باستغراب فتحت الرساله كان محتواها" سلام ، كيفك ؟ "
رفعت حاجبها باستغراب ودخلت الرساله وردت على الرساله " وعليكم السلام ، مين ؟ "
ارسل لها : معك ضيدان
تقشعر جسم عذوب لمن قرت اسمه رفعت راسها تشوف البنات لايكون احد انتبه لها تنهدت براحه ان محد حولها ومندمجين باللعب والضحك طفت جوالها ووقفت : استأذنكم انا بنام
رفعت راسها ديار : وين تو الناس اجلسي ولا ، ناظرت في جوال عذوب الي بيدها وغمزت
عذوب بحده : تخسين وتعقبين
ديار ضحكت ورجعت تفر العلبه
عذوب بتذكر : ايه وصح ترا بكرا بنمشي الديره العصر ابوي قاله
غزيل بحلطمه : اما عاد وتوش تهرجين
عزه بضحك : هدي شوي خاله غزيل وش وراس ؟
غزيل توجهت لفراشها : الله يعيني بكرا اصبح الصباح بدري واشوف الوضع
نجد : وحتى انا والله برقد تعبانه
عزه : يمه انا بجلس مع خالاتي
نجد : بكيفس بس بكرا اذا صحيتس تقومين لا تجننيني!
عزه بضحك : من عيوني
دخلت عذاري ومعها شبسات وعصيرات : انا قيت
ميلاذ بحلطمه : انتي قيتي عز الله رقدنا اليوم
رفعت عذوب جوالها واخذت نفس بعد ماطلعت الغرفه فوق عشان البنات لا ينتبهون عليها وفتحت الدردشه وكتبت : من وين لك حسابي
ارسل ضيدان : مايهم من وين جبته المهم انه انتي
توترت عذوب من طريقته : وش الي مهم انا تكلم زين
ضيدان : اسمعي انا ما جيتك الا ابيك بموضوع
عذوب وهي كل شوي تزيد رجفت يدها من كلامه الي مخوفها ولا ردت عليه وكانت تتابع بصمت
كمل ضيدان : انا داري انك ضايقه مني عشان تفكيري فيك بوقت كنتي تكلمين اخوك بس والله انه ماطرى على بالي انه اخوك انا اعتذر منك
عذوب وهي تمثل البرود : تمام حصل خير
ضيدان : عادك زعلانه ؟
وطلعت من المحادثه وقفلت الجوال وهدت نفسها ونزلت تنام مع البنات
-
تنهد ودخل ضيدان المجلس عند العيال حصلهم راقدين كلهم نفض فراشه ونام معهم
-
قامو على الساعه 12 الظهر وتغدو وبدو يجهزون الاغراض عشان يمشون انقسمو ست سيارات بس
العمّان سوا و الامهات سوى والبنات انقسمو سيارتين مع خالد وضيدان و العيال نفس الشي سيارتين مع هايف وفارس
نزلت عذوب وغزيل بعد ما قفلو البيبان والانوار
عذوب بفهاوه : اصبري بجيب قهوتي في الثلاجه نسيتها
غزيل : يلييييل عجلي
عذوب راحت تركض : طيب انتظريني لا تروحين
غزيل : طيب طيب
قفلت غزيل باب الصاله ووقفت على جنب بعيد عن انظار عذوب طلعت عذوب بعجله وخافت من الضلام : غزيل وينك ، حطت القهوه على الطاوله الي جنبها وفتحت شنطتها تطلع جوالها
شغلت الكشاف ومشت ناحيت الباب وتبي تفتحه
طلعت غزيل من وراها ومسكت كتفها وصارت تتمتم بكلمات وهي تكتم ضحكها عشان لا تنفضح
عذوب الي تسمرت مكانها وتحاول تستوعب الي جالس يصير
نزل فارس من السياره بطلب من ابوه عشان يشوف ليه تأخرو
صرخت عذوب بكل قوتها وخوفها فارس وقف مكانه يستوعب الي سمعه وكمل ركض ووقف قدام الباب يبي يفتحه وحصله مقفل وصار يدقه بقوه
غزيل حست ان الوضع خرج عن السيطره وشغلت اللمبات على طول وفتحت الباب وصارت تضحك من اشكالهم وهم يناظرونها بصدمه فارس راح لعذوب الي وجها كله دموع وواضح الخوف فيها ومسكها مع كتفها : عذوب انتي بخير
عذوب تناظر غزيل وهي تضحك بحقد : ما يضحك ترا حيوانه !
