نمشِي على طوارف عذبها جَاهلين عذُوبتها .

Part 13

نوره ضحكت : ياويلي منس لا مر خبر ولا علوم ما وصلتس
-
يوم العزيمه :

كتبت الاغراض مزنه وطلعت تبي تعطيها هايف وليث وقابلت ميلاذ
ميلاذ : عميمه وين بتروحين ؟ 
مزنه : ابي اعطي العيال يجيبون الاغراض
ميلاذ بابتسامه : طيب عطيني عنك انا اؤديها بس لمن  
مزنه : ل ليث ولدي واخوك
ميلاذ : اي اخو تحديدا ؟
مزنه بنسيان : اخوك ذا مادري شسمه
ميلاذ ضحكت : ايه منهو ياكثر اخواني
مزنه : ذاك العاقل
ميلاذ باستغراب : خالد ؟
مزنه : لا لا الثاني
ميلاذ : فارس ؟
مزنه : لا يابنتي ذاك الي مع ليث دوم
ميلاذ : هايف ؟
مزنه : ايه ايه هو ذا عطيهم الورقه وقولي لهم يجيبون الاغراض مثل ماهي مكتوبه
ميلاذ بابتسامه: من عيوني
راحت ميلاذ تمشي في وتدورهم في عيونها وحصلت عزيز ولد نجد جالسه على جواله ولا احد حوله واستغربت وضعه : عزيز وشعندك لحالك
تلفت عزيز عليها : هلا يا خاله
قربت منه وحاولت تناظر في جواله : شعندك مو مع العيال فيه شي هاوشوك ؟
عزيز لف جواله : لا مافيه الا كل خير
ميلاذ بلقافه : وجع طيب ليه تلف الجوال
عزيز وقف ونفض ثوبه : خاله تبين شي
ميلاذ باستغراب: لا
راح عزيز وخلاها
ميلاذ : طيب وين هايف ؟
عزيز وهو متجاهل وجودها : شفته عند الخيمه
راحت كملت وووصلت الخيمه ووقفت قدامها ولا شافت احد : هايف موجود
ماحصلت رد وكررت سؤالها سكتت ثواني تنتظر رد وتنرفزت وضربت رجها في الارض بتذمر : هااايف
طلع ليث من الخيمه : وجع كسرتي الارض وش تبين
ميلاذ : دامك داخل يابو ضروس ليه ما ترد
ليث : ابو ضروس ؟! احسن مزاجي بعد مابي ارد
ميلاذ : ايه ابو ضروس للحيل ضروسك موجوده كنها علامة جوده
ضحك لمن ذكر عضته لها يومه بزر: اما عاد للحين موجوده
ميلاذ : اقولك علامة جوده
ليث : جوده مني احسن من غيري
ميلاذ خزته: شقصدك ؟
ليث ضحك : ولا شي بس انتي وش تبين في هايف
ميلاذ مدة الورقه : خذ ذي هاذي المقاضي يلي جدتي طلبتها جيبوها وتقول ياويلكم يا سواد ليلكم لو ما جات او فيه شي ناقص
ليث : كذابه هي ما قالت كذا هاذي من عندك
ضحكت انه فهمها : اصه بس
رفع الورقه يقرا : يساتر سبع كراتين مويه لونهم جايين من مجاعه ذولي
عطته ظهرها ومشت : جيب وانت ساكت
ليث : ترا مو حنا الي نجيب الاغراض فارس ووليد
لفت عليه بصدمه : ولك ساعه جالس تتفلسف على راسي جيب
ليث ضحك: لا خلاص روحي انا اوديها
-
جا ذيب يركض : خالد تكفى تعال
خالد رفع حاجبه باستغراب : وش صاير
ذيب : مو صاير شي بس ماعرفنا وش نطلع الذبايح انت اخبر في جدتي
ضيدان : بزر ما تعرف تطلع الذبيحه
ذيب : اسكت انت جدتي مستقعده لي
ضيدان : تستاهل خلها تربيك انت واللوح الي معك
