مَا الذِي بعَيناكِ لتغلبِنيِ هكذا باستمرَار

بارت " 45 "

قاطعها  نايف من نطق:وانتي اي شي تسمعينه تصدقيه يمكن تمزح معاك ؟ ابتهال الله يخليك وش هالكلام والتصرفات
ابتهال هزت بالنفي:مو مزح نور كانت موجودة كمان و كل بنات ان كان من اهلي أو صحباتي تحرجني كذا قدامهم
مسك راسه يحاول يهدى واخذ نفس:توتـا حياتي انتي ناظريني
رفعت عيونها له وهي تبكي و ابتسم يمسح دموعها:حلفت ماتنزل دموعك وانتي على ذمتي ، توتـا انا اتفاهم مع كادي معليك بس احلف لك ماطلع هالكلام مني الحين لو عزمتك على قهوة ولا عشا بفلس مثلاً ، انتي زوجتي و حبيبتي وذا واجبي تجاهك اي اصرف عليك مافيها شي تبين اي شي فداك وعيوني لك والله ما اتضايق بالعكس افرح لان خلاص حياتنا صارت واحدة مشتركة انا ابيك تكفين لعاد تتصرفي كذا ولا تزعلي وتبكي وانتِ مو فاهمة شي مني ولا سامعة من منطوقي انا
ناظرته ولامست الصدق بكلامه ونظراته وهزت راسها لتسرعها:انا آسفة
هز بالنفي يبتسم لها:عادي انتي اهم شي لا تتضايقين مابي عمير يقول اخذتها مني و زعلتها
ابتسمت بخجل وهزت بالنفي:مو زعلانة خلاص
نايف بحدة:والبطاقة حقتك ذي لو سمحتِ وقت تكوني معي لا اشوفها ولا كسرتها ، انتي معي اي شي تبينه بس أشري و يجيك ولو تبين القمر و نجوم السماء جبتها
ضحكت بخجل:الله لا يحرمني
قرب منها ونيته انه يضمها بس قاطعه اتصال كادي
نايف شاف اتصالها وزفر بضيق:ياربي الواحد ما يقدر ينفرد براحة مع زوجته
ابتهال:رد يمكن في شي مهم
رد بزعل منها:نعمم
كادي ببكاء:نايف الحقني
نايف بصدمة:وشفيك؟
كادي:خالد يا نايف يتهمني بالخيانة ويتكلم فيني تعال خذني من عندهم الله يخليك
نايف قفل بصدمة و عصبية ولف يرجع
ابتهال:مستحيل؟ خالد مستحيل يتهمها كذا
لف لها بصراخ:واختي خاينة يشك في اختي؟
ابتهال بدموع:وش دخلني تعصب علي
نايف وقف قدام البيت ونزل ونزلها وهو يمسك يدها يجرها
كانو العيال مجتمعين بالحوش وفز زاهد يشوف نايف داخل بـ ابتهال
نايف دفها لـ حضن عمر وصرخ:خالد يا كل/ب تعال
عمر بغضب بعدّ ابتهال لـحضن زاهد وقرب من نايف بعصبية:صاحي انت ؟!!
زاهد حضن ابتهال بهمس:مد يده
هزت بالنفي بخوف:لا لا
عمر بعصبية:ليش تجرها كذا ليش تدفها ؟ صاحي انت يا نايف المفروض زي ما اخذتها من بيتها ترجعها انا ما اعطيتك اختي عشان تهينها كذا
نايف صد يشوف خالد يطلع ومشى بعصبية يمسكه من ياقته يسحبه للجدار ونطق بصراخ:صاحي انت تتكلم كذا
زاهد بهمس:للبيت
بكيت ابتهال تشوف عصبية نايف و صدت تشوف اثار اصابعه طبعت على معصمها من نزلها بالقوة من السيارة والغضب معمي عيونه و دخلت بيت الجد تروح لامها
خالد ببرود:انا ما اتكلم كذا غير انا شايف شي بعيوني
نايف ضرب بوكس وفز عبدالعزيز يدفه وتدخلو العيال يبعدونهم عن بعض من رجع خالد اللكمة لـ نايف
عبدالعزيز:نايف اصحى اجلس نتفاهم اكيد في سوء تفاهم يا عيال
نايف بصراخ يحاول يبعد سعود من قدامه:يويلك مني يا خالد يويلك
سعود يبعده لوراء:نايف خلاص هدي
خالد بصراخ:لا تكون واثق بزيادة احسن لك أنا ما اقول كلام من فراغ ، عيني شافت و اذني سمعت
خرجو الرجال بصدمة من صراخ العيال
الجد:وجع تتضاربون انتم اخوان انتم
سلطان بحدة:وش صاير
زاهد بقهر يأشر على نايف:مرجع اختي وهي يجرها ويدفها علينا مو حركة رجال ذي
ابو نايف بصدمة:نايف ؟!
نايف بقهر:و فعلة خالد مو فعلة رجال
سالم:خالد ؟ وش مسوي؟
نايف: تكلم؟ يالله خليهم يسمعو كلامك
خالد بحدة:الكلام ما ينقال بالعلن بستر على اختك
نايف تقدم يضربه:تستر على مين يا خسيس اختي اشرف منك
خالد بسخرية:متأكد
ابو نايف بحدة:خالد مو كلام رجال ذا وش صاير
مشى بغضب يدخل المجلس و لحقوه ابوه و الجد و ابو نايف
نايف وقف واتصل على كادي و لحقهم للمجلس
ابو نايف بحدة:تكلمو
نايف:اختي متصلة تبكي وذا متهمها انها تخونه ويشك فيها
الجد بصدمة:وش هالكلام خالد مستحيل هالكلام منك ؟
خالد تكتف ببرود و قهر:مني يا جدي
خرج نايف لـ كادي وهي تحسب بيروحون البيت
كادي ببكاء:نايف
نايف حضنها:خلاص انتي معاي
مشيو للمجلس وهي تبكي:لوين
نايف:نتكلم بس
شدت على جوالها وهي منهارة بكى ماجاء ببالها تحذف الي بالجوال وتدعى ما يصدقون كلام خالد
خالد:دام جات خلوها تفتح جهازها
نايف:مين انت عشان تقول نفتح جوالها انا وانا اخوها ولا مرة فتحت جوالها جاي انت تقول
خالد بحدة:إذا مافي شي تخاف منه افتح الجوال ولك وعد مني اعتذر لك قدام الكل اذا ما طلع شي
نايف بثقة مشى لـ كادي:هاتي جهازك
ناظرته وهي تبكي تهز راسها بالنفي
نايف:لا تخافي دام مو مسوية شي خلينا نتأكد و يندم استاذ خالد على هالاتهام
غمضت عيونها بقهر من سحب الجوال بالقوة واجبرها تفتحه دخل السناب وماكان في شي والانستقرام كذلك مافي
خالد:الواتس والاتصالات شوفها
رجفت كادي وهي تبكي ودخل الواتس يشوف ارقام بنات ومحادثات عادية بس انتبه لـ صورة عرض الولد ودخل المحادثات بثقة وثوان تغيرت ملامح وجهه وهو يقلب بالمحادثات توسعت عيونه بصدمة ونظراته تتنقل بين كادي و الجوال الي تحتوي على صورها و صور سامي وكلام حب و غرام و غزل وكثير
مسح راسه ونطق بحدة:كادي؟ وش ذا
كادي بخوف من عصبيته:نايف
رفع يده بيضربها بس مسكه خالد بسرعة يبعد كادي خلف ظهره:ولد التفاهم مو بالضرب
نايف حاول يبعد خالد و بقهر تكلم:كيف اناظر الناس؟ سودتي وجيهنا
ابو نايف:ايش في ؟
نايف نزل راسه ونطق بضيق: على علاقة بـ واحد ما نعرفه
سالم فز يمسك ابو نايف من تقدم لـ كادي:حلفتك ما تلمسها يا اخوي
ابو نايف بصراخ:يا بنت ** انا ربيتك كذا
كادي بكيت :يبه
نايف بصراخ:اسكتي لا أكفر فيك هنا اسكتي
خالد بهدوء يناظر نايف:وانا عندي اخوات ما اظلم بنات احد اخاف عليها زي ما اخاف عليهم كأن بامكاني اتصرف تصرف ثاني دامها على ذمتي بس أنا ماتربيت يا نايف كذا
نايف غمض عيونه بضيق و صراخ فيها:امشي قدامي امشي للسيارة اوريك
خالد:اخت نايف قبل لا تخرجي
كادي غمضت عيونها ونزلت دموعها وشهقت تبكي من نطق:انت طالق
خرجت وراها ابوها وسالم يهديه
نايف مسح وجهه يخفي دموعه:خالد
خالد صد:معذور على كل شي وتفهمت غضبك علي ويشهد الله ان مازعلت على مدت يدك علي كثر ما زعلني تصرفك مع بنت عمي! وش ذنبها!! والله عيب
نايف:خالد انا
صد خالد يعطيه ظهره:بحفظ الله نايف
خرج نايف بهدوء و احراج من تصرفه شاف العيال يناظرونه بزعل ولاحظ صدود عمر عنه
زاهد بغضب:مالك بنت عندنا ورقة اختي توصلنا بكرا
نايف بندم ناظر عمر:عمر خلينا نتكلم و نتفاهم
عمر بنبرة حادة:نتفاهم ؟ كان ماسويت حركتك وجيت بهدوء نتكلم و نتفاهم ، والحين بتطلقها وغصب ، دام ذي حركاتك قبل الزواج ، بعد الزواج وش بتسوي؟ وش دخلها بين اختك و زوجها ولا عشان خالد ولد عمها ترد الحركات فيها ، انت
قرب عمر منه بهدوء وبقهر كمل:انا اعطيتك اختي وانا واثق فيك اخوي يا نايف انت خويي واغلى كمان بس خلاص انتهى
نايف:اسف والله
سلطان:ولدي ما توقعتها منك الله يهديك
نايف:عمي !!
