أنا جميلة

إرتباط رسمى 10

فرحة يوسف بموافقة جميلة وأهلها كانت كبيرة جدا وحددت له موعد ليأتى لبيتها مع اهله ويطلب يدها رسميا...كان يطير من الفرحة وهو يستعد فى حجرته ودخلت سلوى: جاهز ياعريس.

جاهز جدا جدا ...

فرحان يايوسف؟

الدنيا كلها متكفيش فرحتى ياسلوى اخيرا هاخطب البنت اللى باحبها.. .

مبروك ياحبيبى.

سمعو صوت زين ينادى من الخارج: ياللا ياأولاد ,ميصحش نتأخر على الناس.

سلوى: جاهزين يابابا... ياللا..

كانت والدة جميلة الأكثر سعادة بين الجميع لأن إبنتها اخيرا ستتزوج ,قامت بحملة تنظيف للشقة وقامت بصنع حلويات لتقديمها ووقفت ترحب بالضيوف بنفسها, طبعا لم تنسى جميلة ان تحضر جدتها وجلست معها فى غرفتها فقالت: والله وعشت لحد ماشوفك عروسة ياجميلة..

بفضلك ياتيتا لو مكنتيش تكلمتى معايا مكانش ده إتحقق..

لو كنتى حكيتى لى من زمان .. كنت رسيتك تعملى إيه؟

كل شئ بآوان ياتيتا...

قبلتها جدتها وقالت: بتحبيه ياجميلة؟

قوى ياتيتا وهو كمان بيحبنى..

ربنا يسعدك ياحبيبة قلبى..

دق الباب وظهر احمد على الباب وقال :تعالى ياجميلة الضيوف وصلو وعايزين يشوفوكى...

إرتعشت جميلة وارتبكت وسألت: شكلى حلو؟

زى القمر.

كانت جميلة ترتدى فستان لونه روز طويل ورفعت شعرها من جانب واحد وتركت الباقى منسدلا على ظهرها وتأملت نفسها فى المرآة قبل أن تخرج ,أمسكها والدها من يدها وتحرك بها للصالون ودخلت, تعلقت عيون يوسف بها بإعجاب واضح وإرتفعت دقات قلبه ووقف ,أسرعت سلوى نحوها تقبلها: تعالى ياجميلة...

قبلتها والدة يوسف وقال زين: ماشاء الله .. هى دى بقى جميلة اللى حولت إبنى لراجل بجد؟؟

أحنت جميلة رأسها بخجل فقال: أنا فخور بيكى يابنتى وسعيد إنك هاتبقى مرات إبنى..

جلسو وتكلمو وقرأو الفاتحة وحددو ميعاد للخطوبة, كان يوسف يختلس النظرات لجميلة ويبتسم بفرحة وأطلقت أم جميلة الزغاريد لتعلن خطوبة جميلة للمنطقة كلها وشاركتها خلود وبعد إنتهاء الزيارة طلب يوسف الإذن من أحمد ليخرج مع جميلة وأخذها لمكان جميل وهادئ وعندما جلسو قال: جميلة.. إنت جميلة...

إبتسمت له وقالت: عمرى ماكنت أتخيل إن هاييجى يوم وحد يقول لى كلمة زى دى..

إنت تستاهلى كل خير وكل حاجة حلوة...