مرت ايام العزا بمرارتها
ورغم صعوبة الوضع الا انهم قدرو يتجاوزون اسبوع بدون اي مشاكل
وكل منهم كان يتجنب الثاني قدر المستطاع
كانت علاقتهم متكهربه بشكل ملحوظ
ما استوعبت شي الا وهو كاسر جوالي !
ثواني ذا استخف ولا وشو؟
كنت بمسكه واصفقه بالارض مثل ما سوا لجوالي
بس استهديت بالله ووخرت عنه وانا الملم نفسي
اخذت نفس قوي وناظرت لجوالي المتكسر
ذا يبيله معجزه عشان يرجع يشتغل
سمعته يقول : ازعجني
وطلع ! بس كذا ازعجك يالدلوع
ياربي تكفى انا خلاص تعبت
لحقته وما مسكته الا وهو عند باب الحوش حق بيتنا
: وين تحسب نفسك رايح؟
وخر يده عني بقرف وقالي : لا تسوي فيها ولي امر توكل دوامك
لا ذا بدا يتمادى بحركاته بشوف اخرتك بعدين انت
طلعت ووديت جوالي للمصلح
ورحت بيت ابو علي
مشي مع ان عندي سياره ولكن قررت اطلق العنان لرجولي
تعرفون الطريق الي كله هواجيس
وتفكيركم فيه يضيع
ذا الطريق نسخه منه بالضبط
افكاري كانت ما بين الماضي والحاضر
والله اني خايف يصير شي ويقلب الموازيين فوق بعض
وايهم ذا ماني عارف كيف اتصرف معاه
يحدني على اشياء ما ودي اسويها
ماودي افقد سيطرتي واسوي شي اندم عليه سنتين قدام
الي فيني مكفيني
دقيت الجرس وفك لي ملهم الباب وكان بيده ميرو!
: هلا ابوي اشتقت
اخذت ميرو من يده ولعبت معاه شويات : وين جدك؟
اشر لي على المجلس تركت ميرو بيد ملهم ورحت متوجه ل ابو علي ذا بحسبة ابوي الثاني ويا ان محبته بقلبي مالها مقدار
سلمت ودخلت
ناظرني ابو علي وقام يسلم علي
وجلست
صب لي قهوه وسالني عن حالي
: وجهك ماهو بوجه واحدٍ طيب ها عساك بخير؟
تنهدت وعيوني ارتكزت على فنجان القهوه والبخار الي يطلع منه
ذا انا بالضبط
نار تشوي بداخلي
والبنهايه مردي ابرد
: ابد يا عم الاوضاع بخير وماشيه الحمد لله
قعد يسولف لي عن روحتي والاشياء الي تغيرت من بعد غيبتي
ومنها المزرعه قالو ان عاملهم جاب اهله معه ووضعهم المادي كان سيىء
: الله يكون بالعون الدنيا غلت وما عاد صارت مثل اول
شفت ملهم واقف عند الباب
: شرايك تاخذني بجوله بمزرعتكم ؟
ملهم اشر لي ب تم وراح
مرت نص ساعه قضيتها ما بين سوالف
ابي اشتت نفسي عن تفكيري الي ملازمني
استاذنت من ابو علي وقمت متوجه ل ملهم
عشان يوفي بوعده
شفته جالس يركب مكعبات لشخصيات خياليه
وشكله مركز
ما حبيت اقاطعه وكنت ناوي اخرج
بس شفته ترك الي بيده وتوجه لي
شفته واقف مستغرب وهو يناظر يمين ويسار كانه يدور شي
استوعبت هنا ولعنت نفسي على غبائي : ما جبت سيارتي
نروح لبيتي اول وبعدها نتوجه على المزرعه
