رحلتي إلى الموت

الحلقة 6

#رحلتي_إلى_الموت 💔 الحلقة 6
بعنوان ( أيام صعبة 😔 )

خيره تفاعل مولي ناقص اللي تقرا و متعلقش مش مسامحتها راهو

_________________

مقعمزة مع المغرب لابسة عبايتي السودة و وشاحي الأسود عالكرسي ..
قعدت ساكتة عيوني منفوخات من الدموع مصدومة من الفاجعة اللي مريت بيها ..
نشبح للزحمة و للناس يمشو يميني يساري و أني بين مصدّق و مكذّب
لمياء مرة مررة تتفكر جداي و تنوض تعيط و حماتها و عزوزتها يصبرو فاها ... 😣
نسمع ف صوت بابا من الشارع يعيط ..
يقول شن فيه ؟؟
شن فيه ؟؟ 😭😭
طلعت نجري و خوالي يقولوله لا اله الا الله ،، لا اله الا الله ..
جي اضبطتني و اني نبكي ف حضنه يقولي شنو فيه ؟ شنو فيه
نقوله جداي عطاتك عمرها 😭💔
اه يا بابا ستحشتك .. اه يا بابا ربي ميغيبك
و جت لمياء حتى هيا حضنت بوي معاي و قعدنا نتباكو و هو معش قدر يوقف عالعكاز طاح لوطة و طحنا معاه و هو شادنا و يبكي
اه يا اميمتي وين خليتيني ..
اه يا اميمتي هكي تمشي و تخلينا
مسح دموعه و قال امتى دفنتوها
قاله خالي و هو متأتر العصر .. المرحومة توفت امس فالليل ..
بوي يبكي و يعيط بأعلى صوته
حسبي الله و نعم الوكيل فاللي كااااااان السبب
حسبي الله و نعم الوكيل فاللي كان السبب 😭😭
أول مرة نشوف بابا زي البيبي الصغيّر
كان متعلق ب جداي بشكل رهيييييب 💔😔
يقول اه ضهري انكسر يا اميمتي
ضهري انكسر ...
و أمي واقفة بحدانا تبكي و جت حضناته
يقوللها راحت الودادة يا هنيدة .. راحت الودادة 😭
و امي تبكي .. ربي ما يغيبك عليا يا سليمان ربي ميغيبك عليا 😭
بوي جاته زي الخضّة و قعد يرعش مع بعضه و معش قدر يوقف و طاح علينا ..
و انقلبت الخيمة لعياط تاني
• •• كم تمنيتُ يا أمي حين شعرتِ بالتعب، أن آخذه عنك لتبقيَ براحةٍ ولا تعاني أي تعب. ••

جي هاني و خوالي قاموه و حاولو يفيقوه مفيش استجابة
رفعوه لاقرب مصحة و دخلوه فالطواريء ..
و أني مقعمزة و بحداي لمياء كنا ماسكين ايدين بعض..
كنا خلاص لو تشقّي خدودنا ب موس متطلعش منه و لا قطرة دم
رن عليا خطيب أختي هاني و قالي بوك الحمد لله فاق بيشدوه مبيت لان وضعه الصحي تاعب شكله جاه السكر من الرعشة و من الضرب فالحبس 😣💔
أني و لمياء فرحنا و قلنا الحمد لله يا رب جت ف هكي
و ربي ياخد حقنا من جلادنا
بوي بسلامته ع قد ما حاولو يمسكوه مسكر راسه
قالوله رجليك يبو كشف احتمال فيه كسور لان مش قادر يوقف عليهم ..
قعدو خوالي وراه باش يقعد فالمصحة بالسيف بعد ما داخ عليهم تاني ..
الدكتور يشبح فيه يعافر يبي ينوض من السرير قاله .. شوف لصغارك يا حاج ..
راهو صغارك من بكري يتصلو بيهم اهني و خايفين عليك ،،
وكّل امرك لربي و توا اللي صار صاااار كل من عليها فان ...
منعرفش حتى كيف بنرقد كانت ليلة صعبة أصعب من اللي قبلها
رقدت ف خيمة الجنان لقيتهم مغطييني ب شرشاف بعد ما خداني السهو عالمندار ..
نضت مع قبل الفجر
صليت ركعتين و قعدت ندعي ليل اذن الفجر صليت و قعدت ندور فالحوش ..
و خشيت فوق لدار جداي لقيت لمياء راقدة ع سرير جداي و خانقتها العبرة ..
خشيت اتكيت بحداها فاقت بيا و غطتني و دخلتني ف حضنها ...
حضن اختي الدافي 😔
مع العصر و زحمة تاني يوم
خشت علينا عمتي سمية عزت ماما و عزتني و مكانتش معاها غزل ..
