رحلتي إلى الموت

الحلقة 1

رحلتي إلى الموت 💔 الحلقة 1 المقدمة
أمي و عيلتي كلهم مشو لحوش جدي زيارة ف درنة
و قعدو مصرّين عليا أني و زوجي إن نلحقوهم و نديرو رحلة من الغرب للشرق ❤️
مكنتش نعرف إن هادي حتكون رحلتنا الأخيرة 💔
و حتكون رحلتي إلى الموت ...
بقلمي خلود شلابي
••••••••••••••••••••••••••••
كنت نعافر في نومي و الساعة 11 و معاها
حاطة صاكو حوايجي بحداي و بلهفة طفلة عمرها خمسة سنين🥹
كنت كل ربع ساعة
يا بابا هيا
أمتى بيجي الصبح و نمشو لعيت جدي 🥺
يرد عليا و يقولي و هو موسع باله للمرة الألف 😂 تو تغمضي عيونك و ترقدي و تنوضي الصبح نمشو على بركة الله
به علاش منمشوش توا
بوي و هو شاد راسه خلاااااص عجز معاي 🤦‍♂️
و أمي تشبحلنا و ساكتة معش عندها جهد داهشة من ضمان الحوش و تغليفه بحكم حنقعدو غادي شهر لان باتي فترة هادي اجازة يخدم فطرابلس و نمشو زيارة لحوشنا التاني ف درنة بحدا حيشان عيت جدي و عمامي
خشيت لداري نسمع ف اوخيتي لمياء كانت اكبر مني ب تمانية سنين كانت تقرا فالاعدادي توتي ف صاكوها
و قتلي يا رغد هيا ارقدي ورانا مشوار
فتتها و طلعت لخوي طه كان عمره 7 سنين وقتها و قعدت نلعب معاه و هو يساير فيا كنا زي الصحاب ❤🤩
خشينا لدار  هشام خوي الكبير اني نجري و طه يجري وراي نلعبو في شدني و نشد معاك و هو  يكشخ بيرقد يقوللنا برو ارقدووو و لا نجيكم😠
و احني نخشو اناشبو فيه و نطلعو نتجارو حصلنا طريحة منه 😂
بعد الدميعات 😭 قعدنا مقعمزين نلعبو ب التركيب و دقايق حتى غفيت و حسيت بلمسة حنونة
حد قامني و حطني على سريري و غطاني
و خدا مني بوسة و كانت لحيته الناعمة الخفيفة على وجهي عرفته ان باتي حبيبي 😚❤ و قالي تصبحي على خير
••••••••••••••
نوضتني أمي الفجر و ناضو صلو الكبار جماعة
حطينا بضاعتنا ف الكوفني و أمي تقول حطو السلة متع الفطور من قدام ،، و اني شادة صاكوي منبيش نفرّط فيه قعدت غر نكركر فيه نبي نقيم معاهم زعميته 😅
و هشام يقولي هاتي نقيمه متقدريشي
و ني نقوله راني كبيرة نقدر لين تكركبت اني و وياه 😂😂
هشام   ميبس راسك 😶
و انطلقنا بسيارتنا العائلية لأحلى رحلة فهذاكا الظلام متع الفجر
فوّتنا مسافة باهية
ماما تقول لبابا نعطيك سندوتش قاللها مزال خلنفوتو الطريق
هشام يام صبيلي قهوة راسي بينفجر🤯
بابا  متشربهاش عالخواء توجعلك بطنك
و اني و طه من خلف درنالهم عركة عاد نبو ناكلو صغار منتحملوش نشوفو السلة معبية مشاء الله من كل خير و منتموهاش وقتي 😋
كليت الكيكة و هذاكا السنتوب
و بعدها سندوتش و بدت اشعة الشمس تبان مع منظر شروق الشمس كيف طالع مش عادي بككككل☀️✨
و بديت ندندن فعالم رغد الخاص و نسمع ف امي و بابا الضحك و البصارة ماما توكل ف بابا و بابا يشرق و هي تشرّب فيه فالشاهي يقوللها حرقتيني 😤
و هيا تقوله ماهو سخون شن تبيه يعني بالله اوقف و افطر زي الناس تقول الطريق بتهرب 😤
لمياء مدايرة السماعات ب mp3 على أغاني سامي يوسف
حسبي ربي جل الله ،، الله الله
مرة مرة نوقفو راحة و نبدلو ف كراسي قعمزت وراء بابا و هشام من خلف سيارة على تلاتة مستويات نظام تراجيت
و نغني لبوي و هو يقولي معييتيش من دوة ؟؟ 😫
و أمي تقوله التلات سنين اللي عطلت فيهم و متكلمتش توا بتردهم
بحكم لين دارولي حوتة البلّم بش صار مني 😁
نتفكر ف عز المشوار و كلنا راقدين بسبب الارهاق و بابا بسلامته ربي يعطيه طولة العمر يسوق
كنت نغمّض ف عيوني ب كل راحة و ثقة و نرقد لأن بابا هو الأمان مهما كان التعب مستحيل ينعس و يغفل علينا
نرقد متطمنة و مرة مرة تجي الشمس ف عيوني و نحس ب لون احمر برتقالي لون غريب متلون ف جفوني من داخل و اني عيوني مغمضتهم
