رحلتي إلى الموت

الحلقة 19

#رحلتي_إلى_الموت 💔 الحلقة 19
بعنوان (  درنة المنكوبة 😔  )
#الكاتبة_خلود_شلابي 
و أني واقفة نشبح للمكان و نقول أكيد هذا حلم تو يجي منذر و يلقاني اهني 💔
كانت المدرسة متعلية ،، ما وصل فاها شيء الا شوية امطار خاشة فالمبنى ،،
العاصفة صح وقفت لكن كل شيء خراب و دمار ،،
لون السحب و السماء متلونة  بالرمادي  ،، و الحزن و الفقد و الألم مالي المكان 😔 ..
لحظة من السكون مرت علي ،  و بعدها انهرت بالبكاء ..
مش قادرة على هذا بروحي نبي منذر ،، 😭
هو اللي كان يقوّي فيا  ..
و اللي مخليني مرتاحة و كل شيء يجي لعندي  ..
تمنيت لو كنت نعرف انه هديكا الليلة حتكون اخرلي لحظة معاه ،، كنت قعدت فالسيارة و متنا مع بعض 😭💔
أني حياتي و لا شيء بدونه ،، 😔
الهلال الأحمر و الناس الفزاعة كل مرة تجيب في عائلات ..
و اللي مبثور ،، و اللي مصاب ،، و اللي لقوه حي ف أحلك الظروف ..
تمنيت حد يجيب غزل و طه و الصغار و يقول لقينا ناجين ،،
زعما شن صار ف هشام و مرته و صغاره ..
عمارتهم كانت قريبة من الوادي و البحر .. 
و امي و بوي وينهم ..
تفكرت ان حاطة تيليفوني ف جيبي و مسكرة عليه بالسريتة ..
قلت ان شاء الله نلقاه يخدم ،، كان جهازي ضد المية و مركبتله كفرة للتصوير ضد المية كنت نصور بيه مع راجلي تحت المطر 💔..
كان مبلول و فيه لون المية العكرة و التراب ..
اصلا اني كلي ع بعضي مترغمدة بالتراب ..
قعدت نستفرغ .. و معدتي فاضية و بنة المية لي شربتها فالغرق زي الجيفة ..
كلي مغطاة بالأتربة و البلل ..
نسمع فالناس تذكر فالله ..
و ناس تعيّط ..
و نواح النساء و بكاء الأطفال ..
جاني راجل شبوب من الهلال .. كان
يراقب فيا لما نستفرغ
قالي متقعديش ب لبسك هذا لازم ادوشي و لازم يشوفك التمريض كان عندك جروح بش ميصيرلكش التهابات و حمى ..
و اني نحس ب السخونة ..
يزن يرعش و تلقطو عليه الممرضة و المراء لي شاداته كان نازله السكر من البرد ..
و يرعش ..
مشيتله نجري و معش عرفت شن اندير ..
قالولي دوشيله و تو نشوفوله لبس اطفال ..
واحد من المنقذين قالي ما عندك حد اهني ..؟
قتله ما عندي حد ،، بعدين تفكرت قلت خلنسأله
قتله عمارة (.....) وصل فاها السيل ..
هو سكت ..
قتله .. احكيلي شن فيه ؟؟
قالي من عندك غادي ؟
قتله .. خوي ..
قالي ..  قولي لا اله الا الله ..
قتله لا اله الا الله .. خيرها طاحت عمارتهم ..؟؟
قالي .. رفعها السيل للبحر ..
نزلت دمعتي و تمنيت لو مكانش بينا هالموقف الاخير ،، تمنيت لو مصارتش هالمشاكل .. و خسرتهم 💔
حتى لو تغيرو علينا ،، حتى لو حياة مكناش نعرفو وجهها الحقيقي ،،
لكن صغار خوي شن ذنبهم ،، 😭😭
كانو فرحانين بيا و يقولولي عمتي ..
ديما يكلمو فيا فيديو و نشوف فيهم من كانو فالقماط لين كبرو .. 😭
يارب اشهدك باني مسامحتهم من كل قلبي ،،
يااااارب حتى لو غلطو فحقي أني مسامحتهم منبيهمش يتعذبو فالاخرة بسببي ..
