رحلتي إلى الموت

الحلقة 14

#رحلتي_إلى_الموت 💔 الحلقة 14
بعنوان (  خط الحياة  )
#الكاتبة_خلود_شلابي 
نزلت و ركبت فالسيارة ، و كان وجهي واضح عليه الزعل ..
منذر ورّقلي و مباش يكلمني بكككل يشبحلي و خلاص ..
لقيت عمتي سمية مخليتلي كرسي قدامي و راكبة فالخلف ع قد ما قلتلها اركبي قدام قتلي لا  ...
حطيناهم و روحنا لحوشنا ..
قالي خيرك شن فيه يا روحي ..
قتله ،، تعبانة
قالي .. اهو روحي لحوشك و ارتاحي ،، تو نجيب عشاء من براااا راني مستاحشك ..
مسك يدي و قعد يغيرلي ف جوي ،،
تي وينك قبل يا منذر 💔😔
نحيت الافكار السلبية و رخيت روحي معاه و قعدت نهدرز عليه ،،
روحت لحوشي ..
خشيت دوشت و تعطرت و لبست قفطان حرايري أصفر قصير 👗🔥 ..
نزلت جيهة الجناح ..
و حطيت المشروب و الثلج ..
لين جي و جايب معاه العشاء ..
قالي .. شن هالحلاوة .. ع الاصفر اليوم
قتله .. اي ع الاصفر ..
قالي .. باهي الواحد لي تزوج و افتك من عيشة الكلاب 😆
قعدت نضحك و قتله حاشاك حبيبي ،،
و اني عيوني عالعشاء نبي ناكل 😬 ..
حطهم ع طاولة ..
نضت بنجيب صحون نحط فيهم
شدني ..
و أني فخاطري مش وقته التهدريز و رومانسية جيعانة 😣
مني منك سايرته خمسة دقايق ..
قتله اسمع ..
قالي نعم يا عيون اسمع انتي ..
قتله العشاء توا بيبرد و اني منحبش حاجة مصقعة خلنجيب صحون و ناكلو اني جيعانة ..
دارلي هديكا الشبحة و ضحك ع جنب ..
حط الوجبات قالي متكتريليش ماعين عارفك مش حتغسليهم خلينا ع الصواني و كواشيك البلستك لي فالوجبة ..
كانت وجبة رز و مشاوي وسلايط و بطاطا و باكو باقيت ..
.
.
.
.
المهم عاودت مكياجي من جيهة الفم لأن تخلط بالرز و بالصوصات و أني ناكل نااااكل ناااااااكل لين عبيت بطني و بديت نفرّز .. 🤣🤣🤣
و هو يشبحلي و ساكت ..
خدا كلنكس مسحلي فمي .. قتله بنوض نغسل اهو ..
خشيت للتواليت لقيت هريسة ع ذقني و رزة ع خشمي ..
لكن متعود عليا الحمد لله هادي رغد كان مش عاجبه ،، 😚😚
ساويت روجي و رجعتله لقيته قايم الحوسة و مداير عطر منزلي ب نكهة الفانيلا ..
كل ما يلفني .. نقوله بطني معبية خلتنزل الماكلة ..
قالي البسي حاجة خلنتمشو البرا ..
لبست فوق قفطاني بشت و ربطته ب الربطة و شبشب
و قعدنا نتمشو ف الليل عالحوش ..
و أني نعلّق ..
كان هادي درتها هكي ،، و كان هاديكا جت هكي ..
و هادي كيف صممتها تهبل ..
نعطي ف رأيي و هو يقولي مشاء الله عندك افكار ..
طبعا أني بحكم من قبل يقولي فاها خشي معهد تصميم داخلي ف خش ف راسي موضوع الهندسة و تصميم ..
ف تخصصت هندسة معمارية فالجامعة ..
قالي شن رأيك نحول لمعهد عالي و نديرلك معادلة تكملي بكري و نعلمك تصميم داخلي تبدي معاي تخدمي من الحوش ؟؟
قتله .. اسمع 😡
هيا ك فكرة حلوة ،، لكن اني شرطت عليك قرايتي خليني نكمل هالجامعة و علمني حتى من توا ..
فكني من سريب التحويل و المعاهد الخاصة ..
قالي اني نبي راحتك .. هي الشهادة مش مهمة بحد ذاتها المهم دماغك شني ..
قتله .. دماغي نظيف و حنعجبك ،، علمني توا و اعطيني افكار نساعدك فيهم ..
عندك الحق قداش منك و بدل ما تتعاون مع مصمم تاني و تخدم وحدين ياخدو فلوس ،، مرتك أولى 😂😂
قالي .. اهو بديتي تحسي بقيمة القرش و خايفة عليه ..
