يلتفت لها القلب والعقل

🌷

لاتنشغلون عن ذِكر الله بسبب الروايه 🦋.
.
الله يرحم لطيفه بنت سلطان
-
.
بسم الله الرحمن الرحيم
.
بيت الجد
عبدالعزيز : يابوي تكفى طلبتك لايفجعوني ببنتي طلبتك
الجد بعصبيه:انا معلمهم  وقايل لهم لاتحارشونه اتركوه ،وش ترجون من ولد الشوارع لكن من يفهم؟
.
بجهه أُخرى من المكان بأحد المجالس
تكّلمت مها بمحاولة إشتعال الجّو: انا سمعت ابوي وعبد العزيز يتكلمون في خطبه عاد مادري مين ومين
انتهت كلامها بضحكه تدل على سَخريتها من الموضوع
رفعت نظرها توق بهدوء ، تنهدت بداخلها من عمتها مها الي دائما تحب تناقرهم وتدخل بالمواضيع
اعتدلت بوقوفها وخرجت متوجهه داخل المطبخ ، لكن قبل دخولها شافت ابوها وجدها طالعين من غرفه الضيوف ناضرتهم ،وتقدمت لهم بكل هدوء من لمحت نظراتهم
تقدم الجد ونطق بـ:تعالي ياتوق انا وابوك نبيك
هزت راسها بهدوء ،وتقدمت منهم وسرعان ماجلست بأقرب زاويه
نطق الجد بهدوء:توق يابنتي انتي فاهمه وعارفه انتي ترضين على احد من عيال عمامك ولا اخوانك يدخل السجن؟
رفعت حاجبها ونطقت : لا! ليه وش مسوين عشان يدخلون السجن؟
الجد : اسمعي تعرفين رعد؟ ورع الشوارع ذا الي ماله اصل ولافصل
هزت راسها بـ ايه ، وكمل كلامه الجد ونطق: تحارشو بالشارع هو وعمك نايف وطعنه نايف وعيا يتنازل عن المحكمه لكنه شرط علينا شرط وانتي كفو وبنت عبد العزيز وطالبك على سنه الله ورسوله لكن انا والله مالي راضي على الزواج ذا ومعليك لين تتزوجين كم شهر واطلقك منه وانا ابو عبد العزيز
ضحكت بعدم استيعاب ونطقت : ليه انا طيب؟
نطق الجد: هو يبي يغيض تركي (تركي اخو توق ) وانتي خبرك بتركي دايم يجينا وملابسه كلها دم اثر مضاربتهم
ماتنكر انها تخيلت لو انها متزوجته وضربها حتى يطلع منها الدم
ناظرت فيهم ونطقت بجديه : ومن ضحك عليكم وقال بوافق ؟
ناظرها الجد بصدمه وهزت راسها بـ ايه ،وقامت من عندهم متوجه لغرفتهم اللي ببيت جدهم ،كانت جالسه على السرير تفكر بهدوء تذكر شكل عيال عمامها وعمانها والأهم تركي اخوها لمن يدخلون عليها وكل واحد اخس من الثاني كل يوم واحد متهاوش معاه
ماتنكر لمن تسمع عيال الديره كلهم يسبونه ويوم يمر للمسجد ماكانت تسمع غير السب والشتم له ماتنكر فضولها ليه يسمونه ولد شوارع
.
-
فلاش باك
الجد ابو سلمان : سلمان وانا ابوك اطلع من بدري عشان تلحق على الموعد وترجع بدري
قام سلمان ونطق :على هالخشم
ماهي الا لحظات وطلع هو وزوجته وعياله لجل موعد ولده
لكن لمح رعد ولده جاي من برا بالوقت المتأخر
تقدم رعد ونطق: وين رايحين ؟
شهد : شفيك رعد نسيت موعد بدر؟
رعد: والله اني نسيته
التفت على ابوه ونطق:يبه انتبهو من الخط
تقدم منهم وسلم ع راس امه وابوه وكان بيمشي لكن
استوقفه صوت بدر وهو ينطق بـ: رعد وانا وشهد مالنا نصيب ولا؟
التفت لهم وضحك بخفه وسرعان ما اقترب منهم الاثنين وضمهم
سلمان بـ استعجال :يلا يلا بنمشي وانت يارعد انتبه لنفسك وانا ابوك وخلك عاقل واركد ، واذا رجعت نتفاهم على رجوعك بالوقت المتأخر
ابتسم رعد وأشر على خشمه ونطق :ابشر على ذا الخشم
ام رعد :ودعتك الله ياحبيبي يلا مشينا
توجهوا كلهم وركبوا السياره مُعلنين توجهم لجده وللمستشفى خصوصاً
" لكن مع الأسف انها المره الأخيره لـ رعد بين اهله"
.
