بالليل -
عبدالعزيز وهو يدق بواري ونزلت شهد وركبت وراه وقالت بصوت هادى:سلام عليكم
خولة التفتت:وعليكم السلام يهلا
شهد بغصة:اسفة تاخرت
جود: فيك شي
شهد وهي تمسح دموعها:لا
خولة بقلق:تبكي يابنت وش صار
شهد:دخل شي بعيوني
جود بخوف:بنت انطقي احد ضايقك
عبدالعزيز :بنات !!! خلاص لاتضغطو عليها إذا تبي تعلمكم
حضنت جود شهد وابتسمت شهد بهدوء
وصلو جرير ونزلو البنات وناظرهم عبدالعزيز:انزلو شهد خليك دقيقة
ناظروه خواته بصدمة وقال:خير هيا
نزلو خولة و جُود مستغربين من عبدالعزيز
شهد نزلت عيونها وهي مستحية منه
عبدالعزيز التفت: يا ششَبيه القمر عيونك ما خلقت الدموعع
ناظرته بهدوء وهي تبتسم وراء النقاب
عبدالعزيز ناظر عيونها وسكت دقائق وهي توترت من نظراته و أستغفر ونزل عيونه:بطلبك طلب
شهد:لبيه
ابتسم بهدوء:ابي اشتري لخواتي هدايا وما اعرف تساعديني
شهد:من عيوني وش في ببالك
عبدالعزيز: خولة جهازها مرة قديم وخربان وقلت اخذ لها و لـ جود كمان عشان ما تزعل
شهد:أن شاءالله ندخل ونشوف
عبدالعزيز:خليه مفاجأة
هزت راسها ونزلو
خولة تغمز له:وش في
عبدالعزيز يعدل تيشرته:ولاشي ملاقيف امشو بس
دخلو وشهد كانت وراء اخر شي خرجت جوالها وصورت عبدالعزيز بدون ما ينتبهون لها
عبدالعزيز:وش ناقصكم خذوه باخذ لفة بقسم الاجهزة
جود بدلع:خذي لي لاب
عبدالعزيز:لا يشيخة بتطفروني وبسك دلع
ضحكت بهدوء بس اخذت على خاطرها
شهد:عادي اروح معاك ودي اغير جهازي
عبدالعزيز:تعالي
-
راحو لقسم الاجهزة
شهد بعفوية مسكت يده:تعال ذا الآيفون مرة حلو
عبدالعزيز تصنم وناظر يدها بيده ونبضات قلبه تتسارع واخذ نفس وناظر معاها :اي حلو وش الوانه
شهد :في اخضر و بنفسج
عبدالعزيز:ناخذه
شهد بضحكة:ع طول كذا ناخذه ياخي انتم العيال رهيبين
عبدالعزيز بطقطقة:لييش تبغونا نلف المكان كله ونشوف كل الأجهزة ونرجع لاول جهاز نقول خلاص ناخذ ذا زيكم
ضحكت:المفروض ازعل بس معاك حق نحن البنات كذا ياخي
ضحك بهدوء واخذ جهازين ايفون بلونين مختلفين واخذ لاب لـ جُود
لف شافها تناظر الساعات:شهد ودك بـ شي
شهد تقدمت:لا لا مابي كذا اتفرج
عبدالعزيز: معليك من الحساب
شهد:لا لا بشوف هنا كفرات وانت حاسب
راحت و وناظر ساعات ابل
اخذ منه اثنين وراح حاسب
رجع للبنات وكانت شهد سابقته للبنات
-
زاهد رجع ظهره الكنب:يوه علوش يتعب
علي:تراكم عليك عشان كذا
زاهد:طيب ذا حق الكيمياء مو فاهمه
علي:بجيب قهوة وارجع افهمك
زاهد:تمام
علي دخل المطبخ:سروب شتسوي
سراب بابتسامة:اسوي اكل اسويلكم معاي ؟
علي:لا قلبي بس قهوة
هزت راسها بدات تسوي قهوة وناظرته:علي
