رحلتي إلى الموت

الحلقة 10

#رحلتي_إلى_الموت 💔 الحلقة 10

درتهالكم طويلة حلقتين ف حلقة و توا بنسهر على 11
منلقاش تفاعل بنزعل 💔😭

بعنوان (  أوقات عصيبة  )
#الكاتبة_خلود_شلابي 
أول مرة نحس بكسرة الخاطر ..
و بديت نلوم في نفسي ..
هو من الأول طبعه هكي و أني نبيه ،، مفروض تحمّلت.
بس لما نتفكر رونق و قصتها نزيد نحمق و نتضايق 😞 قلت حتى ني معاي الحق ،، شنو الطبع الواعر غر عليا ني بس؟؟ 😒
و كل يوم يفوت من غيره ،، كأنه ينقص من روحي 💔
قلبي بيتقطع بالذات لما تجي س 11 وقت موعدنا أني ووياه ..
يبدا هو مروح من خدمته و مشطّب أموره و نقعدو نحكو مع بعض ❤😞
الحوش زحمة و العرس بدا يقرب سبوعين عالابواب ..
حرفيا ماسكة دموعي بالسيف ،،
نقعد نحوس مع العيلة و لما نخش للحمام نشبح فالمرايا نتفجر بالبكاء ..
كنت منحبش حد يشبحني نبكي ..
كنت ديما نضحك
و ديما سفرة الماكلة بين ايديا نغطس و ناكل و نعلّق
لكن توا حتى متسايريش فالهدرزة يقولو هادي غر قالقة مننا
الفترة هادي جت مرت عمي لطفي و البنات و كل مرة يجي حد من حوش عمامي  و حتى من عمي حمزة و مرته جونا  ،، بحكم في الفترة هديكا خلاااااص الدواعش شبه خشو لدرنة 💔
الحوش معش تاخدي فيه راحتك ،،  لا فحزن و لا في فضفضة ..
لمياء معش لحقت نقعمز معاها بروحي ...
دارنا بنات العيلة كلهم يرقدو فاها ...
و نسينا كل شيء و كل موقف قديم مرينا بيه معاهم ..
قعدنا قلب واحد و اللي عندنا عندهم .. و حوشنا حوشهم ..
وحدة من نساوين عمي قريبهم قتلوه الدواعش قدام عيلته على خاطر يبيع ف السجائر ..
و على قد ما يحكولنا من قصص صارت غادي أحني ننصدمو و نقولو مستحيل فيه حاجة زي هكي ..
و مكانش يقدر اي حد يتكلم او يوقف فطريقهم ..
درنة خلاص بدو يحكمو فاها قطاعين الرؤوس 👌🏻💔
عطلة و نو ..
و زحمة ،،
انوض الصبح .. نوتو سفرة الفطور
زوز للرجالة لوطة و للنساوين
مرت عمي حمزة .. هادي تقول ضيفة لا تمس و لا تتحرك تهدرز و خلاص و مش عاجبها العجب تلقّح و بس ..
و شروق كل ما تخش لداري هادي بكم ،،؟
و هادي من شراهالك ؟ حي عادي يخلوك تلبسي هكي ؟
نقعد نساير فاها بالسيف .. و مرة مرة نلقى ف حاجة ناقصة تخنب ..
و نطب فاها ف داري خاشة تمنكت ف دواليب..
و ع قد ما نقيت على امي ان نبي نسكرها و يرقدو ف دار المعيشة حصلت هزايب و تكشيخ و قتلي تحملي و صكري فمك 😡 ..
بديت ندس ف حاجاتي و لبسي كلهم ف دار بوي و امي .. كله قشعته ..
ع مرتين نبي نخش نفتش صاكوها و نقول اعوذ بالله من الشيطان الرجيم .. لان حوش زحمة و منبوش نزعلو حد ..
و الطامة الكبرى ان بوها يبي يستقر اهني و يبي يخلاها تقرا معاي فنفس المدرسة ..
ناقصة تقييد احوال اني 😤
نفطرو و نضمو الحوسة ، يجي الغداء ..
