ثاني يوم وذا الثالث وتيام ماله وجود البيت فاضي وشكله موحش
وهدوءه غير معتاد لفيت المنشفه على جسمي من الاسفل و رفعت شعري على فوق تجاهلت المويه الي تنقط من شعري وبرودة المكيف اللي بسببه ارتعش جسمي وقفت قدام المراية بطولي وقعدت اتأمل وجهي يحتاج عناية مشددة لان ذا مب شكل ادمي سحبت المقص والمكينة الي كانت على الطاولة قعدت افكر هل اتراجع عن قراري ؟ بالنهاية سحبت المقص وخففت شعري وحركته يمين ويسار برضى عن الشكل النهائي و لأول مره احس بصدق كلمة الامهات لما يقولون " بان وجهك " افتقدتها ابيها تنقال لي !
تنهدت ولبست ملابسي الي كنت مجهزها من قبل
وطلعت اخذ ثوبي بعد ما فصلتة استعدادا للعيد الجاي ما بقى عليه الا اسبوع ! وتيام للان ماله حس
قعدت أتساءل فين تبخر بالضبط و وش السبب الي خلاه يختفي فجأه بعد ما اصر على وتواجده بهالمكان ؟ تجاهلت شعوري السيئ وتفكيري الغير مجدي وخرجت ناوي اروح للخياط اخذ ثوبي
واول ما فتحت الباب داهم مسمعي صوت وتد الصغير وهو يلعب حول بيت جهاد ابتسمت له بعد ما شافني وركض لي وانا بدوري سحبته من الارض ورفعته لفوق وبعد ما طار بالهوا رجعت مسكته بإحكام وضحكت مستلطفة : اهلاا وتد! وين خالو؟
رد وتد وهو يرفع كتوفه بمعنى مدري : بح مافي خالو
ناظرت له باستغراب ونزلته بعد ما سمعت صوت ابو وتد يناديه وهو يقرب لي لين وقف قدامي وسلمنا على بعض واخذ وتد وراح
وقبل ما يروح سألني بأستغراب كأنه ما توقع يشوفني !
: غريبة ما رحت معهم
وش يخبص فيه ذا ويتكلم عن مين بالضبط
: والله ماعندي علم باللي تحكي عنه
ماطول الا وهو ماخذ معه وتد وركب سيارته وحرك بعد ما اخذ زوجته معه ذا كل صار وانا لازلت واقف بنفس مكاني قدام باب بيتي بدون حراك وتفكيري كله بكلامه ؟ اروح وين ومع مين
تجاهلت افكاري ذي ورحت الحق على الخياط واول ما وصلت وشفت الزحمة تنهدت وكأني ناقص يعني ! بس ما باليد حيلة
وبعد فترة فضى المكان ودخلت اخذ ثوبي طبعا الخياط عرفني على طول بحكم جيتي له كثير وعطاني ثوب تيام بحكم انه يدري انه اخوي ابتسمت بورطه مدري اخذه ولا اسحب عليه وبنفس الوقت مستغرب يعني لو راح تيام يعيد بالمدينة المفروض انه ياخذه معه ليش سحب عليه ! وش ذا الاخ الاهبل ، اخذته بنهاية المطاف
ورحت راجع لبيتي علقت الثوب والشماغ بالعلاقة ولا نزلت عنه الكيسة ولأول مره احس العيد طافي ماله فرحة ولا بهجة
وكيف يكون وهو ناقصه اصحابه ! العيد بدون اهل ما يسوى
داهمتني ضيقة وشعور كريه يضايق والله
يعني بصير وحيد كذا ؟ بنفس الوقت انا الي طلبت من تيام يطلع برا لأني بكل سهولة ما كنت ابي اشوف رقعة وجهه والحين بعد ما سمع لي وغاب عني مالي حق اتكلم ! وش ذا التناقض يا انا الصدق معرفت لي
ولا انا داري وش ابي
بس كل الي اعرفه اني لازلت زعلان من تيام بعد ما تركنا ولا حتى فكر انه يتواصل معانا
و ترك امي تشقى لوحدها جا بعد ما عطت عمرها لربي؟
