رحلتي إلى الموت

الحلقة 5

#رحلتي_إلى_الموت 💔 الحلقة 5
بعنوان ( و تشاء من الأماني نجمة )
سكرت من منذر الخط
و قعمزت بحدا أمي و جداي و لمياء
كانت أمي منهارة بشكل لا يوصف 😭
و لا عرفنا نصبروها هيا و لا نصبرو رواحنا
و جداي حتى من دواها معش تاخد فيه نعطولها فيه بالسيف
جي هاني خطيب لمياء و امه و اخته
و قعمزنا و قعدو يواسو فينا
لمياء تشبح ف هاني يتكلم فالجنان و كان مش على بعضه
قعدت نقوللها و الله الا فيه حاجة 😣
بري كلميه شوفيه خيره
قتلي خليك متفائلة مداما هشام مسافر ميقدرو يديرولهم شيء
قلتلها لااااا قلبي مش متطمن يا تمشي انتي يا اني نمشي نسأله 😭 و بعد نقاشات
مشيناله احني الزوز
و خدانا هاني على جنب بعد ما قعدنا نزنو عليه يقول الحق قاللنا كلمت قريبي فالامن الداخلي و لحد توا مفيش عليهم اي خبر يمكن قعدين يحققو معاهم و ميبوش يعلنو عليهم فالمكتب بش محد يقدر يوصل فيهم
لمياء انهارت 😭💔
قاللها خلاص و راسك و بعون الله الا ما نشق الارض و ندور عليهم هكي جماعة الحكومة لما يبدا راس فالدولة باعتهم لجماعة ميديرولهمش سجل لين يستوجوبهم كويس ..
قلتله .. بوي معش يتحمل الرعايش نخاف تصيرله حاجة 😢
هو من يوم هشام و كل مرة مخلوع و مريض و يخمم ..
و ف خاطري عليك هم أحرف و الله ما وقتهم المشاكل
شن دخل الاب و الاخ ، في شخص هو اساسا كان رافض يدير الحرام و يبوه يوقّع بالسيف و لما يقول لا يهددوه و مالقاش حل إلا أنه حاول يفضح هالناس الفاسدة ..
معقولة الفاسد و الحرايمي يلقى في من يحامي عليه و يندارله ألف حساب ،، و اللي يخاف ربي و مواطن بسيط يقعد حقه طايح فالأرض و يحصل كفوف ؟!!
لهالدرجة بدينا ف مجتمع الطبقيات و اللي كان قبل حكمنا و شرعنا بالله
لكن خليفرحو و يديرو كيف ما يبو توا ،، 😌 و عند الله تلتقي الخصوم
اليوم واسعة ،، و غدوة ضيقة فالقبر 👌🏻💔
جو خوالي لأمي و نساوين خالي
و كل مرة يجي حد لين جي الليل
لقيت مكالمتين فائتة من منذر
قلت زعما نعاودله و لا ليل توا موخر ..
تفكرت رده الجاف و قلت منبيش نحط روحي ف موقف بايح معاه الرزانة كويسة
فتحت النت و شوية و جوني اشعارات و منهم مسج من منذر
كان كاتبلي اول ما تفضي نبي نفهم منك بخصوص صور غزل
كتبتله لقيت منك مكالمة و قلت ليل موخر مش مناسب ان نعاودلك
فجأة انفتح اخضر و عرض المسج و طول اتصل بيا
اني قعدت نرعش مع بعضي😰😩 قلت لعمتي سمية متجبدش موضوع الصور علاش هكي قالتله
و أني سارحة ف افكاري و يديا اللي يرعشو و ف يدي الهاتف لين فاتت المكالمة
بعتلي ع نت ردي توا تبيك
نتأمل فالشات حي هذا حق يا ربي شن بندير 😭
حاولت نتهرب قتله ليل منقدرش نرد
قالي اسمعي يا بنت الناس متلعبيليش ب اعصابي قتلك ردي اني منيش خاطفك
يا قسما بالله نجي لحوشكم توا و نكلم امك
اني قعدت ساكتة مرديتش عليه ..