و فالغداء وتي الغداء ،، و اغسلي الماعين .. و طيبي العشاء ..

لمياء حتى عروسة قعدت تدهك ..
و كل منطلعو ناخدو حاجة كل مرة تلصق فينا وحدة ..
و يبدو خوتها ينقرزو و يجو يكشخو علينا احني ان طلعناهم ..
امي موسعة بالها و تقول تحملو ،، هادو طالعين من الموت ..
يجو خالاتي يبدو عمامي متضايقين منحكيش بالمجمل لكن عندي زوز عمام نار الله الموقدة ..
قصدي انت ضيف مدخلكش باللي يجي و باللي بيمشي ..
ف يوم خالتي نازلة للجنان و جاي ولد خالي جايبلنا حلويات مع الشاهي نفوتو بيهم فترة اهيا ..
كان حمزة و شروق ف مربوعتنا الخارجية ..
جت بتطلع لقت ولد خالي ولّت ..
طلع بوها قعد يتمتم متع شن خاش اهني و فيه بنات ..
و خالتي تحشمت ..
ولد خالي اللي كان حاصل فينا تحشّم و سرها في نفسه و طلع ..
قعد حمزة يقربع فالشيش و خالتي تكركر فالسفر ..
و تسمع فيه يقول لشروق اركبي بتكشيخ 😤
قعدنا نقولو شن صوت التقربيع لوطة ..
على ركبت شروق و قعدت توشوش لامها
و خالتي جاية وجهها احمرر ميتفسرش ..
امي تقوللها خيرك خيررك تقول ما فيه شيء ..
نزلت مرت عمي لوطة اتصل باها عمي ..
و قعدنا نسمعو فالسبان و يقوللها قيمي حوايجك بنطلعو ..
قصدي انت متضايق من الزحمة و مش واخد راحتك ..
احني صحاب الحوش كيف امالا ؟؟
مليكش الحق تنكد علينا فعرسنا ..
هذا عرس و كلهم بيجو ..
دارلنا النكد و امي نزلت تقول شن فيه ..
و جو ولاده حتى هما .. و قعدو يقولو مفروض معش يجي حد من الشباب صح ..
شن كل مرة جاي واحد خاش طالع علينا  ..
قتله امي .. هادو صغار خوتي و يجيبولي و يعولولي ..
و بناتكم فوق معززات مكرمات ،، فيه حد ركبلهم فوق و ضايقهم ؟؟
عمي .. لا و الله نراجوهم غر يركبو ..
امي .. تعوذ من الشيطان يا حمزة و اللي ادير فيه راهو غلط .. خوك معش يتحمل ..  عارفينك متضايق و اللي صار غادي مش ساهل .. لكن الحمد لله كل شيء بأجره حوشنا هذا زي حوشكم و مفتوحلكم و مفتوح لغيركم ..
حمزة ،، لالا شن مفتوح لغيركم مناش اجانب احني و منحلين ،، اني معنديش معاك كلام ،، تو يجي خوي نتفاهم معاه قصة الرجالة لي يخشو اهني متمشيش معاي ..
امي حست باهانة و معش قدرت تمسك اعصابها لأن هو هكي محسدي مهما تتناقشي معاه حيطلع فيك عيوب .. .. رجالة منو لي يخشو اااه ؟؟ هادو عيلتي و صغار خوي ،، يعولو معاي   حتى من خبزة العشاء يجيبولكم فاها اهما اللي توا مش عاجبينك .. و حتى الحوش اللي كنت بتأجره خوي اللي جرالك عليه ..
هذا حوش عرس ،، و بتتحمل زي ما احني متحملين
قاللها حمزة .. اهو احني طالعين منه ..
امي قتله .. تو شن دخل هذا ف هذا ..
جي طه و قعد يهدي ف عمي و عمي يكشخ عليه ..
قاله .. معليشي كانك متبيش الزحمة و بتطلع امورك لكن متجيش اتخلطها ف بعضها و ادير هكي .. بوي مريض و عنده جلطة معش يتحمل المشاكل ..
