.
جود:وش الحكم قولي!
سعاد:يمكن يسحبون شهادته المهنية!
وقفت بعدم تصديق جود و اخذت اغراضها تخرج
خرجت تأخذ نفس تشوف خروج سعود من غرفة المدير و معاه المدير و يمينه المحامي الخاص بالمستشفى
طاحت عيونه عليها و توسعت عيونه بصدمة من انتبه لها تبكي و وقوفها قدام غرفة سعاد و شك بالموضوع وانها عرفت بموضوع قضيته
صد يتكلم مع المدير و ارتفعت نبرته من سمع كلامه البذيئ له
المدير بحدة:تحمل اهمالك! هذه نتيجة استهتارك
سعود بحدة:انا ماسويت الا واجبي
المدير:واجب! اي واجب وانت بترت رجل المريض!
سعود:مريض بيفقد حياته بسبب حالته! انتظر والله عشان بس يصحى و استشيره!
المدير:ادعي انك تكسب القضية و ماتطلع منها خسران بدون شهادتك
تركه يدخل غرفته و مشى المحامي
اخذ سعود نفس و لف من قربت منه و مسكت يده
ناظر عيونها من خلف النقاب عرف من احمرار عيونها أنها بكيت كثير
جود بعتاب:ليش!
سعود ضمها لصدره و شدت تتمسك بثوبه و تبكي بهدوء:ليش ماقلت لي!
سعود مسك يدها يدخلون غرفته و قفل الباب
نزلت نقابها ترميه على الكرسي و مسحت دموعها تمسك نفسها ما تنهار
لف عليها يضمها من الخلف اخذ نفس عميق و زفره وهو يشابك يدها بيده:ليش البكى ياجودي!
جود نزلت نظرها ليدينهم سوا:ليش ما خبرتني! ادري من غيرك احسن!
سعود:ماحبيت اشغل بالك مع جامعتك ولا ابيك تشيلين همي
جود ناظره من الجنب:اذا ماشلت همك اشيل هم مين! سعود وربي
قاطعها من انحى يقبّل عنقها و همس:تعبان جودي
جود:لا تكلمني زعلانة
ابتسم يشدها و ضمها و اخفاها بحضنه و ضحكت بخفة:دودي!
ضحك بخفة:خلاص دام فيه دودي راضيتي ، نطلع
تنهدت تعدل حجابها و لبست نقابها يخرجون
شايل هم القضية و المحكمة والحكم الي بيصدرونه بحقه بس يتصرف بعدم مبالاة عشان مايبي تزعل و تتضايق معه
تشوف نظراته لها و ابتسامته وهو يسوق تعرف نظراته زين مهماً حاول يوضح لها انه كل شي بيكون بخير و انه مو مهتم للقضية الي رفعت ضده بس مكشوف قدامها مهماً اخفى بداخله و كتم على نفسه تعرف وش فيه و ايش يفكر و شايلة همه و جلست تدعي انه يكسب قضيته وإلا لو سحبو شهادته منه بيدمر و ينهار
-
- مرور زمني -
- حال ابطالنا نفسه تجاهل عبدالعزيز لـ شهد مستمر ، علاقتهم صارت باردة و رسمية ، تفهمت شهد موقف عبدالعزيز لأن حطت نفسها للحظة مكانه بيوم زواجهم لو ينرسل لها صورة له مع غيرها قد ايش بتنقهر منه ، حاولت بكل الطرق يتفاهمون و حظها الي كان بيوم من الايام مروق و تكلمو و كانت واثقة انه بيتصالحون ولكن انقلب كل شي خلال ثوان وقت رن جوالها برقم مجهول و فتح عبدالعزيز الإتصال و كان أوس
- وضاح و فرح علاقتهم من احلى لاحلى مع حسن الي يكبر كل يوم و صار بعمر الـ ٤ شهور
- نايف و ابتهال يجهزون لعرسهم بهدوء و بردت علاقتهم من اهماله لها بسبب ضغط الشغل و موضوع كادي الي للحين ما تخطوه و انشغاله مع اهله
- سارة و مشاري مع سُكرة عائلة لطيفة دائماً و يحاول فيها تبتعد عن موانع الحمل لكن رافضة الموضوع حالياً
- روآف و بيـان بعد عرسهم و شهر العسل رجعو لـ دوامهم يشتغلو كل واحد منهم بمحا و يلتقون بالبيت نهاية يومهم ، يأست من عدم حملها و انكسارها من رفض الي يجيها من كل دكاترة " معجزة تحملين ، حالتك صعبة ماتحملين ولا بأي طريقة علاج "
- وباقي ابطالنا على نفس الحال -
-
- اخر يوم بـ شعبان -
زفرت علياء بتعب تجلس مع شيخة و فاطمة و منيرة:يا الله وأخيراً خلصنا فرزنة !
منيرة:بس ما بيكفي لازم نفرزن اكثر
فاطمة:اذا قربو يخلصون نرجع نسوي ماشاءالله نحن كثيرين ويد بيد نخلص
ضحكت علياء بخفة:الايام تمشي بسرعة
شيخة:اي والله حد يقول مر سنة على الحريق
فاطمة:يوه ماينعاد هاليوم يارب
علياء:ولا كمان اذكر يوم كشف الحقيقة و جينا هنا الرياض ، محد معرس الحين ماشاءالله كلهم فاتحين بيت و متزوجين بقي صقر و زاهد و خالد
ضحكت فاطمة:اي والله صادقة
دخلت فرح بدموع عليهم المجلس:يمه
فزت فاطمة بخوف تمسك يدها تجلسها وتاخذ حسن منها:ايش فيك
فرح ببكى:يبكي من الصباح مو عارفة كيف اهديه
منيرة لفت عليها تناظرها:وانتي ليش تبكين؟
فرح:مو هو يبكي و بكاني معاه
شيخة مسكت يد حسن:يمكن جوعان
هزت بالنفي:لا توني ارضعته وغيرت له عجز يسكت!
علياء:يمكن اخذ برد
فرح:مستحيل!
فاطمة:يابنتي يمكن ما دفيتيه زين وبرد تصير
شهقت تبكي اكثر:وضاح لعبه بدون مايكون عليه منشفة بعد ما تروش
مسكت منيرة راسها بصدمة:ياربي اطفال انتم ؟
فرح:بيكون بخير ماما صح !
هزت فاطمة راسها:اي يا بنتي ماعليك
ارسلت منيرة لـ صقر اسم الدواء وهو بدوره كان خارج من المسجد بعد صلاة العصر اخذ الدواء من الصيدلية وتوجه للبيت
-
دخل المجلس واخذت منيرة الدواء واعطت حسن الصغير وفرح تمسح على شعره وبعد دقائق بدا يهدأ وينام
فاطمة:خلاص بنتي مافي شي
فرح باست يده الصغيرة:ابوي انا
ابتسمت فاطمة:اهداي مافيه شي
فرح:خفت والله اول مرة يمرض!
منيرة:تصير كثير بالفترة مغص وحرارة يا الله روحي ارتاحي
طلعت وهو بحضنها و رجعت الشقة
نيمته على سريره بجانب سريرهم غيرت ملابسها تلبس بجامة مريحة و انسدحت تناظره كيف نايم مرتاح
لفت على دخول وضاح وقرب بخوف انحى يبوس راس حسن:وشفيه؟
فرح بعتاب:قلت لك لا تلعبه وهو ما عليه حتى منشفة وش قلت ولدي قوي زي ابوه ما يصير عليه شي
عض شفايفه بندم:اسف والله ماتوقعت يصير كذا
تنهدت تمسح دموعها وقرب يحضنها باس عنقها:احلى ام والله ريحة اطفال يـا ناسسوو انا
ضحكت بخجل وحاوط وجهها بيدينه يبوس خدها:راضيناك والله اسف ماتوقعت كذا يتعب على طول
فرح:حبيبي لسع طفل رضيع ما يتحمل
هز بالايجاب:وعد ما اعيدها
ابتسمت تضمه بتعب:وحشتني
مسح على شعرها بحنية:تعبانة مرة
فرح:مانمت زين ، صاحية من الفجر
ابعد ينزل ثوبه يعلقه وانسدح على سرير وحضنها لصدره:نامي بحضني
غمضت عيونها براحة و حست فيه يمسح على شعرها ابتسمت بخفة ونامت و بعد دقائق من تأمله لها غفى
-
- عبدالعزيز -
خرج عبدالعزيز مع خالد من سوق والابتسامة تزين ثغره يشوف اجواء الرمضان واستعدادات الناس و فرحة الكبير و الصغير لـ شهر الخير
ركب السيارة ولف لـ خالد:ولد العم مسرع تعبت
خالد ضحك:يرحملي اهلك كارفني من صباح ربي وبتغرب الشمس تقول مسرع تعبت! خليتني اتكسر وانا اشيل كراتين التوت و خيش الرز و خليتني احمّل اسطوانات الغاز مسوي خير قالك كل اسطوانات الغاز انا اعبيها ليت كل واحدة عبئ اسطوانة بيتهم و اريح
انهار عبدالعزيز من الضحك يسمع حلطمات خالد و صد من خفت الزحمة يحرك للبيت
مد لـ خالد القائمة بعبط:شف وش النواقص!
خالد قرفط الورقة:مافي شي ناقص للمرة المليون اقراها انحولت عيوني سكر ملح تانج و و و و خلاص كلشي جبناه
ضحك عبدالعزيز يدخلون الحارة و دق بواري لعيال الحارة الي يزينون الحارة و صقر و زاهد معاهم يعاونونهم
وقف سيارتهم ينزلون قدام البيت
ضغط ضغطة مطولة على بواري وخرج كل العيال
روآف:يا اهلين بالكرف
جاهم زاهد يرفع ثوبه لخصره:كرف رمضان لها نكهة خاصة
خالد:اي خاصة مرة روح مع عبدالعزيز ويكرفك وقول بعدها نكهة خاصة
ضحك عبدالعزيز ينقلون مشتريات الرمضان للحوش
والجد والاعمام يشرفون عليهم
عبدالعزيز يمد للجد القائمة المقرفطة:و ذي قائمة كل الاغراض
حسن:ولدي مو بالغت يعني ١٢ كرتون توت وش ؟.