ناظرها:لبيه ؟ ناقصك شي قلبو؟
هزت راسها وحضنته:شفت الدفاتر الي طلبتها وجبته لي ومعاه الورد شكراً يا احلى اخ
باس خدها:العفو يا تؤامـي اخذ منها القهوة و رجع لـ زاهد
زاهد:جاء بوقته تسلم
علي:عافيه
زاهد شم من علي ريحة عطر نسائي وابتسم من تذكر انه اكيد من اخته
-
شيخة وهي تكلم منيرة باتصال:من جد حامل
منيرة بابتسامة:ايه بشهر الثاني
شيخة بغيرة:مو كانك كبيرة
منيرة باستغراب:وش دعوه شيخة ؟
شيخة بابتسامة بدون نفس:امزح ياختي مبروك الله يتمم على خير
منيرة بابتسامة: آمين تسلمي
شيخة:وين شهودة
منيرة:والله راحت مع عزيز وخواته مشوار
شيخة بصدمة:ايش !! وانتي عادي عندك تروح معاهم؟
منيرة باستغراب:وش فيها عادي مو احد غريب
شيخة:لو منك ما اخلي بناتي يروحو عندهم ولا يتقربون منهم وهم لوحدهم ما تدرين وش افعالهم بنتهم ذيك خولة قالو كانت تبيع ممنوعات لو كانت تتعاطى و خلت شهد زيها اعوذ بالله
منيرة بخوف:لا ما اظن البنت وش زينها
شيخة:لو منك ما اخليهم
منيرة:يا شيوخ الله يهديك عيب تتكلمي عنهم كذا وش حلاتهم ومحترمين ومتربيين الف مرة يا اختي
شيخة:ما اثق فيهم والله
-
- غرفة افراح -
ابتهال:فوفه ما لاحظتِ ماما ماتحب خالتي علياء ؟
افراح:لا عادي
ابتهال: إلا لاحظت حتى كمان لمن كنا نسولف عنهم كانت معصبة وتسلك لنا
افراح:ما اتوقع انتي تخرفي
ابتهال شمقت:وش شايفتني عجوز
افراح تطنشها وتنزل المطبخ وسماعات باذنها تسمع اغاني وتسوي اندومي
- بالكوفـي -
راح عبدالعزيز يطلب لهم وجاء بطلبهم
عبدالعزيز:اي اكتملت الطفرة
ضحكت خولة:انت كريم ونحن نستاهل
عبدالعزيز:اعطيكم عيوني
شهد تناظره بابتسامة لـ حنيته
التفتو البنات من سمعو موظفين بنات يقربون وهم يصفقون وحطو باقات الورد قدام جود و خولة
ابتسمت شهد وهي تصورهم والبنات ناظرو عبدالعزيز الي يصور خواته كمان بس بدون شهد يرسلها لامه
جود نزلت دموعها:عزيز
مسك يدها:وش هالدموع يعيون عزيز
خولة بدموع :ياخي شكراً وربي ياخي مافي منك اثنين
-
قام وحضنهم وباس راسهم وقال:به هدية والله مدري كيف دخلوها بين الورد بس شوفوها انتم
ناظرو البنات هدايا وضحكو من شافو ايفون واخر اصدار
شهد مسحت دموعها من الضحك وعبدالعزيز يناظرها بهدوء وابتسامة
قامت جود وهي تحضنه وتبوس خده وهو يضحك
خرجو من الكوفي مبسوطين ورجعو البيت نزل خواته ونزلت شهد معاهم
وقف ينتظر لين ما دخلت شهد البيت واخذ نفس:وش صاير لك يا عزيز ليش تشوفها وتقلب عزيز ثاني وش هالمشاعر ؟وش سويتي فيني يا اخت وضاح
دخل البيت وسلم على سارة:وينك اليوم ماكنتي في على الغدا