شن هالوقاحة مصح وجهه
اتصل تاني
استجمعت قواي و قلت بسم الله ،،
تو نوريك التهديد على أصوله😡
فتحت الخط
قالي طول بلا سلام لا احترام
تسمعي فيا ؟؟ بنبرة تكشيخ
قتله .. خيرك انت 😡😤 .. و نضت فشيت غلي فيه
اني معندي معاك شيء برا تفاهم انت و امك
اني كلام فالليل مش حنكلمك ،، و لاني لاهية ب صور و لا ني لاهية ب أي شيء تاني
تشبح في الهم اللي احني فيه بوي ملقيناشي لا فوق و لا فالوطاء و فوق منها تكشخ و ماكش محترم حد
قاللي اولا اني اتصلت بيك بكري باش نطمنكم على بوك و خوك
و امي لما قالتلي على الصور رقالي كيف تبيني نتحمل و فيه حد عنده صور اختي قوليلي ااااه
لكن مية مية تصبحي على خير
اهو توا نولع نمشي لمصراتة و نفهم شن صاير
قتله شن بتمشي فهالليل
قالي الامور هادي متخصكش
اني ف خاطري مصح وجههك يا بليد يا مغرور يا حقير يا اللي ما تستحي على وجهك
قعد ساكت و اني ساكتة نغلي مصدومة منه و سكر ف وجهي الخط ..
قعدت دقيقتين و عاودتله نبي نفهم وضع بوي لكن بنحاول نرطب الجو و نهدي روحي المرة اهيا
مردش عليا
عاودتله مرة تانية
قالي .. شن تبي مش ليل ؟؟ بري ارقدي
نسمع ف صوت سيارة و حد يجري بالقوية
قتله .. انت وين طالع فهاليل س 1 توا
قالي .. لمصراتة و الولد الا منقتله 😡
قلت حي عليا توا تسنيم بتقولي دخليتها ف بعضها و ولد عمها هو دار فينا خير نبهنا على مروة يجي هذا بيقتله و لا يضربله ؟؟ 😑
قتله منذر ..
قالي شني .. 😤
قتله .. اول حاجة استهدى بالله و خليني نفهمك😰
نسمع ف صوت السيارة و تشريين
قالي.. ادوي نسمع فيك😠
قتله باهي ارجع للحوش
قالي.. هيا نسمع فيك😤
قتله انت جيتني فوقت غلط و تكشخ و مش من حقك تعلي صوتك عليا هادي أول حاجة ..
قعد يقول لا اله الا الله متع مش متحمل الكلام الزايد كان واحد تااااافه قليل ذوق 😣
كملت كلامي قتله تاني حاجة غزل مدخلهاش بولا شيء هيا مظلومة ..
وحدة خنبت صورها و البنت مش كويسة
تتفكر لما كلمتك ع المسنجر مبيتش حتى ترد عليا
لين امي كلماتك و قتلك نبو رقم امك؟؟
قالي و شن عرفك بايميلي ؟
قتله و الله انت لي مدايرلي لايك على تعليقي ف منشور لغزل و لما كلمتها ع نت متردش و الرقم مقفل و امك مقفل قلت نبعتلك ناخد منك رقم امك نكلمها خير
قالي منيش متفكر ان درتلك لايك 🤔
قتله و الله اني منوحيش بيه ايميلك يا منذر اللي صار قلتهولك
نسمع ف صوت سيارة البرا و كيف بتدرس مقابل حوشنا تحت شجرة
و نفس الصوت متع التدريس طالع من الهاتف
و الدنيا ظلام و السيارة فاها وهج تليفون من الداخل
صوت الريح و السرعة اختفت
ضربني شاهد العقل قتله وين انت وصلت لحوشكم ؟
قالي لا قدام حوشك
سكتت و قعدت نشبح فيه بالدرقة من الروشن ❤
قتله تره احلف
دار كلاكس
قالي سمعتيه قتله خيرك بتهبل انت ؟؟
قالي اهو بش تصدقي
لبست طاقية على راسي و فتحت الروشن بالشوي و نشبح فيه فالظلام..
قالي خشي صقع توا الجيران يقولو جاي صاحبها تكلم فيه ..
