قمت على صراخ عم بالبيت
فزيت بخوف ونزلت الدور الاول ابي اعرف وش صاير!
لقيت امي منهاره وحولها اخواتي الاثنين يواسونها
دقيقه تبكي ؟ ليه
شفت اختي الثانيه الي ما تجينا الا بالسنه حسنه
شدعوه يالوالده ذا كله حنين لبنتك
قربت ابي افهم واسال احتاج مليون جواب
ناظرتلي اختي واشرت لي ارجع
فعلا رجعت لكن ما رجعت غرفتي الحقيقه اني طلعت برا
ولقيت الاسعاف حول بيت جارتنا
ثواني اسعاف ليه ؟
قربت وشفت اهل الحي حول البيت
قرب لي ياسر الي كان من ضمنهم
ومسك يدي وسحبني
مشيت وراه بدون ما انطق بحرف
ما بعدنا كثير
ناظرت حولي
الهوا لفح بوجهي
طاحت عيوني على شلة عيال من ضمنهم ولد جارتنا الي كانت حالته يرثى لها وثوبه متشقق وكان يلطم بقوه
بس مسكه واحد من العيال وكان يهديه ويكرر عليه جملة
رنت براسي
: ان لله وان اليه راجعون
بققت بعيوني وانظاري تحولت لياسر هنا : صادق ياولد!
صوتي كان عالي لفو علي اغلبهم ومن ضمنهم ولد جارتنا
اخ ياحبيبي شفت بعيونه نظره
يعلم الله انها اثرت فيني
قربت له وضميته بكل مافيني
ورد لي الحضن بس بخفه
مافيه حيل حتى يشد! ياحبيبي انت
وجا دوري اواسيه
وضحت له ان ذا قدر الله والاقدار مكتوبه من قبل ما نخلق
وحرام نعارض وان امه بحاجه لدعواته اكثر من دموعه
مسكني وكان متشبت فيني
ما نطق بحرف من وقتها
بس عيونه كانت تشرح فضاعة شعوره
تخيل انك اليوم بين اهلك تضحك وتمزح معهم
واليوم الثاني تصحى على خبر موتهم!
يالله يالشعور يروع
يا الله لا تفجع قلوبنا باحبابنا
شفته ارخى جسمه
وعيونه مثبتها على بيته الي ما كان بعيد من نظرنا
والواضح انه دخل بتفكير عميق
مرت اول ليله وكانت ثقيله على سكان الحي
الي قامو بالواجب وسوو العزا بييت المرحومه
وجو اهل جارتنا
والصدق شفت اشكال او مره تمر علي
كنت جالس بمجلس الرجال اناظر الرايح والجاي
الي يعزي والي دموعه بعيونه
واخيرا طاحت عيوني على ولد جارنا وكانه يكلم شخص من ورا الباب واصواتهم اعتلت
لين شفته يندفع ناحية الشخص ذا وسحبه لنا
رجع كم خطوه للخلف وهو متشبت بقلاب الاخر
لين بانت لنا ملامحه
دقيقه كانها مالوفه؟
اي والله ذا اخوه الكبير
يوه اخر مره شفته قبل سنين
يقولون انه طلع بغير رضى امه
عشان مو عاجبته عيشة اهل القريه
مالت عليك
كل اهل القريه ناقدين عليه
والواضح جيته ما تسر
لاني شفت عجوز ماد عكازته ناحيته والواضح انه منزعج
محد يلومه خلقته تخليك تنفر منه
بغير سبب
تقدم ياسر لهم هو وولد الشايب
على طاري ولد الشايب
ذا حفيد الشايب مب ولد الشايب صدق
بس صرنا نناديه كذا لانه دايم مع الشايب
قصة حياته طويله ومعقده ومحد فاهم منها شي
والشايب او ابو علي
متكتم شويات
يخوان حتى بيته بعيد عننا شوي
الي يشوفه يقول بناكل رزه