صد سلطان عنه و تنهد نايف بتعب
قبض نايف على يديه وخرج يدف كادي لـ سيارة ولحقه ابوه مع امه و نور وهم مصدومين من اتصل نايف يخبرهم يخرجون
-
- الحوش -
خالد مشى يخرج من البيت بغضب ولحقه صقر يهديه يعرف خالد الي نادراً ما يزعل و يعصب وإذا عصب مايشوف شي قدامه
وضاح:استهدو بالله يا عيال أن شاءالله خير
عمر:نايف ذا ماله بنت عندنا بكرا يطلقها
الجد:عمر ؟ وش هالكلام
سلطان:يرضيك يبه زي ماقال عمر اذا قبل العرس يسوي كذا وش نتوقع منه بعدين ؟
الجد:لا مايرضيني، انا انت وهو كلنا عندنا بنات ومحد يرضى على بناته ، هو اكيد بيتصرف كذا و يوقف مع اخته صح يمكن تسرع وغلط على بنتك بس كلنا نتسرع بلحظة غضب ، انت كمان وقفت هالموقف بيوم مع اخت عزيز يا سلطان تسرعت وندمت
سلطان صد بضيق:يبه
الجد:يا ولدي نايف واعي بس عصب عشان اخته بيجلس يهدى ويجي يعتذر لا تدمرو حياتها لا تتطلق ، صغيرة بنتك حرام وانت عمر زاهد اهجدو ولا تكلمونه انا و ابوها موجودين
عمر :انا اخوها يا جدي
عبدالعزيز مسكه يخرجه من البيت:خلاص هدي
عمر بقهر:يا عزيز قهرني اختي وش ذنبها وش ذنبها؟
عبدالعزيز:اعرف مالها ذنب و هي اختي و انا تضايقت كمان من تصرف نايف ، بس انت تعرفه وكلنا نعرفه مستحيل يأذي اختك يحبها ياخي ، انت بنفسك تطقطق عليه عشانه مستعجل على العرس صح ولا ؟ مد يده ؟ لا اجل بلحظة بس مسكها ودفها وندمان وانا شفت نظرات الندم بعيونه وهو يخرج ، اكيد ذيك اخته بيوقف معاها هدي و بتزين الامور الله يرضى عليك حرام عشان موقف زي كذا تدمر حياة اختك تبي يقولو عنها مطلقة ؟
هز بالنفي وركب سيارة وركب معاه عبدالعزيز:امشي نهجول يالنسيب
ابتسم عمر بخفة يحرك
-
- بيت نايف -
ابو نايف مسك شعرها بقوة:وين اودي وجهي بين الناس ياربي كيف اناظرهم
بكيت تترجاه يوقف ض.رب
نايف ض.ربها على وجهها:سودتي وجهي بينهم انا واثق فيك قلت اختي ما تسوي شي انا عشانك خسرت اعز اصدقائي خسرت زوجتي وين اودي وجهي منها وين
بكيت ونزلت عند رجول ابوها:ابوي تكفى سامحني تكفى والله ما اعيدها
نايف مسكها من شعرها يجرها للغرفة و اخذ العقال و انهال عليها بالض.رب و خرج بعده يقفل عليها بالغرفة
انهارت وهي تضرب الباب:نايف لا تكفى نايف لا الله يخليك
نايف مسح وجهه بصدمة جهز اغراضه
ونزل:رايح المهمة يبه خليها لا تطلع لين اجي لا تحن خليها تعقل ، يمه نور لا تدخلون لها إلا مويا و اكل وجوال لو وش ما يصير ما تعطونها ، يومين ثلاث انا راجع
مسح وجهه يبوس راس امه و ابوه وضم نور يبوس خدها و مسح دموعها:لا تبكين مافي شي تمام
نور اشرت له:ابتهال؟
نزل أنظاره:ابتهال يا نوني اكيد بترفضني مستحيل تكمل
خرج وركب سيارته يشد على يده يتذكر ابتهال و زفر يذكر ربه وحرك للمركز
صالح:ارحب نيوف يالله بنتاخر
هز راسه بهدوء ودخل مكتبه غير ملابس يلبس زيه وفتح جواله يفتح الواتساب دخل محادثات ابتهال وضاق صدره سجل لها
" حبيبتي ابتهـالـي اسف والله اسف ،اعرف مالك ذنب بالي صار بس لحظة غضب ما ادري وش فكرت وقتها سود عيوني من سمعت صوتها تبكي وثقت فيها ثقة العمياء وخابت ثقتي ، مدري وين اودي وجهي من اهلك و منك ومن عمر ، اسف ما تكفى بس والله ندمان ،بس فرصة اعطيني فرصة اخيرة اوعدك وعد ما ينعاد الي صار ، تكفين لا توجعيني فيك ، انا رايح المهمة ادعيلي ، احبك ياقلبيّ .
مسح دموعه وقفل الجوال يحطه بالدرج و ياخذ جواله الخاص بالمهام ويقفل الدرج وخرج مع صالح
-
سامي جلس بقلق يتصل على كادي وهي ما ترد
مسح وجهه بضيق:وينك يا كادي تكفين لا تخوفيني
زفر يقفل جوال ويمشى لـ شغله الدوام الثاني
ذا حال سامي يحبها بصدق يحاول يسوي كل شي عشان يرتب وضعه و يشتغل دوامين صباحي مراسل بـ شركة و مسائي مندوب توصيل طلبات بس عشان يقدر يجمع مبلغ ويقدر يتزوجها
-
ابتهال فتحت جوالها ورجف جسمها من شافت فويس من نايف
نزلت دموعها تسمعه وهي تبكي
انسدحت وغطت وجهها وانهارت بكى:وش دخلني بين خالد و كادي يا نايف وش دخلني ليش سويت فيني كذا ليش!
مسحت دموعها وغفيت بعد نوبة بكاء
-
- بعد مرور ٣ ايام -
- مركز -
زفر نايف بألم:لا خفيف
صالح:يا ولد أي خفيف يدك مو قادر تحركها من قوة الطيحة
نايف شاف يده اليمين المتورمة و تنزف و زي العسكري مقطع مشى مع صالح للمستشفى وفحصوه
كسر بسيط وجبروها له وووصله صالح للبيت
نايف:مشكور اخوي والله
صالح:ولو نيوفي
ابتسم بهدوء نايف من تذكر ابتهال ونزل يدخل البيت
فزت نور تحضنه بخوف وحاوطها:معليه يا نونـي بخير
ام نايف بخوف:انتي بخير يا ولدي
ابو نايف:وش صار
نايف سلم عليهم:كسر بسيط معليه انتم كيفكم
أبو نايف بحزن:كيف نكون يا ولدي
نايف تنهد:بشوفها
راح اخذ دوش بحذر وهو يكتم ألم يده ولبس وفتح جواله بلهفة و خاب ظنونه من ماكان في رد من ابتهال
اخذ نفس يهدى نفسه وخرج وشاف نور فتحت باب غرفة كادي ودخلو سوا
نور دخلت معاه عشان ما يسوي شي لـ كادي وهو بوضعه ذا
كادي فزت بخوف من شافته دخل وهي تبكي
جلس قدامها:علميني بكل شي يا كادي خليني اقدر احل الموضوع
كانت ساكتة و ماتكلمت
ناظرها بحدة:كادي
كادي ببكاء:اسمه سامي
هز راسه بهدوء:اي
كادي:تعرفت عليه بتويتر من سنتين و شوي
غمض عيونه بعصبية وكملت:حبينا بعض والله يا نايف ما يلعب علي والله
نايف:سنتين! وش الي يمنعه ما يتقدم
كادي:مو متوظف ويعرف ما بتقبلون فيه وهو عاطل كان يدور وظيفة
نايف بقهر:تلعبين انتي ؟ تحبينه وتنتظرينه يتقدم وانت موافقة على خالد
كادي:وقتها انت قلت وافقي و وافقت عشانك على خطوبة و بالملكة انت قلت لا تفشلينا و ووقعي ووقعت بس كنت ازعجه بكلامي و شروطي و ابغاه يطفش و يطلق بنفسه
نايف صرخ:تلعبين يا كادي تلعبين
كادي بكيت:نايف الله يخليك سامحني الله يخليك
مسح وجهه:وش اسوي قولي خسرت ابتهال بسببك خسرت اخوي يا كادي اخوي عمر خسرته بسبب فعلتك فشلتينا قدامهم فشلتينا و دمرتي نفسك و دمرتي حياتك و حياتي معاك خلاص كل شي انتهى و تدمر بسببك
كادي نزلت راسها وهي تبكي
قبض يده اليسار وصرخ:الله ياخذك قولي وين اودي وجهي عنهم رايح يا كادي عندها لو طلبت الطلاق يويلك
شهقت تبكي:وش دخلني
نايف بصراخ:تستهبلييين معايا !! مين سبب مشاكل بيني و بينها ليش تتكلمي عندها بكلام انا ما قلته
كادي:نايف ياخوي والله اسفة
تقدم و رفع يده عليه و نور مسكته بترجى تناظره بدموع و تهز راسها بالنفي
ناظرها:نور اتركيني تستاهل الي يجيها
نور مسكت يده اليسار بقوة تخرجه من الغرفه وقفلت الباب وانهارت كادي بكى
خرج بعصبية وحرك لـ بيت سلطان
وصل وعض شفايفه بـ ألم من اتعب يده بالسواقة نزل يدق الباب وفتح صقر
صقر بهدوء:هلا نايف
نايف:عمي سلطان موجود
صقر:حياك تفضل المجلس
دخل نايف مجلس الجد وكانو كل العيال و الرجال مجتمعين
نايف:سلام عليكم
فزو العيال من شافو اصابته وناظروه بقلق و سلمو بهدوء و جلسو
الجد:سلامات ولدي وشفيها يدك؟
ناظر نايف يده المجبرة:اصبت بالمهمة انفجر قنبلة والحمدلله طلعت منها باقل اضرار
تقدم صقر يقهويه من رفض زاهد يقوم له من زعله
نايف باحراج:عمي انا جاي عشان اتكلم بالموضوع
سلطان:وانت عارف انك غلطت على بنتي
هز راسه:عارف وندمان والله بلحظة غضب وانا جاهز للي تبون
زاهد ببرود:نبي ورقة اختنا
الجد رفع العصا:انقلع قم لا تتكلم إذا الكبار يتكلمون
زاهد:جدي !!