الجد:اي بالله مو كثيرة
عبدالعزيز:جدي كل سنة انت تطلع كرتون هدايا للجيران و مساعدة للمحتاجين وانا اخذت زيادة ، زحمة بعدين مين يروح لو نقص بالبيت
الجد:زين مافعلت يالله ما يحتاج اعلمكم وش تسوون زي كل سنة ولا ناسيين عشان العام ماسوينا
حسن بضيق:صدق العام مشى رمضان ولاحسينا فيه
عبدالعزيز:هالسنة بس بنحلل امه وتحسون فيه
ضحكو و صقر رفع ثوبه بحماس يجهزون كراتين للجيران من كل شي
علي زفر بتعب ينزل خيشة الرز:ياربي الاجر ياربي
ضحك زاهد يقفل الكرتون وبداو يوزعونه للجيران ويستقبلون التهاني والتبريكات للـ رمضان
وقف مشاري قدام البيت و طلع له عبدالعزيز ونزلو الخواريف وربطوهم بالحوش
الجد:يعطيك العافيه والله تعبناك بس تدري عبدالعزيز وخالد نزلو السوق وعمر بالشغل ما اعتمد على البزارين
روآف بصدمة:بزارين افا يا جد
الجد ناظره بحدة:اي اجل نازل بشورت وشيشرت ذا
حك لحيته روآف باحراج:شسوي طفشت من الثوب وبعدين جدي اسمه تيشرت مو شيشرت
الجد:اعقب ترد علي
روآف بهمس: بدأت نفسيات الصيام قبل لا ندخل رمضان
ضحك زاهد على الصامت و لف يسوي نفسه مشغول
الجد ضرب طرف عصاه بـ كتف زاهد الي فز:تضحك على الهزاز تقل رقاص
انهار ضحك يركض بعيد:اسف يا شيخ خليف
مشاري ضحك بخفة:ابد متى ماتبيني اتصل علي وبجيك ابو الغالية انت
الجد بحب له:الله يخليك لها و لبنتها يارب
مشاري ابتسم يهز راسه:آمين
اشر للكرتون الجد:وذي كرتون لك و علاوي سعود لاتنسون حقكم
سعود باس راسه:تسلم جدي
علي فز يبوس راسه:مبارك عليك الشهر جدي و الله يتقبل
ابتسم الجد:آمين ولدي ومن الجميع يالله تجهزو عشان تذبح.ون الأضحية
دخل عمر:سلام عليكم
ردو السلام و نزل برهيهة:اغير و اجيكم
الجد بحنية:لا ولدي اكيد تعبان
عمر:لا بجي عبدالعزيز وخالد يرتاحون والبقية انتم استعدو
دقو له صقر و زاهد وعلي تحية ضحك:استريحو عسكر
ضحكو العيال يستريحون و تركهم عمر يدخل البيت
حط الاغراض الي جابها على السرير وطلع لنفسه ملابس عشان يرجع تكون كل اغراضه جاهزة
لبس قميص حق البيت ونزل و لقى العيال جاهزين و مجهزين عدة
ذب-ح الخوريف وسلخ.هم وهو يشتتم بـ العيال
حسن:صقر زاهد يرضالي عليكم خلونا نخلص لا تستهبلون
صقر هز راسه يهجد وقطعو اللحم وجلس الجد يوزعها
الجد:قم يا زاهد اعطى هالكيس لـ جارنا حِمِّيد
زاهد:عاد ماشاءالله العم حِمِّيد باقي شوي ويدخل العائلة مابقي شي ما اعطيته جدي
الجد رفع العصا وانحش زاهد يطلع
سلطان:يالله باقي غسيل الحوش
روآف:لا يبه تكفى خلي البنات
الجد:قم قم اشبك اللَيِ " خرطوم المياه "
زفر روآف يقوم مع صقر و خالد و عبدالعزيز وعلي وسعود يغسلون الحوش
عبدالعزيز وهو يرش مويا:صقر اشتغل زين
سعود وهو يعرض بعصا الممسحة:اهلاً أهلاً يا رمضان ، بقدومك تحلو الايـام
ضحك عبدالعزيز:الرقص بكفة والاغنية بكفة
سعود وهو يرقص:اشتقت لاجواء العيد من الحين
ضحك خالد:يارجال خلينا ندخل رمضان ثم فكر بالعيد
الجد:بلا كثر الهرج اخلصو ورانا شغل ثاني
خلصو العيال غسل الحوش واستأذن مشاري يطلع للبيت
وبقية العيال انتشرو لبيوتهم يتروشون ويغيرون ملابسهم
عبدالعزيز لحق سعود الي خرج
سعود لف عليه:لبيه!
عبدالعزيز:شصار على المحكمة!
سعود بضيق:على نفس الحال يماطلوني
عبدالعزيز:طيب غير المحامي!
سعود:محامي المستشفى هو مستلم قضية و يحاول فيها
عبدالعزيز:ذا المحامي بغى يتسبب بخسارة قضية ، اسمع مني و شف لك محامي كويس و سلمه موضوعك
سعود:والله بشوف ، بعد ماصدرو قرار ايقافي عن العمل حتى جلسة الاخيرة وانا خلاص فاقد املي
عبدالعزيز:وش جاك دودي خلك قوي ماعهدتك كذا كلنا معاك و كلنا ندري والعالم كلها تدري انت دكتور ناجح بشغلك و الي سويته واجبك
ابتسم سعود:توصي تأخرت على اختك
عبدالعزيز:سلم لي عليها و انتبه لطريقك
هز رأسه يركب و حرك و دخل عبدالعزيز البيت
شاف شهد واقفة فوق الكرسي و مشى بسرعة يمسك خصرها:انزلي الله يصلحك
طلعت علياء معاها لاصق صغيرة:لقيت بنتي
ابتسمت تشوف عبدالعزيز يهاوش شهد لانها طالعة فوق الكرسي تضبط زينة الصالة وكانت بتطيح لو ما مسكها
مشيت تعطي شهد اللصق و رفع عبدالعزيز ثوبه و طلع فوق الكرسي يضبط لهم زينة رمضان
علياء:تجنننن
شهد:مرة عزوز بس ارفعه من هالجهة
اخذ لصق يثبت طرف الاضاءة
مشيت شهد تقفل انوار و شغل عبدالعزيز الاضاءة الزينة و شهقت بخفة:الله تجننن
عبدالعزيز:بس ذي!
شهد:ايه شكراً
ناظرها وابتسم بخفة و صد يطلع الشقة بينما شهد دخلت المطبخ عند خولة
-
تجمعو كلهم بـ الحـوش بعد التراويح ماعدا البنات
زاهد:اي يا شيخ دقيتها نومة ونحن الي انكرفنا
ضحك وضاح:صراحة توقعت جدي بيكسر العصا على ظهري يقول كسل بزارين
الجد:لو ماكنت شايف التعب بوجهك ما تركتك
ابتسم وضاح: الله يحفظه سمي الوالد ما ينام زين ، الليل صاحي والنهار نايم
منيرة بضحكة: نسخة منك وانت صغير
ضحك وضاح يناظر حسن الصغير الي بحضنه واللحاف عليهم من بردّ الجو
عبدالعزيز:هالسنة رمضان به برادّ
هز عمر بالايجاب:اي صراحة ماتوقعت أجواء كذا بس حلو
خرجو البنات بصواني الحلى والموالح
ابتهال:رمضان مبارك عليكم
شهد تبوس راس الجد:كل عام وانت معانا والله يطول بعمرك عمر ولا يحرمنا من وجودك معنا
ضمها بحنية وابتسمت تسلم على ابوها و اعمامها كذلك البنات
الجدة:يا ميري
طلعت ميري معاها اكياس
الجدة بابتسامة: اعذروني يا بناتي و عيالي العام ماكان وضعنا نسمح نعيش رمضان زي ما كل سنة تعودتو عليه
علياء:مو مهم يا عمتي ، اهم شي انتي و عمي معانا و حولنا والله يطول باعماركم و يخليكم لنا
منيرة:اي والله عمتي الحمدلله هالسنة شوفينا مع بعض حول بعض والله لايغير علينا
ابتسمت بحنية الجدة و الكل تمتم بـ آمين
اعطت لـ منيرة و فاطمة و شيخة و علياء هدايا الرمضان:عسى تعجبكم عاد والله قلت تفصلون لكم ذاك الجلابيه الزينة زي ما تبون
فاطمة ناظرت قماش الرمضاني بابتسامة ونطقت:ماتقصرين عمتي
الجدة ناظرت عيالها:وعاد انتم كبرتو
حسن:احه يمه!
سلطان:انت بالذات لا تقول أنا صغير ناظر جنبك ولدك وبحضنه حفيدك ، صرت جد اوص!
حسن ناظر وضاح بطرف عين:كله بسببك كبرتني!