قتله .. ايه ..
قالي .. هيا صح لكن انتي مرات مع الصغار بعد وقت منبيش نتعبك هلباااا ،،
قتله ،، غر يجو و بعدين ساهل ..
قالي .. حيجو بعون الله ،،
و ديما الفريق لما يكون فيه ناس متعددة و شركاء ف الخدمة أفضل و يعطي نتيجة احسسن لان فيه هلبا وجهات نظر و تعاون  ..
و اني مع ضغط الخدمة بني و تصميم داخلي و تصميم ديكور لمناسبات شركة كبرت و نبي حد يهنيني ..
قتله .. ان شاء الله
قالي .. مبدئيا نعلمك ف تصاميم و ديكورات حفلات الزفاف و المناسبات الاجتماعية ،، يجوك البنات و تتفاهمي معاهم .. و خلي وجيج التصميم الداخلي بعدين ..
قتله .. اي عادي .. لكن كيف حنخدم مش فالحوش بيكون ..
قالي .. توا فالحوش و غر نشوف نتيجة شغلك و تنسيقك و كان درتيلي صفقة خمسة عقود حنديرلك جناح بروحك فالشركة نساء فقط  ..
أني فرحت 😍😍
كان مشجعني و زاد ما خلاني ندير طموح كبيررررر ..
قتله لازم خمسة ؟؟ صعب فالبداية ..
قالي ،، هذا تحدي ليك شنو تقدري و لا متقدريش ..
قتله .. نقدر يا روحي
قالي .. هيا شنو ماكلة نزلت و لا بنقعدو نمشو ..
قتله .. ههههه نزلت هيا نخشو ..
حط يده عليا و حضني و قعدت نمشي و مستندة على كتفه ،،
الزوج الصالح ،، يسندك و يكبرك ،، و يشجعك ،، و يكون أكبر داعم ليك ..
و مع الوقت ..
صفيت السمستر امتياز ،، و بديت ناخد ف كورسات عنده و عطاني لابتوبه نخدم بيه ..
خلاني نشد صفحة الشركة و نكون ادمن و بديت نتعلم فالتسويق ..
و بدا يوريلي فالتنسيقات و نحط ف افكار جاهزة ..
بمجرد ما يجو العميلات يوريلهم ف تجهيزاتي ع كتالوج الكتروني يقولو تم نبو زي هذا بالزبط ..
و رفعني لمعامل و شركات تطييب ولائم و حلو و تقديم ،، قدرت نختار اصناف و نصورهم و درنا عقود عمل معاهم ..
و حصلت تلاتة عقود حجوزات .. مزالي زوز
مشى سامحني فيهم ،، قالي الزوز الباقيات بنحسبهملك مع باقات العقود للتقديم و الولائم و تنسيقات الضيافة ...
فرحت و حسيت روحي شخص ناجح  ❤❤
بعد السهر ع اللابتوب و اليوتيوب ،، و المشي و الجي بالسيارة و عصر الدماغ ..
فيوم الصبح قالي وتي روحك .. قتله علاش شن فيه بنمشو لمكان نختار منه حاجات ؟؟
قالي لالا غر نوضي هيا ..
نضت دوشت و شطبت ،، هو لبس و أني
اختارلي عباية معينة قالي البساها .. و الخمار طبعا 😒
قتله وين بنمشو ..
قالي غر اطلعي ..
قتله .. مفطرناش
ضحك و قالي تو نفطرو البرا و انتي ديما بطنك من أولوياتك ..
قتله ،، امالا كيف بنصحصح و الله 🤭😬
قالي .. هيا
قام اللابتوب لي نخدم بيه فالشنطة ..
و ركبنا السيارة ..
لين درس بيا ف بركيدجو الشركة ..
أني خلاص بيغمى عليا .. قتله متقولهاش ؟؟
قالي .. شن منقولش ؟؟ راه تدريب ميداني قدامي بنشوفك كيف تتعاملي مع زباين بطريقة مباشرة ..
قتله اه اممممبه ..
و اني نحساب بيقولي خلاص بتبدي خدمة و دارلي مكتب ..
خشينا من البوابة و كلهم يتصبحو عليه ..
و متع الرسبشن قاللها ،، هادي المدام
رحبت بيا ،، و رفعني للممر و خشينا من باب يفتح لجناح ،، لقيت مكتب صغير فيه بنية ..
قاللها اهلين مسرة صباح الخير ،، هادي مديرتك رغد ..
ناضت وقفت و سلمت عليا كانت بنت زي العسسل ..
