رحلتي إلى الموت

الحلقة 7

#رحلتي_إلى_الموت 💔 الحلقة 7
بعنوان (  إنّ مع العسر يسراً  ) 👌🏻
#الكاتبة_خلود
طلعت من غرفة غزل و أني نسمع ف صوت منذر يقوللها بالشوي عليك هاتي نشدلك شنطتك ...
و قعدت نمشي لين اختفى حسه من وذني ...
خشيت للمياء لقيتها هيا و خالي يراجو فيا بش نروحو
سلمت على بابا  قتله دير بالك على روحك ،، و هو قال ديرو بالكم على امكم ..
كان حتى فحالته هادي يخمم في أمي ..
قداش ما نتمنى نطيح ف زوج يحبني زي ما بابا يحب ماما و يخاف عليها ❤
قلناله و لا يهمك المهم انت شد الهمة معانا و خلي بالك على اصحيحتك ..
ع خشة الدكتور اللي يتابع ف حالته و كان جايب معاه تقرير بابا الطبي ،،
كان سبب الدوخة و ارتفاع الضغط جلطة فالدماغ بس كانت بسيطة نوعا ما 💔😔
انهرنا ..
بدل ما نصبرو بونا قعد يقوللنا و الله بسيطة و الله بسيطة منحسش في حاجة الحمد لله ع كل حال الحمد لله ع كل حال ..
من كتر ما انهرنا لين لزنا الدكتور ..
طلع من الغرفة و قاللنا انتو المفروض تشجعوه مش اتزيدو عليه العياط 😑
خالي مش عاجبه الوضع قاللنا هيا نروحو ..
طلعنا و احني فالطريق كلها ..
نخمم ..
سارحة ..
سبحان الله فيوم و ليلة انقلب كل شيء
معمره ما صار فينا الحزن بالطريقة اهيا و لا عرفته
كنت طفلة حياتي تتمحور على بطني و قرايتي ..
من ما خشيت فالثانوي و اني فالنكد
قصدكم هكي الكبر اللي كنت بنموت بش نوصله ؟؟
هكي حياة الكبار مرض و موت و ظلم ؟؟
لأول مرة نحس ف روحي كبرت و بدل ما كان بوي يخمم فيا ،، بديت أني نخمم على بوي و أمي و خايفة عليهم 💔
وصلنا للحوش
لقيت سيارة سمية مهناش
قتلي امي جو ولادها الزوز محمد و معز رفعوها .. و محمد وجهه كله ضرب و عينه زرقاء منفوخة ..
قلت فخاطري يستاهل ..
و جي عمي لطفي و مرته و بناته قعدو معانا بارك الله فيهم
و من هدوكا الأيام الثقال
خفت الزحمة و اللي كان يجي يطل علينا كل يوم بدا يوم بعد يومين ..
طلع بابا من المصحة
و جوه جماعته متع العمل يحمدوله ع سلامته فالحوش بعد ما كانو يزورو فيه فالعيادة ..
و الميت وقت عزاه تقعد تكذّب في روحك و مش مصدّق
لين الناس تروّح وقتها تستاحشه و تحس بمكانه اللي خلاه فاضي فالحوش 💔😔
أمي معش مشت للمدرسة و كلمت المدير يديرلها اجازة
بتاكل روحها على طه ..
و طه جماعة الجامعة و أصحابه و اساتذته بدو يديرو ف مظاهرات و ينزلو فالنت ..
كان طالب متفوق و الناس كلها تحبه
نخش لداره نلقى فاها مضمومة بعد ما كانو حوايجه عرم ملوحات و نقوله مش فيه دولاب علاش تحذف؟؟  😤
و يقعد يفتح فالقجرات ياخد ف حاجته و يخلي فيهم مفتوحات نقعدو انقرزو عليه و هو يكشخ و نديرو عركة للسقف لين نخلوه يطلع من الحوش متعصّب ..
و لما يجي الليل يجيب شاورما و يقول تعالو يا كلاب كولو معاي
و نجوه نتجارو و نقعدو ننبحو و نضحكو  و ننسو اللي صار 🤣💔
و وينك يا طاسة فالحوش مفقودة نلقوها فداره بدل ما يشرب و يحطها فالمطبخ نلقوها لين مقطنة من كتر ما ينسى 😠😁
فتحت دولابه و قعدت نشم ف ريحته
كأنه موجود نقسم بالله 💔😭
طه أقرب حد لي روحي ،، نحس في قلبي بيتقطع فتاريش ..
قعدت ماسكة سوريته و نشم و نبكي ...