اللهم اني عفوت عنهم ف اعفو عني ..
هما ف دار الاخرة و احني ف دار الباطل ..
قالي المنقذ و سخف على حالي و حال يزن ،، تعالي انتي ووياه لعيلتي في شيحا ..
و كانت اخته ممرضة جاية معاه بش تهتم بالنساء ..
قلتله تمام ..
مشينا ..
قلت للمسعف ،، الحيشان لي جيهة(،،،) شن وضعهم
قالي فيه اللي اتدمرو اهو تو نخطمو عليهم ...
نشبح في شارعنا من بعيد كيف مساوي عالارض،،
لدرجة معش عرفته ،،
حوشنا ،،
بقايا من حوش عمامي ..
زعما نجا منهم حد ؟؟
عمي لطفي و مرته ؟ 😭💔
مشينا مشوار على رجلينا لان السيارات قعدين ميقدروش يخشو ..
و بعدين توكلنا بالسيارة ..
خشيت للحوش .. اني و البنت الممرضة
قلت السلام عليكم ..
و رحبو بيا و يزن ،، كانت ملايكته خفيفة كلهم يحبو يشدوه ..
سخنوله المية فالطنجرة لان قاعد ضي هارب ،،
و قعدنا اندوشوله ،، و اني دموعي موقفوش ..
كان يزن يبكي و درجة حرارته مرتفعة 😭
جت بنية تجري تقول ،، حصلتله دبش ،، حصلتله دبش ..
كان دبش من محل اطفال ،، متبرع بيه الراجل مولى المحل للضحايا ..
صاكو فيه تلات لبسات و جوارب و مرضعة و زلباحة و بطانية و شرشاف ،، و ملابس داخلية لعمر يزن ..
لبسوه و عطروه ،، و لفوه ب بطانية ..
داروله شيشة حليب و قعد يرضع من امس مكلى شيء ..
قتلي ام المسعف ،، خلاص بري دوشي سخنالك مية ..
و تلقي لبسة بنتي جديدة و عبايتها و محرمة و شبشب ..
قلتلها تمام ..
خشيت دوشت و شعري مباش يتنحى منه التراب بسهولة تعبني ف غسله ..
قعدت نديرله فالشامبو و نغسل لين بانو ملامح و جهي و جسمي ..
كانت عندي ضربة ف بطني مكنتش حاسة بيها ..
لبست سروال واسع و حمالة و كنتيرا و تيشيرت و العباية .. و خليت على راسي الفوطة تنشفلي شعري ..
بعدين تفكرت ان الارملة فالرباط ممنوع تغسل ب شامبو فيه معطرات  ..
قعدت نبكي و نقول ف خاطري يا ربي سامحني ،، مفيش الا شامبو ينظفني ..
و بطني ناضت عليا تاني قعدت نرجع ف مرار ..
لقيت معجون درته ف فمي و قعدت نفرك بيه بيديا .. بلكي تتنحى من فمي بنة الغدير ..
طلعت لقيتها مدايرتلي شاهي .. و خبزة و جبنة و زيت زيتون و زعتر ..
و يزن توكل فيه البنت جبنة و وسط خبزة  و هو ياكل .. كان فالعشر شهور يحب جبنة  وياكل ف خضرة و رز ابيض زي البرودو ..
و الممرضة اخت المنقذ  تفحص فيه ..
قتلي عنده جفاف شوية و محصل بردة ،، و عيونه يحرقو فيه من المية الملوثة مزبطات ..
كانت مهتمة بيه ..
و دارتله كل ما يلزم و قطرتله ف عيونه  ..
و اني مذقتش ولا حاجة ..
قتلي الحاجة .. خيرك يا بنتي سمي باسم الله ..
قلتلها كيف بناكل و راجلي مهناش و خوتي ماتو ،،
قتلي .. هذا اختبار من الله ،، قاومي على خاطر ولدك ..