قتله ... و خيرك انت متمشيش مداما عارف ان الناس تدوي هكي ااااه 😑
قالي كمليلي القصة باش نروح بكري
قتله المهم ع قد ما حاولت نوصل ف غزل هاتفها مسكر ف هذا علاش كلمتك و يوم اللي بعتلي رقم امك و كلمتها ،،
قدرت نوصل فيها و قتلي خوها محمد واخد منها الجهاز ..
قالي .. ماهو كان مهنية روحها راهو محد وصل فيها لكن توا حتى قرايا معادش فيه
قتله .. مش هكي الحل يا منذر وسع بالك قتلك هيا مظلومة 😣
قالي.. انتي فيه حاجات متعرفيهمش ف اسكتي خير ..
قعدت نكلم فيه بنبرة هادية نحاول بقدر الامكان ان نمصله غضبه ع قد ما نقدر كان شيطاااااااااان راكبة فيه ناااااار
دهشني و شيطلي ريقي قشرته يابسة قتله يا منذر يا منذر متنحلش الامور هكي ،، هادي اختكم الوحيدة احتووها و صاحبوها و حتى لو غلطت فهموها غلطها وين ،، راه توا تشبح فيها سن مراهقة و اي وحدة تجي تضحك علاها مرات ،، كان بتقعدو غامينها و رسميات بيناتكم كيف حتفهم الدنيا ..
قالي.. هذا كله مدايرينه اني نبي نعرف من الولد
قتله .. و اني شن درّاني بيه الولد يا منذر ؟؟
و قتلك الولد قريبته صاحبتي قتلي كوني هانية صور ممسوحات
نشبح فيه كيف منفعل فالسيارة و يكلم فيا يقولي نبي نعرفه منو اني 😡
قتله .. سامحني
البنت حلفتني ان منقولش منو .. انت بدل ما تكشخ عليا برا للبنت هديكا اعفجها طريحة و الله 😭 ..
و قعدت نبكي فددهملي الحق 😭😭
تنفس منذر بعمق و قال لا اله الا الله
اسمعي ..
اسمعي نكلم فيك ..
خلاص علاش تبكي توا .. اني نبي نفهم بس
قتله .. ما هو مش هكي يا منذر مسد بابا و خوي و انت توا تكشخ عليا ..😭
قالي .. كلمت واحد و وصيته عليهم .. بوك قصته قصة و خوك هشام الله يسامحه و خلاص
مفروض بدل الدوشة هادي كلها راه استقال ..
لكن نقولو ان شاء الله يومين بالكتير و مرات يطلعو
قتله .. صار عرفت السبب علاش ..
قالي .. مواضيع هادي متنحكاش بالتليفون و اني اول بأول نتابع فيهم ..
المهم نبي مني البنت لي قتلك و منو الولد
قتله .. علاش شن بديرله ؟
قالي.. بنتفاهم معاه
قتله .. تره اعطيني عهد انك مديرش حاجة غلط احلف بربي
قالي .. خيرك رغد ؟؟
قتله .. يا تعطيني عهد قدام يا ربي يا سامحني مش حنقولك
قالي .. نوعدك مش حندير شيء غلط ..
قتله .. لا ضرب لا دوة تانية بالله عليك
قالي .. تمام
و حسيته ارتخي معاي و بدت نبرته هادية و حكيتله ع كل حاجة ..
و هو يشبح ف خيالي مع ضي التليفون من الروشن و اني نشبح فيه من السيارة
ولع سيارته و لف و جي مقابلني بالزبط نزل مرش متعه و قالي بايده ✋🏻
مشى و ع قد ما كان نفاخ و عصبي الا ان انعجبت بيه و زي ميقولو حزار لين فايت فيه ..
فاتو تلاتة ايام
لا هديكا الماكلة و لا هداكا الشراب
امي خلتني نمشي للثانوية بالسيف ..
و الماشي و اللي جاي ..
جداي تحكي ل لمياء اللي كانت تبكي ..
تو كله يمشي يا بنيتي و ان شاء الله بوك يطلع و تبدي عروس و نفرحو بيك
قالتلها .. ان شاء الله
قالتلها .. سادك غشاش مش باهي ليك راك عريّس
الردي البودري يبي الوجه الفرحان مش العابس ..