سارة:يزين الي يشتاقون لي والله صحبتي عزمتني ورحت لها
عبدالعزيز:اشتقت للنتفه ذي
سُكَرة:عزيز وركضت تحضنه
عبدالعزيز باس خدها:باخذها معي بطلع الغرفة
جد:اجلس معانا
عبدالعزيز: ودي بس تعبان ابي ارتاح
جدة:رح وانا امك
عبدالعزيز:تصبحون على خير
الجد :وانت من اهله
طلع وهو يلعب سُكَرة وهي تضحك معاه
علياء:ايه وش سر السعادة
جود وهي تحط ورد على طاولة و توريها الجوال
سارة:تتهنو يا حبايبي
خولة:يحبي لعزيز معوضنا عن كل شي هو اخونا وحبيبنا و ابونا
علياء ابتسمت من تعلق خولة بـ عبدالعزيز الفترة وتدعى دايم تكون كذا على عبدالعزيز صدت من غروقت عيونها بالدموع قامو البنات حضنوها وضحكت تبادلهم
-
جلس على عبدالعزيز ع السرير وصور سُكَرة بحضنه وارسلها للقروب برسالة ' اخذت مكانك زاهو '
صقر:يوه عضها عني بالله
افراح:اي بالله تكفى عني كمان
عبدالعزيز:بالاحلام يا بابا
وتذكر شهد ودخل عندها بالخاص وأرسل بتردد:عادي اتصل ؟
-
سمعت صوت الرسالة وشافت من القروب ' كلنا في الهوا سوا '
قفلت وهي متضايقة ماودها تكلم احد انتبهت لـ رسالة عبدالعزيز بالواتساب وخاص
جلست على السرير وتوترت من رسالته وعضت شفايفها
ارسلت:في شي ؟
عبدالعزيز بتوتر ارسل:لا بس سُكَرة تبي تكلمك
ضحكت بهدوء و دقت وشبكت سماعات
عبدالعزيز:سلام عليكم
شهد:تونا كنا مع بعض
عبدالعزيز بضحكة:طيب بتحرجيني؟
شهد بضحكة وهي تخفي دموعها:لا اسفة
عبدالعزيز لامس غصة بصوتها:شهد فيك شي ؟
شهد :لا
عبدالعزيز:دقايق لا تقفلي
اخذ شوكلاتة كانت معاه وعطاها سُكَرة وشالها وطلع شاف سارة :سوير خذيها عندي اتصال
سارة:كنت جاية اخذها وقت نومها الحين
نزل وباذنه سماعاته:ايه قولي وش فيك ؟
شهد وهي تكتم بكاءها :عزيز
عبدالعزيز بهمس:شهد صرت اعرفك زين ، مايهون علي اشوفك زعلانة وتبكي ، احد مضايقك؟
شهد :من ماما
عبدالعزيز فتح سيارته وجلس فيها:من خالتي ؟
شهد:تخيل ماما حامل ؟
عبدالعزيز بابتسامة:منجد مبروك
سكتت وقال بهدوء:وانتي متضايقة عشان هالموضوع ؟
شهد:اي
ابتسم من عرف انها غارت:ليش ماتبي اخ صغير
شهد نزلت دموعها اكثر:عندي وضاح و صقر مكتفية فيهم مابي شخص ثاني
عبدالعزيز بحنية:الشخص الثاني يابنتيّ بيكون اخ او اخت لك واذا خايفة عشان ياخذ مكانك لا تفكري كذا بالعكس
شهد انسدحت ونزلت دموعها على طول من نطق بنبرة حنية كلمة ' بنتيّ '
كمل:مكانك بقلب خالتي وعمي محفوظ تعرفين وش كثر يحبونك ؟
شهد:بس اعرف حيجي البيبي وياخذ كل الدلع مني وانا اكون ع الرف محد يناظرني