وضاح ضحك:وشدعوه يبه لاتصغر نفسك ترا واضح انك كبير
ضحكو من ناظر حسن وضاح بقهر:اسكت لابالترمس على وجهك
ضحك وضاح يبوس راسه:نمزح يبه
ابتسمت الجدة بضيق مدت لهم سجاجيد:صلو عليها يا عيالي ولا تنسون اخوكم حمد من دعائكم
بلع ريقه عبدالعزيز و نزل نظره يخفى ضيق ملامحه
سالم فز لها من لمح دموع الجدة وحاوطوها عن اليمين سلطان ويسار حسن و سالم من قدامها يمسح دموعها
الجدة بدموع:وجع قلبي على اخوكم الي دمر حياته وما فكر فيني
سلطان:خلاص يايمه لاتبكي الله يهديه و يصلحه
الجدة لفت من باس عبدالعزيز راسها وحضنها من اكتافها:حمد راح وجاء عنه عبدالعزيز ولا لا يا نوير القلب
ضحكت تبوس خده: إلا يا روحي انت ، ما اصدق للحين أن دعوات سنوات طويلة استجابت فعلاً وانتم قدام عيوني
عبدالعزيز باس يدها:يا امي انا وبنبقى معاك العمر كله اعرف وجعك يا يمه ، ابوي مهماً قلت ما بيتغير الحقيقة اني مو ولده ومهماً صار ماتقدر اي ام تنسى ضناها ، فاهم شعورك بس ابوي ربي يسامحه ما اعطانا لو موقف صغير نتذكره فيها بالطيب بس والله ما انساه مهماً صار يبيقى ابوي وملازمني بدعواتي و صدقاتي ما اقول إلا ربي يهديه يسامحه وان اخذ امانته يكون راضي عنه
شهقت تبكي ومسح حسن دموعها يغمض عيونه بضيق:يمه خلاص
عبدالعزيز بطقطقة:اشوف نوير تتهربي من هدايا الاحفاد
عمر:اي صح نبي حتى احنا!
ضحكت تمسح دموعها تعطيهم مسابح:عاد يويلكم لو ما اشوفها معاكم
ضحك وضاح:من عيوني يام حسن
زاهد:يا هيي فخمة
ابتسمت:عاد بنياتي لهم حاجة حلوة مرة
أفراح بحماس:وش؟
ضحكت:وحدة وحدة تجي
خولة تقوم بدلع:طبعاً الاولى انا
شمقت ابتهال:قهر اخذتي مكاني
بيـان:وين حبي انا اول
ضحكت ابتهال:حييو حَرم روآف
ضحكت بيـان تسلم على الجدة ولبستها الجدة ربطة شعر على لفة الجلال:هذا اعرف حُبكم لـ ذا حقت الشعر اشوفكم تلبسونها. " تقصد بندانة "
ابتسمو البنات بفرح وبداو يتقهوون و انسحبو منهم للنوم وبعضهم يقرأون القرآن
-
- غرفة علياء -
دخل عبدالعزيز بـ كيس وتقدم يبوس راسه:رمضانك مبارك يا امي وكل رمضان وانتي معي
ابتسمت له تضمه واعطاها الهدية و خرج يتركها تقرأ القرآن
طلع لـ خولة الي من شافته رحبت فيه:هلا بعضيدي وعيون اخواته
ابتسم يبوس خدها:اخر رمضان معاي منغير شر رمضان الجاي مع عمورك!
ضحكت بخجل ومد لها هديتين:والله اخاف انسى ذي وحدة لك و الثانية لـ جويد
ابتسمت له تحضنه و تشكره وخرج
اخذ نفس يزفره وراح شقته
دخل وشم ريحة القهوة وابتسم من تخالطت ريحة البخور مع القهوة وصوت الحرم حس براحة كبيرة بقلبه
وقف عند باب المطبخ يشوفها سرحانة وعند القهوة تفور
تقدم بسرعة يقفلها من كانت بتكب وهي قريب منها
شهد:بسم الله ما انتبهت
عبدالعزيز بعتاب:وش شاغل بالك لو ماكنت موجود كان انحرقتي واساسا ليش قريبة هالقرب من الغاز
شهد بتوتر:ما انتبهت
لفت تاخذ الترمس وحطت القهوة فيه و حطت فنجان وصحن حلى و تمر
همس بجنب اذنها:اشاركك القهوة إذا تسمحين ؟
ابتسمت وهي تناظره بصدمة من تكلم معها بالصريح لاول مرة بعد زعل و صد دام شهور وكان كل كلامهم قبل ببرود و هواش و زعل
لمعت عيونها بالدموع وهزت راسها بالايجاب:اكيد احلى من يتقهوى معي!
ابتسم بهدوء و خرج يروح غرفة
أخذ هديتها يطلع لها الصالة وانحى يبوس خدها:كل رمضان وانتي معي وما تحلى القهوة الا بمقابلة وجهك الحلو
ابتسمت بخجل و ذهول من لامست الرضا بوجهه وصوته
عبدالعزيز جلس بالكنب الي جنبها:ماتبي تشوفي الهدية ؟
هزت بالايجاب تفتحه وابتسمت بااعجاب تشوف عقد ذهب ناعم بتصميم ورود صغيرة
عبدالعزيز:اليوم كنت اشترى لـ امي و لفت انتباهي هالعِقد وقلت مايزين الا على على عنقك ويليق بـ لبسك الرمضاني
لمعت عيونها بدموع تقوم تضمه
فتح حضنه تجلس على فخذه وحاوط خصرها يبوس خدها و عنقها ونطق بـ شوق:لابوه من زعل ولا اوس مين يحرمني من هالوجه الله لا يسامح من كان السبب
شهد بحزن:آسفة عزوز اسفة
عبدالعزيز:خلاص انسي يا حبيبتي ، اسف انا صديتك و زعلتك كثير بس ماكان شي سهل كنت ابيك تتعلمي من درس ماتخبى عني شي كنت ابغى اوعيك و افهمك
هزت بالنفي بدموع:لا تعتذر من حقك والله انا اسفة واعرف غلطتي
عبدالعزيز باس خدها:خلاص ، لو جلسنا لين بكرا بنعتذر مابنخلص ، بس ابي وعد منك
شهد بدموع:اوعدك والله ما ارد عليه ولا حتى اذكره بتفصيل صغير ، ان تبي كمان اترك الجوال بدون باسوورد ومتى ماتبي تشوفه
هز بالنفي يمسح دموعها:اثق فيك ما افتح جوالك لو ايش ، بس لا تخيبي ثقتي فيك وتكسرينها مرة ثاني ما ابي اخسرك مابي علاقتنا تكون باردة و مشاكل وينتهي بانفصال ، تعرفين شكثر احبك انا ، وماابي اخسرك عشان كذا يا شهد لا تسمحي لاحد يدخل بيننا لا تسمحين ابداً
ابتسمت تحاوط وجهه وتطبع قبّلتها على منطوقه
حاوط خصرها بقوه يشدها له ويتعمق اكثر فيها وبتفاصيلها
باس شامتها وغمضت عيونها بـ حُب و خجل
ابتسم وهو يبي يحرجها:جاز لك المكان ؟
ناظرت نفسها وهي بحضنه وساقها حول خصره ويدينها حول عنقه
صدت بخجل تبعد و وقفت تعدل بجامتها و اخذت الترمس تصب قهوة
ضحك ياخذ منها فنجان القهوة و أشر جنبه:تعالي تعالي
جلست بخجل:لبيه
عبدالعزيز:اول جلسة قهوة لنا مع بعض ببيتنا
ابتسمت وهي توها تدرك:اي والله وجعل دايمة الجلسة ذي ولا يحرمني من وجهك ولا من حبك وحنيتك
ابتسم يقبّل خدها وميلت جسدها عليه وحاوط ظهرها بيديه تسند على صدره واخذ صحن الحلى والملعقة:انتي سويتيه؟
هزت بالايجاب:اي سويت لبكرا الفطور و حسبت حسابنا بـ صينية صغيرة
هز راسه يأكل وغمض عيونه بتلذذ:يميمي
ابتسمت:عافيه
ابتسم: يعافيك يابنتيّ و تسلم الايادي
جلس يسولف لها عن تسوقه لأغراض رمضان مع خالد اليوم و هي تخبره عن تجهيزاتهم لفطور بكرا
وقامت اخذت الصحون والقهوة تغسلها و طلعت لبسها الرمضاني و ثوب عبدالعزيز وشماغه تكويه من بدري و علقتها بالدولاب وخلصت ونزلت تساعدهم بالسحور و تركته يقرأ قرآن
-
- بعد السحور -
زاهد يرفس صقر:لا تخلص الجاك المويا خلي لي
عمر:ماهو بزين يا ولد تاكل فواكه على اخر الدقايق الحين بتكثر في المويا ويوجعك بطنك
زاهد وهو يأكل الموز هز بالنفي:مايصير شي ياخوي والله بجوع بعدين
روآف:ماتعرف اخوك يعني ياعمير ماشاءالله يأكل الأخضر و اليابس
زاهد وهو يطنشهم يكمل موزة الي بيده لف لجواله يشوف الوقت وشهق من شاف باقي دقائق ركض يغسل فمه ورجع وشرب كل الجاك و لف ياخذ من على طاولة قارورة مويا
عبدالعزيز بابتسامة:يالله قومو المسجد
ابتسم عمر يحط يده على كتف عبدالعزيز ورفع عبدالعزيز يده على كتف عمر ومشيو مع بعض والبقية خرجو خلفهم
صقر سحب من زاهد قارورة المويا:خلاص بيأذن
زاهد تنهد براحة من سمع الاذان:يارب تقبل مني يارب ما الجوع و لا اعطش كثير
ضحك خالد عليه ودخلو المسجد ودقائق دخل الجد مع عياله
سلمو من الصلاة وجلسو يدعون و يقرأون القرآن لين شرقت الشمس
خرجو بهدوء و تقدم عمر لهم بتردد:يبه في موضوع لازم نتكلم فيه الحين
لامس الجد التوتر بصوته:قول ياعمر في شي
عمر رفع نظره لـ عبدالعزيز وصد:موضوع يخص عمي حمد ؟
لف عبدالعزيز بمشاعر مختلطة له صحيح ماكان الاب الكفو له لكن بالاخير ابـوه
نطق بخوف:وشفيه ابوي يا عمر ؟
عمر وهو يشد على مسبحته:طلع عفو عام واسمه بينهم
ناظره بصدمة ونطق بغصة و عدم استيعاب:كيف؟
عمر:بيطلع يعني!