راح خالد مع ذيب وحصلو سعود ماسك غنمه صغيره ويربط شعرها بسلكه ويغني لها ولا انتبه لهم
خالد ضحك باستغراب : سعود ؟! صاحي انت
وقف سعود بفشله وهربت الغنمه : هاه وشو ماسويت شي
خالد : حمار انت تغني لغنمه وبعد مزين شعرها
سعود حك راسه بفهاوه : ماهي غنمه ترا عندها مشاعر
ذيب ضحك بعلو صوته : اسكت فشلتنا اسكت
خالد وعلامات الذهول والضحك في وجهه : عندها مشاعر اجل تراها بهيمه يا بهيم
ذيب بتصريف للموضوع ؛ يلا خلنا نخلص  الذبايح تاخرنا
دخل خالد وذيب ومسك غنمتين وطلعهم : كنها ما تكفي قليله
سعود : وش بتسوي طيب
خالد بضحك : بطلع الغنمه حقتك تتعشاها اليوم معهم
سعود ضحك : ياشينك بس انطم تكفى
طلع خالد جواله ودق على جدته جملا
جملا : يامرحبا
خالد : فيك والله
جملا ؛ سم يا وليدي شبغيت
خالد : الي بغيته يا جده ان ذبيحتين ما تكفي اهل الديره اطلع الثالثه ؟
جملا : سوي الي تشوفه يا خالد زين
خالد تبسم من كلامها : جعلني ما خلا
قفل جواله وحطه في جيبه : طلعو الثالثه
-
راح لهم وكانو يسولفون : شعندك انت وياه ما عندك لا شغله ولا مشغله
ثنيان ضحك : شكلها جدتي ناسيتني ما حطتني معكم
فارس : لا تخاف ما نستك تحصلها مجهزه لك وحده بس على جنب
ثنيان : والله اني داري وهاذا يلي خايف منه
ليث : لا تخاف بس بتخليك قهوجي
فارس ضحك : هاذا الحاصل
لف ليث على فارس : وانت وش تنتظر ؟
فارس ؛ انتظرهم يجيبون لي القرض عشان المقاضي
ليث وهو يمد له الورقه  : شكله القرض هالمره عليك جاني ورقه بدون قرض
فارس : لا تقوله
ليث : والله شوفه ذا يلي جاني بس
فارس تعكر مزاجه : يليييل
راح توجه للسياره وطلع جواله ودق على وليد : وينك فيه ؟
وليد : ليه موجود
فارس : خلصني تعال انا في السياره
وليد : اصبر خمس دقايق طيب واجيك
فارس بعصبيه : خمس دقايق ها الحين ادق على جدتي واقول لها وليد يقول انتظري خمس دقايق
وليد : وش دخل جدتي اصبر شوي
فارس : وليد خلصني ماني فايق لك
وليد بتسليك : طيب طيب
-
جاب مفتاح المخزن ورفعه للعيال : لقيته
ليث : سنه ؟
هايف : اقول امش وانت ساكت
وصلو للمخزن وفتحوه وناظرو في الفرش الكبير الي يبي اقل شي اربعه يشلونه وهم بس ثنين
هايف: بنشلها من هنا بنتنوم في قسم العظام
ضحك ليث ؛ صادق والله خلني اكلم العيال يساعدونا
كلم خالد وضيدان وثنيان وراح يساعد هايف في المراكي على ما يجون العيال ويبدون في الفرش
جو العيال وشلو اول فرشه وكان في البدايه خالد والنهايه ضيدان ووسطهم ثنيان جا ليث ومسك معهم من الوسط على انه يساعدهم فيها : اهه ياعيال ثقيله
ثنيان : وش شايل انت عشان تقول ثقيله ؟
ليث : انا لولا وجودي كان الفرشه ما تحركت من مكانها يا رخوم
خالد ناظر ضيدان وثنيان بمعنا فكو الفرشه عليه
١
٢
٣