قلتلها ،، هذا ولد خوي 😭😭
قتلي قاومي على شان ولد خوك .. سمي باسم الله عالاقل تتنحى منك لوعة الكبد .. و بعد الحاح
شربت شاهيها السخون ،، دفالي مصاريني
و قلتلها زيديني ..
زادتني و مدتلي الخبزة و قتلي غمسي ..
قعدت نغمس و نبكي ..
و هيا تقولي وحدي الله يا بنتي .. قيمي صحتك توا
كليت و حسيت لوعة الكبد تنحت مني و خفّت عليا ..
و نضت بنرجع ..
خشيت للحمام استفرغت ..
قتلي المراء .. انتي حامل ؟
صدمتني .. و قلتلها لالا ..
قتلي .. اليوم بس ترجعي ؟
قعدت نتفكر و قلتلها ..  الحق من اسبوع انوض الصبح كبدي تزعق ،، لان يمكن خديت ضربة مكيف ..
قتلي بري ارتاحي يا بنيتي ..
و يزن معاي اني و بنتي .. متخافيش عليه ..
قلتلها مش جايني النوم ،، مش قادرة 😔 ..
قتلي الممرضة .. خلنشوف جرحك و حاولي ترقدي ..
عريتلها بطني و داوتلي الجرح ب المضاد و ضمادة كبيرة ..
قتلي منقدرش نعطيك شيء تنزلك حرارتك نخافك حامل ..
اني ضحكت بهزوة و صدمة متع مستحيل يصير هكي و قلتلها .. لالا حامل شني ..
ليا خمسة سنين متزوجة و ربي مرزقنيش ..
قتلي .. ربك قادر على كل شيء وين تندري مرات ..
مرديتش علاها ولا حطيت ف بالي شيء ..
مع الحرارة و الصداع ..
خديت فوار الازرق و جتني نعسة من الإرهاق ..
رقدت رقدة كلها كوابيس ...
كأنه اللي صار يتعاود .. 😔
كيف الموجة ضربت منذر و هو فالسيارة ..
كيف جت دوامة عملاقة متع الاعصار  ..
..
..
كأن الاعصار يكلم فياااااا و صوت صفيررر تهتز له الأبدان
و أني نعيط نقول يا ربي ارحمني 😭😭
يا ربي ارحمني
الإعصار كل مرة يقرب ب دوامته الكبيرة ،، بش ياخدني ،، الاشجار كلها تنحت من جذروها و اني واقفة فالظلام ..
كنت نحس بالعذاب و الخوف ،، بس وقت قرب مني الإعصار قلت بنمشي لربي ...
و غاديكا حنرتاح 👌🏻❤ حسيت بنوع من السكينة رغم الذعر اللي اني فيه ..
كيف قامني و اني نعيط و نشهّد لا اله الا الله ،، لا اله الا الله .. تلوحت ف مكان ع سطح ..
طبست لقيت منذر و غزل و الصغار ..
و المشهد يكرر نفسه ..
لكن المرة هادي شفت هشام ،، و هو ماسك صغاره ..
كان معاي فالسطح ..
قالي .. سامحني يا رغد ،، و قولي لامي تسامحني
قتله .. مسامحاتك 😭😭 و الله مسامحاتك و كيف بيجوني الصغار يجرو بيحضنوني
نسمع ف صوت ..
تلفتت لقيت الموجة الكبيرة جت و ضربتنا ..
و اني شديت ف الحديد الحماية متع السور ..
نقاوم و نقاوم ،، لين خف منسوب المية و هشام و صغاره معش لقيتهم 💔
حسيت بحركة ف كتفي
نضت مفزوعة لقيت المراء تنوض فيا ..
قتلي سمي باسم الله يا بنتي ..
و كنت كلي عرق نقطر ..
حرارة مرتفعتلي و اني نكوبس ...
قتلي نسمع فيك تعيطي ..
قلتلها حلم سيء ..
جت البنت قتلي شحنتلك موبايلك بعد ما مسحته و عقمته قاعد يخدم ..
فرحت قلت ع الاقل نتواصل مع حد من العيلة ..
قعدت نتعرف عالعيلة اللي استقبلتني ..