صد عزيز يمشي للبيت
الجد بقساوة:قفلو الموضوع
مشيو كلهم لبيوتهم
-
دخلت شقتها بعد ما الكل راح بيته يصلي و ينام
قفلت نور المطبخ والصالة ودخلت غرفتها وصلت وجلست على سجادتها تدعى و تقرأ اذكارها
لفت على دخول عبدالعزيز نزل ثوبه وجلس قدامها على طرف سجادة
مسحت على وجهها و وجهه بعد الدعاء وغمض عيونه من لامس يدينها وجهه
مسك يدينها يبوس كفها ونطق:ضميني يا شَـهـد
تبدلت ملامح وجهها للخوف وفتحت له حضنها وحضنته لـ دقائق
ابعد يقبّل عنقها و انسدح وراسه بـ حضنها
رفعت يدها تمسح على شعره بحنية عهدها من شهد دايم
اخذت القرآن تقرأ عليه شوي و حست فيه يبكي بهدوء
همست بقلق:وش فيك حبيبي!
نزلت دموعه:بيطلع؟
شهد باستغراب:مين الي بيطلع ؟
عبدالعزيز ناظر عيونها:حمد … بهمس كمل:ابوي
توسعت عيونها بصدمة وكمل من تساءل نظراتها:طلع عفو عام وهو بينهم
تنهدت بهدوء ومسحت على شعره ووجهه
بكى بضعف:شهد مو مستعد له بيطلع ، ويمكن بيجي ما ادري كيف بتصرف ؟ مهماً صار ابوي ذا مقدر اقول مات و هو حي كيف بيَتّم خواتي و نفسي وابوي حي يرزق مقدر والله
مسحت على شعره:ياقلبي ربي يهديه ويصلحه ويسامحه انت سويت الي عليك و اكثر ماقصرت مع اهلك وابوك هو السبب هو المفروض يتضايق و يزعل
مسح وجهه يغمض عيونه رجعت تقرأ القرآن ويدها على شعره وبعد نص ساعة بدا يهدأ ويغفى
شهد ساعدته يقوم وانسدح على سرير وهي جنبه و مسكت يده: لا تفكر بحاجة نام و ارتاح
شد على يدها و غمض عيونه ينام
-
- بيت سعود -
سعود:يابنتيّ اول يوم رمضان خلينا مع بعض و ثاني يوم نروح لاهلك
عبست:بس
لف لـ صوت جواله يفتحه يشوف رسالة وضاح يخبره " سلام عليكم كيفك دودي اخبار بنت العم خفت تكون نايم لذلك ما اتصلت بس جدي بلغني اعلمك معزوم على فطور عندنا والرفض ممنوع بس طبعاً لا تجي يدك فاضية "
ضحك سعود وتنهد يلف يشوفها عابسة وملامح الضيق على وجهها ونطق يراقب ملامحها:ايه الجد خليف يعزمنا للفطور ونحن نلبى عزيمته و نروح له تجهزي بعد العصر نروح لـ اهلك
توسعت ابتسامتها:امانة ؟ صدق الله
نطت عليه تبوس خده وضحك:صايمين يا بنت
ناظرته باستعياب:نسيت يالله حطيت منبه عشان نصحى بدري
انسدح وقفلت النور وانسدحت جنبه وغمض عيونه وهمست:سعود
فتح عينه:هممم
جود:وش تبي اسوي لك على الفطور
ابتسم:شوربة الشوفان
هزت راسها:من عيوني
باس جبينها بعمق:يخليك لي
غمضت عيونها تنام و نام بعدها على طول
-
- العصر -
طلعو العيال الزُل وفرشوها
و اخذ روآف السلم يطلع يعلق الزينة حق رمضان بالحوش
زاهد:ايه ايه زين
نزل روآف وراح يتوضى وتجمعو كلهم مع ابـاء والجد يقرأون القران
لاحظ الكل هدوء عبدالعزيز الغير معتاد عليه
حسن بحنية:ولدي عزيز انت بخير!
رفع نظره بهدوء لهم و ناظرهم لثوان و همس:بخير
قام زاهد يفتح الباب من سمع صوت الجرس وكانو سعود و جود
رحب فيهم وسلمت جود على الجد واعمامها ولفت لـ عبدالعزيز السرحان وما انتبه لـ دخولهم
تقدمت وباست راسه:ابوي انا وشفيك وجهك تعبان؟
ابتسم بهدوء:اهلين جودي ، لا بس عطشان وجوعان
جو:كله باجره
دخلت للبنات بالمطبخ وجلس سعود جنبه:وش فيك
عبدالعزيز:بعد شوي اكلمك ، ابيك بموضوع مهم احتاج اخوي ينصحني فيه
سعود شد على كتفه:ابشر بوقفتي معاك بالخير أو بالشر
ابتسم عبدالعزيز:الله يخليك لي ياخوي
-
- بـ المطبخ -
كان المطبخ ازعاج وفوضى وزحمة وكل وحدة مشغولة بـ طبق
جود:ماما في شوفان
علياء:اي ليش
جود بدلع:سعود يحب شوربة الشوفان بسويها له
انفجرو البنات ضحك يطقطقو عليها
ابتهال:عشنا اه وينك نيوف
ضحكت افراح:اه وينك يا فتى احلامي
شيخة:ودكم بـ سلطان
انخرشو البنات يكملون شغلهم
شهد:ياربي اتركي الصوص البيتزا وسوي حشوة الجبن لـ زوجك
خولة:اي بس يويله زوجك إذا جاء اخذ منه
شهد:اخوك بالنهاية
ضحكت خولة:اه ليت عمر اخوك واحشرك زي ما تحشريني
ضحكت شهد تقلب صوص البيتزا وتحرك الكريم الكراميل الي يفور وبعدها جات فاطمة تساعدها لجل تسكبه بـ قوالب الكريم الكراميل
منيرة:الثلاجة فل هنا وديها ثلاجة شقتك
شهد عضت شفايفها وهي خايفة يطيح الصينية منها اخذته وطلعت من المطبخ
وقفت على طرف الدرج وتوترت
خرجت الحوش ولوحت لـ عبدالعزيز يجي وانتبه لها وقام
عبدالعزيز:لبيه
شهد اشرت للصينية:امي تقول احطه بثلاجة عندنا
عبدالعزيز باستغراب:طيب حطيه
شهد بخوف:اخاف اشيل شي كذا ثقيل وانا اطلع الدرج ، مرة شلت صينية بـ فناجين قهوة وطاح مني وصار فوبيـا
ابتسم يناظر صينية الي فيها بيالات كريم الكراميل:بس ذا الصينية
هزت بالنفي:في غيرها اثنين
عبدالعزيز بصدمة:وش ذا كذا كثير
شهد:بيخلص ويتهاوشون عليها العيال واولهم عمي سلطان و ابوي
ضحك عبدالعزيز بخفة:انا حبي المهلبية
ضحكت:ادري ، نقاط مشتركة يا حبيبي
ضحك و مشيت معاه الشقة وفتحت الثلاجة ترتب الكريم الكراميل
عبدالعزيز نزل يأخذ الصينيتين من امه ورجع لـ شهد
زفرت بحماس:كذا زين ويبرد بسرعة شكراً حبيبي
عبدالعزيز:العفو يا بنتيّ
نزلو ورجعت هي للمطبخ وهو للحوش
-
- قرب اذان المغرب -
وصار استنفار لتجهيز الفطور
الجد يهاوشهم على التاخير والعيال بحماس يوزعون فطور للجيران ومنها ياخذون كمان منهم
وضاح بجوع:وش صينية فرن الي سويتوه يايمه
منيرة:يا يمه الله يهديك مو سامع جدك يهاوش يالله يرضالي عليك خذ التمر واطلع ووزعه على السفرة
اخذه وهو يتحلطم و طلع يوزع التمر بالسفرة
شيخة:ليت سوير هنا اشتهيت اللقيمات حقها
شهد ضحكت:كلمتني تقول يمكن بكرا تجي
منيرة:زين يالله خلصنا
جود بحماس وهي تسخن الشوربة:اسمعو المدح على اصوله الحين الذ شوربة الشوفان من تحت يدين شيف جود
خولة:لو ما امي موجودة ماكان ضبط معاك
جود ناظرت امها و تقدمت تقبّل خدها:علو انا بدونك وش اسوي!
ضحكت علياء:حبيبتي
فاطمة:نطلع يالله
علياء:اطلعو وبجي مع جود
هزت راسها فاطمة و خرجو كلهم الحوش يتجمعون حول سفرة الكبيرة
سعود بهمس:وين اختك
عبدالعزيز شاف جود و امه مو موجودين:تجي الحين
زاهد بجوع:متى ياذن
صقر:خمس دقائق
زاهد:يجوز افطر الحين هو أساساً ما باقي الا خمس دقائق
سلطان عطاه نظرة وسكت
روآف:وين قشطة للتمر!
بيـان خرجت من البيت بين يدينها القشطة و تقدمت تعطيه:هنا
ابتسم ياخذه منها و مشيت تجلس بجانب البنات
سمعو صوت الباب وقام زاهد بتافف:ياربي مين ، تعرفون وقت فطور والناس بتدع... بتر كلامه من انصدم من الواقف قدامه
بلع ريقه بتوتر وصدمة
وضاح:مين ؟
زاهد باصبعه اشر:عمي حمد
فزو كلهم واولهم الجدة و عبدالعزيز
دخل حمد بتعب يوضح على وجهه و جسمه:سلام عليكم
الجد بقساوة:مضيع ؟ ليش جاي
حمد بندم:جيت عن اهلي
ضحك بسخرية الجد:اهلك !! مين تقصد احنا !! الي بديت الحرام علينا ولا اهل عزيز الي ظلمتهم!!
حمد بندم:يبه كلكم اهلي جيتكم ندمان الله يخليكم سامحوني
الجد بحدة:نسامحك على وش ؟ ٣٠ سنة ظالمنا معاك و عيالك لو ماخفت الله على امك و ابوك كان خفت في عيالك الي من لحمك و دمك
حمد وعينه جات على خولة:خولة بنتي
نزلت دموعها وهي تبكي:بنتك يا يبه ؟ انت ما تركت شي يخليني اقول لك يبه
صدت بدموع وخرجت جود بحماس:تاخرت اسفة بس ...