غزيل : والله ما توقعت ان ذا كله يصير وتكونين خوافه لذي الدرجه
فارس بعصبيه : افرضي جاتها سكته قلبه وماتت
غزيل سكتت بتفكير
فارس مسك عذوب من ذراعها ومشى معها : جيبي اغراضها وامشي خلصينا
راحت غزيل شالت الجوال والقهوه حقت عذوب وقفلت الباب ومشت وراهم
غزيل : عذوب اسفه والله ماقصدي
ما حصلت استجابه منهم الاثنين : وجع طيب ردو انا جالسه اتكلم !
انقهرت غزيل من تجاهلهم : طيب تجاهلوا براحتكم ، نزلت اغراض عذوب في الارض ، وتعالي خذي اغراضك بعد
لفت عذوب وانحنت تاخذ اغراضها من الارض فارس : مع من تبين ؟
عذوب : خالد
ركبت عذوب وراحت غزيل مع ضيدان
خالد : شفيك ؟
عذوب بكت خالد بضحك : يساتر علامك انتي
البنات لمن شافو عذوب تبكي سكتو كلهم يناظرونها من ورا
عذوب توترت من الوضع : خلاص ولا شي
خالد : براحتك اجل
مشو كلهم متوجهين الديره .
طلبو البنات انهم ينزلون البقاله .
دق خالد على ضيدان : ارحب
ضيدان : البقى
خالد : شوف فيه قدامنا محطه وقف عليها
ضيدان : ليه عسى ماشر
خالد : ماشر انشاءالله بس بزراني يبون بقاله
ضيدان ضحك : طيب طيب
نزلو البنات البقاله وكل وحده راحت عند حاجاتها
وقفت عذوب تناظر في البطاطس الي تحبه فوق ولا تطوله لفت تناظر خالد كان معه ضيدان وواحد ثاني والواضح انهم يعرفونه رجعت نظرها قدام ورفعت رجلها على ارفف السله عشان تجيبه
لف ضيدان يناظر البنات وشاف السله ارتفعت قواعدها وراح تنقلب عليها
رفعت يدها بسرعه وتحاول تطوله ولاهي منتبهه على قواعد السله
جاها وبسرعه مسكها مع خصرها ونزلها : تستهبلين انتي ؟
عذوب بخوف من حركته : وش سويت
ضيدان :وش تبين من فوق ؟
عذوب : اهه مابي شي
راحت عذوب ووقفت جنب البنات تناظر فيهم
ثبات: عذوب اجيب لك معي كودرد ؟
عذوب ؛ عادي
ميلاذ جات ووقف جنبها : شفيك انتي وضعك هاليومين ماش
ضحكت عذوب : مافيني شي
ميلاذ : لوني ماني صديقتك واختك كان صدقتك
عذوب : اقولك بعدين
ميلاذ : طيب تعالي امشي ابي اندومي
عذوب : مافيه مويه حاره
ميلاذ : الى عندهم فيه
خلصو كلهم وطلعو
وثبات شافت قطوه صغيره في الارض وشالتها : بنات شوفو تدنن
عذوب ؛ يمه وخريها هناك !
ثبات : اما عاد تخافين من قطوه
عذوب ابعدت عنها وانخشت ورا خالد ولحقتها ثبات
خالد : وين وين ؟
عذوب : تكفى خالد تلحقني في قطوه
ثبات بضحك : وش بيسوي خالد يعني باخذها معي واحطها على مرقادش الليل
عذوب : تكفين وخريها مني
ضيدان : قالت لك تخاف وخريها هناك
ثبات تلاشت ابتسامتها : استهبل معها طيب
ضيدان عرف انه جاب العيد في اخته : مو الحين في الديره فيه قطاوه لاحقيها لين تقولين بس
خالد ضحك ودخل عذوب تحت ذراعه : قطوه تخافين من قطوه
عذوب : انا ماني قطوه
خالد : مانتي قطوه طيب اركبي
خلصو وكملو وجهتهم للديره
أنت تقرأ
نمشِي على طوارف عذبها جَاهلين عذُوبتها .
Spiritualالي ما يعدك لا تعده والي يشب النار لا يزعل على دخانها - ومن باع الوصل بعنا دياره " صكيت باب العتب وكرمت نفسي واقفيت ".