سلطان:زاهد رح لخواتك
خرج زاهد بزعل وكمل نايف:والله عارف وفاهم انا غلطت وجيت اعتذر عمي منك و من زوجتي والعيال ، والله ندمان واوعدكم ما يتكرر الي صار ولكم مني الي تبي بس لا يصير الانفصال يا عمي
سلطان ناظر ابوه وهز الجد راسه وقام سلطان:تعال ولدي عمير قم وانا ابوك معي
خرج عمر و نايف معاه ومشيو لبيت سلطان
قلط عمر نايف وهو صاد عنه وراح سلطان لـ غرفة ابتهال
سلطان:ادخل؟
ابتهال:تفضل يا بابا
جلس سلطان قدامها على السرير وباس راسها:بنتي نايف تحت وجاي يعتذر ويصلح الي صار ما اقول شي ولا اجبرك الي تشوفينه وتبينه يصير ، اذا ودك و قلبك مرتاح معاه و تبغين تعطينه فرصة انا معاك و ابشري و اذا ما تبغينه و تبغى الانفصال كمان انا معاك و غصب عنه يطلقك
ابتهال هزت راسها بهدوء وعدلت شكلها تنزل لوحدها بعد ما استأذن سلطان يروح يرتاح بغرفته يتركهم براحتهم
سمعت صوت اذان العشاء وابتسمت بهدوء تردد بادعية بقلبها و تستغفر ربها و مشيت للمجلس
فز نايف بشوق يناظرها
ابتهال بخوف تقدمت:بسم الله عليك وش صاير لك ؟
نايف بابتسامة حزينة:حادث بسيط انتي كيفك طمنيني عنك ؟
صدت تجلس بعيدة عنه و نطقت بهدوء:بخير
نايف:عمر تقدر تخلينا لوحدنا
عمر:لا تكلمّ بوجودي ولاتبي تكون لوحدكم و ترجع تاذيها
ابتهال ناظرته:عمير نايف ما يأذيني ، تتركنا كم دقيقة بس
هز راسه و طلع الصالة
نايف قام يجلس الكنب الي جنبها و مسك يدها ونزلت دموعها:ايش ذنبي يا نايف
نايف باس يدها:لا توجعيني بدموعك اسف والله ندمان ، ندمان مرة وذا جزائي
قالها واشر ليده:اليد الي اذتك نفسها الي انصابت فيها
ابتهال بحنية مسحت على يده:توجعك
نايف بتعب:شوي
ابتهال قربت اكثر وانحت تبوس جبيرته
صد بضيق:ابتهال توجعين قلبي كذا انا سبب دموعك وانتي تطيبي جروحي؟
ابتهال:نايف خلاص الله يخليك انا تعبت والله تعبت ماعدت اعرف نفسي ب الايام الماضية خلاص
نايف بابتسامة امل:تعطيني فرصة اخيرة والله وعد مايجيك ضرر مني
ابتهال شدت على يده اليسار:تكفى لا توجعني مرة ثاني انا سلمتك قلبي لا تكسرني مرة ثاني الله يخليك
فز يضمها:اوعدك وعد والله وعد ما اسوي شي يزعلك مرة ثاني والله ولك الي يرضيك
ابتسمت تحاوطه وهي تبكي وضربت كتفه:فقدت الامل يالظالم بعيد ما تجي ، ما رديت عليك عشان ابغاك تجي نتكلم وجه لوجه
نايف باس راسها يرجع يضمها بهدوء:قلت لك بالمهمة واول ما رجعت جيتك خفت تطلبين الطلاق
ابتهال بعبوس تبعد وتناظر عيونه:وانت تتوقع اطلبه؟ شوف صح يمكن ازعل كثير واطلب تراضيني بس مستحيل اتطلق منك
ضحك يرجع يضمها:احبك ياكبر حظي فيك والله
حاوطته وهي تمسح على ظهره:تعبان ؟
هز راسه:مرة ماغفت عيني خلال هـالايام غير 3 ساعات
ابتهال بحنية:يعيوني انت ، روح البيت ارتاح
هز بالنفي:مافي بعوضك عن ذاك اليوم وبراضيك وثم اروح البيت ارتاح مرة واحدة
هزت بالنفي:رضيت لا تتعب نفسك الله يخليك
نايف بإصرار:تجهزي يالله ونادي لي عمير
هزت راسها باستسلام وخرجت
عمر:خوخه اكلمك شوي
خوله:اسمع يعيوني تكلم بهدوء وتفاهمو زين الله يخليك عشان خاطر صداقتكم وخاطر ابتهال
تنهد:ان شاءالله ياروحي
قفل من خولة وفز يحضن ابتهال:وش صار؟
ابتهال بنظرات براءة:كل شخص يستحق فرصة ثانية صح ولا ؟
عمر:وانتي واثقة بقرارك ؟
هزت بالايجاب:واثقة ، احبه يا عمر مستحيل ادمر حياتي عشان غلط صغير ، تكفى عشان فرحتي وسعادتي لا تزعل منه والله نايف يحبك ويعتبرك اخوه ارجعو زي اول لا تتضايقون إذا انا سامحته انت ليش متضايق
عمر مسح على شعرها:عشانه سبب دموعك
ابتهال:بس الحين هو سبب فرحتي يالله ينتظرك
هز راسه بهدوء و دخل المجلس
نايف تقدم حضنه
عمر طبطب على ظهره:كلمتني ابتهال وسعادتي ورضاي من رضاها وسعادتها بـ مشيت المرة ذي لخاطر السنين الي جمعتنا بس لا توجعني باختي ، اوجعني بأي حاجة بالدنيا الا ابتهال يا نايف لاتوجعني فيها
نايف:والله ما يمسها شي وهي على ذمتي اوعدك وعد رجال
ابتسم عمر:توكل يالله بيتك
ضحك نايف:وباخذ زوجتي
عمر ناظر ساعته:الحين ٨:١٠ يعني على تسع تكون موجودة بالبيت
ضحك نايف:سلامات ، بس ما نتاخر
نزلت ابتهال مع زاهد وهم يضحكون سوا وخرجو عمر نايف من المجلس
زاهد تقدم يبوس خشم نايف " سلام الرجال ":اعذرنا النسيب
نايف:انت اعذرني ياخوي
عمر:بامانتك
نايف:ولايهمك بعيوني سلم على عمي
زاهد:يوصل بحفظ الله
خرج نايف مع ابتهال وركبو السيارة انتبه لـ سيارة خالد توقف و ناظرها:دقيقة!
نزل ونطق:خالد
خالد لف و شاف ابتهال معاه و اخذ نفس يريح قلبه و نطق بهدوء:هلا نايف ، سلامات سلامات
نايف تقدم يسلم عليه:يسلمك ربي خفايف
خالد:ماتشوف شر
نايف:ما يجيك ، انا جيت لعمي وحليت الموضوع
خالد هز راسه:الحمدلله ما صار الي خايف منه بنت عمي وانت مالكم دخل بالموضوع ماصار نصيب و انفصلنا و مانبغى زعل و مشاكل بين الاهل
نايف:اعرف والله وانا ما ابغى كمان و كنت مقهور و معصب ذاك اليوم اعتذر
خالد:حطيت نفسي مكانك و تفهمتك اكيد ما برضى احد يتكلم على اختي معذور يا اخوي
نايف:طاح الحطب؟
خالد بضحكة:طاح يالله توكل
نايف ابتسم:رجال يا خالد
خالد ابتسم ودخل ورجع نايف بروقان للسيارة و ركب
ابتهال:ليش تتعب نفسك خلي يدك ترتاح
نايف بابتسامة:راحتي انتي وعندك
قرب منها يقبّل خدها و توترت منه و ابتسم بهدوء يشوفها تحاول تتعود عليه
ابتسمت بخجل من نظراته وشغلت اغاني وجلست تدندن ونايف يشاركها توجهو لـ مطعم يتعشون وبعدها تسوقو اثاث بيتهم وراحت شافت بيتهم واعجبها كثير و وصلها البيت وحرك بعدها لبيته
-
- تـركيا -
- بمركز العلاج -
روآف وهو يكلم عمر:اي بس لا تخبر احد بشوف الدكتورة وش تقول
عمر:ان شاءالله خير لا تقنط من رحمة ربي
روآف بضيق:احطها بعيوني هي والله ، بس يضيق قلبي يوم اشوفها فقدت املها
عمر:ادري بك يا اخوي و افهمك انت خلك معاها وبس وهي بتكون قوية و تستجيب للعلاج باذن ربي
روآف اخذ نفس:يالله ان شاءالله
عمر:ان شاءالله خير يالله نزلت المدام رايحين مشوار
روآف بضحكة:تكفى افتح السبيكر
عمر:دقيقة
ركبت خولة وحط عمر ميوت ولف يسلم عليها خدادي:اخبارك حياتي
خولة بخجل:الحمدلله وانت
عمر:شفت هالوجه كيف ما اكون بخير
صدت بخجل و لفت من سمعت صوت روآف
روآف:زوجة اخوي
ضحكت خولة بخجل تفتح الميوت من لاحظته:اهلين ابن حماي
روآف بضحكة:عجبتني ذي ابن حماي كيفك ؟
خولة:الحمدلله وانتم كيف بينو؟
روآف:الحمدلله مبروك مبروك مابغيتو
خولة ضحكت:يبارك فيك وين بنتنا
روآف شاف بيـان جاية مع ممرضة وراح لها وجاء وراها يدفها بالكرسي وراحت الممرضة:دقيقة
بيـان عقدت حواجبها:مين؟
روآف مد لها الجوال ترد من شافت الاسم:اهلين عمر
خولة:خير وطير عمر حاف لو سمحتي اغار
ضحكت بيـان:اهليين عروستنا مبروك مبروك
خولة:يبارك فيك يعيوني
بيـان:انا اخر من يعرف؟
خولة:يعزتي لنفسي يدخل عزيز يقول وقعي عشان تصيري حَرم عمر وانا كنت اسوي قهوة للضيوف
ضحكت بيـان وركبت السيارة بمساعدة روآف وركب جنبها
حطت الجوال بالوسط تعدل حجابها:اي قلتي مفاجأة
خولة:اي والله وذا ابن حماك والي يكون زوجي الصالح مسوي مرة واو لا لمح ولا شي لو شفتو شكلي وقتها الحمدلله طلبوه المركز و راح ولا صارت الشوفة شرعية وإلا مثل ما انصدمت بزواجي منه أنصدم من عزيز يتفق ويدخلني المجلس له
انهار عمر ضحك:تحش عيني عينك
بيـان:معاها حق تزعل لو منك اطلب رضاوة
خولة:بنتي لا بوها من رضاوة اهم شي تممت الامور على خير انا انتظر اللحظة ذي من سنين و بنين
بيـان:اي قال لي روآف قصة حبكم الأسطورية
روآف:يعتبر افشاء سر يا عمير بس ماقدرت ما اقول
عمر:ان كاني داري ما يبقى شي بفمك
ضحك:يالله توكل
عمر:هين اوريك يالله انتبه لنفسكم
روآف:ان شاءالله بحفظ الله
قفل ولف لـ بيـان:كيفك الحين ؟
بيـان:زينة
روآف:تحسي باستجابة؟ خايف كل تعبنا يروح كذا