فكو الفرشه سوا وطاحت على يدين ليث الي كان ماسكها من تحت وطاح فوقها : جن شلوكم انت وياه ليه فكيتو
خالد : مو تقول اننا رخوم ولولاك ما تحركت الفرشه يلا حركها وطلع يدينك يالرخمه
ضحك ثنيان و ظيدان من شكله : خلي الفلسفه تنفعك
حرك يده ليث يبي يطلعها بس كانت فيه حصى تحت كوعه اول ما طاحت واوجعته مرا وتاوه بالم  : ياعيال توجع
رفع حاجبه ثنيان وهمس : لايكون صابه بلا
راحو العيال له بسرعه وشلو الفرشه عن يده وساندوه وجا هايف وشافهم متجمعين ورمى المراكي في الارض وراح بسرعه لهم
خالد مسك يد ليث الي توجعه وحاول يحركها
ليث بالم : لا لا فكها
ضيدان : لا يكون انكسرت
ثنيان : شكلها
هايف باستغراب : وش صاير وش يلي كسرها ؟
خالد : طاحت عليه الفرشه
ليث بتهديد : اوريك انت ويـ
قاطع كلامه ضيدان مسك يده بمنذله واوجعته : اسكت بس لا تهايط واجد
خذوه وراحو المستشفى وطلعت فيها رضه من الحصى الي كانت تحت كوعه فا اطرو انهم يجبرونها له رجعو المزرعه وراحو المطبخ الخارجي عند الحريم الي يجهزون
طلعت سعديه وقابلتهم على الباب : بسمالله وش صاير
محد رد وكملو يمشون وطلعو ورا سعديه
مزنه باستغراب وخوف  : ليث وش صاير بك ؟
جملا وقفت جنبهم : عسى ما شر ليه يدك مجبوره ؟
ضيدان بتسارع : انكسرت يده
مزنه شهقت بسرعه وتقدمت له : ابك امي انت من وشو
ليث : طاحت على الفرشه بالغلط
مزنه مسكته من كتفه بخفه : بسمالله عليك توجعك شي
ليث بابتسامه يطمنها : لا الحمدلله
ثنيان يهمس للعيال : شوفو شلون تعامله ولو انا كان قالت انكسر الشر ولا طقت لي خبر
خالد : شوفو جدتي شلون تناظرنا كنها ناقده علينا
جملا : خلاص ياعيال ما قصرتو ارجعو كملو مو باقي شي ويأذن العصر وتجي العرب
لفو العيال ومشو وكملو يفرشون الفرش ويطقطقون على ليث
-
دخلت نوره على البنات في الغرفه وكانو يظبطون بعض
نوره بابتسامه : الله الله شعندكم
عزه: انتم الي شعندكم يا جده مقومينا الحين ولا يمدينا نسوي شي وشوي وننصرع
نوره ضحكت : سمالله عليك بس من الصرع لا تخافين يمديكم تسوون كل شي يد على يد تنجزون كل شي
غزيل بصياح: عذوب عذوب دبلتي كبدي الله يصوعش
نوره : هالله هالله عاد ضبطوها
لهفه بتمثيل الضيقه : وحنا يا عمه مالنا مثل عذوب
نوره : الا والله كلكم سواسي بس عذوب اليوم الانظار عليها كلها
ديار وهي تركب اظافرها : عمه ترا عزيمه مو خطوبه
لفت عذوب عليها تناظرها باستغراب من كلامها
نوره : انشاءالله اشوفكم عرايس كلكم
طلعت نوره قفلت الباب عليهم وهم كملو شغلهم وطلعو
الساعه | ٨:٣٠
العيال واقفين ويسلمون على المعازيم ويرحبون فيهم دخل واحد طويل وعريض بس ما كان باين وجهه من الي واقف قدامه شبهه عليه وبانت له الملامح راح بسرعه يدور خالد ويعلمه بس حصل جنبه ضيدان يسولف مع واحد من اهل الديره وكذالك ثنيان سحب خالد من يده بعيد شوي عنهم بتوتر : خالد