الجد
شاف رعد داخل البيت ناظر ساعته وماعاد باقي على اذان الفجرشي
لذلك نطق بـ: لاترقد لين تصلي صلاة ربك في المسجد
هز راسه بطواعيه وتوجه للداخل
ناظرته الجده ونطقت:بقوم اصلي لي ركعتين قدام يأذن
هز راسه ونطق الجد: اجل انا بقوم اصحي الوراعين عشان الصلاه
-
توجه الجد بأحفاده وعياله كلهم وصلو صلاتهم بالمسجد
التفت رعد بعد ما انتهى من صلاته على جده ونطق:انا بقوم ارقد تعبان ماجيت الا متأخر
الجد بهدوء :الله يستر عليك
توجه رعد لبيتهم وسرعان مانام من التعب اللي يراوده
.
الصباح
الساعه ٨ تقريباً
المكان مليان بـ اصوات صراخهم ، من بين الصرخات كانت الجده عيده تصرخ بصوت مدوي بالمكان :ياويل حالك ياعيده ولدك واهله راحو( ام سلمان )
كان يسمع صوت صراخ وهو في بيت ابوه لكن كان يجهل صوت من
داخل بنومته العميقه او بالأصح مامّيز الموقف بسبب تعبه وكلهمه فقط انه يرتاح
.
صحى من نومته على ضربه في ظهره من رجل عمه اللي نطق بـ:قم قم اهلك ماتو وانت راقد
فّز من نومه بفجعه ، التفت يمين يسار يبي يستوعب اللي يصير ،رفع نظره لـعمه ونطق:وش صاير
ارتبكت حواسه وانشّل لسانه من شافهم يداهمونه
بوسط بيته وينطقون بـ :أن لله وإنا اليه راجعون، الله يعوض رعد في اهله الورع طايش ومن يعقّله!
.
رعد
اعتدل بجلسته بمحاولة الأستيعاب التفت على عمه ونطق بعدم تصديق:تكفى ياعمي انت صادق؟
كان بيتكلم عمه لكن قاطع كلامه ابو مشاري من نطق بـ: عظم الله اجرك يارعد الله يعوضك
تفاوتت أصواتهم بـ احسن الله عزاك الله يصبرك الخ.. وكأنهم يزفون لهم خبر مُفرح!
-
قام بسرعه من مكانه بدون اي كلمه وطلع يركض برا البيت تاركهم وراه انصدم من شاف اهل الديره كلهم متجمعين حول بيته وايقن فعلياً ان فيه شي صاير
حس بالعبره تسري بداخله والقشعريره تمكّنت من جسده لذلك أكثر فكره راودته هو الهروب
توجه لسيارته وركبها يبي يبعد عن الكل مايبي احد
.
بجهة الحريم
.
ناظرتها ام مشاري بحزن ونطقت: الله يصبرك ياعيده، كلنا بنمشي بالطريق ذا
عيده من بين دموعها :ياحر كبدييي وانا امك الله يعوضني بالجنه
بكت هُدى بحرقه على سلمان اخوها وحبيبها كانت تشوف حنين مفجوعه من المنظر المهيب الي قدامها ، مدت يدها وضمتها لصدرها وبكت على المُصيبه اللي باغتتهم مع الصباح
.
الرجال
ابو مشاري ببرود :متى الدفن يبو سلمان
ابو سلمان بجلافه:الساعه ٢ الظهر
رغم الحزن الي بصدر ابو سلمان لكنه صامل انه مايبكي لجل مايفكرونه حرمه!
"كان هذا تفكيرهم ومن اهم أولوياتهم ان الدموع للحريم فقط.!!"
.