الام ،، نجية
و البنت بعمر الكلية اسمها فاطمة ..
و الممرضة مشت تسعف فالناس تاني اسمها زينب و خوها المنقذ اسمه طارق ..
قتلي الام نجية ،، من عندك اهني
قلتلها .. توا عندي ربي و بس ..
حوشنا طاح و تساوى عالارض ،، و خوي هشام و عياله اللي فالعمارة جرفهم السيل للبحر ..
و خوي طه و مرته و صغاره رفعتهم الموجة قدامي 😔
قعدت نوريلها ف صورهم و نبكي ..
و التغطية مزال مجتش ..
الجو قاعد فالعشية ..
وريتلها صور منذر و كيف كنا نصورو فالوادي و هوا نايض ..
قلتلها على بابا و امي ..
قتلي ان شاء الله ربي يطمنك عليهم ،، ادعي يا بنتي ..
نضت العصر و دعيت ..
و يزن مهتمة بيه فاطمة مجيتش شوره بكككل ..
قلتلها بنطلع نشوف بلكي نلقى حد رافعينه للمدرسة ..
قتلي انتي حرارة و دايخة اكتبي اسماء عيلتك و تو ولدي طارق يشوفلك ..
قلتلها .. نبي نشوف وين كنت اخر مرة بلكي راجلي حي ،، بلكي خوتي ما ماتوش ..و قعدت نبكي و مقدرتش تشدني ..
طلعت و نزلت على رجليا ..
المكان مش مكاني ،، كأنه حلم و أني بداخله ..
نزلت مع اسعاف و وصلت لجيهة المدرسة ..
وجهي احمر من الحرارة ،، و عيوني يحرقو ..
و جيعانة لكن نقاوم ..
نمشي بالشبشب و نشبح ف الجثث ملفوفة 💔..
الناس كلها تشبح ف وجوههم بلكي تلقى حد من عيلتها ..
قعدت نشبح و دموعي موقفوش 💔..
فوق ال 2000 جثة اللي في الجهة هادي بس ..
كتبت اسماء المفقودين عيلتي .. و كتبت اسم منذر و قعدت نبكي 💔..
الوادي قاعد نايض و يرفع للبحر ..
البحر لونه تغيّر ،، شفت للهاتف مزال مفيش خدمة ..
قعدت نتفرج من مكان بعيد مطل عالوادي و البحر..
على صور منذر ..
كيف كان يقولي نحببك و اني ووياه تحت المظلة 💔
سبحان الله ..
لو قعدنا فالحوش راه طاح بينا ..
و لو قعدنا فالشقة راهو رفعتنا العمارة معاهم للبحر
و مكنتش اني و يزن قعدنا حيين 💔 !!
حكم و تدبير الخالق❤
يدير فالأسباب و محد يعلم بخفاياها و شن نهايتها ..
كيف لما طه و غزل جت سيارتهم بحدا بلكونة الشقة بالزبط و قدرو يركبو ..
اما اني و منذر لا .. كانت فوسط السيل
اني قدرت نشد الحبل و منذر ملحقش 😔💔
وطه و غزل مصارلهم شيء و اني فقدت زوجي ..
بس بعدين الموجة هما قامتهم و أني لا ،، لان العمارة لي وقفت سيارتنا قدامها كانت عالية و كنت شادة فالحماية .. و هما العمارة لي ركبو فاها من طابقين
اه لو سمعت كلام منذر ،، كان يقول متضايق نبي نروح و اني نقوله خلينا نقعدو ..
و لما بابا مرض يقوللهم خلينا نرفعوه و هشام مخلاناش ..
لو مشينا روحنا و رفعنا بابا راهو كلنا قعدنا حيين 😭💔..
يا ريتني سمعت كلامك يا منذر ..
نتكلم و اني نشبح ف صوراته ..
و بعدين قلت ياربي سامحني ،، و خليني قد الابتلاء ،، سامحني لما نحكي هكي ،، لكن الفراق صعب 😭😭
يا رب صبرني ع ما صابني ،، يا رب صبرني ع ما صابني
يا رب قويني نعبدك و منقصرش في طاعتك ،،
  اللهم ادخلهم فالفردوس و ارحمهم برحمتك ..