و فنصت فيا نوضي جيبي حاجة لاختك تاكلها ..
قلتلها .. حتى ني يا جداي عريّس 😁
قتلي.. كملي قرايتك قبل نوضي تحركي و جيبيلي مية مصقعة حسني راكبتني حرارة
قلتلها حاضر يا جداي ..
جيت لقيت لمياء متكية ع حجر جداي و جداي تضحك و تمسد ف شعرها .. و تغنيلها غناية من موروث شعبي
لين لمياء نعست و حولتها من حجر جداي و رقدت ع الصالون
قلتلها .. حتى ني غنيلي
شبحت فيا شبحة مليانة حب .. قتلي انتي الغلى كله يا رغودة ان شاء الله ربي يطيحك ف اوليد الحلال و تجيبي الوليدات و البنيات ..
قلتلها و انتي حية
قتلي .. فالشك نلحق على صغارك خلاص اني العمر يا بنتي..
قلتلها وين يا جداي مزلتي شبوبة و قمر ..
ضحكت .. قالت هييي من مات المرحوم الدنيا معادش فاها بنة 😔
رن الهاتف
نضت
لقيت رقم عمتي سمية تتصل رديت علاها و كانت غزل
فتحت الخط الو ..
و نزلت فيا هزايب على تكشيخ
انتي شن دخلك فيا قوليلي اااه
اهو بطلوني من المدرسة بسببك
قلتلها شن فيه ؟؟ خيرك تدوي هكي ؟
قتلي .. تكلمي ف منذر و قلتيله ع البنت
قلتلها منكلمش فيه .. اني كلمت امك و امك قالت لخوك مع ان قلتلها متقولش لخوتك بري تفاهمي انتي و امك ..
يا لاه خفت عليك هديكا تبعت ف صورك للولاد طلعتلك توا مننفعش صحيتي يا غزل ..
قتلي .. امي مقالتليش هكي ..
قلتلها .. مالا شن قالتلك
قتلي .. اني خانبة تليفون امي توا و محبوسة فالحوش
اني نسمع ف امي تنادي عليا و كان الحوش زحمة ..
قلتلها اسمعي يا بنت الناس ..
بوي و خوي طه شدوهم جماعة مسلحة و لحد الان منندروش عليهم و فوضعهم ،، 😔 ف اني مش ناقصة وجع راس
بري تفاهمي انتي و امك و عيلتك و طلعيني منه الموضوع ..
اني حكيت لامك فقط ..
قتلي.. خيره طه شن فيه 😭😭
و اني نقول خيره تليفونه مقفل
قلتلها شنو تكلمي فيه و لا شني..
قتلي موضوع طويل تو اول منحصل فرصة نكلمك المهم طمنيني عليهم و على طه 😭 ..
امي منبيهاش تعرف ان كلمتك باهي
قلتلها باهي..
قتلي تو ندبر كيف نكلمك من تليفون حد
قلتلها تمام ..
حسيت فيه موضوع تاني و غزل حياتها و قصتها ملخبطة .. لا تعرفها بريئة لا تفهم راسها من رجليها ..
قعدنا لاهيين مع اللي جايين
ديري شاهي .. ديري قهوة
و بين امتحاناتي النصفية
و بين غزل و ضميري ..
فاتو يومين كلمت عمتي سمية ردت عليا عادي كأن مافيه شيء
سألتها كيف حالها و شن اخبارها .. توقعت منذر يكون حاكيلهم لكن شكله محكالهمش
قتلي كيف حال العيلة قلتلها و الله كذا و كذا ..
قتلي لا حول و لا قوة الا بالله 😰
قلتلها .. غر بنسأل على غزل و اني الحق زعلت منك يا عمتي قتلك متقوليش لخوتها و منذر كلمني
قتلي .. اني معنديش جهد و عمك طاهر مهناش
و البنت اونا خدا منها منذر التيليفون من الثانوية و انحلت القصة و حرشو ف اهلها ..
قلتلها .. و شن جو دراسة غزل بدت امتحانات نصفية و لا شني ..