خالد باستغراب: شفيك انت مسحبني من بين العرب علشان تقول خالد ؟ 
هايف : لا لا ياحمار افهم حمد جا
خالد باستغراب : حمد ؟! حمد ما غيره ؟
هايف : ايه ايه واضح ان نيته مو زينه كلش
جا وليد ووقف جنبهم : شفتو الي جا ؟
هايف هز راسه ب الايجاب وسكتو كلهم
ضيدان بابتسامه: خالد تعال وين رحت
لف خالد عليه : جايك جايك بس دقايق
لف على هايف : امسكه لا تخليه يجي وليد تعال معي
راح وليد وخالد يمشون على عجله
وصلو وحصلو ابوهم وعمهم يرحبون ويهللون فيه ولا كأن بينهم ماضي طويل عريض
السلطان : يامرحبا ب حمد ولد الغالي
وليد ناظر خالد وكله استغراب : ولد الغالي ؟
محمد : شلونكم شعلومكم ؟
حمد : بخير يا محمد
مشا خالد و وليد بسرعه ووقفو جنب عمهم محمد
حمد بابتسامه استفزاز ومد يده يصافحهم: اهلااا باقاطعين تدرون والله الديره من دونكم ما تسوى قرب من اذن خالد وبهمس ، وخصوصا ولد العم الديره فاقده صوته وهو مقهور وكثيييير
خالد شد على يده بقهر من كلامه وبنفس الهمس: ماينقهر وعيال عمه على هالارض تفهم
حس العم ذياب ان فيهم شي : حياك حياك يا حمد
لف حمد على ابو ثنيان : البقى ماعلـ
قاطع كلامه ضيدان الي مسكه من ياقة ثوبه بقوه ورصه على الجدار : وش جابك ؟
حمد انصدم منه بس تماثل البرود : عمامك الي جابوني
ضيدان بحده : اقسم بالله لو ما تتحرك من هنا الحـ
وقفو الرجال وتوجهو نحوه والعيال ووخروهم عن بعض ومحمد وخالد مسكو ضيدان وطلعوه برا المجلس علشان يهدأ شوي
محمد بعصبيه : وش يلي سويته داخل ضيدان هاذي ماهيب من عوايدنا الرجال اذا دخل في مجالس الرجال يحترم ويقدر وهو داخل مجلسك وكذا تسوي به قدام العرب ؟!
ضيدان : هاذا ماهوب رجال ذا رخمه ونا اخبر فيه اكثر منك
محمد بتهديد : حمد راح يبقى ولا راح يتحرك الا اخر واحد وبتجلس معه وتقهويه وتوجب فيه وكانك بتكسر كلمتي تكلم يا ضيدان ونا اثبت لك انه مارح يصير فيك خير
ضيدان : يبه هاذا ملعـ
مشو محمد ودخل المجلس
ضيدان مسك غترته وعقاله ورماها في الارض بعصبيه : قال وشو قال اوجب فيه الرخمه
خالد : وهو صادق عمي وش الي سويته
ضيدان : خالد وخر عني ماني فايق لك
خالد : لا تفوق خلك تمشي ورا نفسك وانتبه تفكر في عقلك مثل البشر الصاحيه
ضيدان تكتف وسكت يناظر فيه
خالد : صحصح شوي شوفه جاي ولا هامه شي وكنه ناسي الماضي كله وانت اول ما شفته وكان كل يلي حصل البارحه صح ؟!
مشى ضيدان وترك خالد يناظره
-
جملا بعجله: يلا يلا يابنتي تاخرنا
عذوب وهي تعدل كعبها : شوي شوي ياجده
طلعو البنات وراها وهي مو عارفه تمشي زين في الكعب عشان جدتها الي تسحبها بسرعه : تكفين اصبري شوي
عذاري بضحك عليها : جدتي بتطيح !