عبدالعزيز:شهد تدرين لمن امي علمتني عن حملها بـ خولة اني مثلك تضايقت بس شوفي للحين مكاني نفسه بقلبها ، مافي احد ياخذ مكان احد لا تزعلي امك بالعكس فرحيها وانبسطي عشانهم ، بيكون عندكم طفل جديد بنور عائلتكم
شهد بابتسامة وهي ارتاحت من كلامه:عزيز
عزيز بابتسامة:لبيه
شهد: شكراً منجد ارتحت بكلامك
عبدالعزيز:ولو شهد مايستحق تزعلي عيونك الحلوة امسحي دموعك يالله
ضحكت ومسحت دموعها:وش عرفك ابكي
عبدالعزيز:قلبي علمني
شهد بتوتر:اي وش بعد
عبدالعزيز: ابد والحين تاخر الوقت نامي وارتاحي
شهد:اوك وانت بعد انتبه لنفسك
عبدالعزيز:وانتِ بعد يعيوني وقفل
ضحكت بتوتر وحطت يدها على قلبها
عبدالعزيز اخذ نفس وهو يقول: هد وش فيك عزيز هدي تكشف نفسه بتقول خفيف؟ ضحك:طحت على وجهي والله
نزل من سيارة وناظر جهة شباك غرفتها وشافها قفلت النور وابتسم بوسع ثغر
انتبه لسيارة وقفت جنب سيارته
نزل زاهد من سيارة علي:والله تعبتك معاي ياخوي
علي: تعبك راحه ياخوي
عبدالعزيز قرب : سلام عليكم
زاهد:يهلا … عزيز اعرفك علي صديق روحيّ علاوي اعرفك عبدالعزيز ولد عمي
علي:يامرحبا اي حكيت لي تشرفت
عبدالعزيز:انا اكثر اي وين كنتم سهرانين
علي بضحكة:كنا ندرس والله وبالبيت
عبدالعزيز بضحكة:تمام صدقت موفقين
علي:تسلم يالله استوعناكم الله
حرك و مشى
زاهد لمح فهد من بعيد:عزيز دقائق
مشى بخطوات متسرعة لسيارة فهد
فهد نزل شباكه:خير
زاهد:مضيع بيتك بالاخ
فهد:زاهد حركاتك مب عاجبتني
زاهد:مو ملزوم اعجبك يلا مناك بس
فهد:طيب انا وانت والايام بيننا
وحرك سيارته راح
عبدالعزيز:منهو ذا
زاهد:ابن كلب يدور حرش
عبدالعزيز:فكك منه وابعد عن المشاكل
زاهد: أن شاءالله وراح لبيته
اخذ عبدالعزيز نظرة سريعة لبيوت عمامه وتطمن أن سيارات العيال كلها موجودة و دخل البيت
-
- يوم الجمعة -
خرجو العيال من المسجد بعد صلاة الجمعة
عبدالعزيز شاف عربية فواكه:اسبقوني وانا جاي
راحو كلهم متجهين بيت الجد لانهم متعودين الغدا يوم الجمعة بيت الجد
صقر تقدم من عبدالعزيز:وش تسوي
عبدالعزيز:اشتهيت جح
صقر:جدي عشقه وقت غدا جمعة يكون في جح
جلسو يختارون الافضل
صقر: شف انا باخذ واحد وانت واحد كل واحد وخبرته نشوف حق مين الكويس والحلو
عبدالعزيز:تدور فرص اكيد تبي شي ؟
صقر:ما افوت اي ابي نطلع الليل مع العيال
عبدالعزيز:ع هالخشم
صقر تقدم وباس خشمه:عليه الطيب عزو
عبدالعزيز:باخذ موز وبرتقال
صقر:باخذ فراولة لـ شهد
عبدالعزيز:وش رايك ناخذ العربية كلها
صقر بضحكة:ما تقصر
ضحك وضربه على كتفه:مت حر يالله
اخذو جحين وكرتون برتقال وموز
اخذ عبدالعزيز علبتين فراولة بدون ما ينتبه صقر ومشيو للبيت