توجه عويض للحمام يُكرم القاري يحس انه ماعاد يصبر من اول وهو يكابر ويكتم عبرته بس ماقدر بِمُجرد دخوله للحمام يكرم القاري ، بكى بصوت عالي على فراق اخوه
بالنسبه لـ فارس كان تايهه مايدري وين يروح هو حنون وبزياده ، مايعرف ليش اهل الديره عقولهم كذا متحجره وممنوع البكاء وهو من ابسط حقوقهم لجل يطّلعون اللي بخاطرهم !
محتاج احد يضّمه لصدره يهدّيه يبي أمه فقط.
توجهه للمغاسل يغسل وجهه لكن التفت من فتح الحمام يكرم القاري ،وطلع عويض كانت نظراتهم متبادله قرب فارس من عويض وضمه بقوه وبكى على طول ، تعالت شهقات فارس من شد عليه عويض ورمى بثقل جسده عليه
طلعت شهقه من عويض كان كاتمها ورجع يشدد من احتضانه عليه ونطق :الله يرحمهم
ابتعد عنه ومسح دموعه ونطق :يالله وانا اخوك بنروح نغسلهم ونصلي عليهم
فارس بهدوء: اطلع وانا الحقك
دخل الحمام يكرم القاري وبكى بتعب هو تعبان كيف محد يبكي على فراق اهله؟
قام بسرعه من تذكر ابوه وتلثم بغترته متوجّه للخارج
واجه مشاري اللي تقدم منهم ونطق :عويض ابوي يقول خله يجي ويجيب رعد معه
نطق عويض:بنتظر فارس يطلع الحين واجيك
طلع فارس ومشو كلهم متوجهين للغسل والدفن
-
رعد
يتمشى بالشوارع يشغل نفسه في اي شي يحاول مايتذكر الي سمعه او بالأصح ينكره
طلّع جواله من جيبه بـ ابتسامه وكل تفكيره انه ابوه يعاتبه على خروجه فقط. غمّض عيونه من كان عمه عويض ، تنهد بـ اسى ورد عليه
عويض:رعد ابوي يقول خله يجي ويترك الدموع للحريم هو رجال
تسارعت انفاسه من تفكير جده المُختل ، احتدت نظراته وسرعان ماضرب باب سيارته برجله
ركب سيارته وكل تفكيره ليه الرجال ماتنزل دمعته ماهو بـ انسان وله مشاعر ليه عقولهم كذا
المصيبه ان اللي مات ولده وزوجته و٢ من احفاده ولا بكى لهدرجه جده قاسي؟
شغل سيارته وتوجه لجده يبي يتأكد بنفسه هالمره
-
أحد المقابر
ارتعش كفّه وبردت اطرافه من شافهم ملتمّين حول القبر ، تقدم بتوجس وخوف يبي ينفي الحقيقه لكن صوت جده اللي نطق بـ : رعد تعال احفر قبر ابوك امك واخوانك حفرنا قبورهم
تمتم بكلمات غير مفهومه ، حاول يجمّع كلامه ويتفّوه به لكن تقدم الجد ومسكه من عند كتفه ونطق :يالله انت ماتفهم؟
رمش بعدم إستيعاب ومن ضمّه فارس بهدوء أيقن انهم ماتو فعلاً
ابعد الجد فارس بحده خوفاً من ان رعد يبكي وأشر له بوعيد
تقدم وبدا يحفر قبر ابوه ،مانزلت منه دمعه وحده مايدري من فرط صدمته أو انه بدا ياخذ من عاداتهم لكن الأكيد انه مصدوم!