سكتت بصدمة من وجود حمد بين اهلها
طاح زبدية الشوربة منها وشهقت بصدمة تبعد خطوات للخلف ودموعها على خدها
حمد تقدم منها:جود بنتي
جود بانفعال:لا تقرب
حمد والدموع بعيونه:ابوك انا
جود بسخرية:ابوي؟
شهقت تبكي وبحدة بصوتها:انا عندي ابو واحد واعرفه من ولدت هو الي كان جنبي يوم ولادتي هو الي سماني وهو الي سهر مع امي ليال وقت تعبي ، هو الي فرح بنجاحي كرس عمره وحياته عشاننا ، عزيز هو ابوي هو كبرني و رباني هو علمني الصح من الغلط ، لا تجي بعد سنوات طويلة تقول فيها انا ابوك ، لا مستحيل يصير
شهقت من حاوطها سعود يضمها:خلاص يعيوني هدي
جود وهي تناظر حمد:ليش ظلمتنا ليش ، سنوات طويلة انتظرناك فيها ترجع ابونا الي نعرفه بعيد عن الخراب و التععاطي
بحلفك تعرف عمري كم ، تعرف اعمارنا ولا وش حياتنا وش عشنا و ايش مرينا فيه ، ليش حرمتنا ابسط حقوقنا
حمد نزل راسه يبكي و نطق:اسف يابنتي اسف
صرخت بوجع: علمني! مو كان من حقي تكون جنب عزيز وقت عرسي تسلمني لـ سعود بنفسك و توصيه علي ، مو ابسط حقوق خولة تكون انت وصيها بزواجها ولا اخوي عزيز مو حقه يكون وراه سند بعرسه والي يكون ابوه ، ليش سويت فينا كذا
ناظرت عيونه:علمني يا ابوي وش ذنبنا يوم الناس كانت تناظرنا وتقول عيال حمد كانو يتشمتون فينا ويعيبونا ، ليش ظلمت نفسك وظلمتنا ليش راجع الحين ليش ، جاي تطلب السماح ؟
حمد بدموع:والله اعوضكم عن كل شي بس سامحوني
جود بصراخ:تعوض ايش علمني ، تعوض طفولتي ؟ حياتي ؟ ولا سعادة امي الي حرمتنا منها يا ابوي تعوض ايش ولا ايش
ابعدت سعود عنها و تتقدم وتمسح دموعها بع.نف ونطقت بحدة:تمام معليك مني و من ماما و من خولة
نطقت بقهر:عوض اخوي عزيز حياته رجعه ولد العشر سنوات الي كان يتحمل ض.ربك و شت.مك عشان ماتمس امي عوضه عن عمر الخمسطعش سنة الي بسببك اهمل دراسته عشان يشتغل بس عشان يوكلنا بعيد عن فلوس الحرام الي كنت تجيبها عوضه طفولته و مراهقته عوضه بوقفتك يمين بـ زفته لـ زوجته و انا عهد علي اسامحك واخلي كل الي هنا يسامحونك عوض عزيز بس
عبدالعزيز تقدم يضمها ومسح على شعرها وانهارت بكى بحضنه:ياخوي خليه يعوضك وانا اسامحه ، ليش جاي الحين ليش! ايش يعوض!
الكل كان يناظرها بصدمة و حزن على انهيارها و عتابها لـ ابوها
صرخت تبكي:جاي لنا بعد ٣٠ سنة يقوم بعوض يا اخوي ، ايش يسوي وايش يترك
عبدالعزيز:هدي يابنتي بسم الله عليك هدي صايمة انتي لا تطيحي الحين! انا معاك والله خلاص مايصير الا كل خير أهدأي
الجد بحدة:الكل مكانه افطرو وثم نتكلم
جود ببكاء تناظره:يبه خليف تكلم معاه
الجد:بيتي ما يطرد ضيوفه
حمد نزلت دموعه أكثر من كان اول عيال واكبرهم بالبيت صار ضيف بالنسبة لهم
ناظر اخوانه عزوته يشوف الدموع بعيونهم لهفتهم له و شوقهم و نظرات عتابهم له ، يشوف لمتهم الي اشتاق لها و الي خسرها بسبب افعاله
جود لفت لـ سعود:خذني من هنا
سعود مسح دموعها:جيبي عباتك
هزت بالايجاب ودخلت البيت
لف سعود عليهم:جدي نستأذنك
سلطان:سعود تعال اجلس ماهو وقت خروج افطرو على الاقل
سعود:ودي ياعمي والله بس افضل لها تهدى ونتكلم بعدين
عبدالعزيز ببحة بعد صمت طويل:طمني على بنتي تمام ؟
قالها وعيونه على حمد الي ناظر عيونه من شدّ عبدالعزيز على كلمة " بنتي "
خرجت جود مع سعود ورجعو يجلسون البقية من أمر الجد لهم يجلسون
علياء كانت داخل البيت وشهدت من دخول حمد لـ خروج جود و سعود انهارت بكى و توجهت لغرفتها تقفل الباب على نفسها
قام وضاح لـ جانب عبدالعزيز مكان سعود و جاء حمد جنب حسن
الجد بهدوء:سمو بالله
بداو يفطرون ماعدا عبدالعزيز الي مافتح صيامه للحين
الجدة بحنية:ولدي افطر
عبدالعزيز ناظرها بابتسامة:مالي نفس جدة
قام:تقبل الله سابقكم للمسجد
شهد بقلق:افتح صيامك على الاقل!
هز بالنفي:مالي نفس بروح المسجد
خرج وزفرو بتوتر من صمت المكان و نظرات الكل لبعضهم
شهد بهمس لـ خولة:حياتي الله يخليك لو لقمة
كتمت خولة بكاءها وهي تاكل و تناظر ابوها و صدت تناظر قدامها
حمد ناظر حسن الي حط قدامه التمر واخذه بتعب يفتح صيامه وهو يسعل ومد له حسن كوب المويا
زاد سعاله و لفو الكل عليه
اخذ منديل بسرعة يمسح فمه و لفت انتباه حسن الد.م الي بالمنديل و ناظره بصدمة و صد بخوف يسكت و افكار كثيرة تدور بباله
فتحو صيامهم كلهم و قامو العيال للمسجد والبنات استنفرو يشيلون السفرة
-
عبدالعزيز تنحنح:ياولد بطلع الشقة
شهد خرجت باستعجال معاها كوب مويا و تمر:افتح صيامك
صد بضيق:مابي مو مشتهي يا شهد
ناظرته وهي تمسك يدينه:الله يخليك لو حبة تمرة
هز بالنفي:مابي يا شهد لا تضغطين علي
شهد:حرام ياخي ما يجوز تسوي كذا
علياء طلعت من غرفتها وملامحها توضح بكائها
عبدالعزيز تقدم لها و حضنها يبوس راسها
شهد:خالتي شوفيه للحين مادخل شي بفمه
عبدالعزيز ناظرها بحدة ولفت بعدم اهتمام لنظراته لها تعطى علياء صحن التمر وكوب المويا وعلياء بحنية مدتها له واخذ حبة تمر اكلها وتوجه لـ شقته يغير ملابسه
-
- بـ المجلس -
الجد و الجدة متوسطين المجلس والاعمام يسار الجد و الاحفاد العيال يمين الجدة
عبدالعزيز دخل:سلام عليكم
ردو السلامة وباس راس الجدة من لامس الحزن بوجهها
حمد :عبدالعزيز
عبدالعزيز لف بنبرة حادة:نعم
حمد:اعتذر منك يا ولدي سامحني
عبدالعزيز واستنفر كل طاقته نطق بغصة:اه يبه وش سويت فيني
حمد قام على حيله بتعب وتقدم منه:سامحني تكفى يا ولدي اعطوني فرصة اخيرة قبل لا اموت تكفى سامحني تكفى ياولدي
عبدالعزيز بصدمة ناظره:تموت ؟
حمد بانهيار:اي مابقي الا وقت قليل واموت مابي اروح وانتم زعلانين مني تكفون سامحوني حللوني
الجدة بصدمة وهي تبكي:وش تقول يعيون امك انت ؟
حمد طاح على رجولها:امي سامحيني يا يمه تكفين والله تبت لربي والله تركت كل شي والله تبت سامحيني
الجدة وهي تبكي:ياوجعي عليك يا حمد وش سويت فينا
حمد باس رجولها ويدينها:سامحيني يمه يبه
لف يبوس رجول الجد ويده:يبه سامحني يا يبه الله يخليك سامحني حللوني قبل لا اروح من هالدنيا
الجد بدموع:ليش يا ولدي كنت بين اهلك وناسك عايش مبسوط وما كنت مقصر عليك بشي ليش ظلمت نفسك
حمد بانهيار:سامحني يبه ندمت والله
الجد بانهيار:وينك يوم ان امك تطيح على سجادتها تنوح ويروح صوتها من البكى عليك مافكرت فيني في امك اخوانك شوفهم ، اعرفهم يتظاهرون بالجمود بس عيونهم تحكي حزنهم وشوقهم لك ، شوف عضيدك حسن الي يوم تبريت فيه منك اسبوع ماطب البيت يدور عليك زي المجنون ، طاح على رجلي يترجاني عشان ترجع قال يبه حمد اخونا الكبير لا يطلع من البيت ، نحن اهله وبنحاول فيه ونكلمه وبيجي ويعتذر بس وين ، جاي بعد ٣٠ سنة تعتذر بعد ما فات الاوان ودمرت كل شي لو جيتني داخل مع الباب ذا معك زوجتك و عيالك بحطكم بالعين وعلى الراس بس ان بعد سنوات اشوفك فيها بين ايادي الشرطة تحاول تق.تل عيالك
حمد حط راسه بحضن الجد يبكي زي الطفل
عبدالعزيز ماقدرت رجوله تشيله وطاح على ركبه ويبكي
وضاح بحزن شد على كتف عبدالعزيز ولفو من صاحت الجدة باسم حمد
فز عبدالعزيز و ثقلت رجوله من هول الصدمة و زحف على ركبته و جلس عن راس حمد يشوفه فاقد وعيه بحضن الجد و فمه ينزفه الد.م
رجفت يدينه يطبطب على وجه حمد:يبه يبه اصحى حاكيني يا يبه ، اصحى نتكلم ، لا تسوي فيني كذا لا تسوي!