يا رب استودعتك وخيي طه
يا رب رده لينا سالم بصحة و عافية 😭😭 ..
•••••••••••••••••
معش فتحت نت نهائي
و اتصل بيا منذر مرة فته معاودتلاش
جي الليل فتحت الفيس لقيته باعتلي كم مسج
يسأل على اسم مدرستي بش يسجل غزل فاها
رديت عليه ..
فجأة قالي وينك مغيبة
قتله .. ظروف معش لحقت نفتح النت
قالي .. اتصلت بيك على رقمك 🙄
قتله .. زحمة ناس و مركزتش يمكن ، فترة هادي مضغوطة ..
قالي .. خلاص غدوة نسجلها لان عندي عمل بنطلع و بنقعد شهر نبي نصكّر أموري العالقة
قتله .. حتى هو رأي
قالي .. خيرك زي اللي فيه حاجة بلكي زعلتك ف شيء
قتله .. لالا
قالي .. منعرفش بس حسيتك من اخر مرة فالعيادة زي اللي راقيلك مني ..
قتله .. غر هذاكا اليوم تاعبة و بوي طلع جاياته جلطة فالحبس . . و الحمد لله على كل حال ..
كنت نحاول نصده بأي طريقة و مخاطريش نكلمه نهائي ..
قالي .. تتفكري لما كنتي كركوبة و تقولي نبي .....
و بعتلي صورة فاها صونية خوخ
قتله .. هي يا حسرة
قالي .. مندز 🤣🤣
قتله.. عاد المهم كتبته صح
قالي .. اي مشاء الله عليك  معرفتيش تكتبي إلا منذر زعما علاش؟ 🤔
قلت شكله هذا بيبدا يسحب مني فالدوة و يبيني نقوله ان كنت نحبه ..
قتله عادي بحكم كنت تساير فيتدا و تفرح بيا كنت عندك معزة خاصة فقلبي ..
قالي .. صار كنت و توا ؟
قتله .. انت كبرت و أني كبرت و اكيد تغيرنا لانك انت تغيرت هلباااا ..
قالي .. من اما ناحية تغيرت ..
قتله كنت طيب و توا عصبي و تكشخ و مش متحمل حد ..
قالي .. من العوج يا رغد ..
و المهم نعرف علاش متكنطية يوم المصحة..
قتله علاش؟
نحسابه قالتله غزل ان قتلي ع كلامه
قالي .. على خاطر كشخت على غزل
سكتت و قتله .. خوك محمد مفروض ميعنفهاش بالطريقة هادي و انت شن مدايرلها بش تقولك متكلمنيش ؟
شبح رسالتي
و معش رد عليا ..
دورة و اتصل رديت عليه
قالي التغطية متع النت هربت
قتله تمام
قالي .. خلنجاوبك توا .. عن نفسي غزل  اكتر واحد تخاف مني و صح نكشخ علاها لكن ديما نوقف معاها ..
أني شبه منقعدش فالحوش
بالذات لما يكترو عليا مشاريع البناء اهو توا ماشي للجنوب في منطقة مهمشة باش نبنو مدرسة يقرو فاها الصغار  لأن يقرو ف تريلاّت و بنقعد قريب شهر حكايا رملة و حرارة و مناخ صحراوي
تجي تروح تلقها مدايرة عملة
يا طالعة بالدرقة مع بنات عمي ،، يا ترفع ف تليفونها للمدرسة و قلتلها مرة معش ترفعيه و رفعاته و انخنب ضربتها منبيش نكذب عليك 😒
متسمعش فالكلام ..
محمد هذا مكسد و ديما نتعارك معاه على خاطرها
لقاها تكلم و ترد على شباب ف قروب مختلط ضربها و جيت حزيت عليها و خدا منها التليفون
و لحد اخر مرة تعاركت معاه لما بتنتحر قتله معش دخلك باها ..
انتي صغيرة و قعدة متعرفيش عقلية الولاد ..
احني الخوت لما نخافو على خواتنا و نشددو عليهم مش معناته احني منحبوهمش ،، لكن نعرفو الذكورة البرا شن نيتهم ..
قتله .. هيا نفسيا متضايقة و أمك زايدتها لو خلتها جت اهني للعزاء راه مضربهاش محمد و لا انتحرت .. و فنفس الوقت أي حوش يبدا فيه خلل بين الاب و الام بينعكس عالصغار ..
سكت .. لما عرف ان سامعة ب امه و بوه
قتله .. سامحني صح مش من حقي نتكلم ف حاجة متخصنيش بس اني نوضحلك ان هيا متأترة بالموضوع هذا ..