الجد: يابو مشاري ازهمهم يجيبون الجنايز
ابو مشاري بهدوء: يلا ياعيال
نزلوهم من سيارة الموتى تحت أنظاره ، شاف اهله كلهم ينزلون في القبر نزل على رجوله يناظرهم ٤ اشخاص وكلهم اهله
حاوط راسه بيدينه من فرط صدمته
لكن الجد تقدم بسرعه وقرب منه يوقّفه وكل خوفه أنه يبكي : قم بتبكي يالرخمه صدق
وقّف رعد يناظر فيه ونطق بحده : الحين موت اربعه اوادم من اهلك مانزلت دمعه منك انت انسان؟
ما اهتم الجد لكلامه ، وتقدم عويض ونطق: رعد وانا عمك اقصر الشر وتعال
ابعد عنهم ولازالت الصدمه تعتريه دفنهم بيدينه الثنتين بمساعدة عمه عويض وفارس
وقّف بعد ما امتلى جسده بالتراب وودعهم بنظراته ، وكل تفكيره انها اللحطه الأخيره اللي بيلتقي فيها مع جده وعمامه
هو حتى دمعته مانزلت من كثر صدمته وشعور الكتمه اللي يراوده ماعاد يقوى طلع بسرعه برا المقبره لكن استوقفته يد فارس التفت عليه وضمه حاول فارس بأنه يبكي لكن صدمته أقوى منه
طلع على طول لـ سيارته متوجه لبيت ابوه وماهي الا لحظات ودخل بيت ابوه ياخذ ملابسه واغراضه كلها ماعاد بيجلس بالديره ابداً
-
.
.
.
نرجع للواقع
بيت الجد
كان جالس بصالة بيته وما احد حوله ، ندمان قد شعر راسه كيف انه فقد ولده وعياله ولا نزلت منه دمعه ليه كذا ليه انزرع فيهم الشي ذا للحين مقهور على حفيده الي مايعرف عنه شي اخر مره يتذكره بعد وفاة اهله ، تركهم رعد قبل ٨ سنوات محد يعرف عنه شي غير فارس اللي يدعّي عدم المعرفه .
لكن بالسنبه لـ فارس هو اللي يتواصل مع رعد هو الوحيد اللي سانده بعد الله هو الي يتطمن عليه رغم الي صار ماتركه
يعرف عن الديره اللي ساكن فيها وأنها قريبه من ديرتهم يدري بالشتايم الي تجيه ويدري بكلام الناس عليه يدري ان رعد توظف وصار ظابط
صحيح انه تعب ومافي احد سنده ولا سئل عن حاله لكن الحين صار عمره ٢٦ سنه رجال واعي وكبير وعاقل
-
.
.
" بيت الجد ابو عبدالعزيز "
الجد: عبد العزيز لازم تفّهم بنتك بأنها لازم تتزوج لجل نايف كله زواج على ورق وبتجلس عندنا!!
تنهد بتعب وهز راسه بـإنكسار اكثر شي خايف منه أنه يجبرها على شي ماتبيه
.
الحريم
دخل الجد عليهم ورد السلام تقدم وجلس على الكرسي ونطق : الاسبوع الجاي
اول ماتكلم توسعت ابتسامة مها ، وكمل كلامه ونطق الاسبوع الجاي ملكه توق
انصدمت حصه ونطقت: وشو من قال هالحكي! ، البنت صغيره وهي اكيد مابتوافق؟
الجد بهدوء: بزوجها عشان عمها وبعدين زواج على ورق تطمّني يـ ام تركي
مها: يبه هو نفسه ولد الشوارع الي ماله اصل ولافصل ولانعرف وش نهايته
الجد: اي هو كلها فتره لين يرجع نايف وينقلع
مها ابتسمت ونطقت :طيب يبه مو حرام ليه تعطونه توق
حصه بحده: مهي توق الي تنجبر على شي ماتبيه
الجد: اقصري الشر ياحصه زواج ورق بس
طنشت حصه الموضوع ومشت متوجهه لغرفه البنات دقت الباب ودخلت
لقت عبد العزيز عندها ناظرت فيه ثواني ونطقت :ممكن نتكلم؟
هز عبدالعزيز راسه بـ ايه وطلع معاها
.
حصه : ممكن اعرف ايش الي قاعد يصير
عبد العزيز : تركي متهاوش هو ونايف مع رعد وطعنه نايف ورعد معيي يتنازل الا بشرط انه يتزوج اي وحده من خوات تركي ولا نايف
حصه : بنتي مالي معطتها احد ولا ارضى بـ ذا الشي
عبد العزيز ابتسم بسخريه: يعني انا راضي تبين ولدنا يعفن في السجون ؟
عالعموم الزواج بس على ورق يعني بتكون عندنا هو يبي يقهرهم بس
.
