برائة وجشع

مشهد

حقاً انا لا اعجُبً مما ارى!
ايا تُرى هل استحقُ ما جرى!
هَل ياترى لو بتُ انسى ما جرى!
لو ادري كل هذا اليجي منڪ فلا حبيتك...
لـ ميسم ↑↑

#مشاهد_مختصرة
~~~~~~~~~~
كُل الكلام ينسرد عن طريق البطلة نغم "

نغم::- واني مغمضه واهز بروحي علكيف حسيت واحد واكف يباوعلي فتحت عيني الي مابيها شي والثانية مغمضتها

كمزتلي كمزة من شفته لدرجة وكعت من المرجوحة، دنك يريد يكومني سحبت روحي منه وحجيت بهدوء وتحذير

:- شدااسوييي هنااا امشي اطلع برا

:- افا اطردين ابن عمج

- امشي اطلع برا لا تخليني اصيح واكعد اهلي، روح

- والله وحليانه عكس من عفتج، صايره اجيبين العين

- ........

~~~~~~~~~~~~~~~~~~~
صبا:- من شفت ابن عمي حاصر زينب اختي عرفت هاي ختلته الخاتلها مو فارغة واني اعرفه لهذا الوصخ مايعوفني براحتي الا يزوجني ومايعوفني

من رجعت من الدوام لاكاني طالع من بيتنا استغربت من عبرني بدون مايحجي!! منك من الشيطان

فتت بدلت وكعدت استراح ثواني واجتني امي مدخنه وتصيح هيئت روحي للمصيبة الجايه من ورا زينب وحسين

- صباااا صدك هذا الحجي السمعتهههه

- شسمعتيي هلمره

- موديه صورج لصاحبج وابن عمج اجه يكل لابوج اني استر عليهاااا تعرفين لو لاااا

- يمه شبيج وصدكتي بهذا الهتلي؟؟ والله لا موديه صور ولا عندي صاحب واذا عنده دليل يجي اله اطيح حضه يجيب جذب ويذب عليه اكبر جذاب وبس يريد يكسر خشمي

- ولج اسكتي وتراددني فوكاها ولج منين جابهن صورج منين اذا ما موديه صور شلون يجرئ ويجي يحجي هجي وي ابوج شلوووننن

- والعباس جذاااب والعباس تصدكين بي واجذبيني؟ اكيد فوتشوب لو بس يريد يزوجني ولو يضل اخر بشر بالدنيا ما اخذه يعني ماا اخذهه وخللصص

- انجبييي صبااا انجبي تردين اجلطيني انتِ كلشي يطلع منج انتِ ام الكليات والمعاهد اكيد صافتلج وي واحد وضاحك عليج هسه شحصلتي هاا شحصلتي ابوج ماخذ شهادة يلا تاخذينها انتِ مو اختج هل بطلت شبيج مفلفله على الكليات لو لان بيهن ولد ها احجي احجي

استغفرت بقهر وكعدت بالكاع ابجي وارجف شأسوي ماصدكني جزعت ومليت وصلت حدها بعد ما اسكتله وصل مرحلة يطعن بشرفي اني اعلمه

سكتت مارديت عليها اذا ارد تزيد العركة وماتنقص عافتني وراحت تاكل بروحها ركضت للتلفون اخابره ماعندي غير حل..........

~~~~~~~~~~~~~~~~~~~~~
شذى:-
اتوقف من الحركة مصدوم ثواني وهو صافن عليه وعلى تصرفي شسويت

شال اديه الثنينهن وخلاهن على بلعومي بعصبية يريد يخنكني، لزمت اديه اريده يعوفني ماكو

يقوي قبضته وما يعوفني، اختنكت اي اختنكت والهوه اختفى حسيت صار طنين بأذني مثل البيها الدود وفقدت حاسة السمع

واطراف رجلي وايدي كلهن خدرن، نزلت اديه من على ادينه المخليهن على رگبتي وردت اغمض عيوني واستسلم ثواني...

ثواني وبين ثانية وثانية الله كتبلي عمر جديد ورچعت عشت بسبب...!!

مثل القصف وصار على جهتي اليسرى جهة الشباك

انكسر الشباك مال غرفتي والكزاز وصل يمي يطافر، نز ورخه قبضته عن رگبتي وفر راسة يباوع للشباك مصدوم.....

~~~~~~~~~~~~~~~~~~~
رغد:- واني صافنة بالفراغ الي صار بحياتي من بعد وفاة امي اتصل تلفوني رقم غريب فتحته بملل

- منو!

- هاا ماعرفتيني مع الاسف والله

- عفواً؟؟ كلت منو

- شوفي من الاخير خابرتج اريد مصلحتج امج ماتت مو بسبب المرض ماتت لان حبوبها غلط واليطيها الحبوب اعرفه اذا تردين تعرفين ياهو المطيهن الها اتانيج للتسعة اذا ما اجيتي انتِ الخسرانة

وسد التلفون بوجهي بعدني ما مستوعبه شجاي يحجي وهذا منو؟ و وين يعرفني؟ و ومنين جاب رقمي؟ رجعت اتصلت عليه غلقه بوجهي اتصلت ثاني مرة ماحصلته........

~~~~~~~~~~~~~~~~~~~~
ميسم::-
تقربلي يريد يبوسني من شفايفي توترت وركضت للبيت سوالي بيده مثل يسبني، غميته وفتت لجوه وايدي على گلبي

خايفه لا يكعد واحد ويشوفني التقي ويا بنص اليل يذبحوني ومايرف الهم جفن بس علموده كلشي اسوي لو يكلي ذبي روحج بالشط هم اذب روحي وحتى ما افكر

كلها نايمة ماكو صوت بس اني كاعده
كلت همزين محد كاعد فتحت باب الصالة وفتت علكيف متت

فريت روحي من بعد ماسديت الباب لكن مادامت فرحتي

متت بطولي ونشف دمي بعروگي من شفت امي واكفه بنص الصالة ومتخوصره ضليت ابلعم.....

ْ
ْ
ْ
ْْ
ْ
اربع صديقات مرت على صداقتهن 11 سنة مع بعض محد كدر يفرقهن ويصد لمتهن

قصة حياتهن تختلف جذرياً، البعض بسبب الاهل والبعض بسبب بعض الشباب المُنحلين والبعض تنولد وياهن مشاكلهن

تعالن وياي خل نتعرف عليهن نفرح لفرحهن ونحزن لحزنهن

شنو رأيجن بالمشاهد؟
منو اكثر وحده لفتت انتباهجن ؟

تصميم الغلاف من المُبدعة يقين
الانستغرام تَبعها ...  yaqeen_3gi

يتبع...