اني لو بوي و امي منفصلين و عراكات بيناتهم حنتعقد و مع سن المراهقة و نشبح لغيري عايشين مرتاحين فالحوش و اني فاقدة حن الأهل سألتك بالله كيف تبيني ندير ؟؟
قالي .. عقلك كبير يا رغد
قتله .. الكلام بيناتنا مش تقوللها علاش حاكية لصاحبتك
قالي .. و حتى لو حكتلك شن اول و لا اخر وحدين يصير فعيلتهم هكي !!
كل واحد و ربي باليه بحاجة ..
المهم ردي بالك علاها و انصحيها راهو عاطي فيك الثقة أني خايف علاها فالنهاية هادي اختي الصغيرة ..
قتله .. بعون الله ما يصير الا كل خير بس غريبة امك خلتها تقرا معاي ..؟
ضحك
و قالي .. بالله شن تعرفي تاني 😅
قتله .. كل شيء فوقته حلو
قالي .. أني محد يتكلم معاي كلمتي هيا اللي تمشي .. غدوة حنسجلها باش اتم قصة ام بسيسي ..
قتله .. تمام
توا نستأذن منك
قالي .. اي الوقت فيسع ما مشى ساعة واحد و نص 😅
قتله .. منذر ؟
قالي .. نعم
جيت بنسأله و نقوله علاش قلت عليا نتدحنس عليك
بعدين خفت يدير لغزل حاجة ..
سكتت و قتله .. سجلها ف أولى أول معاي
قالي .. مع ان نحس فيه مش ع خاطر هكي لكن تم تم ..
سلامات    سلامات ....
علاش تغيّر معاي ؟
و علاش بدا يدوّر فيا ؟
و خيره نبرة صوته اخف من قبل ؟
زعما اللي ندير فيه صح و لا غلط ؟
حاولت نرقد لأن وراي مدرسة و نفخ ..
جي هاني و أمه
و قعد يكلم ف امي و بوي قاله بنأجل العرس لأن مزال عليه شهر و نص بحكم الظروف الاخيرة
بوي قاله يستر الله سامحنا يا اوليدي و الله انت من خيرة الشباب و تعرف الأصول ..
قاله .. عزانا واحد .. و طه كأنه خوي الصغير ربي يفرج عليه ..
قاله بوي بارك الله فيك يا اوليدي ..
............
و مع الدراسة و بدت غزل معاي
حكتلي على تطوراتها الجديدة و كيف ان بوها جاهم و زاد تعارك مع امها ..
و قتلي امي رضتني و قعدت تبكي .. يعني الواحد لين يقتل روحه بش يحسو بيه
و جربت نجبد منها الدوة قلتلها شفت محمد وجهه مضروب قتلي منندريش عليه بلكي مداير عركة فالشارع ..
و حسيتها متبيش تقولي ان منذر تعارك معاه ..
و كالعادة تبي تسحبني من صحباتي لكن قلتلها معليشي هادو صحباتي و لاقيتهم ما نجي نفوتهم توا ..
هيا تبي جيهة الروشن و اني نحب المقاعد اللي فالوسط
تعرفت على وحدة تكسرلي ف رقبتي و قعمزت بحداها
و اني مع قروبي الاول ف الصفة الوسطية ..
كأن غزل الصف الأول
كلهم تشبحلهم بنظرة فوقية و انها فوق الكل
كلامها المغنّج ،، و صوتها اللي يا دوبه يطلع من حنجرتها ،،
أما أني منفتحة عالكل و كلامي مسموع و مستعدة نعليه ان لزم الأمر  ..
ف يوم
نزلو الصفحة على المسؤول الفاسد و كيف ان حابسين خوي طه ظلم على خاطر هشام فضحهم
و الناس و صحابه كلهم يعلقو
كيف ان محبوس و لا قدموه لنيابة ولا يندرو عليه وين محبوس ..
بدا ترند على كل الصفحات بالاخص ان صوره فاعل خير كيف مريض و هزيل و متعرض لابشع انزاع التعذيب
امي تشبح لصورته و تبكي و بوي طاح علينا تاني
و رفعناه للمصحة سكره كان مشيّط 💔😣
كأن نمشو يوم باهي و شهر فالبكاء و الحزن
و فات على هذا الحال تسعة أيام
لين ف يوم نسمع فالباب يشرين من الشريانة
اتصل هاني ب لمياء قاللها جاي اني و اختي افتحي الباب ..
نزلت لمياء و أني متكية على حجر بوي ..