سعود
طلع من المجلس متوجه لسيارته لكن استوقفه صوت جده اللي نطق :وين رايح
التفت له سعود ونطق: بروح لسلطان بنروح مع عمي عبد العزيز لـ رعد يمكن يتنازل
الجد: ياويلكم لو تترجونه ورع الشوارع ذا
طلع سعود وسلطان وعبد العزيز متوجهين للمستشفى
-
.
المستشفى "رعد"
كان يناظر في سقف غرفته محد يعرف عنه شي ماله احد حتى فارس ماكلمه له اكثر من ٨ اشهر مايبي احد هو لو محد يحارشه كان وجوده مثل عدمه بس يثيرون اعصابه ومحد يسلم منه لكن هالمره طعنه نايف وتركي ومابيخليهم
قاطع تفكيره دخول عبد العزيز وسعود وسلطان اللي ردو عليه السلام
رد عليهم رعد : وعليكم السلام
عبد العزيز بهدوء: والله يارعد انت عاقل وفاهم ونحنا جايينك عشان تتنازل ماعندنا بنات لزواج
رعد :بكيفكم اجل حقي مالي متنازل عنه ونايف خله بالسجن وايام واعقبه (الحقه) بتركي
عبد العزيز:لكن انت خلك اعقل منهم واطيب هم ورعان وانت رجال واعي وكبير
ابتسم لهم بهدوء ونطق : الحين عرفتوا مكانتي
سلطان : نحنا جايينك عشان تتنازل
سعود: تناز يارعد وخل كل واحد فينا يروح بحاله
رعد: وانتم خليتو فيها حال؟ رايح بطريقي دايم وهم الي يتعرضون لي وساكت لهم احترام للمكان لكن هالمره ماني بساكت الا اذا وحده من بناتكم صارت حليله لي !
-
بيت الجد ابو سلمان
مشاري:حنين يابنت
حنين: هاه ياعذاب حنين وش تبي
مشاري :ياسلقه انا خالك احترميني
حنين : اخلص علي انا ماجيتك تعلمني الاحترام
كان فارس متكي بالجلسه ويسمع كلامهم ونطق :ياحنين ذا وجهه ماهو وجه احترام ماعليك سوي الي تسوينه انتي في وجهي
ضحكت حنين : طيب صقر وينه ؟ ماشوفه
فارس : توه قام من عندي
التفتت على مشاري ونطقت: وش رايك لو نطلع الليله بدون احد يدري
مشاري:الله يسلم لي عقلك احلفي
حنين : والله
رفع رجله مشاري ناوي يهبدها فيها لكنها قامت بسرعه ونطقت :الله يعين زوجتك والله انك نكبه صدق
-
صقر
وقف سيارته على جنب وحط راسه على الدركسون وبكى بأعلى صوته يبي امه مشتاق لها ، التفت وناظر المشروب على جنب مد يده بتردد وسرعان ما ابعدها واخذ يكرر دُعائه ، يارب احرمني لذه معصيتك يارب احرمني لذه معصيتك يارب احرمني لذه معصيتك
لكن مع الأسف ان الشيطان هالمره تمّكن منه وغلبه ، قفل على نفسه في سيارته وفتح جزء بسيط من الشباك
فتح علبة المشروب بيدين مرتجفه وهو يبكي يبي ينسى هو يلجأ له عشان ينسى
.
مع الأسف انه ترك الله ولجئ لـ الشيء الحرام والعبد المفروض يلجأ لربه فقط لكن صقر الجهل تمّكن منه ونسى ان عنده رب يلبي دعواته ويعينه.
.
بيت ابو عبد العزيز
بالجلسه الخارجية
نطق الجد : الكل الليله على الساعه ٨ القاكم متواجدين ابيكم
وانتم (يقصد العيال)يلا قوموا الحقوني على المسجد
.
توق
سمعت الاذان ودخلت الحمام اكرمكم الله وطلعت للبنات عشان يصلون
خلصو من صلاتهم على دخول جدهم واحفاده
تقدم فهد يركض ونطق :يابختك يافهد كل حبيباتك موجودات
تقدم الجد ونطق:ماقول الا الله يعوضني فيك ذا كبرك وتهارش يلا الحقوني كلكم بالمجلس
هديل تقدمت من فهد ونطق :فهودي ياعيوني زعلت؟
فهد:يعيون فهد ازعل من ايش
حور : ذا ماله احساس ماعليك امداه ينسى
فهد : اقول انتي هيه يالنتفه ياورعه اقصري حسك لأوطاك
سلطان : يلا يلا امشو جدي ينتظر
.