نبكي و ندعي و حرارتي مرتفعة ،، متصدعة و ريحة المكان كلها بلل ،، مكان لو منشبحش فيه بعيني توا و كيف انقلب بيه الحال ،، راهو مصدقتش 💔😔
لو كنت نعرف ان حيكون اخر لقاء بيناتنا ف هذيكا الليلة ،،
راهو مسكتش بكل و كنت حنحكي معاه ف كل دقيقة لين نشبع من صوته ،،
وكنت حنزيد نتأمل ف تفاصيله،، و وجهه ،، و ابتسامته ..
لو كنت نعرف ،،
كنت حنحضنه و نشبع من دفء يديه ،، و نقوله نحبك مليون مرة  ..
لو كنت نعرف فلحظتها بس 👌🏻😔
كنت محتاجة اني نصدق ،، انّ نطلع البرا ،، مع كل حد يشبحني يقولي من عندك اهني و الكل بيساعدني ،،
لكن كنت نرفض و زي الهايمة ،، او زي اللي هبلت و ختّشت ،، نتكلم بروحي ،، و مرة نعيط ،، و مرة نتفكر ف مواقف بيني و بين طه نقعد نضحك ،، كنت نشوف فيه يجري و حركاته لما كان طفل  ..
المغرب ادن و اني فالشوارع و الازقة نحوس ،،
و الكل يضايق فيا و يبي يرفعني لنقطة التجمع للضحايا ،، نقوللهم خلوني ف حالي منبيش نمشي لولا مكان 😤..
ركبت للعمارة ..
و للدرج المعبي طين ،،
و للسطح .. و أني نتفكر ف الأمس الذي لن يعود ..
نشبح في طه و نقول للصغار باي من بعيد ..
قاطعني صوت طارق و قعد يشبح يحسابني نكلم ف حد ..
لكن اني متهلوسة ..
يقولي يا مدام شن اديري اهني ،، الكل يحكي بسيرتك ..
بري ارجعي لولد خوك فالحوش علاش طالعة انتي ..
و اني نقوله خليني نبي نشوف عيلتي 💔..
قعد ياخد فيا بالكلام و ليل و غدوة نجيبك ..
قتله خليني نشبح خوي بس ..
يقولي وينه خوك ..
نطبس من السطح نقوله اهوا ..
و طه يشبحلي و يضحك كله نور ،،
دار يده ع جبهتي و لقاني حرارة ..
قالي .. حرارتك مرتفعة اكيد عندك التهاب و لازم من مضاد 😰 ..
جي منقذ تاني و روحو بيا للحوش و اني نهلوس ..
انادي فالطريق ،،
يا طه ،،
يا منذر ،،
يا هشام ،،
يا بابا 😭😭
و طارق يقول لا حول ولا قوة الا بالله ..
خشينا للحوش و جت امه نجية ،، و زينب الممرضة ..
و فاطمة و يزن ف غمرها يضحك ..
قعدت نشبح ليزن و نقوله ،، تضحك ؟؟ 😔
عندك الحق متعرف من الدنيا شيء
حطتني زينب عالصالون و كانو رجليا مرغمدات بالطين ..
حرارتي كانت 42 ..
قالت لازم نعطيها مضاد فالوريد ..
جت نجية جابت سطل امية و غسلتلي رجليا ..
بعدين قالتلها زينب خلتخش ادوش قبل ..
خشيت دوشت ب مية مصقعة و اني نتقردح و نقوللهم مش لازم ما فيا شيء..
لبست بيجامة بدلت فالحمام و اني دايخة ..
خشت الممرضة قتلي دورتك شنو معطلة ؟
قلتلها ... نسيت
قعدت نعصر ف دماغي قلتلها كم التاريخ اليوم
قتلي 11سبتمبر ..
تفكرت و لقيتها 12 يوم ..
قلتلها ديما هكي ملخبطة مرة تجي بكري و مرة تعطل ..
قتلي غر خليك ..