خليتها تهدرز هيا و أمي قالت ان جت بروحها بسيارتها ..
سألتها على غزل تغيّر وجهها قتلي مريضة مقدرتش تجي ..
سألتها امي على قرايتها قالتلها ان هي بترجع للعمل و عارضين عليها منصب جديد الصحة بيستقرو اهني زي قبل و انهم شاريين فيلا كبيرة ليها و لولادها بتزوجهم كل واحد دور ..
امي .. ان شاء الله تلقولهم بنيات الحلال ياربي
قالتلها .. حتى احني خطبنا لمحمد و عرسه قريب زي لمياء
و منذر حتى هو شفتله بنت اختي تمشي معاه بحكم هو اكتر واحد يدقق و شروطه تعجيزية كل منقوله على وحدة يقولي لا .. يبيها غزااااال مصوّر و متعلمة و واخدة على نظامه بحكم خدمته و سفرياته و عنده اصدقاء اجانب يجوه يبي وحدة فالحة تزبط ..
اني اهني زي من دار مية نار على وجههي ..
تمالكت نفسي و قلت
يلا جت غر على هادي 💔
خوي محبوس و معذبينه
و جداي ماتت
و بوي مريض
و اللي نحبه امه بتخطبله بنت خالته و كأنها كانت تلوحلي فالكلام أو أني هكي عندي قلة ثقة بالنفس مش عارفة الحق ...
تلفتتلي .. قتلي مدايرة حاجة لوجهك ؟
قالتلها امي .. العفو هي من امس تبكي و لا ماكلة لا شراب شن بدير ف وجهها ..😑
قالتلها .. لا لكن مشاء الله وجهها قداش ليا معش ريتها كبرت و احلوّت 😅
أني فتت قطافها و نضت من بحداهم
نسمع ف هاتفي يرن ..
طلعته من جيب العباية
لقيته رقم منذر
كرهته 😤 كان نلقى ابصر شن اندير فيه
عاودلي تاني ..
فتحت عليه و كان يرعش و مخلوع
قالي اسمعي رغد قولي لامي تطلع قدام الباب نتصل باها مقفل..
جيت بنقوله خيرك لكن كابرت ..
قتله تمام ..
قالي .. قوليلها تستعجل فيسسسع
لقيت روحي نسأل فيه الكرامة ديما ضدي 😩
قتله خيرك اشغلتني يا منذر 😰
قالي غزل رفعتها للمصحة ناديها من غير ما تخلعيها 😔
نضت كلمتها يا عمتي سمية و كيف بنزلق نقوللها اتصل بيا منذر تفكرت
قتلها واحد من ولادك قدام الباب بعتو مع حد من الصغار يبيك ضروري
قالت ان شاء الله خير ..
و ناضت و اني معاها نبي نسقدها قدام الباب
نزل منذر من السيارة قعد يشبحلي و عزّاني
و امه قتلي خلاص تمام خشي يا رغد ..
و اني كيف بنخش قتله امه شن فيه ..
قاللها غزل واخدة حبوب بتنتحر رفعها محمد للمستشفى
سمية اللي كانت لابسة بدلة رسمية سوداء و اتيكيت قعدت تعيط و تقول كله مني .. كله مني 😭😭
منذر .. غر اركبي توا و خليها السيارة تو نرجعلها
أني لا عرفت نتكلم و لا نتدخل و لا شن اندير ..
بعتت لمنذر مسج .. بالله عليك طمني على غزل 😭..
زعما شن صاير معاها البنت ؟؟
جي اللي و مردش عليا منذر و قلت لو بنتصل بأمها حتقول شن دخلها ف نفهم من منذر خير
جت ال 12
بعتلي منذر مسج ع النت نايضة ؟
قتله .. اي نراجي فيك اتطمني
قالي .. دارولها غسيل و الحمد لله
قتله .. صح ان مدخلنيش لكن نبي نعرف خيرها غزل اني صاحبتها و نخاف عليها اكتر من نفسي
قالي .. نعرف .. المهم حالها باهي هيا فنفس مصحة بوك امبكري درتله زيارة و اتطمنت على حاله ..
قتله .. كويس بكل اليوم ملحقناش نمشوله غدوة نمشي نشوفه و نشوف غزل ..
قالي .. حتى هو رأي
قتله .. صحيت
قالي .. على شنو ؟
قتله .. ان بابا طلع
قالي .. لان مرض عليهم غادي و ميبوشي يموت عندهم هذا علاش طلعوه مش على خاطر جنازة جداك ..
قتله .. المهم ان طلع بجد صحيت يا منذر ..
قالي .. معنديش فيه جميل المهم نستأذنك توا ليلتك سعيدة ..
قتله .. و انت من اهل الخير ..