بيـان بتوتر:ها لا الدكتورة ذي معروفة وكثيرين استجابو للعلاج ان شاءالله انا منهم
روآف:والله يا بيانـي ان استجاب العلاج لك الي تبين
ابتسمت:وعد
روآف لف لمواقف السيارات قدام المول:اكيد وعد يالله ننزل
هزت بالايجاب ونزل
فتحت الباب وتستند توقف على رجولها
روآف ركض يمسك يدها:هدي لا تتحمسي يا حبيبي بتتوجعي
ضحكت وهي توقف على رجولها ويديها بيده
فتح عيونه بذهول ونطق برجفة:بيـان
ضحكت بدموع:صار الي نبيه
ضحك يترك يدها ويرجع خطوتين لـ وراء:قربي ، قربي مني شوي
ضحكت تتقدم و تمشي له وضحك بعدم تصديق و دمعت عيونه يحاوط خصرها ويشيلها ودار فيها وهي تحاوط عنقه وتبكي
روآف:ما اصدق ما اصدق
بيـان بكيت وراسها عند عنقه:ولا انا يا روآف
روآف باس راسها وناظر بوجهه يبوس خدها:حبيبي انا ، كيف صار ، متى ، وليش ما قلتي
بيـان:من جلسات الي كنت اسويها بمركز العلاج بالرياض خطيت اول خطوات
توسعت عيونه بذهول:وأنا ليش ما ادري من وقتها
بيـان:حبيت افاجئك وطلبت من الدكتورة الي هنا من وقفت على رجولي ما تخليك تدخل معي
عبس:هين اجل ذا طلبك انتي
شابكت ذراعها بذراعه:مايهون تزعل بس حاولت لين خلاص مشيت اليوم زي اول وافضل
ضحك بفرح يشيلها وهو يصرخ:يارب لك الحمد يارب
بيـان ضحكت باحراج من نظرات الناس لهم ونطقت:الناس تناظر
روآف:وتناظر ، خليهم ، انا مبسوط فيك يا حبيبتي ، مبسوط قد الدنيـا
ابتسمت ودخلو المول وهي تسند عليه و تمشي على مهلها شاف محل ورد ركض تاركها لوحدها عند كراسي واخذ بوكيه ورد وخرج بسرعة لها:ذي لك
ضحكت تاخذ الورد منه وانحى يبوس خدها وحاوط ظهرها:وين تبين الحين
بيـان:جوعانة
روآف:يخسى الجوع تعالي من هنا جهة المطاعم
توجهو للمصعد وركبوه
فتحت جوالها ويد فيه جوالها تصور فيه ويد فيه بوكيه الورد الي يتوسط حضنها وهو يحاوط خصرها وراسه على كتفها يناظرهم
اخذت كم صورة
ابتسمت بـ حُب من جمال الصورة وقفلت الجوال من انفتح المصعد وتوجهو لـ احد المطاعم
طلب لهم اكل روآف وبقى يتأملها وهي مو منتبهة لنظراته وعينها تدور بالمكان
بيـان: روآف المكان حلو صح
روآف وهو يقصدها:مرة حلوة
ناظرت عيونه وفهمت قصده وابتسمت بخجل
شابك يده بيدها:بيـان للحين مو مصدق
ابتسمت:ولا انا كانت امنية مستحيلة
ابتسم يمسح بابهامه على ظهر يدها:وش تتمنين ثاني
بيـان اخذت نفس:يكون في ثمرة لـ حبنا!!
هز راسه بهدوء يبوس يدها:الحمدلله على كل حال ربك كريم
بيـان:مو قلت الي اطلبه لي تم
هز بابتسامة:من عيوني وش تبين
بيـان:ان ربك سبحان اسمه ما رزقنا خلال شهر اوعدني تتزوج
سحب يده من يدها بصدمة:بيـان وشتقولين؟ واعيه!! متوقعة بقول اي
بيـان باصرار:انا الي ما اقدر اجيب لك عيال انت مافيك شي تقدر تتزوج وتجيب عيال والله ما ازعل ذا حقك لين متى انا احرمك كم لنا متزوجين ؟
صد روآف:لو مر عشرسنين مني متزوج لو ابي ولد ابيك انتي امه ابيه منك أنتِ!
بيـان:ما اقدر روآف
روآف:بيـان مافي شي مستحيل شوي كيف كنا فاقدين الأمل من العلاج و الحين الحمدلله والشكر لله رجعتي زي اول و ربي بيكتب لنا الضنا بتتعافي و تحملين طفلنا بداخلك
دمعت:ما اقدر انا سألت دكاترة بالرياض هنا ارسلت تحاليل لأكثر من مكان و قالو كلهم مافي اي أمل خلاص أرجوك
روآف سكتت من قرب النادل يحط الاكل وشكره وراح وقرب يمسك يدها وهمس:اخر كلامي مستحيل اتزوج
صدت بدموع ورفع الملعقة بالاكل يوكلها بـ حُب و حنية
مسح دموعها بيده ونطق:عشاني خلينا نفرح بهاليوم ، مبسوط فيك يا حبيبتي هيا عشاني
هزت بالايجاب و اكلت منه
كملو اكل وهي حست حزنته من فتحت الموضوع
خرجو من المطعم وتسوقو وشافت قسم الاطفال:روآفـي شوف
ضحك:يجنننن ناخذ لـ حسن ؟
هزت بالايجاب:اكيد ما يتفوت عقبال ما اخذ لولدك
زفر بضيق وحاوط كتفها:ولدنا قصدك
بيـان اخذت نفس:أن شاءالله
خلصو تسوق وهم يتوجهون للفندق يجهزون اغراضهم لـ رجوعهم للسعودية لاجل زواج عبدالعزيز و شهد
-
- عمر و خولة -
خارجين من السينما متجهين للكوفـي:والله حلو
خولة:حبيبي اي حلو لو داري جايبني لفلم رعب ما وافقت
ضحك:مين قال اعتمدي على ذوق عسكري
خولة:ونا وشدراني قلت هو رومانسي اكيد عازمني على فيلم رومانسي نازل جديد مو على فيلم خطف وغموض وقتل
انهار ضحك ومشيو من جنبه بنتين و نطقت وحدة منهم:واه والضحكة الحلوة
سمعها وناظر بصدمة يصد يمسك يد خولة
خولة رفعت حواجبها تترك يده:لو سمحتي
البنت بدلع:اهلين
خولة بقرف من شكلها:ما تستحين على وجهك انتي شايفة شكلك ، حاطة طن مكياج بوجهك ولبسك استري نفسك اعوذ بالله ، وبعدين استحي على وجهك تتغزلي بـ واحد متزوج
البنت شمقت:وعع انتي شايفة نفسك وشدخلك فيني، مين صار يتنقب بهالزمن ، اقول لو ماتغيرتي زوجك اكيد بيلف لوحدة ثاني
خولة:مو شغلك بس على الاقل ما يتلفت باشكال الي زيك مقرفة
سحبتها صحبتها ومشيت قبل لا تتهاوش معاها
عمر بابتسامة كان مستند على السيارة يناظرها ورفست رجوله:وجعوه لا تبتسم اص
عمر :ابكي يعني؟ عادي لا تنكرين اني حلو البنات ينجذبون لي
خولة توسعت عيونها:رجعني البيت وارجع لهم ولا اقول ادخل انت لهم وانا ارجع اوبر
طلعت جوالها وسحبه منها:امزح يا خوخه
تكتفت تناظره وقرب يشابك يدينه بيدينها وعيونه بعيونها:محد مالي عيني إلا أنتِ
خولة:كان عاجبك الوضع قبل شوي ؟
عمر:عاجبني غيرتك وإلا انا قربت اطق الثلاثين سنة محد اخذ قلبي إلا أخت عزيز والحين تقولي عاجبني الوضع
ابتسمت بخجل من وراء النقاب وضحك:ضحكتي والله اني عارف
خولة بابتسامة:شسوي تجيب راسي بكلامك المعسول
عمر ضحك :افا عليك ، يالله ندخل
ناظرت الكـوفي:لا انسد نفسي
عمر:انا ارجع لك الشهية امشي روآف قال عندهم اشياء حلوة نزلت بالكوفي
ابتسمو يدخلون الكوفي الخاص بـ اخوه
تقدمو يطلبون وكانو البنتين الي قبل جنبهم كمان يطلبون
انس:اهلين استاذ عمر نورت الكوفي
عمر:بنورك انوس اخبارك
انس:بخير بس فاقدين مديرنا
عمر ضحك:عاد بشهر العسل ناسي الدنيـا كلها مع المدام
ضحك انس:يستاهل مديرنا اجازة
عمر ابتسم:وش جديدكم بالمنيو
انس مد له المينو وطلب عمر لهم وطلع مع خولة دور الثاني
جلس نزل جواله على الطاولة وهي تصور المكان:من بين كل كوفيهات ما ارتاح الا بالكوفي ذا
عمر:وانا احسب تقولي ما ارتاح الا معاك
ضحكت:غيور ؟
ابتسم:تلوميني يوم اغار عليك ؟
ابتسمت بخجل وتقدم انس يحط الطلب:لـ عيون عمرنا نجيب الطلب بنفسنا
عمر ابتسم:ما تقصر ، بمدحك لـ روآف
ضحك انس:ماتقصر
و نزل يرجع لـ شغله
خولة:تعرفه؟
عمر:اي اول موظف توظف هنا مع روآف وميانة طايحة معاه
خولة:اي ماشاءالله عليك استغربت انك طايح ميانة معاه
عمر :انوس غير
خولة :وانا احسب تقول خولة غير
ضحك ودوت ضحكته الرنانة بالدور بسبب الهدوء الي كان يعمّ المكان واغلبهم كانو بنات يناظرونه
قرصته واخفى فمه بيده يكتم ضحكته:ياخي تردين الحركة بحركة
خولة بغيرة:وجعوه البنات يناظرون اسكت
عمر اسند على كرسي يشرب القهوة:اعترف لك بشي؟
هزت راسها:لبيه
عمر:اول مشوار لنا و احلى مشوار والله مقد انبسطت مع احد كذا بس والله ليت خرجنا بدري نتعشى مع بعض ونتسوق لبيتنا
خـولة مدت يدها وشابك يده بيدها ونطقت بصدق:وانا لاول مرة انبسط مع احد كذا واساساً معانا وقت نطلع بيوم ثاني نتعشى باحلى مطعم ونتسوق ، بس ها المرة الجاية علي ما صرت اثق بذوقك
ضحك:ابشري ابشري
ابتسم وهي تاكل من الحلى وتتلذذ فيه
-
- شقة عبدالعزيز ساعة ١١م -
شهد بنرفزة:لا عزيز
عبدالعزيز بتعب ينزل الطاولة:بنتي والله تعبت مرة هنا مرة هناك حددي
حطت يدها على خصرها تدور بالمكان ونطقت:هنا هنا
ناظرها وشافها تأشر على مكان مقابل رف الكتب
تقدمت تساعده ونطق:اتركي انا اشيله ثقيل عليك وبيوجعك ظهرك
شهد:حياة زوجية مشاركة ماما تقول
ضحك وعدل الطاولة وركزوها وصفرت بحماس:يجنن
عبدالعزيز يحاوط خصرها من وراء:ليش هنا بالتحديد!
