مابين الماضي والحاضر

part. 12

لا تَلتَفِت يُهان المَرءْ على عَدد إلتفاتاتِه..!

**************🍂
خلصت ركص الجوبي هيَ والبنات واحنة منبهرات لان مامتوقعيها تسوي مثل هيج شي ولا وكلمن اباوع علية الكاه يباوع مصدوم..

حوراء: ها شلوني
ماري صارت اتكفخ بيها
ايهم: صدك جذب فرجتي علينة الدنية
حوراء: اووي شكد نحوسيين، هسة سوينة شي كلها تنبهر من تشوفة وانتو بعدكم لازگيلي فرجتي علينة العالم، بس خوش اجواء سويتلكم
ضلو يتناقشون واني خربانة ضحك على سوالفهم.
رحت ابارك للعرسان الي جو ومالحگت اباركلهم
إلياس: هاي شنو وتين هنا، يا هلا
وتين: وبيك اكثر
إلياس: تدرين توني جنت اسولف وية احمد واگلة يراد بس وتين وتكمل لمتنة
وتين: كلش شكرا على حبكم ومعزتكم الي
احمد: اي طبعا شون مانعزج، وحدة منة

انتبهت لإلياس عندة شامة برگبتة من الجهة اليسرى مثلي بس مادققت بالموضوع، لان سنار خلت بنتها بحظني وراحت تركض ورة ابنها الي راح ينداس من صغر حجمة بين المعازيم..
صار وكت العرسان يرگصون وصارت الاضائة كلش حفيفة يس ازيد شي عليهم والاجواء صارت تجنن
ليان: عمة اريد ارگص مثلهم
وتين: مو يدللون الحلوين
گمت من كرسي وشلتها وصرت افر بيها مثلهم على اساس، ليان صارت تضحك بصوت شوي مسموع مااحس الة واحد يجي يجرها من ايدي، مبين علية عصبي
كيان: منو سمحلچ تشيلين الطفلة ها
صاح بوجهي والطفلة خافت
وتين: بس...
كيان: احچييييي
وتين: انطي مجال نحجي، ام البنية گالتلي شليها..
جتي سنار وتداركت الوضع واحذت ليان من ايدة
سنار: هاي شبيك كيان ماكو داعي للعصبية اني خليتها بإيدها لان يمان تعبني واني اركض وراه
كيان: وليش تنطيها بإيد غربة
سنار:.....
وتين: حل للنزاع، يابة اني اعتذر....
كيان: ومنو گلچ اعتذارچ مقبول
تيام: صدك جذب كيان طولتها وهي گصيرة دگعد
كيان: وهي منو حتى تشيل بنتي
وتين: اهووو ترة طلعت رواحنة، الماعاجبك اعتذارها تصير المحقق وتين و....... بنفس الوقت
صفن بوجهي شوي سكت وگعد، ضل هو وتيام يحجون سوة الما خلص رگصهم ورة شوي گمت حتى ننضم للحفلة فات كيان مرة ثانية بس مبدل ملابسة وويوزع ابتسامات
گلت لا هذا اكيد شخط
كنان: اول مرة اشوف هل حلو، مني انتي؟
يباوع علي
وتين: عفوا قصدگ اني
كنان: اي ليش اكو حلو هنا غيرچ
وتين: لااا انت اكيد جنيت على الاخر توك متعارك وياي وهسة حلو مدري مو حلو دطيير چنك كناري مهلس
كنان: كل هل جمال وكناري مهلس مع الافسس
كيان: دعووفها ياكنان ليش تتحارش بيها
وتين: عزا العزاكم، شنو انتو ناصبين علي

صارو واحد مقابيل اللاخ واني بالنص،.. تيام: دعوفيهم هذول ماعدهم شغل وعمل
وتين: هذول توأم؟ لو اني اتوهم
ماري: لاعيوني توام، امشي خل نعلگ القاعة..
مشينة بس اني لحد الان بية علامات الصدمة
وماچذبنة خبر علگنة القاعة من اغاني ورگص والعسان هم ويانة
إلياس يرگص وية ماري، لازمها من ايدها ويفر بيها نفس الاميرات، بس شكلهم يجنن
وحوراء راحت غيرت ملابسها ولبست فستان احمر واني وياها وحدة مقابيل اللخ وكلها فرحانة چان يوم من العمر..
جة وقت الكل ياخذ شريكة ويرگص سلوو فإحنة البنات گعدنة بس ماري ماشاء الله هواي عدها رگصت وية كيان لان سنار ماقبلت تگوم، مااحس الة احد لزم ايدي
كنان:تسمحيلي نتشارك الرگصة سوية
وتين: ومنو گلك احنة اجانب ونتشارك سوة وعادي
مااخذ برأيي وسحبني لنص القاعة، مااكدر اعيط ولابية امسح بي الگاع..

إلياس من شافنة سوة واني ضايجة خرب من الضحك والبنات صارن يوزعن ابتسامات وليث يغمزلي اهو يكفرون الما يكفر..

