعيني_الأعزب.. وتقريبًا اغلبها بتطالب ان النوفيلا تتقلب رواية واحداثها تتزود والاهم حوارها يكون عامي، حقيقي بحزن لما بلاقي عدد محترم مش متابع اللي بعمله خطوة بخطوة، او يمكن مش متابعين حسابي الخاص لو كانوا متابعين كانوا عرفوا ان بالفعل تم تعديل الرواية وتحولها لعمل ورقي وصل عدد كلماته ل40الف والنوفيلا كانت 12الف كلمة، وكمان زودنا ثنائي للرواية...(موجودة توصيل اون لاين على رقم 01001631173... وكمان موجود باقي رواياتي..)

رابعًا..

بما يخص نوفيلا فاطيما..

ااتعودت أكون صريحة معاكم، الفتره اللي اخدتها استراحة ليا في الحقيقة كنت بجهزلكم فيها 3مفاجآت وكنت بسعى للانتهاء منهم قبل موعد الاستعداد لفاطيما وللجارحي بس للاسف القريب مني يعرف الحالة الصحية اللي دخلت فيها انا حرفيًا كنت بين الحيا والموت واخدت حوالي تلات اسابيع عشان اتعافى وده خلاني بطيئة جدًا في تنفيذ كل الخطط اللي كانت مطروحة قدامي، بس مازلت بعافر وبحاول اني اعوض الشهر ونص اللي عدوا عليا وانا اعاني نفسيًا وجسديًا عشان كده مش عارفة اذا كنت هقدر انزل فاطيما الشهر ده ولا لا بس زي ما ذكرت سابقًا مازلت بحاول.. 💙

خامسًا وأخيرًا.

بوعدكم بأعمال شيقة جدًا وأهمها الجزء اللي هينزل للجارحي لاني عارفة اد ايه الرواية دي مقربة لقلوبكم فإن شاء الله الجزء ده بالذات مش هيتنسى من الذاكرة ابدًا... وعدي سيف 🤭.... انتظروا الاعلان عن الغلاف النهائي والفصل يوم رأس السنة.. بحبكم في الله ❤😍😍