شهد:مثلاً لو طفشنا من غرفتنا نجي هنا ادرس انا ، و انت اذا تبي تشتغل وكمان لو فكرنا نقرا كتب وكذا يعني حلو صح ؟
هز بالايجاب:غصب يعجبني دام عجبك
ابتسمت تلف له:متى اليوم الموعود!
عبدالعزيز قبّل خدها:قريب قريب جداً
ابتسمت بوسع ثغر:طيب الغرفة السرية متى اشوفها
عبدالعزيز:سوبريز! بعد ما اجهزه!
زفرت بفضول وابتسمت تحضنه وسمعو صوت الباب
عبدالعزيز:ادخل
جود دخلت:يا حلوين وينكم
عبدالعزيز:بالصالة
دخلت وصفرت باعجاب:واو ماشاءالله مرة حلو
شهد:ماعجبني كل شي كان ابيض ابيض واخذت اشياء اكسر فيها اللون
جود:الصراحة مرة خييال ذوقكم ، يعني لوحات و الكنب كاسر اللون مرة أهنئكم
عبدالعزيز:اصدمك؟
جود باستغراب:ايش؟
عبدالعزيز:ذا اللوحات انا و شهد رسمناها
جود بصدمة:تكذب
ضحكت شهد:لا والله بس سر يعني
جود:ماشاءالله مرة حلو اذكر مرة لمحت غرفة خاصة قبل الحريق
ضحكت شهد:اي وتنهدت بحزن:راحت وراح كل الي فيها
ناظرها عبدالعزيز ولمح الحزن على ملامحها ناظر جود وهي تناظر اللوحات عن قرب:الحين رسمتوها ؟
هز بالايجاب:على سريع يعني المرسم انحرق و راح كل الي فيه بس جبت اغراض سويناه هنا بشكل عشوائي
ونطقت بانبهار:ماشاءالله خخيال
عبدالعزيز:اي انتي متى جيتي
جود:من شوي سعود عنده شفتّ ليلي وطلبت اجي عاد من حقنا نسهر معاك على ايام الأخيرة بكرا تتزوج وتسرقك منا بنت حسن
ضحكت شهد:اي اكيد وان ودكم بعدين تسهرون معاه تاخذون إذن مني قبل
عبدالعزيز ضحك من ملامح جود المصدومة وحاوط كتفها:قلبي انا ، تمزح واكيد مو انا الي اتغير عليكم ابداً
جود ابتسمت:قلبي انت
ابتسم وخرجو ينزلون وشافو صقر وركضت جود للمطبخ من كانت بدون جلال
صقر:ماصارت من حددتو موعد الزواج ماصرنا نشوفك بالبيت صرنا ندورك ؟
ضحكت شهد تحضنه:تعرف قرب الزواج اكيد مشغولة
عبدالعزيز:وانت وش حاشرك
صقر:نبي اختنا
عبدالعزيز:زوجتي
صقر:اقول نحن الاول يالله مناك
ضحكت شهد تلبس جلال وودعت عبدالعزيز و خرجت مع صقر لـ البيت
دخل عبدالعزيز المطبخ:جويد
جود لفت:عيوني
عبدالعزيز:مشتهي الكيك ذاك الي كنتي دايم تسوينه
جود:ابو الشوكليت
هز راسه يجلس على الطاولة:اي تسوينه
هزت بالايجاب:كم عزيز عندي
ابتسم:الله لا يحرمني
دخلت خولة:اي وخولة لها الله
عبدالعزيز بطقطقة:لها عمر الي اخذك مننا
ضحكت:وشهد الي اخذتك مننا
انهارت جود ضحك:ولي سعود
عبدالعزيز بحماس:شرايك نسهر الليلة ثلاث مع بعض
خولة:تم بغير واجي
جود:تتذكرون طقم الهودي الي طقمنا فيها نلبسها الله يخليكم
ركضو لغرفهم يغيرون ولبسو طقم الاسود بـ اسود
والهودي فيه طباعة خطوط بيضاء
نزلو سوا و سكرّ عبدالعزيز باب المطبخ خلفهم وفتحت خولة جوالها على اغاني
عبدالعزيز:وطي الصوت بيصحون ويويلنا منهم
ضحكو وبدأت خولة تطلع معكرونة وتسلقها وعبدالعزيز اخذ السك/ينة واخذ الخضار وتارة يهز على اغاني وتارة يقطع
جود وهي تصور سناب:هاي سنابيون وبما ان اليوم بنام عند اهلي قررنا نسهر انا و خوخه و عزيزي مع بعض ، اختنا تسوي معكرونه و اخونا يتراقّص
لفت الكاميرا على عبدالعزيز وهو ماسك سك/ينة يلعب فيها
خولة:ذكرنا بالعقيد ابو شهاب مع شبرية
عبدالعزيز بحدة:مين ابو شهاب قدام عبدالعزيز
جود صفقت:حيي عينه ولد امي
عبدالعزيز ضحك:اوص اوص ينزل جدي والله والعصا على ظهورنا
خلصت خولة معكرونة وجلسو على الارض شكل دائرة يأكلون
عبدالعزيز:ياحظ عمير والله بياخذ السنعة
جود:مين؟ خولة بديرة والسناعة بديرة
خولة بدلع:حبيبي ذيك خولة قديمة الحين وحدة جديدة وبين قوسين حَرم اللواء عمر بن سلطان
جود:وانا حَرم الجراح سعود
عبدالعزيز:هدو هدو احترمو وجود اخوكم ماعمري شفتكم تقولو نحن خوات عبدالعزيز مالت عليكم
ضحكت جود وتقوم تحط الصحن بالمغسلة وطلعت اغراض الكيك وقام عبدالعزيز يساعدها وبعدها خولة
عبدالعزيز اكل من الخليط:لذيذ
خولة:وااععع فيه بيض
عبدالعزيز بقرف:ايشش!
جود انهارت ضحك تحطه بالفرن
عبدالعزيز لف اخذ عصا المكنسة وشغلت خولة اغنية وعبدالعزيز يلاعب بالعصا وكانها سيف وبدا يرقص وقفت جود جنبه يرقصون و جات خولة جهة ثانية ترقص معاهم
فزو بخرشة من دخل الجد وضرب الباب بالعصا
الجد بعصبية:لا والله؟ في ديكسو نحن ؟! قفلو ذي الاغاني
انخرشت خولة:سم جدي وقفلت الاغاني
نزلت علياء بخوف:بسم الله عليكم وشفيه؟
الجد:عيالك فاتحين هنا ديكسو كفار
كتمت جود ضحكتها على كلمة ديسكو الي الجد ماعرف ينطقها:كنا جوعانين جدي
عبدالعزيز:اي والله
الجد بعصبية:والجوعان يسوي كل هالازعاج
خولة:وشدعوه جدي
شهقت جود وصرخت:الكيك
انخرش الجد و مسك صدره:اعوذ بالله بسم الله ليش تصرخين؟
جود ببراءة وهي تطلع الكيك:الكيك بغى ينحرق
الجد بحدة:يالله قدامي امشو
عبدالعزيز:وين ؟
الجد ضرب الارض بالعصا:اص ولا كلمة امشو قدامي ام عبدالعزيز حطي الكيك حقهم بالثلاجة خليهم يتعاقبون أولاً
هزت راسها وهي تكتم ضحكتها على ملامح وجه عيالها المخروشة
وطلعو الثلاثي مع الجد للصاله
الجد:البسو جلال الصلاة انتي و ياها
هجو ياخذون الجلال ويلبسونه و ناظر الجد الساعة وكان باقي على صلاة الفجر عشر دقائق
لف بحدة:اسمعوني انتي وياها باخذ ذا التيس نصلي وانتم كمان صلو وان جيت وانتم مو مزروعين بالحوش ذا العصا على ظهركم
هزو بالايجاب وركضو يتوضون وخرج عبدالعزيز مع الجد للمسجد والتقو مع سلطان وعياله و سالم وخالد وحسن وعياله
حسن باستغراب من لبس عبدالعزيز:وش هاللبس عزيز ؟
عبدالعزيز هز راسه ببراءة:جدي ماخلاني اغير حتى
الجد:اص ولاكلمة جنبي هنا
سلطان:يبه خليه مع العيال ونحن جنبك
الجد:لا ابيه جنبي
عض عبدالعزيز شفايفه وقف جنب الجد
خالد بهمس:علامه جدي مستقعد لـ عزيز ؟
وضاح:الله واعلم ، نخلص صلاة ونشوف
خلصو صلاة وانسحب عبدالعزيز بشويش يخرج للعيال
عمر بضحكة:وش مسوي!