الرگصة ماراضية تخلص، واني حاطة ايدي على كتفة صرت اگرص بي وهو ماراضي يعوفني
كنان: شبيج بس تگرصين ماتشوفينة متونسين
وتين: واني مامتونسة، شسوي لازم اونس روحي
شوهذا بس يضحك بس بدون صوت
وتين:انت على شنو تضحك فهمني اكو شي يضحك؟
_ اضحك لان انتي معصبة، سؤال ليش من فتت للقاعة گلتيلي چنك كناري مهلس
_ هههههههه شذكرك بيها، قصدت بيها لانك اشگر ومسوي شعرك كيرلي
كنان:وعجبج
_هو ماعجبني بل احرى حلو
_هاا، اني مامسوي شعري كيرلي، هو كيرلي
_اوو حلو، سؤال شنو تشتغل
_ليش
_هيچ
_مهندس
_صدك لو تتشاقة
_لاصدك
_عائلة العجائب انتو
_ليش عجائب
_لان كل منكم عندة شي ضامة، مااعرف شون اصيغها بمعنا آخر عائلتكم اسرار
_صحيح اني واحد من العائلة مرات تصير اشياء ومااعرف عنها
_زين شعچب إلياس دخل بالسلك العسكري عكسكم كل من عندة وضيفة
_صحيح، اني مهندس، وكيان دكتور اسنان، وماريانا دكتورة، بس إلياس عكسنة راسة يابس مثل ابوية
_هههههههه ليش ابوك شنو يشتغل
_ابوية العميد الي يكون مديركم هيچ شي، شمدريني
_قصدك العميد عبدالله
_اي هو
_ياا ولاچنت اعرف، حتى إلياس ماگللنة
_يجوز انتي ماتدرين بس تيام يدري
_امممم يجوز
خلصنة الرگصة اخيرآ
_تشرفنة بس ماعرفت شنو اسمچ
_وليش شتسوي بإسمي، شنو رايح تخطبني
_هههههههه لسان دلالة
_انت دلالة، خليك هيج احسن ماتعرف اسمي خما بس انتو عدكم غموض خلي اني هم يصير عندي غموض...

وخرت حتى ارجع لمكاني ولزمتني ماري وتباوعلي بنظرة
_خير شبيج هيج تباوعين
_ضحك وسوالف وية اخوية، متأكدة اول مرة تشوفي
_هو ضحكني وضحكت وين المشكلة
_اممممم؟ متاكدة؟
_دطيري والله بطرانة
_وين رايحة بعد ماخلصنة رگص
_يارگص، جاي يگصون بالكيك
_اي ورة الكيك
_مااريد والله تعبت
_ماكو تعب
_هسة دخل نرتاح وماشي
گعدنة على الطاولة الشباب جاي يضحكون ومتونسبن اني گعدت بصف امي جاي اتسولف وياي فمااسمع الي جاي يصير حاولية؛ ندستني حوراء وگالت: تردين مَي
_اي لان عطشت
جابت موضفة مَي وراحت، وزعو الكيك والشباب حارو شصنفو على الكيك
دجلة: يمة اني راح اروح
_وين رايحة ماكو طلعة راح يرحون للزفة
_لااني بعد مااكدر تعبت اريد اروح
ليث: على بختچ خالة اني اوديچ
گام ليث حتى يوديها وانطا العنوان تيام ووصا عليها، ورة شوي حسيت نفسي فد. مرة دايخة، وحتى وية البنات ماگمت وضليت گاعدة..

للزفة كلها صارت تگوم حتى يروحون واني مدري شون انتبهت گلادتي ماكو
تيام: يلا مانمشي
_تيام شون اروح وگلادتي ماكو
_شون، وين راحت
_ماادري، تعال ندورها
_تمام، بس اني ووياج ترة راح نروح سوة الشباب اخذو البنات بسياراتهم وراحو
_تمام لعد ندور على السريع
وبلشنة اندور گلبنة القاعة گلاب وماكو، القاعة فرغت من الناس وبس احنة مدري شلون لگيناها واگعة يم الطاولة الي جنة گاعدين بيها...
.. واحنة طالعين لگينة سيارات سود واگفات ورة سيارة تيام، بس المصيبة مو هنا فراس جاي ووياه هذاك الرجال الي جان بالصورة!
ووياهم مجموعة شباب...

تيام وگف گبالي وملامحة تغيرت صار عصبي
تيام: شعدكم هنا جايين
ياسر: جينة نصفي الحساب وكلمن يعيش حياته بشكل طبيعي
تيام: مابينة اي حساب، ويلا اخذ رجالك منا ماريد اشوفكم مرة ثانية
فراس: اني جاي لاحتى اخذ خطيبتي
باوعلي تيام مصدوم.....

يتبع.....

***************🍂
هذا البارت هدية بمناسبة عيد ميلادي
ارجو لكم قرائة ممتعة..
في امان الله.. نبض الحياة