و اني لفت بيا الدنيا معش فهمت شيء ..
و فتحلي المكتب قالي تفضلي بش مهندسة ..
اني نشبح و خلاص و هو مفهمنيش قدام السكرتيرة كان يتكلم بالالغاز ..
بس لما شفت اسمي و لقبي ع المكتب ،، عرفت ان هذا مكتبي 🤩❤❤ ..
خشينا و قال لمسرة من فضلك جيبي الطلبية تلقيها عند المطبخ و سكر الباب ..
اني قمت خماري و قعدت نشوف و نبكي ..
حضني و قالي مبارك عليك مكتبك يا مرتي و ان شاء الله ديما متفوقة و ناجحة ،،
خيرك تبكي خلاص يا روحي
حضنته و قتله بجددد شكرا يا منذر 😭😭
قالي خلاص اسكتي ،، قتله هادو دموع فرحة و فخر بيك ع قد ما نديرلك مش حنوفيلك حقك يا روحي ..
قالي ،، مش بيناتنا انتي قلبي و قطعة مني ..
طق الباب نزلت الخمار ..
قالي نحيه عادي ميجي حد اهني الا النساوين ..
خشت مسرة و جايبة طاولة متحركة فيها الفطور .. و كل شيء ..
قاللها شكرا .. خديتي بوكس فطورك ..
قتله .. اي بش مهندس صحيت ..
ف هذاكا اليوم الشركة كلهم فطرهم حاجاا راقية ع خاطر افتتاح جناح الديكورات للشركة ..
كان بوكيه ورد ع مكتب كبيررررر ،، و فيه بالونات و بهرة الاحتفال ..
قعدنا واقفين و اني مصدومة نتفرج ..
قالي شن يا مديرة متبيش اتضيفينا قعمزت و قتله تفضل ههههه
فطرت عبيت بطني و شربت شاهي و قهوة .. و حبيب القلب معاي ..
قالي .. اهو فالحوش معاي و فالعمل معاي متهني عليك توا ..
..
و نزلو الاحتفال و صور الفطور و البوكسات الجميلة و البالونات و نزلوهم ع صفحة الشركة ..
و مع التسويق الناجح جوني ستة عقود حجز ديكورات خلال اسبوع ،، قالي راجلي لنقنك بترفعيلي راسي ..
درت جدول اني ووياه ،، و قسمنا وقتنا
و درت خطة كيف نقدر نقسم وقتي بين الدراسة و بين العمل و قالي وقت تقري تو اني ندير بدلك عادي ..
و مرة مرة يفوت الشهر ،، نقول شكلي حامل نمشي ندير تست يطلع سلبي .. نبكي و نقول الحمد لله ربي تو يرزق ..
جابت لمياء ع خير ..
و كانت عمتي سمية مسافرة عمل ..
و غزل قعدت معاي ..
قتلي لمياء عادي جيبيها معاك كنا نساعدو فاها و مشيات الاولات للنافس و نستقبلو الناس و هكي قبل اللمة الكبيرة ..
روحت من خدمتي رفعت ما كتب ربي و حطنا منذر ف حوش هاني .. و خش باركله و كان جوهم مليح الحق ..
هاني مشاء الله عليه ..
سلمت اني و غزل على امي و لمياء و عزوزها و حماواتها و سلفاتها و نهى مرت طه  .. و طبعا نهى لما شافت غزل وجهها انقلب ..  سلمو ع بعض
مفاتتش ساعة جي طه روح بيها و امي تقوللها خيرك ؟
و أني واقفة نسقد ف صغار لمياء ..
قالتلها بنتك مفروض متجيبهاش عارفتني منبيش نشبح وجهها غزل ..
مبيتش نرد علاها ..
امي قالتلها ،، هذا مش حوشك بش تتحكمي فاللي يجي و اللي يمشي ..  خلاص جت شن بنلزوها يا نهى ؟ هيا مجتش ف طريقك ،،
قالتلها .. اهو اني مشيت و خليتهالكم ..
امي .. لا حول و لا قوة الا بالله ..
امي تغششت وجعتها الكلمة ،، و اني ع قريب تفجرت علاها هالوقحة ..
امي قلتلها متغششيش روحك فوتها المريضة ..
بس امي وجعتها 💔
و خشت غزل فالعيلة و حبوها ،،  و سلفة لمياء قعدت تسأل علاها تبي تخطبها لخوها ..
و خوها نعرفه تحكي عليه لمياء كان راجل متع خدمة و عاقل و اموره مرتاحة بحوشه الكبير و ب اخلاقه مش ناقصه الا بنت حلال بسس ..
قتلي سلفتها كلميها و ردي عليا قلتلها ان شاء الله ..