بالمجلس
الجد: انتم كلكم تعرفون وش سوا نايف وتركي بـرعد
حست برعشه بجسدها بمجرد طاري اسمه ، وقّف الجد يكمل كلامه ونطق: وافق يتنازل لكنه شرط وشرطه عند بنت عمكم توق
مها ابتسمت براحبة صدر ونطقت: وش شرطه يبه
الجد:خطب توق على سنه الله ورسوله
ماكمل كلامه من وقّف تركي بعصبيه ونطق :والله ماياخذها يعقب يبي يقهرني فيها
تقدم من توق ومسكها بيدها مبعدها عنهم ونطق:والله محد يجبرها على شي
الجده :ياورع اقصر حسك ماحد قال لكم اطمرو علاه وهو رايح بحاله
افهم الزواج بس على ورق يعني بتقعد معك في البيت
الجد : اساسا توق وافقت ولا لا ياتوق ؟ ليكون ترضين بسجن عمك واخوك
توق لفت عليه بحده ونطقت :انا مالي موافقه
شدد تركي من احتضانه ليدها ونطق من بين انفاسه:ماعليك محد بيجبرك
الجده : ماهو على كيفكم ياورع افهم تقعد معك بالبيت واختك موافقه وزواجها الاسبوع ذا على ورق وانتهينا
وكمل الجد يأيد الجده ونطق: هو اساسا يقول مايشرفني اخذ من عندكم ومن الحين اقول لكم كلكم زواج توق وبيتم على ورق !
توق: والله مأخذه
اخذها تركي وطلعوا متوجهين للخارج لكن ابوه وقفه من نطق : وانت ياتركي نهايتك اذا ماوافقت توق بتروح مع عمك نايف ،تحسب يوم انه سكت متنازل لا ياعين ابوك وتوق بتوافق ولا تضغط على البنت
ضحك تركي ونطق: نشوف
-
البنات
هديل : هو منجده ذا يبي يغصب البنت
لين :ماتعودنا عليه شفيه كذا
ايلاف : هو عشان عمي نايف في السجن ومقهور
حور: حتى ولو ليه مأخذ مننا نحنا ليه توق؟
سلاف: جدي اساسا يقول رعد يبي اخت نايف ولا تركي وعمي نايف شوفة عينك وتركي ماعنده غير توق
هديل: طيب ايش رايكم نروح لها نسليها شوي
اتفقو البنات وطلعو كلهم متوجهين لها
-
الحريم
مها: هاه ياحصه ترضين تعطين بنتك ورع الشوارع
حصه ناظرتها بحده:انشغلي بنفسك ماعليك فيها
الجده: لاتظغطون على البنت وهي موافقه انتي وتركي تعبون راسها يرضيك نايف له ف السجن ٤ ايام وبنتك رافضه باقي يوم وتوافق ماهو على كيفها هو على ورق وانتي يامها ابلعي لسانك
-
بجهه اخرى
طلع تركي من بيتهم بعد ما ترك توق بالبيت وتوجه لهم
سلطان : تركي اسمعني انا فكرت وقلت مادام انه على ورق ورا مانعطيه وكم شهر ونطلق
تركي: انت تعرف رعد كذاب يقول كلمه الحين وبعدين كلمه
سعود: اذا تبي الصراحه ياتركي انا اشوف ان الادمي رايح بحاله وانتم الي دايم تتمشكلون معه عشانه جاي وساكن عندنا بالديره من زمان وحكمتو عليه انه ولد شوارع
قاطع كلامهم دخول الجد اللي نطق: ابشركم ان توق وافقت
فز تركي من مكانه ونطق: انت ظاغط عليها انا اعرفها
ركض بسرعه داخل البيت يدوّر عليها
.
