رحلتي إلى الموت

الحلقة 11

#رحلتي_إلى_الموت 💔 الحلقة 11
بعنوان (  العوض  )
#الكاتبة_خلود_شلابي 
قعدت نشبحله و مشيت بعيد جيهة القراج نبكي
لحقني و قالي خيرك ؟؟
قتله .. مخيرنيش 😭😤
قعد واقف يهدّي فيا ..
و حسينا بحركة حد بيطلع للجنان المعشّب ..
فتح باب القراج و قالي تعالي ..
قتله بعقلك انت تبيني نقعد معاك بروحنا؟؟  😡
انفتح الباب البرا و هو طول خاف و دفني للداخل و سكر الباب ..
مشيت لأخر القراج و هو يلحق فيا ..
قالي .. هما كلمتين و بنطلع و بنخليك ..
قتله .. متقولي شيء برا تسقد يلا ..😤😭
كان وجهي احمر من البكاء و منفعلة ، معش فارقة معاي خلااااااص  ..
قعد يهمس بهدوء و قالي .. خيرك يا رغد قوليلي  خيرك طالعة تبكي ؟ من اللي مزعلك الداخل ؟
مني منك ..
و كالعادة بعد الحاح منه زي كل مرة
قدر يحتوي غضبي و لقيت روحي نحكيله اللي فقلبي كله زي البنت الصغيرة لي خنبو منها حلوتها 🤭 ..
قتله .. رونق الشكل 😤
قالي .. خير فيتها
قتله .. خشيت نلبّس ف غزل القفطان و شادة تاكم الذهب كل مرة تفك مني ف حاجة و تقعد هيا اللي تلبّس ،، قلتلها قوليلي و نمدلك معش تفكي مني و اختك يا ريته حتى كلمتها ،، جت مع رونق و قتلي عادي مرت خوي ،، و قعدو يضحكو رونق و اختها مها عليا ..
قالي .. المشكلة متكلمش فيا غزل كان هذا راهو كلمتها ..
و انتي مداما اديرلك فالجو اهوا معناته حارقتيها و تبي تغيظك بأي شكل .. كان اني ف بدالك راهو نمسح دموعي و نخش نضحك و نهدرز طز فيها و ف اختها ..
قتله .. اني تعبت خلااااص ،، معش عندي جهد نقاوم نبي نروح للحوش ..
قالي .. جديد الكلام اهوا ،، وينها اللي كان لسانها طويل .. ؟
قتله راحت من يوم (و سميتله التاريخ اللي حضرني فيه و معش رد عليا )
قالي .. انتي تسكري ف راسك و اني بروحي فاد و ضغط خدمة و مشاكل الحوش .. تزيدي فيا على ما بيا علاااااش ؟ لكن لما تنقرصي و تعرفي قيمة اللي يكلم فيك هكي تغيري من طبعك و تتعدلي ..
قتله .. صار عقاب
قالي .. اي ضروري منها قرصة الودن
قتله .. منيش كلبة بش تقرصلي وذني ،، و أصلا معش فيه ما قعد ..
وينك لما كنت ف أصعب أيامي ؟؟
وينك لما كنت بحاجتك و كنت ف ظرف ما يعلم بيه الا ربي ؟؟ عرس اختي و جري و مشاكل اعمامي اللي جو و نزحو عندنا و انت و طه و الكلام اللي قلتهوله و الكلام اللي قلته لبوي و رونق الدراه و اختك توا ،،  هو هكي اصلا ع قد ما ندير نطلع مننفعش 😤 ..
منذر .. غر وسعي بالك وحدة وحدة ..
قتله .. انت اصلا متحبنيش مجرد كلمة قلتهالي اهني و مش من قلبك 😭
كان تحبني متخلينيش !!
كان تحبني منهونش عليك ..
منذر .. و الله حبيتك و خشيتي الخاطر لكن فعلك خلاني نبعد ..
قتله .. صار حبيتك لكن فعلك ؟؟  يعني توا شني نهاية علاقتنا تره قولي ..
سكت
قتله .. شني ؟؟
قالي .. مخليها على ربي و حاليا ظروفي و نفسيتي متسمحليش نربطك بيا يا بنت الناس نبي شوية وقت
قتله .. صار نفسيتك يا منذر 😭💔 تي مية مية صحيت ،، ياريتني مخشيت هذاكا اليوم اهني و لا شفتك و لا تلاقيت معاك ..
انت قلتها الكلمة بالكذب و أني صدقتك ..