جملا : محد قالش تلبسين كعب
دخلو ووقفو في نص الجلسه
جملا بصوت جمهوري : يامرحبا ويامسهلا والله ان جمعتكم تسوى الدنيا ومافيها عندي
الحضور : ماعليك زود ، الله يطور في عمرك
كملت جملا بابتسامه : ومن جمعتكم ذي نور عيني بسبت هالبنيه حفيدتي بنت السلطان عذوب
وحده من الحضور شهقت بصدمه : طلع متزوج الرابعه
سمعتها جملا ضحكت من كلامها : بخصوص الرابعه مافيه اعتراض بس هاذي بنت نوره تركي
وقفو الحريم الكبار وصارو يسلمون عليهم ويباركون لرجعتها لهم بخصوص انهم يعرفون السالفه من بدايتها
كانت جالسه ديار وحاطه رجل على رجل كانها وحده من الحضور ولا هامها الي يصير وتكتب
حمد : شوفيه يمكن جاكم
ديار  : وين بيجي البنات كلهم هنا قدام عيني
حمد : شوفيه ولا تكثرين كلام
وقفت ومشت داخل ودخلت المطبخ الداخلي وحصلت حلا وجلست تاكل منه
-
ثبات جات عند عذوب بابتسامه : عذوب عادي تروحين المطبخ ابيك بسالفه
عذوب بتعب : والله اني تعبانه لازم الحين ؟
ثبات : ايه روحي وباجيك انا دقيقه بس
وقفت عذوب وراحت المطبخ الخارجي وجلست على الطاوله تناظر اضافرها في ملل
دخل وهو يسب ويلعن في حمد من الضيقه وتهديد ابوه له
رفعت راسها تناظره بصدمه وهو انتبه لها ولف عليها وناظرها بذهول
ضيدان ابتسم من شكلها واكانه روق ولا كنه الي يسب قبل شويه : انتي
عذوب تناظره ولا عرفت وش تنطق استوعبت على نفسها وجات تنزل من الطاوله
ضيدان : خلك خلك باخذ مويه واطلع
ناظرته وهو يفتح الثلاجه ويطلع مويه ويلف عليها : نتفه بس والله صاروخ
طلع من المطبخ وهو مروق وهي الي وجها بدا يعرق من التوتر الي صابها نزلت من الطاوله وصارت تهف على وجها في يدها وتهمس: الله ياخذك يا ثبات
دخلت ثبات وجوالها في يدها وبحماس : عذوب جيـ
ناظرت عذوب باستغراب : عذوب ؟ شفيك تعبانه
لفت عذوب عليها وبعصبيه : ولك عين تسالين يا زفت ؟
ثبات : شفيك وش تقولين انتي ؟
عذوب : كذابه انتي الي مرسله اخوك عندي
ثبات باستغراب : اخوي ؟!
-
ميلاذ راحت ورا النخل عشان لاحد يشوفها تصور المجلس وهو مزحوم
وقفت ورفعت جوالها تصور وخايفه احد يركز عليها او يشوفها
: وش تسوين هنا ؟
طاح جوالها في الارض ولفت وهي ترجف
ناظرها بصدمه : ميلاذ
ميلاذ والخوف يعتليها ؛ لـ لـ ليث !
ليث : ايه ليث وش تسوين هنا ؟
ميلاذ رفعت كتوفها : مـ مادري
ليث بحده : وش الي ماتدرين تستهبلين انتي من تنتظرين ؟
ناظرته بصدمه ومن تفكيره : والله ما انتظر احد لا تفهمني غلط
: اجل وش تسوين علميني
حطت يدها على وجها امتناع عن البكاء : تكفى والله ان مو مثل ما فكرت
مسكها مع كتفها : طيب هدي وعلميني وش جابك
سكتت ثواني : كنت ابي اصور
ناظرها باستغراب : تصورين ؟! وش تصورين بالظبط
ميلاذ ودموعها على محاجرها : مارح تفهمني الحين
سكت ورفع يده يمسح دموعها : بتبكين الحين بتحوسين في وجهك خلاص
ميلاذ خزته في نظره : جمالي طبيعي
ضحك عليها : خلاص طيب اسف
-
راحت ديار وسحبت عمتها الي كانت تسولف مع وحده من الحريم ودخلتها المطبخ ومثلت البكاء والضيقه
غيداء: ديار بسمالله عليش شفيش
غطت وجها ديار وصار تبكي : عمتي شفته واقف معها وضامها
غيداء باستغراب وصدمه : منهو وضامم مين على وشو تتكلمين
ديار : ضيدان ياعمتي
فتحت عيونها بصدمه : ضيدان ؟! من الي ضامها
ديار : عذوب ...