格格不入(GeGeBuRu)
စာရေးသူ : ဝူးကျယ်
ဘာသာပြန်သူ : ယင်း
အပိုင်း ၃၂
စုန့်ယိ သန့်စင်ခန်းတံခါးကို တွန်းဖွင့်၍ ၀င်လာသည့်အချိန်၌ ၊ ချိန်ပေါ်ယန်မှာ လက်ဆေးကန်အရှေ့တွင် ရပ်၍ လက်ဆေးဆပ်ပြာဖြင့် လက်ကို သေသေချာချာ ပွတ်တိုက်ဆေးကြောနေသည်။ရှန့်ရှီးကို မတွေ့ရပေ။
"မင်း လက်ဆေးတာကို ကြည့်ဖို့ ငါ့ကိုခေါ်လိုက်တာလား?"
စုန့်ယိက သန့်စင်ခန်း၏ လေးဖက်လေးတန်ကို ကြည့်လိုက်ရာ ၊ အခန်းတစ်ခန်းက တံခါးပိတ်ထားသည်ကို တွေ့လိုက်ရသည်။
"မင်းရဲ့ ဟိုစူပါမားကတ်က"
ချိန်ပေါ်ယန်က စုန့်ယိကို ကြည့်လိုက်ပြီး
"လူလိုနေသေးတယ် မဟုတ်လား?"
"လိုသေးတယ်လေ"
စုန့်ယိက ချက်ချင်းပြောလိုက်သည်။
"လိုသေးတယ်"
"ဘာရာထူးလဲ?ဘာတောင်းဆိုချက်တွေ ရှိလဲ?"
ချိန်ပေါ်ယန်က မေးလိုက်ပြီး ၊ တံခါးပိတ်ထားသည့် အခန်းဘက်ကို တစ်ချက် လှမ်းကြည့်လိုက်သည်။
"ငွေသိမ်းဖို့သာ မဟုတ်ရင် ၊ စကားပြောတတ်တာနဲ့ ရပြီ"
စုန့်ယိက ပြောလိုက်သည်။ချိန်ပေါ်ယန်၏ အဓိပ္ပါယ်ကို နားလည်သည်ပင်။
"ကျွန်တော် ငွေမသိမ်းပေးနိုင်လောက်ဘူး"
အခန်းထဲမှ ရှန့်ရှီး၏ အသံ ထွက်ပေါ်လာသည်။
"မင်း အရင်ဆုံး သင်လိုက်ပေါ့"
စုန့်ယိက ရယ်၍ ပြောလိုက်သည်။
"ငွေသိမ်းတာကလည်း ဘာမှ မခက်ပါဘူး ၊ နည်းနည်းပါးပါးပဲဟာ ၊ တကယ် သင်လိုက်ရင် ၊ ရက်နည်းနည်းလောက်ဆို တတ်သွားမှာ"
"သင်ရမယ့်နေရာ မရှိဘူး"
ရှန့်ရှီးက ပြောလိုက်သည်။
"ဒါဆို ငွေသိမ်းတာကလွဲပြီး ၊ မင်း နေရာတစ်ခုလောက် စီစဥ်ပေးလေ?"
ချိန်ပေါ်ယန်က လက်ဆေးနေရင်း စုန့်ယိနှင့် ဆွေးနွေးလိုက်သည်။