هيا مجرد كلمة عندك و تقدر تتغير بعدها ،،  لكن اني بنيت علاها احلام نحسابك تحبني زي ما نحبك .. خمسة شهور و اني نراجي فيك .. و نقول اهو تو يرضى و يرجعلي
و ف الاخير طلعت عايش حياتك و تقوللي لا نفسيتك معش تسمحلك ان ترتبط بيا ..
حسبيا الله فيك  😭😭
و طلعت نجري و خليته و هو يقولي يا رغد استني ،، فتحت الباب لقيت مافيه حد
خشيت للجناح من الباب الخارجي و منه للحمام ..
غسلت وجهي كله و مسحت ب كلينكس ..
قعدت قريب خمسة دقايق و أني نهدّي ف نفسي ..
بعدين  اتصلت ب لمياء باش تمدلي شنطتي فاها بودرة و مكياج و روج ..
جابتهملي و قتلي وين كنتي قلتلها ع رونق بسس و انّ كان راقيلي من غزل و هكي .. 😞
درت بودرة و روج ..  و الماسكارا احسن حاجة ضد مية مساحتليش 😬
خديت بالروج و قعدت نمشّي ع خدودي و طلعت للصالون قعمزت لقيت طاسة مية شربتها بش نبرد على رويحتي ،، و درت زي ما قالي منذر بالزبط
هدرزي و اضحكي و خليهم لين يحيرو فيك ..
شووي شوي لين انطلقت و طلعت غزل للصالون على اغنية و قعمزت عالكنبة تاني
جت امي لبستها الدبلة و قصو الطورطة و لمياء بحكم مرزنة و مع تفنيصي قلتلها تنوضي نقتلك ،، 🤨
و اني نهدرز على قريباتها و منهم وحدة نفاخة نفختلي راسي بس سايرتها و اهو زعميتني نحكي و نضحك بأعلى صوتي و الجو امليح ..
قعدت غزل تشبحلي من بعيد و توشوش هيا و رونق ..
و من هالزحمة و الناس الواقفة ناضت مرت خالها تقول وينهم حماواتها يجو بحداها ..
اني قلبي وجعني حسيتها لقطة بايخة و مفروض ان مندورش و ميركبش عليا الحق قدام الناس و نطلّع روحي عافنة .. و نكون الكويسة مهما غلطو فيا ..
لكن لالااااا
رغد الجديدة معش بترحم حد 👌🏻
طنشتها و خليتها زي الحشرة .. لين روحنا
سلمت على امها و طلعت ركبت فالسيارة ...
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
لمياء باتت عندنا رقدت ف دار جداي ..
و أني بأمانة نبي نرقد بروحي ،، عندي حديث عمييييييق مع وسادتي ...
شوية شوووية نزلو دموعي و تفكرت منذر و ملامحه ،، ع قد ما كان خايف عليا و مهتم ع قد ما انصدمت بردة فعله ...
كنت نتوقع ان حنرجعو لبعض من كتر ما كان باين عليه انّ مستاحشني ..
لكن خلاص ..
قلبي لا يهان 👌🏻❤
يا ريته لو نقدر نطلّع قلبي من قفصي الصدري و  نبوسه و نواسيه ،، و نقوله راهو أني نحبك بدل الجميع ..
اني نحبك و نخاف على مشاعرك بدال كل من خذلك و استغفل طيبتك ..👈 ❤
و رقدت و أني ف راسي عالم تاني و مخططات جديدة نوقف بيها على رجليا ..
و كالعادة غزل حكت لطه ع كل شيء ،، خواتك مجونيش بكككل بعد ما لبست الدبلة ..
خواتك مصوروش معاي ..
قتله .. هاني تعرفه ميحبش جو الصور ،، و كانك عليا ايه رقالي تو تنفعها رونق ..
قالي .. عيب هيا تبصر عليك و قعدت تنادي فيك انتي مجيتيهاش ..
قتله .. شنو من توا تعبيلك ف راسك عليا ؟؟
طه سكت .. و بعدين قالي يرحم بوك فكينا من المشاكل ..
قتله .. صار اني لي طلعت متع المشاكل ؟؟ 😳
قالي .. قعدو اقربائها كلهم يقولو خيرهم مجوهاش لبسوها الدبلة و قصو معاها الطورطة؟؟ شن كان منظرها و انتو مخليينها بروحها  ..
قتله .. لما كنت نلبّس فاها و رونق تفك مني فالحاجات تحسابني عيلة صغيرة و هي تضحك معاهم عادي منظري قدامهم ،، لكن لما توصل فاها يبدا مش عادي !!
تي مية مية ..