تعشينا و جي منذر بش يروح بينا شده هاني تعشى معاه ..
و نشبح ف امي يكلم فاها طه و يعارك ،، نسمع فالصوت كان عالي بنتك هادي ادير فالمشاكل بلعاني ،، علاش جايبتها .. ؟؟ تي و الله كان نشدها الا منمرج خنفورتها و امي ترعش و لمياء تكلم فيه سبها ..
قتله بارك الله فيك يا طه .. 😭
زعميتا تعبت بحكم ف شهرها حتى هيا رفعها للعيادة ..
و بري عاد كالعادة خالتي و بناتها فالفيس تلقيح و يتحسبو فيا 🤣💔 ..
لين قبل اللمة مشيت لامي جبتلها قفطان و تاكم ذهب خديتهولها من فلوسي و مرتبي و جايبة لبابا بدلة ..
خشيت علاها ف يدي الاكياس و باقة ورد ..
امي فرحت و قتلي علاش متعبة روحك ..
و بابا حتى هوا قالي سلم بنتي صحيتي ..
قعمزنا و قعدت نحكيلهم ع جو الخدمة و مقالبي بين الزباين و هما يضحكو و ينصحو فيا ..
شكله طه يراقب فالوضع خلى بابا لين مشى للجامع بش يصلي العشاء
و خشلي لا سلام لا كلام ..
انتي متتحشميش على وجهك و انتي صفتك و نعتك ..
قريب قتلتيلي ولدي ،، لاها اسبوع راقدة فالمصحة و ضغطها راقي حتى عملية مش قادرين نديرولها   ،، خليتي المراء تمرض ،،،  عارفتيها تغار منها ،، اصلا انتي حاسدتيها هيا حملت و انتي لا ..
اني نشبحله مصدومة و هو الكلام يحط فيه مستّف ..
قالي الكلمة هادي اللي خلتني ننهار 💔
من سمك هذا علاش ربي معطاكش و ان شاء الله ما تشوفيهم ..
قتله .. بارك الله فيك ..
دفل على وجهي و طلع  و امي تلحق فيه و هو يقوللها خليني يماااا ..
امي قتله .. ان شاء الله تجيني اهني لا عاد نعرفك لا تعرفني ..
اني طحت نبكي 😭😭 و نبكي ..
تي شن لي درته اني 💔 امي تنوض فيا و تقولي استهدي بالرحمن ،، و بدل ما تواسيني طاحت من الغشاش و قعدت نرعش و جاني منذر رفعناها لقينا ضغطها راقي و هي مكانش عندها ضغط
روح بوي ملقى حد جانا فالمصحة و يقول خيرها .. قتله شيء
جي طه حتى هو يرعش ،، يمااا سامحيني سامحيني
و امي انجلطت منه ..
فمها تعوّج و حالتها حالة ..
خليت منذر ينزل بيجيب تحاليل من معمل ف مكان
و اني قعدت نتعارك معاه فالمصحة حدفت عليه مزهرية و سبيته سبيييته غل غلي طلعته فيه ..
بتقتل امي يا عاق الوالدين ،، بتقتل امي على وخدة فتانة .. و دفلت عليه عبيته دفال .. كيف جاي بيمد يده
بوي ضربه كف و لزه ..
جي هاني ،، و الحق نحكيله مندس عليه ف شيء ..
بوي حتى هو راسه ناض عليه ..
ختمت 💔
و من يوم كنت بنحتفل فيه مع اهلي لي يوم فالعيادات و الرعايش ..
مرته الحقيرة جابت ولد ف نفس الليلة كان داهش و دخلوها عملية مستعجلة ..
و فرحته ما كلمت..
حتى لما روحت حوش فاضي جت خالتي و بناتها بحداها و طه منكد عليهم  ..
امي قعدت سبوع لين وضعها استقر ،، منذر رفعها لعيادة مرموقى قعدت فاها و اني مرافقة ..
و بوي قعد عند لمياء حلفله هاني بالطلاق بش يتربا طه ..
و كل ما بيجي طه لامي نقربع فالباب عليه .. لين جاه الامن و لزه ..
المرة هادي كرهته خلاااااص ،، و الدم ولّى مية ..
جت خالتي لزيتها قلت للرسبشن متخلوش حد يخش ..
خليت خوالي و نساوين خالي فقط ..
مش اني مننفعش توا خليقولو ان اني مننفعش بجديات ..
كان اسبوع طويل و مرهق ..
روحت بامي لحوشي ..
و قعد طه يتغوت لمنذر قاله اني مندخليش تفاهم انت و اختك ..
و جي بوي و امي عندي ..
