رحلتي إلى الموت

الحلقة 12

#رحلتي_إلى_الموت 💔 الحلقة 12
بعنوان (  فرحة غير مكتملة  )
#الكاتبة_خلود_شلابي 
و أني قدام المرايا قعدت نجهّز في نفسي و درت  ماسكارا ،، و شعري جت بنت خالي ميار دارتهولي فير .
ومش مصدقة ان منذر خلاص بيولي ليا أني و بس❤🤭
حطيت لمسات و لبست فستان حرايري عالفضي ..
الحوش معبي بريحة البخور و الوشق و المعطر ...
الدروج و الجنان يلمعو لمععع 😬
و المربوعة جلستها قريب قضيتها و غسلتها غر طبني منذر طبان لكن اجرت مكنسة غسيل آلي بالبخار و قمت بالواجب ..
و حتى الثرية لمعتها تلميع ،، اللي معمريش ركبت على سلوم و درت حاجة 😁
أمي قتلي يا ريته خطبك من زمان ،،
و بوي مش عاجبه قاعد مش راضي فوق من قلبه على خاطر تفركيسة طه و غزل  ،، لكن أني نبيه منذر خلاااااص ..
بوي قال عندي ما ندير بنطلع عندي التزامات مع ان نعرف ان ميبيش يقابله 😞
و طه هذا قعد يكشخ و يعارك مش راضي عالخطبة بقولت منبوش هالعيلة ..
و تحسست منه و رقالي ..
لكن خليتها على الله و قلت بلكي قاعد حامق على غزل ،، تو مع الايام يقتنع 👌🏻
و جي خالي و هاني  يا ناري بيقومو بالواجب بدل بوي و خوي ..
لمياء و صغارها التلاتة عندنا .. عندها توا ولدين و بنت .. و ولادها بسلامتهم بيقلبو الدنيا ..
قعدت نفنص فيهم ..
عاد الحوش مضموم فكونا من الحوسة 😡
لمياء ،، حوش جدهم الراجل بيقعمز لوطة مش فوق ؟
قلتلها و أمه ..
قتلي شن بتقعمزيها فالمعيشة ماهو ف صالون الاستقبال 😒
قلتلها يتجارو فالممر ،، و أني مسيقة الحوش منبيش فيه عفاسي ..
لمياء .. انخطبنا و خدينا و ما درنا هالدير  😑
قلتلها .. معقولة تقارني روحك بيا زي انتي زي أني ؟؟ 😏
لمياء أأأ ...
قاطعتنا ميار و قالت اهو وصلو
نضت نجري  لداري بش نتفرج عليه كيف بيخش للجنان 😍
نحيت الستارة ،، و نشبح في خالي فتحله الباب و خاش ف ايده بوكيه ورد كبيرررررر لدرجة لا توصف ..
و عمتي سمية شادة كيسة على شكل بوكس فيه شرائط ..
نزلت أمي من الدروج و رقّتها ...
و أني قلبي خلاااااااص ...
فرقو العصير و الشكلاتة ..
و بعدين جيت و سلمت على عمتي سمية ،،
و أمي تسأل على غزل كيف حالها و الخ ..
سمية ،، الحمد لله قعدة متأثرة
امي .. الله غالب ان شاء الله ربي يعطيها الوقت الطيب و يحفظها ..
قعدت تشبحلي سمية و بتشوف ردة فعلي ..
لكن أني نزلت عيوني لوطة زعميتك متأثرة ..
هدرزنا ع قرايا و على جديد العيلة و هي تهدرز ع خدمتها و ان ديما مش فاضية ..
و ان خدت عطلة فترة لي فاتت و سافرت هيا و غزل بش يغيرو جوهم لمالطا .. مع بوهم و مرته ..
يعني مع مرافق .. غر مش مع بعض ف نفس الطائرة و الفندق ..
هوا سبقهم و بعدين جاهم للمطار ..
و جي وقت المقابلة الشرعية ..
خلانا خالي و هاني برواحنا و لا خشت امي و لا خشت أمه ..