توق
بعد مُعاناه وإصرار وافقت مستحيل تخرب علاقه امها وابوها ويدخل تركي السجن مع نايف
قطع تفكيره دخول تركي اللي نطق بحده: انتي كيف توافقين صاحيه؟
توق : خلاص هو على ورق وجدي يقول وافقي وانا اطلقك منك
تركي: يضحك عليك وانتي مصدقه والله ماتاخذينه وانا حي
.
نرجع بالاحداث شوي
دخل الجد عند توق بعد ما تأكد من عدم تواجد تركي ونطق : بتوافقين على رعد انتي فكري فيها لو بيدخل تركي السجن بيتهاوشون امك وابوك وكل واحد يقول لثاني انت ماتعرف تربي واللوم كله عليك انتِ لأن الحل بيدك من بعد الله صدقيني بتوصل لطلاق ياتوق ونهايه محاوله القتل السجن والاعدام وعمك واخوك ماقصرو فيه وطعنوه انتي تحسبينه للحين يوم انه ماسجن تركي حباً فيه لا ياعين ابوك يبي يعطينا انذار زي ماسجن عمك بيأخذ اخوك انتهى من كلامه وسرعان ماطلع لجل تتأثر بكلامه وتوافق وفعلاً ، ركضت وراه بخطوات متسارعه ونطقت : جدي انا موافقه لكن عندي شرط انه ماياخذني ابقى هينا وبعدين يطلقني
ابتسم لها بهدوء ونطق : تيسر ان شاء الله لاتخافين الله معك وحنا معك
.
نرجع للواقع"تركي تحديداً"
يفكر كيف انه يبعد رعد عن توق يبي يلغي فكره الزواج من عقله
قاطع تفكيره فهد اللي نطق: ورع امش معي يلا ابوي مرسلنا للحلال
تركي:مالي رايح
فهد: ماشاء الله عليك والله بتروح معي تبوني اكرف لحالي والله ماكرف اساسا المفروض تقولون لي ياعمي فهد انت اجلس ونحنا نخدمك
اما بالنسبه لتركي يدري بأن فهد كلامه كثير لذلك سدد اذانيه ونطق بنرفزه:
بس بس بالع راديو خلاص اسبقني وانا جايك
-
بيت ابو عبدالعزيز
الجد: فهد عاني اعلمك ماتشوفك عيني انت والي معك الا الساعه ١٠ الليل ابغى انسم منكم ومن احساسكم (اصواتكم)
غيث:افا عليك ياجد طرده محترمه على الاقل احترمنا لو لا الله ثم احنا كان مالقيت من يشوف حلالك
الجد التفت عليه ونطق: لا يارجال تراني طالبك
ناظر فيه سعود وكتم ضحكته يعرف ان جده بيجيب العيد في غيث كالعاده
تقدم الجد من غيث ونطق: تعال وانا جدك بسلم على راسك والله انكم نعمه من الله
وقف غيث والابتسامه مزينه وجهه يناظر العيال وتقدم من جده
سلطان بهمس: لا لا ياربي ياغيث لا
وقف عند جده والتفت على العيال يبي يقهرهم لكن صقعه الجد على راسه بعكازه وقال :ياقليل الحيا جايني تبيني اسلم على راسك ماعاد به عيال
انفجرو العيال ضحك على غيث وحالته يعرفون ان الجد دايم بمضاربات مع غيث ودايم يلقم
ناظر فيهم كلهم ونطق :يمين بله لو ماتنصرفون من عندي ماخلي واحد فيكم صاحي واخذو لكم لبسً يدفيكم
طلعوا كلهم من المجلس متوجهين للحلال الي يبعد عن الديره بشوي
-
بالسياره
اصواتهم كانت شِبه طالعه بسبب مُهاوشتهم اللي يكون قدام مع فهد
قطع عليهم فهد اللي نطق بـ: عيب عيب انتم كبار والله لو ان نايف عندكم ليمردغكم كلكم اهم شي انا قدام
ناظره سلطان ونطق: اسمعو قدام بيكون انا وفهد وورا سعود وتركي وغيث
غيث: لا والله انا قدام وتركي معي وانتم اركبو ورا
صقعه فهد على راسه ونطق:عيب احترمنا انا اكبر منك وكلامي يمشي ويلا زي ماقال سلطان
دخل غيث السياره يتحلطم وهذا حالهم دايم اذا بيروحون مكان
انتهى 🌷