هذا انا واقف بعيد عن المنطقه الي ساكن فيها
تعتبر خاليه من السكان ومافيها اي وسيلة من وسائل الترفيه
الشي الوحيد الي موجود ويطلعون له الناس يغيرون فيه جو
هي حديقتنا والي اقل ما يقال عنها عاديه
الحدايد مصديه ووضعها مزري لابعد حد
العشب منتف ومليان رمل واخيرا يتوسطها مظله كبيره يحتموون فيها من اشعة الشمس الي تصك الراس
بس هيهات مافي الا وحده واهل الحي وقت الخرجات يعاملونها معاملة المسابقه الي يوصل اول هو الفايز ! وتصير ملكه
قاطع علي تفكيري صوت خويي
ياسر والواضح انه مروق وناوي يمسكني طقطقه : ها يالسلقه شفيك سرحت ؟ متخوف افاا ما عهدتك كذا
ناظرت له : الشرهه علي انا الي طاق مشوار وتارك جوالي العزيز عشانك
ياسر وهو يطلع جيوبه : ياخي شف حتنا ما جبته عشان ما نتراجع
تاففت : طيب وش نسوي الحين نتكي برا هالبيت المسكون على قولتك لين يجي الجني ويرحب فينا
ياسر : سمعت انه يعشي ويقهوي اثره متعلم علوم مرجله ماهو بهين
رديت عليه وانا اقلب بهالمفك الي بيدي : شكلنا بنصير عشاهم هالليله
ياسر : جهاد انا جايب لك هالمفك عشان تهفه فيه اذا قربلك هالجني مو تلوح فيه
جهاد : بلوح فيه براسك ياسبك اعجل علينا امي تحتريني
شفته سكت
وناظر بالارض بعدين لف معطيني ضهره وهو متوجه لذا البيت
ما تحركت
الحقيقه مب سالفة اني خايف
بس ندمت يوم جبت سيرة امي على لساني قدامه
ياسر من انخلق وهو بدون ام
وشكله مشتاق لها بالحيل وما ابيه يحس بالنقص
والله اسف تكفى لا تتضايق
ما حسيت الا بشي يشطفني وكان حجر !
ويوم ناظرت لياسر شفته يجمع بهالحصى ناوي يفلقني
ياسر : لي ساعه اكلمك اسحب لي هالخشب انتبه فيها مسامير لا توجعك وتبكي علينا
مشيتها له والله لاني ابو قلب حنون وقربت اساعده ابعد البلاوي الي تحيط بهالبيت
قربت افتح الباب بالعروه حقته بس ما فتح : وش ذا الباب الخربان
ناظرني ياسر بعدين ما شفته الا وهو طايح يضحك
ناظرت له باستغراب ! خير ليه يضحك
بعدين شفته يقوم ويوقف بمكانه للحظه كان يجمع فيها طاقته ودف الباب بقوه ما سمعت بعدها الا صوت ضربة الباب بالارض والخشب متطاير بكل مكان ناظرني مره ثانيه وضرب على صدره بقوه : تعلم يالدلوع
قهرني
تجاهلته وتقدمت قدامه وكنت اتفحص البيت بعيوني
بس ما سمعت الا هبده خلفي
طبعا اخونا فالله ياسر ما خلى شي الا ولمسه طبعا ضروري يترك لمساته والا بيموت
لفيت اناظر فيه ابي اشوف وش مهبب شفته ماسك لوحه وكسرها
واخذ الصوره الي فيها ناظرني ورد بكل برود ولا كانه سوا شي : اعجبتني برسمها
شمقت له من متى يعرف يرسم ذا : كذب زين
مشيت تاركه خلفي ولاحظت ان البيت فيه اشياء واجد تصلح للبيع وراها مكسب : شرايك نسوي بسطه ونبيع هالخرابيط
ما سمعت رد لفيت ورا ادور لياسر بس ما لقيته
ياخي بزر امداه يختفي رفعت صوتي وانا اناديه على امل يسمعني ويجي بس ما كان فيه رد
هنا خفت شويات يعني والله ياسر ورع واعرف حركاته يبي يخوفني قلتها بصوت عالي عشان يحس باليأس ويجي : ترا حركاتك مقفوطه واعرف انك تمزح