سكرت منه الخط و حسيته زي اللي ارتخي معاش هذاكا البلطجي اللي كان أول مرة ..
جي الصبح نضت وتيت روحي بلا منستأذن حتى من أمي و كلمت خالي الصغير قالي تو نرفعك
و اني كيف طالعة قلت لماما راهو ماشية مع خالي لبوي أني و لمياء قتلي تمام ..
امي مشتله قبلنا بيوم و اليوم دورنا مع انها كان تلقى متروحش منه امي تحب بابا بشكككل لا يوصف .. ❤
خشينا للمصحة ركبت لبابا سلمت عليه و هدزنا و الحمد لله رجليه جبسوهمله و سكره نوعا ما خف ..
اتسللت و قلت للمياء اتدرق عليا و مشيت للرسبشن نسأل على اسم غزل الطاهر ..
مشى قتلي عالمكان
خديت جولة ف ممرات المصحة و ركبت الدروج لين انصدمت ب واحد و وخرت رجلي من الدرج و جت فالهواء ،، كان سقوطي مؤكد لولا لطف الله
و بسرعة البرق هذيكا اليد جبدتني لجسمه
قمت راسي اللي كان مدفون ف حضنه و شفت
لقيته منذر 😣
خشيت بعضي تحشمت و وخرت مرة تانية و الدنيا لفت بيا و قريب طحت تاني من قلة الماكلة ..
شدني و قعد يرقي فيا من الدروج قالي اكيد عندك هبوط .. شدي حيلك يا رغد
قتله .. ايه معش هديكا الماكلة ..
و نحى يده من على مرفقي
و وصلني قدام حجرة غزل و هو مباش يخش ..
طقطقت و خشيت لقيتها متكية
بنادمة تانية مش نفسها اللي كنت نعرفها نهائي ..
قلتلها غزل ؟؟ 😳
شبحتلي و نزلو دموعها على طول
قربت منها و حضنتها و قعدت نبكي معاها خيرك شن جاك بتهبلي انتي ؟؟ معقولة تبي تنتحري و تخشي نار جهنم على خاطر مني ااااه ؟؟
قتلي .. معش نبي نعيش خلاص عييت
قلتلها .. هادو وساوس الشيطان تعوذي منه
قتلي .. اني بحد ذاتي عايشة معاهم الشياطين
اني قعدت مستغربة من كلامها كانت نازلة ف عيلتها بشكل لين صدمني 😣..
و اللي عرفته ان امها عرفت علاقتها مع طه و قالتلها ان معش تكلمني و الا تقول لخوتها
و هي خافت على طه و اختاراته ..
كانت امها تحسابني ان اني مهبعة ب بنتها ..
و امها و بوها شبه منفصلين و يبي يخطب وحدة صغيرة فالعمر و فرض علاها تسيب عملها فالصحة و تقعد ف حوشهم متع مصراتة و كانو ولادها مأيدين الفكرة يبو أمهم و غزب تقعد بحدا العمام و الاقارب بحكم كل واحد لاهي ف خدمته
لكن بسبب موضوع مروة و الصور سمية تسبلت و داراته حجة و كبراته الموضوع و قالت لخوتها الشباب اللي لامو غزل على رفعان التليفون للمدرسة و لما انخنب منها غادي ..
تعاركت سمية مع زوجها الطاهر و قعدت تقوله مخلي بنتك لا تندري علاها فمن تصاحب و لا ف من يضحك علاها اهو يوزعو ف صورها للولاد و انت تفكر غر ف زواجك و خدمتك و سفرك .. و منها قررت تجي لطرابلس تستقر و منها ترجع لعملها بعد ما جاها عرض مليح ..
غزل .. كل واحد يشبح لمصلحته
امي تشبح لمصلحتها
و بوي خدتله عقله هديكا الساقطة
و خوتي بيقتلوني من الخنق و ديما و هما مهناش لكن وقت تبي اديري حاجة يوقفولك عالوحدة و نص بحجة ان خوتي و يبو يتحكمو فيا 💔😔
اني من اليوم معاد مكلمة واحد فيهم لا عندي ام لا خوت لا بو
اول كلب يجيني بنتزوجه و بنهرب
قلتلها .. هذا مش حل انتي قعدة صغيرة متهربيش من حاجة و تطيحي فاللي احرف منها ..
قالتلي .. تي شن بعد امك ادير فيك هكي بش تتعارك مع بوك و تفرض سيطرتها و تمشي رغبتها ااااه ؟؟
قلتلها هيا فاها وجهة نظر
مرات صح خيرتك اهنايا مش غادي ..