و لمياء تعيط و تقول الحمد لله يا ربي 😭😭
بوي ناض فز من مكانه يقول شن فيه 😰
و لمياء تقول يا رغد تعالي
يامامااااااا يا باباااااا
و اني نجري و امي تجري
و لمياء تقول يا جداي تعالي ...
شفنا طه مع هاني و كيف بنمشو ناحيته
لمياء .. نادو جداي قولولها طه روح
هاني تلبّك و قعد يشبح ل لمياء اللي كانت منهارة.. لمياء خلاص 😣💔
طه اضّبط لمياء و قعد يقوللها جدانا ماتت 😢 يا لمياء جدانا خلاص ماتت  قولي لا اله الا الله 😔
و لمياء تبكي و شكله نست  😔 و بوي يعيّط ..
جيت لطه حضنته و بسته من كل وجهه و ايديه و نبكي و امي معش طلقاته و هي تبكي من الفرحة
و كأن طيف جداي نشبح فيه واقف فالجنان يتأمل فينا ..
يقوللنا اهو التميتو مع بعض بعد ما فرقوكم  و أني خلاص مشيت لمكاني اللي عند رب العالمين✋🏻
بنمشي مع الحاج بنلحقه ،، و ردو بالكم يا صغاري من طريق الحياة 😌👌🏻
قعدت نتأمل فيها لين تلاشى ظلها ..
نقسم بالله اني شفتها كيف تشبحلنا 😔
كانت ناقصة جمعتنا بيها 💔
من قال يرجع شملنا و هيا تمشي و تخلينا 💔
..................
بدينا فالامتحانات النهائية و غزل مرة مرة نلقى فاها تكلم في طه من تليفون وحدة من البنات
قلتلها شن اتفقنا يا غزل ..؟
قتلي .. عارفتيني منقدرش نصبر ياسر معش شفته 💔😣 بدل ما تجيبي تليفونك و تخليني نكلمه منك جاية تحاسبي فيا ؟
قلتلها .. فكيني من سريب امك راهو اني منتحملش حد يغلط فيا ..  بتعرفني نعطي فيك جهازي بتحرش خوتك و بنلقو روحنا ف مشكلة كبيرة
قتلي.. انتي اطلعي منه الموضوع
قلتلها .. خيرك انتي ؟؟ اخر مرة قلتيلي اطلعي منه الموضوع شوفي شن صار فيك و حتى من قرايتك بطلوك منها
معليشي .. احني مش ناقصين مشاكل طه كيف طالع من الحبس و قعدين مش مصدقين ان بحدانا
بيبدو خوتك يجو و يكشخو و بيتعارك هو وياهم بايخة راهو ..
قلنالك فوتي شوية و نجو نكلمو امك نديرو حاجة رسمية .. اما احسن هكي و لا تحرقيه مع خوتك ؟
قتلي.. انتي مدخلكش الهي ف عمرك معليشي
و مشت و خلتني
قعدت نراجي فالمرواح بش نوصل للحوش و نكلم امي تتفاهم مع طه ..😤
و صلت للحوش و لقيت طه مستقبلني و يراجي فيا شكله طول كلماته و حرشاته
مني منك تعاركت معاه ،، ع قد ما فهمته قشرته غليظة
حكيت لامي من طقطق للسلام عليكم و قلتلها ع كل شيء
أمي شداته ف تركينة و قعدت تهزب فيه قتله فكنا بلا عار
شوف خوتها شن يديرو افرض يقتلوها فجرتك ..
ياسر عملة هشام راه بوك معاش متحمل مشاكل يا ولدي
كمل قرايتك و ارجع لخدمتك و نوعدك نمشي نخطبهالك ..
بعد ما ترايشت اني ووياه قال باهي و اقتنع
لكن نشبح فاها واخدة تركينة فالمدرسة و تهدرز و بدت حامقة عليا ..
و هو نخش عليه نلقاه يهدرز تبدا تكلم فيه فالحوش شكله دارت حتى جهاز بالدرقة
جيته باللي هي احسن و قتله يا وخيي فكك شد قرايتك و فكنا ..
راهو بيصيرو مشاكل القدام ..
شيء يقولي باهي و زي من يحرث فالبحر ..