قاله .. عقاب الوقت امك تقولي اهو يجيبولك فالخبزة ؟؟  كان مش من الظروف راه و الله ما عفسته حوشكم
امي .. اني قلت الحق ،، تقول علاش جايين قتلك يعولو و عرس .. و الله متضايق من الحوش برا اجر امالا ..
و ناض يسب ف امي و طه متحملش خشت بيناتهم ضرب و جو ولاده التلاتة ..
و عمي لطفي يحز و ولاده يحزو ..
ع خشة بوي جايب معاه خضرة لوح كل شيء من يده
و قعد يقول خيركم شن فيه 😰 ..
و دقايق حتى طاح و ارتفعله السكر ..
رفعه خالي عاينه و عمي لطفي قعد بش يحز
اني لما شبحت لبابا كيف طاح معش قدرت نفرّزها من بعضها ..
قعدت ندفل عليه و نقوله و الله العظيم ماكش راجل ..
غل غلي و تعبي و حزني و خلعتي على بوي و لما نشبح ف طه كيف مولي وجهه من الضرب ،، فشيت غلي فيه ..
دفلت عليه و ما خليت ما قتله ..
يا محسدي ،، يا عيل .. من يوم يومك كلب 😭
بوي تصيرله حاجة الا منقتلك بيديا ..
و هو يسب و مرت عمي الكلبة ادافع معاه و تعاير و كأن الخير لي درناه فيهم مشبحولاش ب ربع عين .. ..
قامو صاكواتهم و طلعو و عمي لطفي كشخ عليا يقولي سكري فمك ..
قتله .. بوي 💔😭
قالي .. خلاص 😡
و مفاتوش يومين لين عمامي كل واحد شد رحاله و روحو مننا كل واحد بيأجر برا ..
و طلعنا احني اللي مننفعوش و ركبو على امي الغلط ..
و يمكن لان حتى لو خوهم عارفينه كلب ،، لكن مرضوش فيه بس رضوها فينا ..
نكدو علينا عرسنا ،، الله ينكد عليهم دنيا و اخرة
و بوي يبكي وجعاته من خوته 💔😞 ..
و قال لامي مفروض متكلمتيش و قعد يكشخ علاها ..
تي هما ف وفاة جداي و ماجوش فتحو عزاء غادي ..
تبيهم يجو و يفرحولنا يا بوي ...
قعدو مأجرين حوش واسع مع بعضهم العمام التلاتة ب نساوينهم و شبابهم و يدفعو فالايجار مع بعض .. و كل واحد نشط توا و يدور على خدمة ..
و خيره مش من البداية
قعدو تلات اسابيع زي الضيوف تهدريز و نوم و تقييد احوال .. طه اللي يكر و يرفع و يجيب و لا بوي و ولد خالي  ..
حتى لما سيارة طه توقف و عندنا مشوار للحجوزات يقولو سياراتنا منحبوش نعطوهم من يد ليد 😒
الحوش لي كان زحمة فضى ..
و داري رجعتلي زي ما كانت ..
بس الموجعة مش حتنتسى نهائي ...
لقيت من غزل مكالمات ..
رديت علاها و هدرزنا عادي تسأل شن جو العرس و هكي ..
محكيتلها شيء ..
قتلي ..اهو شريت هاتف 😍 و درت ايميل جديد بعتلك عليه طلب قلتلها تمام ..
قتلي .. منذر احسن حاجة مهناش مسافر بنطلع غدوة مع مها و رونق بش ناخد قفطان لعرس لمياء ..
قلتلها .. ان شاء الله تلقي القفطان اللي يحبه قلبك و تجي ع خير و بركة ..
قتلي.. ان شاء الله
و سكرنا ..
باهي فيه تطورات شكله ارتخى عليها الحبل ..
و رونق عرفت كيف تكسبها ،، ..
فرحتلها ان حياتها بدت احسن .. و خداني تفكيري بعييييييييد ..
عصرني قلبي و خليتها على الله 💔
دوشت و لبست بيجامتي و خليتها على الله ..
جي عرس لمياء
الأحباب و العيلة ملتمين ..