طبعا مش اني اللي جبت القهوة .. قلتلهم بعد ما نخش دخلوهالنا بش نشرب اني ووياه ..
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
خشيت و قلت السلام عليكم ..
هيا ثواني ،، لكن اني حسيتهم دقايق طواااال
كان مقعمز و وقف ..
نتأمل فيه ،، و فالمربوعة ..
نقول زعما أني نحلم و لا بجديات ..
قرب مني و اني قربت منه مد يده بش يسلم و سلمت عليه لقيت روحي نسلم بالخد 🤣🤣🤣🤣
و هو أحرف مني
أني خلاص تلكمست و هو يقولي خيرك عادي الناس كلها تغلط ههههه متوترة ما بعدك ..
قعمزت بحداه و قعدت نشبح لوطة و مرة مرة نخنب ف شبحة و هو من كتر جرائته و هباله قبل ..
أول مرة نشبحه متشنج مع بعضه ..
نقوله منذر وين تشبح اني اهني ..
يقعد يتلفتلي و يشبحلي ثانية بس و بعدها يتفرج ع الروشن .. و جبهته كلها عرق 🤭
هو ،، كيف حالك ،، شن دايرة ،، شن جو القرايا ،، الخ
و أني قتله كيف حال صحتك توا و احكيلي شن الحروق اللي فضهرك ..
قالي نمشي نداوي فيهم و الحمد لله ..
و شوية شووية انطلقنا و انسجمنا بعد ما دخلولنا القهوة و بدينا نشربو و نتكيفو و اني مرة مرررة تطلع مني ضحكة يقولي اسكتي فضحتينا ..
قتله طززز ،، خلاص جيتني من الباب ،، 😌❤
كنت حاطة يديا على ركابي .. مسك يدي و قامها و باسها ..
و قالي .. نوعدك يا رغد مش حنقصر معاك ف ولا حاجة
و زي ما كنتي معززة مكرمة ف حوش بوك حتكوني بنتي و مرتي و دنيتي كلها ف حوشي ..
قتله .. حوشنا .. نااااا ..
ضحك و قالي .. ف حوشنا ..
و قالي استغرربت بوك مهناش..
قتله اي ،، قال عنده مشوار هو و صحابه من قبل ما تقوللي اولامس انك بتجي ،، ف قلت عادي اهو هاني و خالي تو يقومو بالواجب ..  ☺
قالي .. تمام و سرح بعيونه ، كنت عارفة انه حاس بالرفض و عدم القبول ..
بس طنّش كل شيء على خاطري و أني شبحتهاله بعين كبيرررة 😢..
خشت امي و امه بعدين و هدرزنا شوية و امي كانت معاي مخلتنيش ف الفترة اهياااا ❤😞
و طلع منذر البرا و قعد يهدرز على هاني و شكلهم انسجمو مع بعض ..
و نادى على امه اتصل بيها و روحو ..
ركبت فوق بين فرحانة و بين تعبانة ..
نراجي ف منذر يوصل للحوش بش يكلمني ..
لقيت بوي ف داره مقعمز يتفرج ،، قعدت نقول خيره التلفزيون مفتوح خشيت لقيته متكي و يتفرج عالاخبار ..
تلفتلي و شبحني ..
اني طلعت و خشيت لداري نبكي نبكككي بجد وجعتني ..
بدلت قفطاني و قعدت ف داري ..
خشت امي لقتني نبكي ..
قتلي خيرك ..
قلتلها معقولة بوي يطلع فالدار و تقوليلي مشى طلع ..
قتلي .. اسكتي ردي بالك تدوي كلمة راه بوك على سبلة اسكتي توا .. حتى تشبحيه خليك عادية لين يتم موضوعك على خير ..
هزيت براسي موافقة ..
و حتى عشاء ع قد ما ينادو فيا مبيتش نتعشى ..
نسمع ف بوي يقول وينها ..
قلت ..
و انت وينك لما بنتك جي من يخطب فاها ،، ؟؟