جابتلي طاسة بلستك و تست ..
قتلي خديتهولك من الصيدلية جربيه ..
طلعت و خلتني و قلت نجرب ..
فتحت التست حطيته فالطاسة ..
و قعدت نتفكر ف كل اختبار درته و كان سلبي ،،
و كيف كنت نرسم ف خط بالخطاط و نتخايل فيه موجب ..
شبحت لليمين و جتني الدوخة طاحت الطاسة مني فالحوض ..
قعدت اتطق عليا نجية و زنيب فالباب قعدت نمرد و فتحت الباب متع الحمام ..
نوضوني ..
وقفت و اني راسي بيتفجر ..
فتحو الشيشمة و قعدو يبلو ف وجهي و اني ف حال ما يعلم بيه كان ربي ،،
نتفكر غسلت يديا و مع الدوخة رؤيتي اتضببطت،، و نسمع في زينب تقول التست موجب ،، التست موجب 😍 ..
و اني دخت ..
قاموني و حطوني عالفراش ..
نحس ب كمادات ع راسي و طارق مشى بيجيب التغدية ..
و ضغطي كان نازل 30
و تقولي نجية ،، افرحي ربي عطاك بعد خمس سنين ،، شدي صحتك ع خاطر اوليدك ،، شدي صحتك يا رغد ..
نزلت دمعتي و قلت الحمد لله و معش نندري على شيء ..
نضت صحصحت لقيت يبرة الكانيولا ف يدي ..
و قتلي مضطرة نعطيك مضاد خفيف .. و بنادول ف وريد ..
هزيت براسي بنعم ..
و عمتي نجية جابت شوربة خضار و توكل فيا و اني نزمط ..
تقولي كولي على شان اللي ف بطنك ..
مع ال 1 فالليل ،،
كانو كلهم حواليا متجمعين ..و يزن مرة يعيط و مرة يلعب ..
جتني فاطمة قتلي تليفونك يتصل ..
شبحت لقيت ماما فرحت ❤❤
رديت عليها و هي تقول وينك يا بنتي الحمد لله اللي سمعت صوتك 😭😭 ..
انهارت بالدموع و اني معش عندي جهد نبكي صوتي هارب و حرارتي بين ترقى و تنزل مرة مرة ..
قلتلها وينك انتي و بابا ..
قتلي حصلنا فالطريق .. بوك حالته خطيرة وقف قلبه مرة و داروله انعاش 😭
وينك و وين خوتك نتصل بيهم ..
قلتلها معش فيه حد الا اني و يزن ..
امي بكت و قعدت تعيّط و اني بكيت ..
قتلي و منذر ..
قلتلها و حتى منذر  راااااح يا يما  ..😭😭
حوشنا طايح .. و عمامي مريت منهم حد ..
قتلي انتي وين ..
قلتلها عند ناس بارك الله فيهم سعفوني ف شيحا ..
قتلي عمك لطفي و مرته الحمد لله طلعو من حوشهم ،، كانت عند اماليها ..
اتصلي بيهم يجوك ..
قلتلها و انتي وينك ..؟
قتلي علقنا فالطريق في سوسة الفوقية ،، و حتى هيا دمار 💔
قلت
شوره السواق كان يجري و حصل مشوار باهي..
..
..
قتلي و هيا تبكي ،، الطرق كلهم مسكرات توا .. المهم ردي بالك على روحك و على يزن ..
قلتلها .. يما 😭
قتلي .. نعم يا بنتي😭
قلتلها .. اني حامل ..
قتلي .. الحمد لله يا ربي ،، و قعدت تبكي ،،
قتلي تسمعي فيا .. ؟
شدي صحتك ،، اهو ربي دارلك سبب تقاومي على خاطره ..
قلتلها .. صعب
قتلي .. كله صعب ،، لكن توكلي على الله ،، زي ما اني دارلي سبب و عرفت مكانك وين ..
امي ف عز محنتنا تواسي فيا ،، و كلمت عمتي نجية وصتها عليا ..
و هيا تقوللها بنتك بين ايدين امينة ..
