စီအီးအိုရဲ့ ဗီလိန်သူငယ်ချင်း (Book 2)

အပိုင်း (၂၂၆) ဇာတ်သိမ်း (၂)

စာစဉ်နာမည်- စီအီးအိုရဲ့ ဗီလိန်သူငယ်ချင်း
ဘာသာပြန်သူ Yuuki

အပိုင်း (၂၂၆) ဇာတ်သိမ်း (၂)

နှစ်မိနစ်ကြာပြီးနောက် ဖန်သားပြင်သည် မူလဓာတ်ပုံပြန်ဖြစ်သွား၏။ အစီအစဥ်တင်ဆက်သူက ထပ်တောင်းပန်ကာ ပြောလိုက်လေသည်။

“မစ္စတာဟွမ် ကျေးဇူးပြုပြီး အကောင်းဆုံးအမျိုးသမီးဇာတ်ဆောင်ဆုရှင်ကို ကြေညာပေးပါအုံး”

ဟွမ်ချူ၏မျက်နှာသည် စိတ်မလှုပ်ရှားဘဲ တည်ငြိမ်နေ၏။ သူသည် စင်ပေါ်တွင် ရပ်ကာ ကြေညာလိုက်တော့သည်။

“ ဒီနှစ်ရဲ့ အကောင်းဆုံးအမျိုးသမီးဇာတ်ဆောင်ဆုကိုတော့ <<သလဲပင်>> ရဲ့ မစ် ချောင်မော့ယွီက ရရှိသွားပါတယ်၊ သူမကို ဂုဏ်ပြုပေးလိုက်ကြရအောင်ပါ ခင်ဗျာ”

မီးရောင်သည် ချောင်မော့ယွီ ထိုးထားပြီး ဖန်သားပြင်ပေါ်တွင် သူမ၏မျက်နှာအမူအရာကို ဖော်ပြထားလေသည်။

သူမသည် ရှန်ပိန်ရောင်စိန်သားချီပေါင် (တရုတ်ရိုးရာအမျိုးသမီးဝတ်စုံ) ကို ဝတ်ဆင်ထား၏။ သူမ၏ဆံပင်ကို ပိုနီတေးလ်ပုံချည်ထားသည်။ သူမသည် လန်းဆန်းရှင်းသန့်နေသော်လည်း ကြီးကျယ်မြင့်မြတ်နေသည့်ဟန်တစ်ခု ပေါ်လေသည်။ သူမ၏ဆွဲဆောင်မှုရှိသည့်ပုံရိပ်ကို ဂါဝန်ရှည်တစ်ထည် ဝတ်ဆင်ထားခြင်းဖြင့် အစွမ်းကုန်ချပြထားသည်။ သူမ၏ ပုံမှန်လန်းဆန်းသည့် ရုပ်သွင်နှင့်ယှဥ်လျှင် သူမသည် ဒီနေ့မှာတော့ အားလုံး၏စိတ်ဝင်စားမှုကို ဆွဲဆောင်ထားတော့သည်။

ညစာစားပွဲ၏အပြင်ဘက် ရှော့ပင်းမောလ်တစ်ခု၏ LEDဖန်သားပြင်တစ်ခုဘေး၌ ချောင်ရို့ဟွမ်သည် ချောင်မော့ယွီကို စိုက်ကြည့်နေပြီး သူမ၏မျက်လုံးများထဲတွင် မနာလိုဝန်တိုမှုများနှင့် ပြည့်နက်နေ၏။

သူမသည် ချောင်မော့ယွီအလွန်လှသည်ကို အမြဲတမ်း သိထားခဲ့လေသည်။ သူမသည် ဘယ်ပုံစံမျိုးနှင့်မဆို လိုက်ဖက်အောင် လှလှပပ ပြင်ဆင်တတ်သည်။

သို့သော် ချောင်မော့ယွီသည် သူမကိုယ်သူမ တမင် လှလှပပ ဝတ်စားလိုက်ချိန်တွင်တော့ ချောင်မော့ယွီသည် ဤမျှအံ့ဩစရာကောင်းကြောင်းကို သူမ လုံးဝမသိခဲ့ပေ။