حسن بصراخ:اسندوه للمستشفى وضيح شغل السيارة
خرج وضاح مخروش للسيارة وسندو العيال حمد مع عبدالعزيز وخرجو فيه للسيارة ولاقرب مستشفى
خرجت خولة وهي وتبكي ومسكها عمر
عمر:يا روحي سمي بالله
خولة ببكاء:شفت بحضن عزيز طايح عمر ابوي فيه شي علميني قول تكفى
عمر:لا يا حبيبتي انتي أن شاءالله بخير خلاص
هدأت وهي تحضنه وزفر بضيق يطبطب يهديها
-
- بـ المستشفى -
مسك راسه بصدمة من سمع كلام الاطباء واعمامه الي انهارو بالخبر ووضاح و خالد و روآف كل واحد واقف عند رأس ابوه يهديه
جاء سعود بعد ما كلمه خالد و قرب من عبدالعزيز:وشصار عزيز !!
عبدالعزيز بـ رجفة والدموع بعيونه وبعدم تصديق:سعود يقولون ابوي بيموت!
توسعت عيون سعود:اجلس وصل على النبي
عبدالعزيز بصدمة هز بالنفي بعدم تصديق:مستحيل سعود ابوي مستحيل يروح لسع في اشياء كثيرة ماسواها مايموت لازم يعيش عشاننا ياخوي لايموت ابوي
مسكه سعود من ثقل جسد عبدالعزيز عليه و فقد وعيه
صرخ للممرضة :جيبو نقالة
فز وضاح له:وشصار!
سعود:مدري فقد وعيه
جابو النقالة له و راح وضاح معاه
سعود قابل الدكتور يخرج من غرفة حمد وصافحه:دكتور عثمان كيف وضع المريض حمد بن خليفان!
الدكتور عثمان:بخير الحين تصير حالات الاغماء كثير بفترة المرض ذا !!
سعود:وش تشخيص المرض
الدكتور:سرطان الرئة وللأسف في مرحلة الثالث من العلاج!
سعود بصدمة:دكتور عثمان وش تقول!
عثمان بحزن:دكتور انت يا سعود اكيد تعرف المرض و تفهم ، اكتشف المرض متاخر ، بيبدأ بجلسات الكيماوي و الله يعافيه لكم يارب
مسح وجهه يشكر الدكتور و يروح لـ غرفة عبدالعزيز
عبدالعزيز تحرك:ها بشرني أكيد في غلط تشابه اسماء !!
سعود بحزن يناظر الكل بحزن:عمي حمد
مسك عبدالعزيز راسه وغمض عيونه:اه ياربي لا تختبرني كذا يارب سامحه يارب لا تاخذه الا وانت راضي عنه يارب
سعود:ودك تخرج ؟
هز بالايجاب:اي لازم اكون مع خواتي
روآف:لا تفجعهم بشويش على نفسك و على اهلك يا اخوي
عبدالعزيز اخذ نفس يشوف سعود يتقدم لجل يطلع المغذي وحط عليه لصق واسنده وخرجو العيال معاه بينما الاعمام حلفو ما يتركون اخوهم وبقيو ثلاثتهم عنده
-
- بعد العشاء -
سلمت سارة من صلت صلاة العشا و انتبهت لدخول مشاري معاه قهوة
ابتسمت من انحى وباس خدها:تقبل الله حياتي
سارة:منا و منك
نزلت الجلال و جلست يمينه
مشاري:خرجات سُكَرة مع لينا صارت اكثر من خرجاتها معي وحشتني
ضحكت سارة:صايرين صحبات مرا
انتبهت لاتصالات بقروب البنات بالسناب و الواتساب و رسائل كثيرة
فتحت قروب السناب واختفت ابتسامتها ومالت ملامحها للصدمة من قرأت رسائل البنات يخبرونها بخروج حمد من السجن و تعبه و نقله للمستشفى
مشاري بخوف عليها:سوير وش صاير !! مين ارسلك!!
سارة بخوف:اخوي بالمستشفى ؟ مشاري خرج اخوي
مشاري بقلق:هدي و علميني مين!
سارة بدموع:ابو عزيز طلع من السجن و تعبان و أخذوه المستشفى خذني لاهلي تكفى البنات يقولو امي تعبانة بروح لها بسرعة الله يخليك
مشاري:روحي اجهزي بسرعة
ركضت تجهز و اتصل بـ العيال و رد عليه خالد و خبره خالد عن الوضع و انصدم مشاري وقفل منه ومسك يد سارة من نزلت له وهي للحين مصدومة وتوجهو لبيوت آل مطلق
دخلت البيت وجلست تهدي خولة والجدة و الجد و من خبرتها الجدة كيف طاح بحضن خليفان و فمه طلع د.م بكيت سارة و جلست تذكر الله
خرجو كلهم بخوف من دخلو العيال كلهم بدون الاعمام
الجدة بخوف:وين عيالي تكلمو
خالد:جدة بالمستشفى مرافقين مع عمي حمد
خولة بخوف تشوف عبدالعزيز تقدم وضمها:سمي بالله مافي شي
خولة ببكاء:في يا عزيز اعرف قلبي يقول فيه شي
الجد:تكلمو وش صار ؟
سعود بهدوء:للاسف عمي حمد مصاب بسرطان الرئة
خولة صرخت بانهارت بحضن عبدالعزيز
الجدة صرخت:ياربي ولدي لا ياربي
مسكتها سارة مع شيخة و فاطمة يهدونها و ركضت افراح تجيب علاجات الجدة
دخل عبدالعزيز الصالة بحضنه خولة بعيد عن العيال
العيال سندو الجد يدخلون المجلس من انهار و حاوطوه يهدونه و يحاولون يطمنونه لجل مايفكر و يتعب
علياء صدت تتركهم تروح غرفتها وانهارت بكى لوحدها بغرفتها
عبدالعزيز:خولة خلاص يا امي انتِ
خولة ببكى:عزيز كذب كلامهم تكفى ابوي مستحيل يروح
لمعت عيونه بضعف يرجع يضمها وحاوط الجدة لصدره من جهة الثانية
الجدة ببكى:ولدي انا ياربي ، يارب عافيه يارب احفظه لي يارب
عبدالعزيز هداهم:ناظريني خولة
خولة ناظرته و نطق:ابوي يحتاجنا هالوقت اطلعي البسي وانزلي ناخذ جود نروح له فهمتِ!! مانبي بكاء و انهيار يحتاجنا ابوي نوقف معاه الحين
هزت راسها وطلعت بسرعة ولحقتها شهد الي ماقدرت تبقى كذا وما تكون مع عبدالعزيز و البنات
مسح عبدالعزيز وجهه يشوف الجدة طلبت عباتها وماتكلم وهو يعرف بعنادها والي بالمستشفى مهماً سوا يبقى بـكِرها وضناها
خرج مع الجدة وخولة و سارة وشهد وتوجه للمستشفى بينما سعود الي تكلم مع عبدالعزيز وطلب هو الي يكلم جود ويجيبها للمستشفى ومارفض عبدالعزيز بالعكس ارتاح لان سعود يقدر يخبرها بهدوء و يمهد لها الموضوع عكس عبدالعزيز الي صعب عليه يخبرها زي هالخبر المفجع
دخل المستشفى وتقدمت شهد تحضن ابوها وسارة حضنها سلطان الي جلس يهديها و يطمنهم
الجدة:وينه ولدي ؟
حسن مسك يد امه:يايمه هدي بخير تونا كنا عنده داخل
عبدالعزيز:كيفه الحين ؟
سلطان:نفس الوضع
عبدالعزيز هز راسه ودخلو بهدوء ولف حمد للباب من حس بدخول احد
وضيقت عيونه بابتسامة يشوفهم عنده رفع نفسه يقوم منعته سارة من نطقت بدون وعي:يا اخوي لا تتعب كذا
ابتسم ومد يده ينزل الأوكسجين:يمه
جلست الجدة بالكرسي واسندت يدها على العصا و بيد الثانية تمسح على وجهه التعبان
مسك يدها يبوسها والدموع بعيونه وكح بقوه
عبدالعزيز بحنية رجع الاكسجين:خلاص ارتاح كلنا حولك
حمد شد على يد عبدالعزيز والندم يأكله:ولدي
عبدالعزيز نزلت دموعه يبوس يد حمد وهمس:لاتتعب نفسك يبه خلاص معاك نحن
شاف ضيقة عيون ابوه دليل على ابتسامته وابتسم بخفة يبوس راسه
تقدمت خولة تجلس على طرف السرير:يبه كيفك
هز راسه وهمس:بخير يابوك انتي اخبارك!
