موقف واحد قادر يطفي كل شعور حلو فيك
-
باقي ايام قليلة ويدخل علينا العيد
لكن عيدنا بيكون غير
ناقصه شخص وتكتمل فرحتنا الصغيره
حاولت اتأقلم على عيشتي الجديدة
تركت المدينة بما فيها وقررت ابدا بداية جديدة من ذي النقطة
و اول شي بحاول اكسبه برجوعي هو ود اخوي
ما دريت انه بذيك الصعوبة
كنت يوميا امر بيت ابو علي و تقربت من ملهم وعوضته عن فترة قطعتي عنه وكسبت صداقات جديده بوسط الحي ومنهم ولد المزرعه ذاك الي عرفت منه ان اسمه ادم وعنده اخ اكبر منه بكم سنه الي هو زين وبخصوص شيبان الحاره حاقدين علي للحين! ما اعرف وش الكلام الي متناقل عني هنا لكن والاكيد انه منتشر بينهم
-
عند جهاد
-
ياسر صاير غريب وتصرفاته اغرب تعرفون الي كانه متلقي خبر صادم ومتغير
مشكلته انه من النوع الكتوم لو اقعد من اليوم لين بكرا اتشحذ منه كلمة ما بينطق بحرف بس تتوقعون بستسلم لعناده؟
هو عنيد وانا اعند
وبوسط جلوسي بغرفتي سمعت دق من الباب
استغربت مافي شخص ببيتنا يحترم الخصوصية نهائيا
حتى مفتاح الحمام امي راميته من خوفها
تقول يمكن يتقفل عليكم بالغلط ! شدعوه يالوالده
قلت ادخل بصوت عالي وما كانت غير اختي الكبيره سوار
ثواني ذي متى صارت تحترمنا؟ يبوي ذي شلوطتنا جميعا
: اسلم عشانك تزوجتي مسويه غريبه مانك منا!
ناظرت لي سوار وهي تشمق لي : اقول قم ترا الباب يدق من اليوم وخويك له ساعه برا
فزيت تاركها خلفي وهي بدورها راحت غرفتها
وانا نزلت تحت افتح الباب وما كان غير ياسر ومعه يزيد
دخلتهم المجلس : كان دقيتو علي ما دريت انكم جايين
قالي ياسر وكانه مغصوب على جيته : لازم عزومه بعد؟
استغربت من كلامه بالطريقه ذي مو من عادته
اما يزيد تكلم يبي يغير السالفه : خلك منه نفسيته شينه هالولد و ترا كفيل عامل البقاله علم ابوه بسواياكم و ابوه دق على ابوك يعني من الاخير ودع الملاعب ياحب
قالها بضحكه والصدق انا ما اهتميت خله يدري بالطقاق يعني ترا كل ابوها بطاطس منتهي صلاحيته وببسي من الفين وحطبه ما كثرنا
قال ياسر بقهر : يلعن اصله ابوي تلف البكت حق الدخان وسحب مصروفي
جهاد : مسوي سالفة عشان بكت دخان ؟ يرجال بالطقاق مادمرك الا هو
ياسر تكلم بضيقه : ياليتها وقفت على هنا
قربت له وانا اساله : وش مسوي بعد؟