عبدالعزيز باستعجال:خذوني عندكم مسكين انا انقذوني!
عض شفايفه ولف من نطق الجد:والله ما المسكين الا انا امش قدامي
عبدالعزيز بخرشة:سم
مشى جنب الجد والعيال وراه ويصورونه ويضحكون عليه
زاهد:ياخي ابي اعرف وش مسوي
صقر:وذا اكبرنا المفروض يكون اعقلنا
ضحكو كلهم و سالم يأشر لهم يسكتون قبل لا يقلب عليهم الجد و يسوي تحديد الكل لهم
ودخلو البيت شافو جود و خولة جالسين على عتبة باب بيت الجد وفزو من دخلو كلهم
خولة بفشلة من وجود عمر
الجد اشر لهم:اوقف جنب خواتك
وقفو وانهارو العيال ضحك
صقر:عقاب؟ اوف وش مسويين
الجد:كأن ودك؟
صقر بجدية:ابد جدي
الجد:مفتاح المستودع مع مين ؟
حسن:معي يبه
اشر لـ جود:خذيه وطلعو الزُل
اخذته من حسن وهي تناظره ببراءة وهمست:انقذني
حسن:وش مهببين؟
جود ركضت من سمعت صوت العصا يضرب بالارض وراحت وراها خولة و عبدالعزيز يطلعون الزوليات من المستودع
بعد معاناة طلعوها ورموها على الارض بتعب
الجد جلس على الكرسي الي جابه زاهد له ونطق:بتغسلونها الحين
عبدالعزيز شهق:جدي بالبرد ذا
الجد:اي مافكرتو بالبرد يوم مسوين ازعاج
سالم:افا عزيز و بنات وش مسويين
خولة ببراءة:عمي بس سوينا اكل
سالم:بس؟
خولة بتوتر:يعني ازعاج كتكوت وصغير بس
الجد:كتكتو راسك! اجل كتكوت قالبين المطبخ ديكسو كفار ويتراقصون
انهارو العيال ضحك
سلطان اخفى زاهد وراه لجل ما يضربه الجد من صوت ضحكته:اي بس حرام برد و يغسلون الزُل ثلاث يا يبه كثيرة
عبدالعزيز:اي مرة كثير وسخه مرة
الجد:تأخير دقيقة ترا بيزود العقاب
ركض عبدالعزيز يفتح المويا وجابت خولة مسحوق الغسيل
رشت شوي وعبدالعزيز رفع سروال لـ ركبة و بدا يغسل وجود جنبه
سالم:انت وياه روحو ساعدو اخوكم
الجد:لحد يروح خليهم وحدهم
سالم:بس يبه حرام برد والله
سمعو صوت الباب وفتح صقر:اهلين اهلين بـ دكتورنا
صرخت جود:جاء الفزعه
الجد:اص غسلي بلى كثر هرج
سعود دخل باستغراب وتوسعت عيونه يشوف عبدالعزيز يهاوش خولة عشان رشته بالمويا وجود معاها مكنسة تغسل الزُل
تقدم يسلم على الجد و فهم من ضحك العيال و شماتتهم انهم معاقبين:افا وش مسوية يا بنت
جود:حرام بريئة انا
صقر:البراءة تصيح بزاوية
عبدالعزيز مسح المويا مع وجهه:بنت ترا بمرض عريس انا تبين اعطس واكح بعرسي
الجد:مافكرت بعرسك وانت تتراقص
عبدالعزيز:بس والله المعكرونه حقت خوخة كانت حلوة فاتك جدي
خولة بابتسامة:عافيه يعيوني
الجد صرخ:كملو لسع في شغل ثاني
انخرشو الكل وانهارو العيال ضحك وعبدالعزيز رجع يغسل وهو يتحلطم مع نفسه
سعود:عادي افزع
الجد:اجلس مكانك
عمر نزل ثوبه وركض ويتزحلق على الزُل:الحياة مغامرة ، اهم شي زوجتي ما تتعاقب لوحدها
خولة تصفق:حييي الفزعه
عبدالعزيز بطقطقة:وضيح نادي فزعتي
وضاح ضحك:كان فكرة قبل لا تقلب المطبخ ديكسو كفار على قولة جدي
عبدالعزيز:جدي كان خليتني اكل الكيك وبعدين عاقبني
صقر:في كيك!!
زاهد:راحت عليكم
ركضو المطبخ اثنينهم وركض عبدالعزيز يلحقهم وتزحلق من صابون وطاح على الارض
عمر ساعده يقوم وهم يضحكون جود زفرت بعصبية البرد من استلمت لَيٌ المويا وعمر و عبدالعزيز و خولة يغسلون
صقر و زاهد جلسو على عتبة الدرج وبيدهم صحن الكيك ياكلون:تسلم يدين الي سوته يجننن
زاهد:صدق لذيذ
عبدالعزيز بقهر:سم ببطونكم
الجد:صاحيين تاكلون كيك قبل الفطور
جود:عاقبهم جدي
الجد:شوفي شغلك مالك دخل
توسعت عيونها بصدمة وهزت راسها بخرشة تاخذ الحديد:ابشر
ضحك سعود يقرب ياخذ منها حديد " الحديد الي يطلعون المويا من الزُل " اخذه منها:والله ما يرضيني تتعاقبي
وقفت على جنب و مشيت خولة جنبها يعبون السَطل مويا و العيال يغسلون
عبدالعزيز:سعود جنبك شوي وسخ اغسل زين
سعود:تعال انت غسله لو تبي
عبدالعزيز شمق وخلصو الزُل الثاني وبداو بالثالث و الأخير وخلصوه بعد معاناة
وجلسو بتعب على الارض
جود:توبة اسمع منك واسوي كيك يا ولد امي
عبدالعزيز:انا توبة اشتهيه
خولة:عمي سلطان اكيد ما حتعاقبنا إذا سوينا كذا ازعاج
زاهد:والله يابنت عمي حسب مزاجه وقتها الذي رايق هو يختار الاغاني اذا لا ، عاد وقتها لو غسلتو الحوش ما يكفيه
مسكت راسها بصدمة وضحكو العيال
خالد:يالله ندخل نفطر
الجد:اي انتم ادخلو انتم الخمس ما انتهى شغلكم
عبدالعزيز بتعب:وش بعد
الجد:اشوف الحوش وسخ غسلوه
جود:جدي تكفى
قامت خولة وتزحلق رجلها وصرخت بوجع
عمر مسكها بخوف:اجلسي
عبدالعزيز بخوف:فيك شي ؟
خولة:اهخ رجلي ، كان فيها صابون وتزحلقت اه يوجع
قامت جود و مسك يدها سعود:انتبهي انتِ كمان لا تزحلقي
مشيت تجيب ثلج و حطوه لها و زاد بكاء خولة وهي تتألم
عبدالعزيز لـ جود:جيبي عبايتها بسرعة لا يكون انكسر رجلها
ركضت تجيب العباية ولبسته وهي تبالغ بصراخها و تبكي بانهيار  شالها عمر مع عبدالعزيز يطلعون للمستشفى
سعود:ان شاءالله خير
الجد بتأنيب ضمير:الله يهديني بالغت والله لو صار لها شي
جود حضنته:لا اكيد بخير جدي معليه
سلطان:يالله ندخل لا نمرض
سعود:انا استأذنكم والله تعبان وجيت اخذ زوجتي
هزت راسها جود و دخلت تلبس عبايتها وخرجت معاه وتوجهو لـ بيتهم
-
- سيارة عمر -
عمر:ولد استعجل
خولة :بعدنا عن البيت
عبدالعزيز باستغراب:اي
عدلت جلستها وضحكت:كيف التمثيل
عمر بصدمة:الله واكبر ذا كله تمثيل؟
خولة بضحكة:اي ، والله يعني مالقيت خطة افضل من ذا عشان نهرب من عقاب الثاني ، الي ما ندري بعده عقاب ثالث او لا
عمر :حرام عليك طيب عطينا اشارة خفت والله
عبدالعزيز:رغم اني حافظك و من زمان تمثلي علينا ، بس ما انتبهت صراحة تطور تمثيلك اهنئك
خولة ضحكت:توقعتك فهمت كم مرة سويناها من طفولتنا
عبدالعزيز ضحك:والله ما عرفت الحين وين؟
عمر:المستشفى اكيد جدي لازم يشوف بعيونه رجولها ملفوف عليه شي
خولة:اي بس مر دانكن كافئني
عبدالعزيز: بايش بالله وانا ناسي بطاقتي جوالي بالبيت
عمر ضحك:امش على حسابي تستحق على انجازها
رن جواله وكان سعود رد :اهلين دكتورنا
سعود :وش فيها طمنا ، الاخت شوي وتقتلني هنا من الخوف و توتر
ضحك عمر:بخير طلع خطة
مسك راسه سعود:كيف
عمر:عشان نهرب من عقاب جدي وانتم ؟
سعود:خرجنا بيتنا
جود ببكاء:وش فيها رد علي
سعود:دقيقة يابنت الناس ، اي عمر تمام مع السلامة
قفل ولف عليها يخبرها وضحكت تمسح دموعها: ياربي بس والله كفو
سعود:كفو ولا مو كفو ما صرت اشوف شي من النوم