خولة:بخير ، تدري اني تزوجت؟
رفع حواجبه وابتسمت:ولد عمي سلطان عمر
ناظر سلطان الي كان متكتف بهدوء يناظرهم
حمد اشر له يقرب وقرب سلطان:لبيه يابو عبدالعزيز
حمد بتمتمة:بنتي يا سلطان امانتك
سلطان:بنتي خولة والله بحسبة بنت من بناتي وليش توصيني عليهم انت بتكون معاهم و حولهم
نزلت دموعه يناظر سارة ونطق:عزيوز ارفعني
ابتسم عبدالعزيز على دلع ابوه المميز له من وهو صغير وعدل السرير وجلست سارة وحضنها:العنقود
هزت راسها تبتسم:العنقود سوير ياخوي
باس راسها ومسح على وجهها:ما اصدق عندي اخت ياما زعلت عشان الكل عندهم اخوات إلا انا
ضحكت بدموع تحضنه وباست راسه ، ورفع نظره للباب من دخل سعود مع جود
ركضت عنده وهي تبكي وتحضنه:يبه لا تروح وتخلينا
حمد حاوطها بقوه وبكيت من حست بدموعه على كتفه:سامحيني بنتي ظلمتك كثير اسف والله ، ابعتذر من اليوم لين اخر نفس لي عشان تسامحوني فيه تكفين يابنتي سامحيني
جود: انا والله اسفة كلامي تعبك وازعجك وعد ما اقول لك شي ولا ازعجك بس لا تروح
حمد:لا والله يابنتي ماتعبتيني بالعكس ماقلتي الا الحقيقة ، ذا الكلام الي كنت خايف اسمعه منكم وقت اجيكم كنت مستحي و منحرج اناظركم بعد كل الي سويته فيكم ، خفت اسمع هالكلام من عزيز وقت كان يزورني و ارفض اقابله ، بس هالمرة سمعته منك على كثر ما اوجعني قلبي على كثر ما استاهله والله يابنتي مو زعلان منك لا تبكين
عبدالعزيز بهدوء:جودي خلاص يا روحي لاتتعبيه بالكلام
ناظرته و هزت بالايجاب تمسح دموعها
حمد:تعال ياولدي سعود
قرب سعود وباس راس حمد
حمد:كيفه معاك ؟
جود: الحمدلله مافي منه
ابتسم ورجع يبوس راسها وهي بحضنه
سعود ضرب يده بتصفيق:اي جماعة يؤسفني قولك ذلك بس لازم لازم نخلي عمي يرتاح
سارة :بروح و برجع لك بعدين تمام
هز راسه وتقدمت الجدة تحضنه:محتاج شي
حمد:سلامتك يا يمه
الجدة :بجيك بكرا
هز بالايجاب ولمعت عيونه بالدموع و خرجت مع سالم و سلطان ومعاهم سارة و خولة و جود
عبدالعزيز:عمي انا ببقى
حسن:اقول خذ زوجتك و روح قبل شوي طحت علينا
حمد بصدمة:زوجتك معاك ؟
عبدالعزيز بتوتر واحراج يناظر شهد:والله نسيت تعالي
تقدمت من عبدالعزيز بخجل
عبدالعزيز:زوجتي شهد بنت عمي حسن
حمد:يعني ما البنت الا لولد عمها تعالي بنتي
تقدمت منه وهي يدها بيد عبدالعزيز
حسن ابتسم بخفة:بنت عماد يا اخوي
رفع راسه بصدمة و دمعت عيونه يناظر شهد:عماد !!
هزت راسها و بكيت:تعرفه صح!
هز راسه:كيف ما اعرفه اخوي ذا قسم بالله من خسرته خسرت الدنيا و روحي كلها
شهد بكيت:تدري اني ما شفته ولا اعرف عنه حاجة
هز راسه:عندي كل شي عنه اخبرك كل شي انتي بنت اخوي حسن واخوي عماد
ابتسمت و مسحت دموعها و تنحنح يعدل نبرة صوته يناظر عبدالعزيز و رجع يناظرها:كيف عزيوز معاك
شهد:عزوة و سند ياعمي
حمد:ما يحتاج اتكلم أساساً لان اعرفه تربية امه و فيه حنية الدنيـا وطيبتها كله بقلبه الله يخليكم لبعض
عبدالعزيز همس بـ حُب يناظرها:امين
حمد نزل رأسه:وصلني خبر من الي سواه الي ما يتسمى مازن و طلال والله مادريت الي سوووه فيك الا بعدين وقت حقق عمر معاي
شهد بلعت غصتها:اعرف عمي و فرحت مرة انك ماوافقت ولا كلمتهم
حمد ابتسم بخفة و مسح على وجهها يحفظ ملامحها و تنهد بضيق:تشبهينه حيل نفس النظرات و الملامح
حسن:يالله يرضالي عليكم روحو و ارتاحو بنتي انتبهي لزوجك خليه يرتاح و ينام
هزت راسها و لف عبدالعزيز على حمد:يبه محتاج شي اجيب لك شي
حمد:سلم لي على امك وقول لها تسامحني
عبدالعزيز هز راسه وتقدم يودعه و خرج و معه شهد
شاف البقية راحو مع اعمامه وتنهد
شهد شدت على يده:عزوزي
ناظرها بابتسامة:عيونه
شهد ابتسمت بهدوء:انت بخير؟
هز بالايجاب وركبو السيارة حرك للبيت
- غرفة حمد -
ناظر حسن و همس:تشبهه
ناظره حسن باستغراب و كمل حمد كلامه:شهد تشبه عماد كثير ماخذة كثير من ملامحه
حسن ابتسم:مرة ، تبغى صور له وانا ضيعت ألبوم الصور إلي كانت فيه صورنا سوا
حمد:اظن انه مع ام عزوز فيه البومات
حسن:نشوف بعدين ، الحين يالله ارتاح لا تتعب نفسك
- شقة عبدالعزيز -
وصلو و نزلو ماشاف احد وعلى طول راح شقتهم
دخلت شهد المطبخ شغلت مايكرويف وسخنت له الفطائر وبدأت تجهز اكل وطلعت شقتها على طول
شافته يسلم من صلاة العشاء وقام يستغفر:تاخرت مرة على صلاة الله يغفر لي
جلس وحطت الاكل:يالله حبيبي سمي بالله
عبدالعزيز هز بالنفي:مو مشتهي
شهد جلست جنبه ومسكت يده:عشاني مالي خاطر عندك
ابتسم يقرب يبوس خدها:لو ما انتي معاي وش كنت بسوي!
ابتسمت بحنية تمسك يده اردفت بحماس:سوت خولة الفطائر بالجبن لـ عميرها وخبيت لك منها
ضحك ياخذ منها فطيرة الجبن ياكل واكلت معه شوي
وخلصو وحطت مواعين بالمطبخ ودخلت الغرفة كان منسدح على السرير يناظر الفراغ
تقدمت تنسدح جنبه وفتحت له حضنها
مسحت على راسه من ضمته لصدرها و همست:علمني وشفيك
عبدالعزيز بغصة:بعد سنوات طويلة ما كنت احبه الحين طلع لنا ومريض مو عارف وش أسوي كيف المفروض أتصرف
شهد:بس حبيبي ، هو ابوك مهماً سوا ومهما كان ماضيه يبقى ابوك احتسب اجر برك فيه وبكرا عيالك يبرون فيك
عبدالعزيز ناظرها:خايف افقده مابيه يروح عنا
مسحت على وجهه و ابتسمت من تناقضه وفهمت من تداخل مشاعره ببعضها:كلنا ماشيين على الطريق ذا يا حبيبي الله يحسن خاتمتنا
همس:آمين لاول مره اخاف و احن عليه اول مرة احبه
ابتسمت:اي شوف ربي سبحان اسمه ، عمي تاب و الله سامحه وكتب من نصيبه العفو العام طلع من السجن وزي ماقال الله في كتابه
نطقت ببحة وهي تمسح على شعره: { قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ }
وكملت:ربك غفور رحيم هو سامحه و عمي تاب لربه وبعدين يمكن مرضه كفارة له لازم نفكر بكل شي ايجابي
غمض عيونه براحة يقبّل خدها:وش اقول وش اخلي بس الله لا يحرمني منك
حاوطته اكثر تضمه لـ حضنها ورأسه على صدرها ونام بتعب
-
- يوم الثانـي -
الكل كان مستنفر كـ العادة بالمطبخ للفطور
شهد:اي جدة عزيز والبنات بيروحون
الجدة:جهزتو لهم الفطور
عليـاء بدون انتباه:اي عمتي شوربة العدس حمد يحبها وسويتهاا له
انتبهو الكل لكلامها و ابتسمو رغم اكثر وحدة ضرها حمد الا انها ماتكلمت ابداً بالعكس انها اهتمت لاموره و تسأل عبدالعزيز عنه و عن صحته
قربت الجدة تمسك يد عليـاء:طول عمرك طيبة وقلبك على الكل
عليـاء:افا عمتي ذا مو حد غريب ذا ابو عيالي بيننا عشرة عُمر
ابتسمت خولـة تضم امها:احلى ام بالدنييا كلها
ابتسمت لها علياء
شهقت خولة تناظر الساعة:مابقى وقت يالله سوير
سارة بعصبية لـ سُكَرة:لو ما هجدتي بصفقك
دخل عبدالعزيز:اوف وشفيك على البنت!
شهد بضحكة:نفسية صيام
ضحك يشيل سُكَرة:تعال نروح لـ ميشو وانتم بنات يالله عمر ينتظرنا تأخرنا عليه
خرج و دخل المجلس:خذ بنتك جننت عمتنا
ضحك مشاري من ركضت سُكَرة تجلس بحضنه:ميشو ما سويت شي
عبدالعزيز يقلدها بنفس نبرة الاطفال:ماسويت شي
مشاري ضحك:مو اتفقنا يا بابا تجلسين هادئة
سُكَرة:بس اخذت حبة سمبوسة من حق عزيز ماما هاوشتني
عبدالعزيز تخصر:وليش تاخذين سمبوسة حقتي
سُكَرة بعبوس:جوعانة
ضحك مشاري يحضنها:ياربي انا بنتي عافية عليك وانت انقلع مع سمبوساتك
ضحك عبدالعزيز يخرج وشاف خولة وسارة جاهزين وخرجو للمستشفى
-
- بالمطبخ -
شهد تاففت:فرح عند ورعها وخولة و سارة هربو المستشفى ونحن ننكرف
ابتهال:كله باجره
ليـنا دخلت من خرج عبدالعزيز:المفروض انا اجلس بالمجلس بس شوفي داخلة اساعدكم ماتلقون ضيفة مثلي
ضحكت الجدة:افا لَيـون انتي من اهل البيت
شهد بطقطقة:اخذ مشاري عمتي ليش ما ناخذك لولدنا وخلاص تكتمل
ليـنا بطقطقة:حبيبي ليمين لـ صقر ولا زاهد!