و هدوكا بعد سبوع من الايجار مع بعض بسس
تعاركو .. و بدا خاش بيناتهم الشيطان فجرت كلام النسون و تعاويد الدوة ..
جو كلهم  حضرو العرس الا مرت حمزة  ..
و قلنا يلا اهو جو مع ان قعدنا مكرشين فيهم و كلمناهم زعميتا فالبداية حرجانين مع خوهم لين صارت التّكّة بيناتهم يقولو اهو خلنغيرو جونا خير من الحيوط ،، كل وحدة اتطنقش ع التانية فالعرس و كل وحدة تلقح 🙄 ما علينا هذا كله ف سبيل بوي حتى جوه يتغير  شوية ..
الحمام و السهرية و القفة ..
كنت نجري و نعوّل ... و نتأمل في لمياء و نقول اهو بتمشي و تخليني ..
قعد يكلم فينا هشام و مرته حياة فيديو ..
و ورتلي لبسة البيبي قتلي .. قولي مبروك 🤭😍
فرحت من كل قلبي .. حياة حامل و بيجينا بيبي ..
امي لين بكت من الفرحة و هشام يقوللها يما خلاص بالله عليك 😢
قعد يوصي في لمياء و هي تبكي و تقوله ستحشتك يا خوي  ..
أول مرة نشبح هشام متأثر كانت الغربة واكلاته ماكلة 💔
و فالحمام مشت معانا غزل ،، و حضرت امها القفة ..
و كانت يد بيد معاي فالعرس مسيبتنيش ..
و ماجبتليش سيرة طه نهائي ..
جي يوم الحفلة ..
ركبنا احني و طه بش نمشو للمزين و طه يغني و يغيرلنا فجونا و لمياء مقعمزة القدام تبكي ..
قعدت شادة ف يدي مادتها من وراء الكرسي و اني ماسكتها ..
خشينا للبوتيك جينا الفيلو و الطرحة و الحاجات  ..
و كملنا طريقنا للمزين
استلمتها الارتست و من حظي ان فيه مرافق 😬
دارولنا شعرنا و هيا مكيجوها ..
و كل ما تحطلها ايلاينر تقعد تبكي لين المزينة قعدت تندب ..
نشبح في هاني مرة مرة يكلم فاها و هي تضحك و أني نحاول نحتفظ ب ذكرى هاليوم و نصور ف كل شيء ..
جت الساعة 7 مشينا للصالة ..
و خشينا لجناح العروسة
قعدت تلبس فاها متع التلبيس و أني وصيت امي تجيبلي شنطتي فاها قفطاني و اكسسواراتي و كندرتي ..
خشت غزل و كانت زي البمبلة جميلة و قفطانها طويل عالاصفر و هيا شقراء ❤..
و أني قفطاني عالأسود و الفضي و طويل ..
طلعنا للمعازيم و أني قلبي غامني ..
من كل الوجوه اللي نشبح فاها ..
نشبح فيهم كلهم وجه منذر .. 😞
نحس ب دوخة و معش متفكرة امتى اخر مرة كليت فاها حاجة ...
الضيوف خدو عصير و شكلاتة ..
و جت الزفة ..
انزفت اختي و طه ماسك ف ايدها ..
كنا قبل نقولو لمياء و هشام ..
و اني و طه ..
قداش خليت مكانك يا هشام ..
كان قاعد راه عمامي مسترحوش يديرولنا هكي ..
كان قاعد يا هشام راه يوم طه مش فاضي عنده خدمة .. ترفعنا انت ،،
كان قاعد راه انت زفيت لمياء و فرحنا بيك حتى انت ❤
كان قاعد راه مرتك معاي تحوس و تطلع معانا و ناخدو ف رأيها و تنسق معانا ،، و تحوس فالصالة و يقولو هادي كنة سليمان 😞
كانت لمياء غزال مصوّر ..
وصلها طه للكوشة و قعدو خالاتي يحضنو فيه ويقولوله فال ليك ..
قعدت واقفة بحدا غزل و غزل تشبحله و تدمع قتلي ياااارب اني ووياه زي هاليوم ..
قلتلها .. ربي يفرحكم ببعض 🥺❤
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