قالي .. اني شاد روحي عليك يا رغد ،، و فكينا من الحساسيات و الغيرة ..
قتله .. غيرة شني ؟ بنغار منها على خاطر شني ؟
قالي.. انتي ترعشي منها على خاطر انخطبت قبلك ..
قتله .. كان عالخطبة حتى ني يخطبو فيا و منبيش
قالي .. هوا سؤال و منبيش نفتش هاتفك ،، تكلمي ف منذر ؟؟
قتله .. شني ؟؟
قعد يكشخ و يقولي تكلمي ..
تكلمي فيه ؟؟
فتحتله الرمز و قتله تفضل خليه عندك حتى شهر فتشه براحتك ..
ع فكرة منذر خطبني من بوي و قلت منبيش توا لين نكمل قرايتي و برا اسأل بوي ..
و كان ع الكلام أهو بحداك التليفون فتشه .. و اتصل بيه أسأله ..
قعدت انادي ف امي جت .. و قالت خيركم 😡
قلتلها .. يما مش جي منذر و كلم بوي عليا و قلناله مزال منبوش ؟
قتله .. اي خيره شن فيه؟
قلتلها .. أسألي ولدك اهو قدامك ..
مشيت و خليتهم و خشيت لداري 😤😤
قعد يطق فالباب و قتله فوتني بالله عليك متجيش ف طريقي ..
صار هكي يا غزل تعبي راس خوي عليا ،، تو تشوفي المعاملة شن شكلها فالجديد ..
مشيت للثانوية و بحكم تخصصت علمي ،، نشبح فاها هيا و مها و زعميتا حرجانة اتطنّش عليا و حتى اني نطنّش علاها ...
و شوية شوووية و مع دوام القرايا طبعا منذر من هديكا الليلة اتصل بيا تلات مرات و بعتلي مسج ردي نبيك .. و مرديتش عليه فته و فاتني ..
منبيش نعرف شن يبي يقوللي ..
خلاص حنشطبه من حياتي ..
بديت مقعمزة لقرايتي ،، و حنجيبها الأولى عالمدرسة و نرد أمجاد زمان 👌🏻
الناس من قبل ينقو علينا صغار سليمان فلاتيز و حنخليها الجملة هادي حقيقة مؤكدة ...
كلهم تخرجو بتفوق مزال اني اخر العنقود حنكمل مسيرة خوتي الدراسية ..
بديت بين قرايا و بين زرادي و شبه كل يوم فطور اني و البنات اللي فالفصل ..
بيتزا ،، على سمبوسة ،، على كيكة ،، على شاورمات ،،
يضرب الجرس ،،
نفرشو هذاكا المفرش
و كل وحدة و شن جايبة تحط ،، ترامس الشاهي و القهوة ..
نقعمزو ناكلو و نهدرزو و نلبسو ف بعض و عايشين مراهقتنا بما يرضي الله ..
المدير مسمينا قروب الخشرة ،، كنا من كتر ما نحبوه ديما نبعتوله ف حصته ،،  لانه قدوة حسنة و مدير واقف معانا احني الطلبة و مش مخلي ولا ابلة تقصر ف تعليمنا ،، و من كتر ما مدخلين روحنا معاه
بدا كل ما يلقانا يجي يفطر معانا و يقول لبنت صاحبتنا قهوتك مش عادية ..
نحطوله هديكا القهوة مع كيكة و لا حاجة حلوة و يتكيف بيها و يعدل دماغه بعد دوشتنا احني الطلبة و مشاكلنا اليومية ..
و كان ممنوع عيد الطفل ،، قعدنا نترجو فيه قلناله يا استاد سمستر التاني خلينا نحتفلو بيه ..
قعد يضحك علينا قاللنا تحسابو رواحكم صغار 😂😂
و بعد كر و فر وافق على مقترحنا ❤😬
و غزل كل ما تخطم هي و مها و وحدة تانية قريب تموووت ..
كان قروبها برستيج و متع نفخ ،،
احني قروب شهلولي و الفصل كله يد بيد مع بعض ما عدا هما ...
طه ،، شبه رسميات اني ووياه ..
اخر وقت يطلعني نغار من خطيبته اللي لولاي راهو منخطبتش ..
غزل تنزّل ف صفحتها كيف راكبة مع خطيبة خوها و مها  يتدهورو عاد يوتو للعرس و الحجوزات ..
و شبه كل يوم طالعة معاهم و كلام و تاقات متع انتي اعز صديقاتي و انتي الدنيا كلها لا وجود لصديقة غيرك في قلبي .. .
ربي يعقّد عسلكم 😒