افراح:لو ما روآف متزوج كان زوجتك ياه
بيـان شهقت ترمي عليها منديل:يا … لا تخليني اسبك بصيامي
ضحكو كلهم و التفت شهد تكمل تقطيع السلطة
فرح دخلت:وش الموضوع اصوات ضحككم عالية
فاطمة:هاا اكتملت العصابة
ضحكت شهد تتكئ على كتف فرح:نقول دام اخذ مشاري سوير ليش ما ناخذ اخته بس محتارين لمين
فرح:لـ خلودي
صفقت بيـان:اي والله نسيناه ، خالد و لينا ، واوو
ضحكت ليـنا بصدمة:خير بنات ترا نطقطق لا تقلبون جد
فاطمة:ليش بنتي ما تبين تتزوجي
هزت بالنفي:لا خالتي ما افكر
خالد من عند الصالة:احسن
شهقو بصدمة و طلت فرح شافته على جواله بالصالة ضحكت:وش مجلسك هنا
خالد:كان عندي اتصال وجيت هنا وقولي لاخت مشاري محد ميت عليك
الجدة:بالعكس ولدي الف واحد يتمناها
خالد بعبط:خليني اشوف الالف الي يتمنونها بعدين افكر
ليـنا:محد ميت عليك انت كمان
شهد:من شفتك تتهاوشي مع سُكَرة على سمبوسة وانا غاسلة يدي منك بزرة
ضحكت لينا:اشتهيته وقلت اكل
شهق خالد:كاف.رة ما تصوم ياربي الحمدلله مجرد دوعابة لو صدق بنتحر
ليـنا:اي كاف.رة وبسلم على قت.لك
ضحك بقوة وصدت باعجاب من فخامة صوته
فرح:ضاعت علوم البنت من ضحكتك
ليـنا باحراج:وتبن يا فرح
خالد ضحك باستهبال يخرج
-
- بالمستشفى -
عبدالعزيز بحنية:كيفك يبه ؟
حمد ببحة:الحمدلله
خولة قفلت باب الغرفة ونزلت ححابها والنقاب:يالله مابقي شي على الفطور
اخذت سارة سجادة فرشتها على الارض وجلس عبدالعزيز و عمر و سارة بينما خولة سكبت شوربة وجلست على طرف السرير:ماما سوتها تعرفك تحبها
حمد بابتسامة حزينة:ياطيّب قلبها
بدأت توكله واذن وفتحو صيامهم البقية
عمر شاف خولة مشغولة تاكل ابوها قام وحط تمرة بـ فمها
ابتسمت له بخجل ورجع يجلس
خلصو فطورهم و قامو صلو
خولة وهي تصب لـ ابوها عصير التوت:يويلي من شهد سرقت التوت الي صلحته
عبدالعزيز:بنت ترا تحارشين زوجتي كثير افضل لك تهجدين
حمد:إلا خولة ذي الدلوعة لا تعصب عليها
ضحك عبدالعزيز بصدمة:افا وانا المفروض الدلوع الحفيد الاكبر والولد البِكـر.
ضحك حمد بهدوء:البنات بنات ابوهم والولد ولد امه
ضحك عمر:اتفق معاك ياعمي
ضحكت سارة وعدلو حجابهم وتنقبو من دق الباب سعود
فتح عمر:هلا بالعديل
سعود بروقان:مساوء يا حلو
عمر رفسه:ادخل
ضحك يتنحنح:عندي لكم خبر حلو
عبدالعزيز:وش الله يبشرك بالجنه
سعود:توني كلمت الدكتور يقدر عمي حمد يخرج بس بشرط
خولة بفرحة تناظر حمد وكمل سعود:يرتاح كثير بالبيت ويلازم علاجاته وجلسات الكيماوي
عبدالعزيز:يا الله لك الحمد أن شاءالله يالله طير شوف اوراق الخروج
سعود ناظره وشمق:وترا بأخذ عمي عندي جود وصتني
عبدالعزيز:اقول طير
ضحك سعود يخرج وضمت سارة حمد:الحمدلله ياخوي
حمد:وين اروح يا اختي ؟
عبدالعزيز بحنية:عندك اهلك ينتظرونك جدتي و جدي وكلهم
حمد بحزن:ابوي !! الي للحين زعلان
عبدالعزيز:بتروح ونشوفه إذا زعلان او لا يابو عبدالعزيز
وحمد رفع يده يضم عبدالعزيز لصدره:الله يخليك لي سند وظهر ارتكز عليه بايامي الاخيرة ياولدي
عبدالعزيز:الله يطول بعمرك ويحفظك يارب
حمد ابتسم و دخل سعود بـ ورقة الخروج وهو يبتسم لهم
-
- بيت الجد -
الجدة زغرطت:صدق سوير طيب طيب قفلي
قفلت من سارة وناظروها كلهم من كانو يتقهوون بالحوش
الجد:وش العلم نوير؟
الجدة:حمد كتبو له خروج
حسن بفرح:صدق الحمدلله
الجد وهو يراقب ملامح وجه عليـاء:جهزو له غرفة
علياء رفعت نظرها له:لا عمي غرفة موجودة بجهزها الحين له
الجدة:بس ذيك غرفتك
علياء ابتسمت بخفة:عمتي زوجته انا وشوله يبقى بالمجلس و غرفة موجودة الحين اجهزها له
قامت مع البنات الي استنفرو يجهزون البيت والقهوة والشاهي لجلسة بعد صلاة العشاء
-
- قدام البيت -
نزل عمر يسند حمد وجاء عبدالعزيز من جهة الثانية بسرعة يمسك ابوه
فتحت سارة الباب ودخلو كلهم
يشوفون الجدة باستقبال لوحدها
الجدة:يهلا يهلا تو مانور البيت
ابتسم حمد وقرب منها يضمها ويبوس كتفها ويدها وراسها
الجدة حاوطت وجهه:كيف صرت ياضناي
حمد:عند شوفة الوجه انا بخير ومبسوط
ابتسمت بدموع وتقدم عبدالعزيز:لا تبقى واقف يبه
الجدة:اي تعالو المجلس
دخل المجلس وفز الجد يقوم و عيال كلهم وقفو معاه
حمد تقدم لوحده ومسك يد الجد يبوسه وهو يبكي:يبه سامحني تكفى يابوي سامحني
الجد بدموع حضنه:مسامحك يا ولدي مسامحك تعال اجلس ارتاح
جلس يسار الجد جنب اخوانه ، والأحفاد كالعادة يمين الجدة
حمد يأشر لـ زاهد:ذا ولدك يا سليطان صح !!
ضحك سلطان:واضح ؟
حمد هز راسه:مو بالشبه وبس الا بهباله وطول لسانه يوم فتح لي الباب اذكرك وانت صغير كنت مثله
عمر ناظر زاهد:خذلك من اول مرة يقول اهبل ما الومهم
زاهد بملامح بريئة:انا مسكين
روآف:سك.ين والله
حمد اخذ نظرة:البيت تغير ولا لان من سنوات ماجيته
حسن:تغير يا اخوي قبل سنه حصل حريق بس ماقصرو العيال رجعوه زي اول واحسن
حمد:ماشاءالله عقبال ماتفرحو فيهم
ضحك سلطان:انا مابقى الا الملسون ومطول وعند اخواني صقر و خالد ، البقية الله يزرقهم الذرية الصالحة
حسن:وانا قاهرني ذا اهبل مكبرني على طول بعد الزواج جاب لي ولد انا صغير على ماصير جد
وضاح ضحك:وشدعوه يبه الله رزقني الحمدلله وبعدين لا تقول لنفسك صغير الصراحة كبير مرة كم مرة تبيني اصارحك بهالموضوع
حسن:ان كنك تبي عصا ابوي تكلم مرة ثاني بموضوع عمري ، انا صغير لسع وغصب عنك
حمد بضحكة:للحين العصا شغالة
الجد شد على العصا:اي وما نستغنى عنها
ضحك عبدالعزيز:الحمدلله ماجربتها
عمر:انت جربت الاسوء غسلت الزُل بعز البرد
مسك راسه:الله لا يعيدها من يوم
ضحكو كلهم ودخلت سارة بالقهوة والشاهي ومعاها سُكَرة
عبدالعزيز ضم سُكَرة:وشفيها السُكَر
سُكَرة:زعلان من زاهو
زاهد لعب بحواجبه:تستاهلين
عبدالعزيز:وش سوا لك هالمرجوج!
زاهد وهو يجهز نفسه للنحشة:اكلت ايسكريمها
فز يركض من رفع الجد العصا:ليش اكلته بزر انت!
عبدالعزيز:خلاص انا اوديك البقالة لا تزعلين!
حمد:بنت من ماشاءالله؟
سارة:بنتي سُكَرة ، ماما سلمي على خالو
سُكَرة بخوف لشخص غريب اول مره تشوفه:لا
ضمها عبدالعزيز بضحكة:ذا ابوي انا
سُكَرة هزت بالرفض ونطقت:لا ابي بقالة
عبدالعزيز:طيب الحين صقر يوديك
صقر:هات فلوس معاي خمسمئة وحرام اصرفها على ريالين اسكريم
وضاح:من شهر تقول معي خمسمئة مدري متى تنصرف
صقر:مخليها لايام الشدة
سارة:اي يالله عاد كل واحد يده بجيبه ماشاءالله انتم كريمين ماتقصرون خوالها وعيال خوالها
وضاح:لايشيخة اقول معاي خمسة
✨ انتهى ✨
🤍🤍🤍
أنت تقرأ
مَا الذِي بعَيناكِ لتغلبِنيِ هكذا باستمرَار
General Fictionكاتبـة رَوان الانستا: rlliie44 البطل - عبدالعزيز - بيوم ادافع عن امي يوم ابوي يضربها واتسبب بقىًله وسبب هالحادثة تغيرت حياتي - البطلة - شهد - اكتشفت بعد ١٨ سنة سر خطير يدمر حياتيّ وش مصير الاثنين ؟!