بعد اكتر من 16 ساعة وصلنا و خشينا لدرنة
و وصلنا قبل الفجر بشوي خشينا لحوشنا قلنا منبوش انوضو العيلة و نخلعوهم قبل مفيش هذوكا الاتصالات و مش اي حد عنده تليفون البيلة
جي الصبح نضنا و امي دوشتلي و جهزتني اني و طه
و مشينا لحوش جدي المرحوم
جداي  استقبلتنا ب شتاوة و تصفق ❤❤👵🏻
أهلا  مرحبتين    اهلا يا غالي
ياما للنيبان مجالي
جرّي للقدام تعالي
ودي نحكيلك عن حالي 
مرحب يا ضاوي الجبين
مرحب يا ضاوي الجبين
مرحب يا ضاوي جرعودة يا بو عين تقابل سودة
ودي نحكيلك مجرودة
النبراشة و المجرودة   مولات الدور عراجين
مولات الدور عراجين
دقايق حتى
جو عمامي
و سفرة الفطور تمشي و سفرة الشاهي بالعالة تجي
و نساوين عمامي مع ماما يطيبو فالغداء و لمياء مع البنات اللي ف عمرها
و أني مسلطة عليا بنت عمي شروق المرعاشة
قطعتلي فيوكة قفطاني 👗🎀 قتلي نحاها و تو تشوفيها كيف تكبر و تجيك فيوكة كبيرة احلى من هادي
قلتلها فكيني ماما تضربني
قتلي لالا تو تطلعلك وحدة تانية🎀
قلتلها امتى
قتلي تعالي نلعبو ف السانية و نقطفو عنب لين فيوكة تكبر
أني صدقتها و قلتلها باهي
مشينا فتنا جردينة و جنان حوش جدي و خشينا جيهة جنان الجيران كانو بعاد شوية مكانوش مدايرين عليه كله صور
قلتلها بابا ميخلينيش نبعّد يضربني
قتلي نبي نفسحك تشوفي المناظر متكونيش جبانة يا رغد
و ناضت تقطف ف عنقود العنب و تقولي تعالي
قلتلها هذا مش متع جدي
قتلي ديما نقطف منه عادي
قمت العنقود لي مدتهولي خديت منه عنبات و كليت معاها بنتهم زي العسسسل 😍
كانت الارض معبية من كل الخيرات فيها كل شيء 🌲🌳
و خشينا ع العوينة و المشمش 🫐🍇🍑🍎
خلتني راكبة ف شجرة نقطف و اني نمدلها نشبح فاها مرة مرررة تتلفت نقوللها خيرك
تقولي لا شيء 🙃
لين نسمع في راجل كبوري فالسن
و معاه واحد شاب يكشخ السراقة جت السراقة جت
الحاج  يقول يا هوو  انتو عيال من
شن اديرو اهني
شروق هربت و خلتني فالشجرة
اني خفت لما سمعت كلمة سراقة و بننزل طحت و تخبشو رجليا قعدت نبكي😭
قرب مني الشيباني و قالي  متخافيش🥹
و الشاب يكشخ شكله شروق مدرهتله كبده
قاله خلاص يا ولدي اسكت هادي وجهها مش مألوف جديد علينا مش نفسها اللي تسرق
و اني نبكي و نقوله و الله مسرقت يا عمو
بنت عمي جابتني قتلي ديما ناكل من اهني 😭
قعد الشاب يخوّف فيا و يقولي ربي بيحطك فالنار و نلقاك مرة تانية نوريك و الحاج سخف على حالي و قالي خلاص معش تبكي بري روحي لحوشكم 😣
اني طلعت نعكّز و نشبح ف شروق جاية مع بوها و جي يجري ناحيتي و فجأة
ضربني كف
لين طحت من طولي
قعدت نبكي و هرب عليا النفس 😢 ناض قامني من يدي و يقولي نوضي وين طالعة بعيد عالحوش؟؟ 😡 وين تحسابي روحك جاية تسرقي ف خضرة الناس !!
أني كنت صغيرة مقدرتش ندافع على روحي
و مكنتش متعودة على ان حد يمد يده عليا و يضربني
حدي هربت نجري لحوش جدي لان خايفة من عمي حمزة بو شروق كان عصبي هلباااا
و كان هذا درسي الأول فالحياة 👌🏻
ارتسخ ف ذهني لحد ما كبرت
رغم صغر عقلي الا أني استوعبته و تعلمت منه هلبا حاجات
شبحت لقفطاني و فيوكة 🎀👗  لقيتها مكبرتش
قعدت خايفة نخش لامي تلقى قفطاني الجديد مقطّع
و لا نحرش عيلتي و نقوللهم عمي ضربني ؟
جي عمي وراي بمسافة كبيرة كيف خشو من الباب و نسمع فيه يكشخ على بنته يقوللها معش تلعبي معاها 🙃

أني ف هذيكا اللحظة خديت قراري
خشيت هربت نعيط و جداي و بوي يقولو خيرك شن فيه
خشيت لبدت ف حجر بابا
و نقوله عمي ضربني كف
و اني رفعتني شروق لجردينة قتلي نقطفو عنب 😭
و عمي و بنته وراي
شروق تقوله تكذب هيا مشت و اني نقوللها متبعديش
عمي قعد يقول ......
يتبع 💔💔

نلقى تفاعل انزل بارت 2 بش نخشو فالاحداث
ديرو متابعة بش يوصلكم اشعار الحلقة ☺️