اتصلت بيا لمياء
قعدت تكلم فاها زينب تقوللها مريضة و ملتهبة متعبيهاش بالكلام ،، و خلي نفسيتها عالية .. اني هذا كله نسمع فيه و الرؤية و الادراك شبه فاقداته ..
عطتني الهاتف و كلمتني و تتحمدلي بالسلامة و شادة غصتها ،، مسألتنيش و لا على واحد ،، كانت سامعة من امي شوره ،، و قتلي هاني و سلفك معز و محمد بيتسقدو لبنغازي بش يلاقوكم غادي ..
مدخل درنة مسكر ،،
قلتلها و اني بصوتي التاعب ان شاء الله ..
سلفتي حتى هيا تتصل و تخش فالانتظار ..
رديت عليها و قتلي الحمد لله ع سلامتك و تبكي و عمتي سمية تبكي و كلموني و اتطمنو عليا ..
عمتي .. بنتي و ولدي راحو من يديا 😭 ..
قعدت نبكي و زينب فكت مني الهاتف و قعدت تقوللهم خلاص هيا مريضة ،، المراء حامل و تعبانة ..
و شوره عمتي ما صدقت و قالت الحمد لله عاللي ربي كاتبه .. ربي ياخد و يعطي
كلمتني و زينب قالتلها بتخلوها تبكي ناخد الهاتف و عطتهولي ..
قتلي .. ردي بالك على روحك و كولي على خاطر ولد منذر 😭 غصبي على روحك و قيمي صحتك و ان شاء الله اوليدي و بنتي شهداء فالجنة ..
قلتلها .. ان شاء الله ..
رقدت ..
و تاني يوم حالتي اتدهورت اكتر ..
نسمع ف زينب تقول ،، شوره الجرثومة اللي فالغدير واصلة للدماغ تبي مصحة و عناية ضروري قبل ما يتفاقم وضعها الصحي ..
و اني دايخة و مرة مرة نمشي فيها و عيوني يحرقو فيا ..
و حوش اهل طارق مسيبونيش ..
جت مرت عمي و عمي لطفي ..
قالولي لقينا جثمان غزل ،،
اني قعدت نبكي ..
و قالولي لقو جثامين صغار هشام طافيين فالبحر الولد الكبير و شهد .. و مزال البحر يطلّع..
قلتلهم .. و سيارة منذر ؟
قالي .. معنديش خبر ربي يلطف بينا و خلاص ..
عمك مصباح و صغاره ماتو .. و مرته كانت عند اماليها ( عمي الصغير لي واخد حوش جداي )
و عمك حمزة و عياله حيين الحمد لله ..
و عمك علي ولده توفى كان عند صاحبه بايت ..
و اني حوشي طاح ستر ربي مشينا لنسابتي ضي هارب شدوني عندهم ..
..
عمي لطفي بروحه من غير حوش قاعد عند نسابته قالولي تعالي معانا  ،، لكن عمتي نجية قتلي و الله ماك طالعة مننا اقعدي اهني تعودنا عليك و على يزن معندناش رجالة و طارق ميجيش ..
قلتلها باهي ..
روح عمي و مرته ..
..
..
و حمزة حوشه مصارله شيء ،،
ديما الموت تاخد فالناس الباهية ،،🤷‍♀️
أمي و سلفتي و سلافي و عمي الطاهر و لمياء و هاني كل شوية يتطمنو عليا..
و اني رفعني طارق و زينب لمستشفى ميداني بديت نتعالج ..
و كان تشخيص زينب صح ،، كان عندي التهاب بسبب المية العكرة اللي فالفيضان و جتني جرثومة ..
و بدو يعطو فيا ف مضاد و اني نبكي عاللي انخلق ف بطني ،، اني ما حصلته الا بعد طلوع الروح ،، و مع المضادات القوية و الابر حيريح مني .. 💔
قعدت نقول اللي كاتبه ليا ربي حنشوفه ،، و قعدت نقرا فالقرآن على رحمي و دعيت و استودعته فالله ..
و قلت اللي كاتبهولي ربي راضية بيه .. 👌🏻😔
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