ضحكت وهي تروح معه للغرفة ينامون
-
- بيت الجد -
دق الباب وقام زاهد يفتح وشهق:الله
ضحك روآف يحضنه ودخل وجنبه بيـان ضحك زاهد:نورتو يا عرسان
ضحك روآف:بنورك بس جيب الشنط من تاكسي
خرج يجيبه و قفل الباب
روآف:وينهم اهلي ؟
زاهد:عند جدي نفطر كلنا
دخلو وترك روآف الشنط بالحوش
زغرطت الجدة بفرحة من شافت روآف داخل وجنبه بيـان
شيخة بدموع تضم بيـان:بنتي؟ ماشاءالله
البنات فزو بفرح يضمونها وهي تضحك وتضمهم بدموع
سلطان تقدم يقبل راسها:كيفك بنتي
بيـان باست راسه:بخير وانتم اخباركم
سلطان:بخير يابنتي دام انت قدامنا بصحتك و عافيتك ، حمدالله على سلامتك
بيـان:الله يسلمك
حسن: كيف ؟؟ علمنا ؟
روآف:والله مركز العلاج الي هنا خبرونا على دكتورة معروفة هناك بتركيا والله رحنا قضينا شهر عسلنا و عالجنا بنفس الوقت و زي ما تشوفونها بعيونكم صارت افضل من اول الحمدلله يارب
الجد:والله احلى بشارة الحمدلله على سلامتها ولدي
روآف باس راسه:الله يسلمك شيخ خليف
جلسو يفطرون ويسولفون
بيـان:وينه وينه الشيخ حسن
ضحكت فرح:نايم تكفين تعبني بسم الله عليه ما نام الا الفجر
بيـان:الله يحفظه واه يزين الامهات الحلوين
ضحكو ولفو من دخل عبدالعزيز وعمر يساعد خولة تمشي
ركضت علياء تمسكها وجلست على الكنب
عمر بابتسامة:هلا باخوي هلا ولد ابوي
ضحك روآف يحضنه و بعدها تقدم لـ عبدالعزيز يسلم عليه
الجد:كيفها اختك وش قالو لها
عبدالعزيز:ها اي التواء الكاحل شوي كم يوم وتصير زي الحصان
الجدة:وانت شخص واعي مطلعهم الفجريات تعاقبهم شايف رجلها
عبدالعزيز:وينك يا جدة من الفجر
عطس مرتين ورا بعض ونطق:ياربي لا
زاهد بطقطقة:الي خفنا منه حصل
عبدالعزيز بقهر:لا ابوها من كيك ولا معكرونه
صقر:بالعافيه علينا الكيك ولكم المعكرونه
رفسه عبدالعزيز:انقلع يا حيوان سم ببطن العدو
شهد ضحكت:حرام عليك بدل ما تقول عافيه عليك
عبدالعزيز بنرفزة:اي ، وقت الكل تفزعين وعزيز ولد البطة السودا محد يفزع ويدافع عنه
الجد:وش كبرك وخط الشنب بوجهك وتبربر مسوي مسكين
الجدة وقفت:تعال وانا امك اسوي لك شي دافئ
زفر بتعب يدخل المطبخ معاها والكل انفجرو ضحك
حسن:ياخي هالعزيز عليه فصلات
شهد ابتسمت بخفة و توترت من وصلت لها رسائل من مجهول
قفلت جوالها بسرعة ونطقت بهدوء:عسى ما نسيتونا من الهدايا
ضحك روآف:افا عليك ، عاد ماشاءالله مانسيت احد بيـان ، ذا حلو مرا ذوق فرح الله مرة حلو بيعجب خالاتي وعاد لين طفرت
ضحكو و ابتسمت بيـان بخفة و قام روآف يجيب شنطة الهدايا
فتحه و جات جنبه بيـان
روآف ابتسم ياخذ هدايا العيال و اعمامه و اخوانه و الجد
بيـان ببطاقة:شوفو بالله
ضحكو بلطف من كانت هدايا حسن
فرح:مرة حلو ياخي بس ليش كلفتو على نفسكم!
بيـان:عيب هالكلام ياخيي ولد اختي بعدين كله حلو و اعجبوني واخذتهم له
وضاح بابتسامة:ماقصرتو والله
روآف ابتسم له و ناظر صقر الي لبس تيشرته هدية روآف و ضحك:ياخي تعرف وش احب شكراً والله
روآف:لبس العافية
علياء تناظر طقم الصحون هدية بيـان:مرة حلو هالصحون
منيرة:اي والله مرة حلو و
بيـان:كان محل تراثي و عجبني حيل
سلطان:وانا وش هديتي
ضحكت تاخذ عبوة تفتحه و اخذت بقلاوة و ضحك سلطان بذهول ياكله من يدينها وتلذذ:جبتي راسي
ضحكت بيـان تعرف حُب سلطان للبقلاوة و ابتسمت بـ حُب من قبّل راسها يضمها
روآف تخصر:ايه!! انا ولدك
سلطان:هي بنتي
ضحكت بيـان تطلع لسانها لـ روآف بعناد و ضحك على حركاتها
جلسو يتقهوون و يسولفون
خولة تثاوبت بنعاس:اهخ يالتعب
حسن:بنتي تتوجعي!
خولة:شوي عمي ، شيخ خليف عادي اطلع ارتاح
الجد:اي اي وسلامتك
خولة:الله يسلمك
ساعدتها شهد تطلع الغرفة
عبدالعزيز بقهر طلع من المطبخ بعد ما شاف صينية الكيك فاضية بالمغسلة مشى لـ غرفته
دخل و قفل الباب ينزل الهودي بعصبية
و ضحك بذهول يشوف على طاولة صحن كيك مغلف
ابتسم يشوف الكرت " ماتبقى بخاطرك ياولد امي ، جود "
ابتسم غير ملابسه وجلس اكل الكيك واخذ جواله و ارسل لها
" الله لا يحرمني منك يا جـودي 🤍 "
خلص الكيك وانسدح يطفى الضوء ينام وكانت من اسوء نومة
صحى بعد ساعتين شاف ساعة ١٢ ظهر
زفر بتعب وتوضى وصلى الضحى و لبس فروته وجلس على سجادته يقرأ قران زاد الكحة عنده واخذ مناديل وبخاخ الربو وشافه مخلص
اخذ نفس بهدوء واخذ جواله يتصل بـ علياء
علياء:عزيز وشفيك تتصل وانت بغرفتك؟
عبدالعزيز بصوت مكتوم:عندك بخاخ الربو ، حقي خلص
فزت من المجلس:اي جايتك
قفل وانسدح على سجادته و عيونه تلقائي تغمض من التعب
شهد بخوف لحقت علياء ودخلت عند عزيز وعلياء راحت غرفتها تدور بخاخ الربو حق عبدالعزيز
شهد بخوف جلست وحطت يدها على خده:عزيز تسمعني
فتح عيونه بابتسامة:اهلين بعروستي بس لاتقربين بعديك!.
شهد اعتدلت و رفعت راسه لـ حضنها:مايصير لي شي ياحبيبي
دخلت علياء وانحت تعطيه البخاخ
اخذ نفس بهدوء و زفره و رجع ياخذ نفس بهدوء
علياء:الله يهديه جدك الله يهديه
عبدالعزيز:معليك يمه شوي كذا اصير بخير
علياء:بنزل اسوي لك شي تأكله
هز راسه وناظرت شهد:بنتي خليك عنده
شهد ابتسمت بخفة تمسح على شعره:اي خالتي ما اتركه لاتخافي
باست علياء راس عبدالعزيز وخرجت
بدات تمسح شهد على شعره بهدوء وهي تشوفه يكح بقوه
همست:اكلم العيال ياخذونك للمستشفى
هز بالنفي:لا مافي شي مهم
شهد:إلا في ، شايف وجهك انت ، عيونك كله احمر من التعب و الحرارة و حلقك نشف من كثر ما تكح
عبدالعزيز:بنتي انا بخير وانتي اساسا تضيعين وقت هنا مو عندك تسليم فستانك اليوم و اشغال الزواج
شهد:لا ما اتركك وبيكنسل العرس إذا تعبت زيادة
هز بالنفي يبوس يدها:لا ما يتكنسل شي ياحبيبتي
شهد اخذت جوالها واتصلت على وضاح:وضيح وينك ؟ اممم بتتاخر؟ كويس لان عزيز تعبان شوي ، لا رافض يروح ، الله يخليك تعال خذه غصب عنه
زفر عبدالعزيز بضيق:انا بخير يا شهد
شهد:انتظرك ياخوي وقفلت
شهد ناظرته:يالله قم جاي وضيح
خلته يقوم وطلعت له ثوب و ملابس داخلية بيضاء:يالله البسه
خرجت من الغرفة وغير ملابسه واخذ بخاخ الربو وجواله ومحفظته وخرج
اسندته يحاوط ظهرها ينزلون
الجدة بقلق:وشفيك ولدي
عبدالعزيز:تعب خفيف
وضاح قام من وصل قبل دقائق:لا طيب أن شاءالله نروح يعطيه الدكتور علاجات ويرجع زي الحصان
خرجو للمستشفى وشهد جلست جنب علياء بقلق .