بنكلم امي تاني بنقعد نرعّش فاها و ساد ما جاها
قعدت نحكي اني و لمياء  و لمياء قتلي خوك يبي القتل حالة مرخي ذقنه 😤
مشيت لسريري و فتحت النت من هذاكا اليوم منذر معش كلمني
خشيت على صفحة شركته
منزلين المدرسة كيف يبنو فيها و حاطين القواعد
و كان رئيس المجلس المحلي يتكلم و يشكر فالطاقم و على رأسهم الباش مهندس منذر الطاهر على مجهوداتهم و طلع مدايره عمل خيري لوجه الله يعني الاشراف و الخريطة و التصميم كله بدون مقابل ❤
يا رب تكون ليا 🥺
قعدت نردد فاها بدون لا وعي مني
و بالذات لما شبحت الصغار كيف يقرو ف تريلات و كانت المنطقة مهمشة 💔
شن اللي يخلي شخص يقعد شهر و نص متغرب باش يدير حاجة بدون مقابل ؟!!
قعدت نقرا ف محادتتنا اللي قصيرة أصلا
و كيف يكشخ و كيف بعتلي صونية الخوخ
زعما خلاص بيخطب بنت خاله ؟؟ و لا امه تكذب قدامي ؟؟
زعما كيف شكلها بنت خاله هادي ؟؟ طويلة؟ قصيرة؟ قنينة ؟ أحلى مني ؟
عمري 16 ايييييي
قعدة صغيرة يا رغد اعقلي 😣
خليتها على ربي و رقدت  ....
جي تاني يوم فالمدرسة
قعدنا نهدرزو اني و البنات فالحصة الابلة كانت غايبة
جت غزل بحداي و قتلي عرس خوي بنديروه اهني ف طرابلس اكيد تقدري تجي ولاه ؟
قلتلها جداي متوفية فالشك نخش لعرس الحق 😣
حتى من لميياء اجلناه
قتلي .. امالا من بيساعدني
قلتلها .. انتي غر هدرزي و معش اتطنشي لما حد يكلمك و بعدين نساعدوك ..
قتلي .. خيره مولي قلبك معبي هكي ؟؟
قلتلها .. مش انتي بس اللي تغيرتي .. كلنا تغيرنا 😏
قبل نساير فيك توا اي حاجة غلط بنكلمك علاها..
قتلي .. خلاص فكينا من العراك
كان تقدري تجي التلات بنغلفو السوابيت و بتجي حتى مها و اختها  ( بنت فصلي اللي تكسرلي فرقبتي )
قلتلها .. مشاء الله
قتلي .. جتني تلات مرات للحوش و عندها اخت صاروووخ شافها منذر قال كلموهالي ..
اني ركبتني الحرارة ..
قلتلها .. عالظروف كان قدرت تو نجي و الحمد لله رن الجرس بش نضت من بحداها و رجعت لمقعدي ...
صار منذر روح من الخدمة 😩
و من اخت مها اللي طلعتلي توا ،، مش كانت بنت خاله ؟؟ 😭😭
و جي يوم التلات
قلت منيش ماشية لكن سمية اتصلت ب امي و قالتلها خلاها تجي مناش مدربكين تجي تساعد غزل بحكم صاحبات
استغربت من كرم سمية 🤔
و مع طه اللي شاد فيا نمشي
باه كيف بنشد دموعي توا ؟؟
لبست أحلى ما عندي و مع الفترة الاخيرة نازل وزني و شعري الطويل استشورتهولي لمياء و درت لمسات و كحلت عيوني و درت ماسكارا و طلعت
حطني طه قدام الحوش و طقطقت كنت اول مرة نجي لحوشهم الجديد
كان فيلا كبيرة مشاء الله
حوض سباحة ،، و حديقة ،، و رخام
طلعتلي مها و غزل
سلمت عليهم و خشينا
لقيت اخت مها مقعمزة مع عمتي سمية و مع بنات تانيات منهم بنات خواله و الاقارب قعدين يجهزو للعرس ..
الحق كانت البنت صاروخ جسم متناسق و البشرة صافية بيضاء و فالعمر اكبر مني اكيد .. فيها ملامح الأنوثة ..
قتلي غزل نحي عبايتك
نحيت عبايتي و فتحت شعري اللي كان تحت من مؤخرتي و كنت لابسة فستان وردي هادي مع روج وردي و تكحيلة عين عاكسة ع عيوني البنيات و رموشي الكثيفة
حتى ني غزالة راهو غر درية 😚😎
قعدو يقولولي مشاء الله شعرك
غزل .. امتى طول العفو
قلتلها .. قولي مشاء الله
و خشيت سلمت على عمتي سمية و على رونق اخت مها .. عن قريب ضربتها كف 😤😤
قتلي سمية .. مزال العرس راهو  تلقحلي ع خاطر قفطاني و اهتمامي بنفسي لان كلهم بلايز و سراويل و جمبسوت..
قلتلتها .. الشياكة هادي معندهاش وقت معلوم ..