قالتلي .. لالا أني موضوعي صعب
خش علينا منذر قلبت وجهها و تلفتت
قعد واقف يشبح و هيا تقوله اطلع منبيش نشبح وجهك 😡
قاللها.. يمين بالله تزيدي حرف واحد الا ما نذبحك
اول مرة نشوفه هكي بلطجي لين خفت منه بجديات 😰
قاللها خمسة دقايق و نلقاك واتية بتروحي للحوش
و طلع من الغرفة
قعدت مصدومة
قلتلها غزززل
غزززل
لفتتها ناحيتي لقيتها تبكي بالسر و دموعها يصبو
حضنتها و قعدت تبكي و نقوللها عيطي متسكتيش عيطي ..
قتلي .. يديرو عملتهم و بعدين يبدو يبو يكلموك بالسيف اني معش نبي حد يكلمني 😭
اتصدقي محمد امس يناشب و يستفز فيا يقولي تفكرتي عارك و مشاكلك غر وقت العرس لين قتله معش تكلمني اطلع من راسي مدامني متع عار ..
طلعني نرد فالدوة و ضربني قريب قتلني قتله ان شاء الله ما تتهنى بيه عرسك و ربي ياخد فيك الحق
شد راسي و خبطه عالسرير اني من الانفعال خديت حبوب بش نفتك من الجحيم اللي اني فيه ..
اني وجعني حالها بجديات ..
قلتلها .. متخافيش كله عند ربي و مردود
قتلي .. اني تعبت يا رغد تعبببت 😭
و زيدك طه محبوس حتى قلت لامي بنمشي نعزيكم مخلتنيش نمشي ..
قلتلها هذا كله يفوت لكن نبي نفهم حاجة وحدة علاش خوك محمد ياخد ف جهازك زي يومتها نكلم فيك و هو واقف بحداك؟
قتلي شاك فيا لان امي خدت مني تليفوني التاني بعد ما انخنب الاول فالمدرسة و قاللها اكيد شادتاها تكلمي ف واحد و حصلت طريحة فوق منها ..
كانت اديرلي ف يبر تقول عليا مش بنتها هذا كله على خاطر متبيش طه تقولي انتو قعدين صغار ...
اني راسي ستاكة خلاص متوقعتش امها تطلع هكي الحق قلتلها .. بنعطيك الحل و اسمعي مني قبل ما يجي منذر
قتلي .. شنو
قلتلها روحي و اسكتي ولا كلمة
عيشي هالايامات كيف ما تمشي و شداها صلاة و دعاء لين ربي يفرج من عنده
تبدي عالاقل راجعة لقرايتك و تو نشوف منذر يخليك تسجلي ف مدرستي و نبدو مع بعض
قتلي .. قال لامي تو نسجلوها مع صاحبتها رغد لكن امي متبيش
قلتلها .. ماهو قتلك انتي توا تروحي و تسكتي بش متحرميش على روحك
لازم تتحملي الوجع توا بش توصلي لوين ما تبي
تكملي ثانويتك و طه يطلع بإذن الله يبدا مكمل و متخرط من الجامعة ،، هو توا يخدم و يقرا ملقط فلوس و بيكمل حوش هشام اللي خلاه قاله خوده 💔
بعدين نديرو خطوة و نتقدمولك و تبدو انتو كبار فالعمر محد يقدر يقول لا ..
قتلي .. ان شاء الله
قلتلها .. المهم لا كلام لا اتصالات بينك و بينه لا شيء ..
قالتلي .. غر يطلع و نتطمن عليه و هادي نعمة من ربي 😔
لكن ننصحك لو تكلمي ف منذر فوتيه و ابعدي عليه
قلتلها .. منكلمش فيه
قالتلي.. يومها لما تبي رقم امي كلمتيه ولاه
قلتلها .. هو مدايرلي لايك و امك مغيرة هاتفها و انتي مقفل لقيت ان هو الحل الوحيد بش نوصل فيك
قتلي.. قال انك تتدحنسي عليه لما خشيتيله فالفيس .. لكن لما امك كلماته غير رأيه
قلتلها .. مصح وجهه علاش بنتدحنس يعني
قتلي.. هو هكي يكلم فالبنات و لما البنت تعطيه وجه يقول متنفعش و يفوتها .. نصيحة مني متحطيشي ف راسك راه خوي و نعرفه
قلتلها اني مش في بالي توا الامور اهيا
مش عارفة حتى كيف تمالكت اعصابي
و اني نقول علاش عرض رسايلي هداكا اليوم و مردش عليا لين كلماته امي ؟؟ 🤔
ناضت غزل لبست عبايتها
ع خشت منذر
قلتلها نتلاقو ان شاء الله
و طلعت قعد يشبحلي و مبيتش نعبره نهائي
قلت ف خاطري الحق مش فيك 👌🏻
يتبع 💔