-
- بيت نايف -
فتح نايف جهاز كادي بعد ما كان مقفل من فترة وانهالت الرسائل و الاتصالات
انصدم ودخل الواتساب وشاف ما يقل ٢٥٨ رسالة غير اتصالات من سامي
فتح المحادثة وهو يناظر الرسائل عشوائي
" كادي يعيوني وشفيك ماتردي "
" كادي طمنيني عنك "
" لا تسوي فيني كذا وتخوفيني "
" حبيبتي اسف لو زعلتك بس ردي طمني قلبي"
" يرحم لي اهلك ردي لاتخوفيني "
وكثير كلام انصدم منها نايف وهو توقع ان ذا الشخص لعاب ويومين وينسحب من يشوف كادي مختفية
ضغط على الرقم و اتصل وسرعان ما رد
سامي بـ فرح:وأخيراً يا امي انتِ حرام الي تسوينه فيني اسبوع وكم وانت مختفية ماتفتحي و تطمنيني عليك ، لا ليلي ليل ولا نهاري نهار بدونك لو رسالة انا بخير تطمنيني فيها عليك انا يكفيني
نايف اخذ نفس:انا نايف اخو كادي
سامي فز من مكانه:ايش ، نايف ؟
نايف بحدة:ماعندك خوات ولا اهلك يوم تكلم بنات الناس ؟
سامي بهدوء:اول طمني كادي بخير
نايف بحدة:لا تسأل عنها يا كلب وانت جايك الدور
سامي بخوف:لا تلمسها انا في وجهك مايجيها ضرر تمام اعترف نحن على علاقة ونحب بعض بس احلف لك باغلى ماعندي يا نايف انا ابيها والله ابيها بالحلال تكفى لا تبعدنا وش تبي ؟ تبغاني !! اجيك الحين البيت وسوي فيني الي تبى بس لا تلمسها ولا تضرها
نايف انصدم من كلامه و تمسكه بـ كادي و خوفه عليها
تنهد:تعال البيت برسلك اللوكيشن
سامي بلع ريقه:اعرفه وجايك
نايف مسك راسه بصدمة:تعال تعال خلينا نتكلم رجال لـ رجال
سامي:جايك والله
قفل نايف واخذ نفس يتصل بـ ابتهال ردت باستغراب:نايف ؟
نايف بهدوء:جاي يا ابتهال مو عارف وش اسوي
ابتهال:مين بسم الله ؟
نايف:الي كادي تكلمه ؟ جاي
ابتهال بخوف:اسمعني حبيبي
ابتسم:عيون حبيبك
ابتهال ابتسمت بخفة و هدوء:وراك اهل فاهم تكفى لا تتهور وتسوي شي فيهم و تخسر كل شي و تنسجن ، انا عندك تبغى تدخل تدمرنا ؟ تبغى تتركني تترك عمتي وعمي و نوني الله يخليك لا تتهور كلم بهدوء وانا اشوف افضل حل تزوجهم
نايف بتوتر:ما اعرف بالنهاية اختي ذي يا ابتهال لو ماكان رجال كفو كيف ارمي اختي كذا
ابتهال:شوفه تكلم دامه جاي اكيد صادق وبعدين انا واثقة فيك بتختار اكثر حل مناسب ويناسب الكل وهم يحبون بعض خلاص اجمعهم
نايف سمع صوت الباب ونطق:جاء
ابتهال:اوعدني ما تتهور ترا انتظر اتصالك فاهم استاذ نايف؟
نايف بابتسامة:عيون نايف انتي اي فاهم
قفل الاتصال وقام يفتح الباب لـ سامي ناظره ثوان و همس:سامي
بلع ريقه و هز راسه
نايف:تفضل
دخل سامي بتوتر ودخل المجلس مع نايف
جلس نايف مقابله بقهر:تقدر تفسر لي و تحكي لي
سامي:أول شي يا نايف  طمني عليها
نايف بحدة:قول الي عندك
زفر سامي بضيق:انا ما عندي اهل انا لقيط
نايف ناظره بصدمة بس سكت يخليه يكمل:انا ما اعرف شي عن اهلي ولا مين هم الي اعرفه انا لقيط وتبناني رجال وحيد الله يرحمه ، وما ورثت منه الا الكلمة الطيب والسمعة الحسنة اعيش لوحدي بالبيت الي تربيت فيه مع الشايب و صار ملك لي ، كنت تارك الحياة زي ما هي تمشيني امشي ماعندي مسؤوليات اهم شي عندي كان انام و اكل و العب طول اليوم على اجهزة المعروفة بالصريح ما كان عندي هدف بالحياة لين دخلت بيوم قروب بتويتر وتعرفت على كادي هناك ، ما كان في تواصل خاص كل كلامنا بالقروب مع شلة عيال و بنات نتكلم فيه عن برامج والعاب الي كانت مشهورة ذيك الفترة فقط يعني بس عن الألعاب حتى حكي خاص مافيه
هز راسه نايف بهدوء وهم يعرف عشق العاب ذا لـ كادي ويما ازعجته عشان انقطع النت وانقطع اتصال باللعبة
كمل سامي بصدق:بعدها تقفل القروب وكل واحد طلع منه ، بس أنا ماقدرت ادمنت اللعبة و ارسلت لـ كادي بالخاص اسم حسابي باللعبة وبدانا نلعب كل يوم مع بعض لين انتقلنا لـ دردشات وتعرفنا على بعض أكثر ، احلف لك باغلى من املك اني ما قد فكرة فيها بنية سيئة صحيح ماعندي اخوات بنات بس عندي ضمير صاحي مايخليني اسوي كذا ببنات الناس ، حبيت و تعلقت بـ اختك حبينا بعض ، ولا قد تمادينا ما بيننا الا الجوال والله ، صحيح ما يرضى الله الي سويناها بس غصب عنا والله حبيت تعلقت وخفت ابعد و اخسرها ، من بعدها بدات ادور على شغل لجل اقدر اجهز نفسي واجي اتقدم لها ، بس اتوظف اسبوع ويطردوني لين ربي رزقني بالوظيفة وبدات اشتغل
نايف بهدوء:وش تشتغل الحين
سامي:عندي دوامين صباحي مراسل في شركه وبالليل مندوب توصيل طلبات المطاعم
نايف بذهول:دوامين ؟!!
سامي هز راسه:اي والله بس عشان باسرع وقت اجي واخطب اختك و ماتروح مني
نايف مسح وجهه:كسرت ظهري اختي بفعلتها معاك ، انت تدري انها تزوجت!
توسعت عيون سامي ونطق بصدمة:كيف ؟ نايف حلفتك اوجعني بأي شي بس هي لا ، لاتقول زوجتها
نايف هز راسه بالنفي:قبل فترة صارت الملكة وهي على تواصل معاك ، زوجها شاف محادثاتكم مدري كيف عرف ، بس الي ادري وقف قدام وجهي يقول اختك كذا كذا كذا و طلقها
مسك سامي راسه بصدمة و عدم تصديق:يا كبرها عند ربي ياكبرها
نايف:الحين هيا فوق بتصل على شيخ يجي تملكون وتاخذها فاهم ؟
هز راسه سامي بخيبة و انكسار وخرج نايف من المجلس
سامي بقهر:هنت عليك يا كادي تسوي فيني كذا كيف طاوعك قلبك تسوي كذا فيني كيف!
دخل نايف بالقهوة ونطق:تربيت على إكرام الضيف مين ماكان!
اخذ سامي منه الفنجان:والله مو عارف ايش اقول يا نايف انا غلطت بعلاقتي بس صدقني والله ما فكرت اضرها
نايف بحدة: وش نهايته ؟ لو جيت ، تخطبها وقلت لي أنا يا نايف ظروفي ما تسمح لي اتزوج الحين اعطيني وقت اجهز نفسي ، سامي انا حياتي فدا لسعادة خواتي
سامي:والله عارف شعورك وموقفك و افهمك معاك حق
دخل ابو نايف مع الشيخ و وقف سامي مع نايف
نايف:هلا يبه
سامي تقدم يبوس راس ابو نايف وصد ابو نايف يبعده
صد سامي بضيق و جلس
عقد الشيخ زواجهم وطلع نايف لـ غرفة كادي فتح الباب وشافها على سريرها تبكي
مشى ومد لها الجهاز: يالله وافقي
فزت:على إيش ؟
نايف بحدة:على زواجك يالله
هز بالنفي:مستحيل ترميني على احد كذا يا اخوي نايف الله يخليك لا
مسك يدها واجبرها تبصم بسرعة بدون انتباه منها لاسم العريس و هي تبكي تترجاه وترفض
دخلت نور بخوف و هي تبكي وسحب العباية منها و رماها على كادي:البسي يالله تروحي معه
هزت راسها بالنفي:لا تكفى نايف لا
مسك شعرها بعنف:لاتخليني اعصب ترا للحين ماسك اعصابي
شهقت تبكي واستسلمت للأمر الواقع ولبست عبايتها
نزلت معاه و هي منهارة تناظر امها الي صدت عنها تدخل غرفتها و اجبرت نور تدخل معاها
نزلت راسها بخجل من نفسها و ناظرت نايف و بكيت من حست ببشاعة فعلتها وانها كسرت ظهر اهلها
دخلو المجلس و تكتف نايف يصد عنها
توسعت عيونها من شافت سامي جالس بصدر المجلس
غمض عيونه بضيق من شاف دموعها وجروح وجهها تجمدت بمكانها عند الباب
ابو نايف:الله يستر عليكم انا من اليوم ماعاد عندي بنت اسمها
قاطعه نايف الي تكلم بسرعة و الدموع بعيونه:لا يبه الله يخليك لاتقولها
بكيت كادي وهي تجلس عند رجل ابوها:تكفى يبه سامحني تكفى يابوي لا
ابو نايف ابعدها بقساوة:روحي للي بدتيه علي اهلك روحي سودتي وجيهنا الله لا يسامحك
نايف:سامي
تنهد سامي ومسك كادي يقومها وهي تبكي
كادي بانهيار وهي تبوس رجول ابوها:يبه الله يخليك سامحني يبه الله يخليك
لفت على نايف و بكيت:نايف ياخوي نايف تكفى انا اختك
صد نايف عنها وانحى سامي و وقفها وناظرت عيونه و صد بنظراته عنها

✨ انتهى ✨
🤍 🤍 🤍