بالمطبخ كانت منيرة جالسة وتحاول تساعدهم بشي بس يمنعونها وللحين شهد ما كلمتها
افراح:خلاص منور خليه علينا
شيخة ضربتها على راسها:منور ليش هي صديقتك ، خالتك ياهبلة
افراح: ماشاءالله قمر اربعطعش
ضحكت منيرة:لا تبالغي يابنت
ابتهال:وهي الصادقة حتى خالتي علو
علياء تناظرهم وهي تضحك
شيخة تناظرهم بعصبية
عبدالعزيز:يمه
تحجبو وقالت علياء:ادخل عزيز
دخل ونطق:جمعة مباركة
نزل مع صقر الفواكه وتقدم عبدالعزيز وباس راس علياء
منيرة:تقبل الله ولدي
عبدالعزيز بابتسامة:منا ومنك ومبروك يخالتي الله يتمم عليك
منيرة بخجل:تسلم
عبدالعزيز: جبت جح و فواكه
اخذ الفراولة وحطهم بالثلاجة ونطق:ذي حقي
راح المجلس
دخلت شهد مع جود و فرح المطبخ:اساعدكم ياحلوين
منيرة:اي بنتيّ قطعي الجح مع البنات
هزت راسها بهدوء وبدأت تقطعهم تفكر كيف تكلم امها و تراضيها ما انتبهت والسكينة جرحتها كان جرح صغير بس عميق
فرح سحبتها للمغسلة وغسلت يدها
منيرة فزتّ:بسم الله عليك بنتي يوجعك
شهد وهي تحاول توقف الدم:ينزف
اخذت جود علبة الاسعافات ولفت جرحها: اجلسي انا اكمل عنك
جهزو البنات الغدا للرجال وجاء زاهد وعبدالعزيز اخذو صحون الغدا
وبعدها جاء عبدالعزيز المطبخ وماكان في الا جود و شهد والبقية خرجو يتغدون
عبدالعزيز بخوف:بسم الله عليك وش صار ليديك
شهد بهدوء:جرحت وقت كنت اقطع الجح
عبدالعزيز:اخذك للمستشفى
شهد:لا لا جرح بسيط
جود :فليتها يالاخ
عبدالعزيز بتوتر: بنت عمي يعني ما اخاف عليها تراها من اهلي
ابتسمت بخجل ونزلت راسها وضحكت جود:يالله خذ الفواكه لا يفصل عليك جدي
عبدالعزيز:طيب اعطيني جاك مويا
راحت جود وانحى وهمس باذن شهد:بالثلاجة في فراولة خذيها لك
اخذ سلة الفواكه وعلى طول خرج
جود أخذت جاك المويا:بسم الله وين راح
شهد بتوتر:خرج جدي ناداه
جود:تعالي يالله ناكل ميتة جوع
- بعد الغدا -
جلسو يسولفون العيال بالمجلس و البنات بالصالة والبقية كل منهم راح بيته ياخذ قيلولة
افراح:وش رايك نروح العصر منتزه
جود وهي ع جوالها:حلو ومغيم الجو احد يكلم العيال
فرح:خالد حيهاوشني
افراح:وانا عمر ما اكلمه
شهد قامت:انا اكلمهم بس احد يروح معي
خولة فزت وهي تبي تشوف عمر: انا
شهد تسحبها بهمس:واضح مشتاقة للحب
خولة بهمس:لا تسالي الشوق واصل حده
ضحكت وعدلو جلال الصلاة ودقو الباب
كانو العيال يلعبون بلوت وهم يشربون شاهي
شهد دخلت:سلام عليكم
العيال:وعليكم السلام ورحمه الله وبركاته
خولة تناظر عمر وابتسم من شافها تدوره بعيونها
شهد:جمعة مباركة وتقبل الله ياحلوين
روآف:من الاخير وش تبون