قتلي بتوتر .. لالا مزال 😣 الحق مزال الجو متوتر و مرات نرجعو لطرابلس و تقرا اهني
قلت رسمي كلامها شكله معش يبوها تقرا غادي
يلا حتى تقرا اهني المهم ميبطلوهاش

جيت بنرقد فالليل بعد ما كلمت قرايا
الحوش مولي اخخخي بلا بابا
كل مرة نتخيل ف خشته و مرواحه من العمل
و طه لما نقعدو نهدرزو مع بعض و نضحكو
خلى جامعته اللي مفروض يكون على باب الامتحانات
فتحت الروشن و قعدت نشبح للقمر
زعما بوي يشبح فالضي و فالسماء زيني ؟
و لا مسكرين عليه 😣
حاولت نرقد و كيف جاني النوم حسيت بهمسة صوت جداي ف وذني ..
نضت مخلوعة حاولت نولي طار النوم و قلبي عصرني قلت نمشي اناشبها جداي شوية و نرقد بحداها
خشيتلها انادي و ضي كان مفتوح
جداي جداااي
لقيتها متكية ع السرير و طايحة
جداي .. خيرك ؟؟
جداااااي .. جدااااي 😭😭😭
يا جداااااااي
و قعدت نعيط واااااااااك يماااااااااا يمااااااا
لمياااااااء ..
نخض ف جداي و عيوني تعبو دموع مش مصدقة ان جداي ماتت
خشت امي و لمياء و خالاتي كانو بايتين معانا
و قتلي خالتي اسكتي يا رغد خلاااااص 😢
جي خالي و قمناها للاسعاف
قلتلهم نبي نمشي معاها قالولي اقعدي
مشت لمياء و خالي و خالتي
و اني نبكي ..
جداي اللي نحبها اكتر من روحي
جداي اللي نبيها تشبح راجلي و اني ننزف معاه بالفيلو و تلحّق ع صغاري
جداي اللي ديما فرحانة بيا 😭💔
مكنتش نعرف انها تودع و توصي فينا ..
و كيف كانت تشبحلي و تبي تشبع مني 😭😭
كيف تموت و تخليني ..
حي كان بوي يندري الا ما يزيد على همه هموم😭
امه ماتت و هو مش بحداها
بقلمي •••• خلود شلابي
و سبحان كيف فات الليل بسرعة و جي الصبح و انتصبت هديكا الخيمة 💔
حدي بعتت مسج لمنذر قتله قول لصاحبك راه جداي ماتت كان يقدرو يطلعو بوي يحضر جنازة امه و يردوه
اتصل بيا عزاني و قالي اني ف مصراتة تو نجيب امي و غزل ..
و شكله خلاص بيجو يعيشو اهني ..
عمامي مجاش و لا واحد قالو بنفتحو عزاء غادي و الطريق و الدواعش ف هديكا الفترة كيف طالعين فالطرق ..
و اهني تشبحو هدوكا اللي يجو بيعزو كيف يهدرزو و يوازو فالخبزة و الفطيرة مع الشاهي ..
و اللي تقولك خيره الشاهي سخون هلبا و اللي تقولك خيره القهوة مرة ..
معقولة الانسان نهايته هكي ؟؟
مجرد خيمة و فاها ناس تهدرز و تاكل ،،،
و الله لو كل حد يتّعظ من خيم الفقد راه مكانش هكي حال اغلب الناس
الواحد يعمل لآخرته و يجهز صحيفته بش يقابل بيها ربه ،، و مزال فيه ناس غافلة 👌🏻💔
بابا طلعوه العشية موخر و ملحقش عالجنازة كان عليه اثار ضرب و رجليه مش قادر يوقف عليهم اما طه قاعد مصيره مش معروف
قالو لبوي كنوع من التهديد يا هشام يجي يسلم روحه يا طه بيقتلوه
الفترة هادي نفسية و وجع و فقد بشكل تحس روحك ان هادي النهاية خلااااص
و كأن لسان حالك يقول و تشاء من الأماني نجمة و يشاء القدر ان يبعتلك نيزك يدمرك بالكامل ..
و منها يا تنوض بعد الدمار تلملم شتاتك يا تقعد طايح 👌🏻
يتبع 💔