خولة تضحك بهدوء:نبي نخرج منتزه طفشنا من الدوامات
عبدالعزيز بنذالة اتكى على خالد:وش رايكم يا عيال نروح معاهم ولا نروح لطلعتنا
وضاح:اشوف ما نكنسل طلعتنا ' اشر للبنات ' وانتم اجلسو
شهد بقهر:الله لا يحوجنا لكم انا اكلم جدي
ضحك عبدالعزيز وقال:تمام نروح منتزه
زاهد:يوهه عاد جمعة وحيكون زحمة
عمر:لا…اعرف لكم مكان رهيب وهادئ
خولة:وش قلتو
عمر:ابشري تجهزو ونحن نكلم ابوي
عبدالعزيز:الجد علي
وضاح:استلمت اصعب مهمة
عبدالعزيز:معليك المهم يبنات لا تقصرون بالصواني
خولة:ما تتغير تحب بطنك
خالد:الكل يحب بطنه
شهد:من عيوني ابشرو
صقر:ماتقصرو حفيدات الشيخ خليف
خرجو البنات بحماس تخبر البنات
جود:وش نسوي
شهد:نهبد اي شي يالله على المطبخ يالله
وكل وحدة راحت تسوي لها صنف
- ساعة خمسة ونص -
وضاح:كيف نتوزع
خالد يقفل شنطة:اغراض حطيتها بسيارتي معي جدة وامي و ابوي و فرح
عبدالعزيز: دقيقة وضاح انت خذ امي و امك وعمي وشوف من زوجة عمامي وانا معي البنات وعمر البقية معاك
عمر:تم
خرجو البنات كل وحدها معاها بيدها صينية حلى أو معجنات
زاهد:يهلا بالحامل والمحمول
شهد تناظر عبدالعزيز:لجل عين تكرم مدينة
ابتسم من نظراتها وقال: البنات يالله بسيارتي
الجد:انا ابي اروح معاك
عبدالعزيز بهمس: ترحمو علي يعياال
وضاح يضحك :يالله يالله
وكل منهم تقسمو ولان سيارة عبدالعزيز كبيرة كفو البنات براحة
فرح:خالد الله يخليك ابي البنات
عبدالعزيز:ياورع خليها تجي
خالد:مايكفي
عبدالعزيز:يكفي يكفي فروح تعالي
شهد تناظره بغيرة وبهمس:فروح !!!
ركبت فرح بسيارة عبدالعزيز وعمر حرك وكلهم وراه
خولة:عزيز شغل لنا شي
عزيز:وش تبون
جود:حط محمد عبده
الجد: وشو ذا لا حط ماجد المهندس
شهد بحماس وضحكة :اللعببب ياجدي
جد ضحك:اص انتِ وياها خلونا نروق
افراح بهمس: جود كلمي عزيز يوقف عند سوبر ماركت
هزت راسها وقالت:عبود نبي سوبر ماركت
عبدالعزيز:شوله سوبر ماركت والاغراض الي سويتوها ماتكفي.
خولة: ياخييي مرة وحدة لا تسأل عن شي نبي مفرحات
تنهد:الله يهديكم تمام
وقف عند محطة بطريقهم وارسل للعيال انه بيوقف محطة
التفت وقال:مو كلكم تنزلون
افراح وابتهال و جود وسارة كانو بالمرتبة الاخيره
بينما فرح و خولة وشهد معاهم سُكَرة بالمرتبة الثانية
.
' انتهى ' 🤍.
أنت تقرأ
مَا الذِي بعَيناكِ لتغلبِنيِ هكذا باستمرَار
General Fictionكاتبـة رَوان الانستا: rlliie44 البطل - عبدالعزيز - بيوم ادافع عن امي يوم ابوي يضربها واتسبب بقىًله وسبب هالحادثة تغيرت حياتي - البطلة - شهد - اكتشفت بعد ١٨ سنة سر خطير يدمر حياتيّ وش مصير الاثنين ؟!