و مع العلاج الطبيعي فم امي و يدها اليمين بدو يستجيبو الاعصاب متعهم ..
امي تصلي و تدعي و تبكي ..
و اني نتأمل فاها كيف متأترة و نقول مدافعش عليا ،، و هي كانت تحرق من الداخل على خاطري 💔 ..
الأم مهما كانت قاسية لكن متخليكش ،، حتى لو موضحتلكش ،، و حتى لو ما دافعتش عليك ..
لكن بينها و بين نفسها هيا تدعيلك و ديما مسانداتك ..
جت خالتي للفيلا .. هيا و طه
خليتهم زي الكلاب يتربو ..  المهم جيتو لحوشي فالاخير ..
شبحت وجههم فالكاميرا  و حاجة تقولي متفتحيلهمش ..
اتصل منذر بيا قالي خوك يتصل مرديتش عليه و شفت فالكاميرا جايك ..
مني منك قالي بتدخليهم انتي حرة متبيش براحتك ،، المهم متقوليش راجلي حارمني .. لكن مداما جوك للباب تعوذي من السيطان و خليها لربي ..
دقيقة و اني نفكر و نفسي الامارة بالسوء تقولي لزيهم ..
لكن قلت ياااااارب لوجهك الكريم ،، لوجهك الكريم ..
خليت مدبرة المنزل تستقبلهم و ادخلهم و اني مقعمزة مقابل امي ..
تصدقو ان خشو و مسلموش عليا ،، ف حوشي و كأني مش موجودة ؟؟
طلعت و خليتهم ،، للدرجة هادي انتو حقيرين ؟؟
كملت جميلي و خليتها تحطلهم ضيافة ،، حتى لو ما خدو شيء ..
نسمع ف طه يقوللها يام سامحيني بالله عليك و يبكي 😭 ..
و خالتي تقوله الله لا تربح اللي كان السبب ..
امي كشخت عليهم ..
قالتلها هادي بنتك سبب المشاكل ،، بنتك من يوم جت و هيا كذا و كذا و كذا و اديرلي و تفعلي و ترد فالكلام ..
و طه يقول امتى صار ،، خيره مقلتيليش ؟؟
قتله .. منبيش مشاكل كنت ،، لكن يا وداد تجي لحوش بنتي اللي فتحتلك بابها و تجي تدعي علاها قدامي ف هادي منسمحلكش فيها ،، ان شاء الله ف بنتك الظالمة ..
ناضت خالتي تلعلع ..
قالتلها في بنتك مرضيتيش لكن ف بنتي تبيني نرضى؟!!  امشي سحقة انتي ووياها ..
و طه يحز ..
قالتلها صحيتي يا هنيدة هذا اللي يجيك اصلا ..
قالتلها امي ،، منبيلك جي شدي حوشك و بنتك من عليا ..
و طلعت و هيا تتسحبن و اني و لا كلمة ..
المدبرة لحقت وراهم سكرت الباب و جيت بحدا امي لي تبكي ..
و قتلي سامحيني يا بنيتي كان من الاول وقفتها عند حدها راهو مصارش هذا كله ..
قلتلها الحمد لله ..
جي بوي و امي حكتله و بابا يهدي فاها ..
جاني بابا على غير طريق و قالي ابدي امشي لقرايتك تو نقعد مع امك نعانيها اني .. لين تصح و نرجعو لحوشنا ..
امي شدت فيا حتى هيا ..
و لمياء تجي حتى هيا مرة مرررة ..
و عزوزتي و غزل ..
طه لا فرح بولده ، و لا دارله حاجة ،، كله جاه بالنكد .. و لز نهى رفعها لاماليها و قاللها بنتجوز عليك .. و معاها ولي العهد اللي مذنبه شيء طفل مسيكين ..
يجي كل يوم تفتحله الشغالة و يخش يهدرز و تأسف من لمياء و حضنها و يبكي سامحيني يا اختي الكبيرة ..
الا اني لااااا ... 😅
امي تقوله مش مسامحاتك لين تتأسف من رغد ،، يقوللها اني حتى منكلمش فاها لكن نعزها هيا طولت لسانها و قاعد حامق علاها لكن تو نتسامحو يما خيرك ..
امي تقوله الموت ترفع و تجيب ،، امتى حتتسامحو ان شاء الله .
يقوللها يستر الله ..
و اني فالدراسة حكايتي مضغوطة و بين عمل نكمل فيه على منذر فالليل لان شاد كل شيء ..
و حوشنا بدا زحمة كل مرة يجي حد ..
••حوشك نظيف ماهو قاعد معندكش صغار يحوسوه ،،
°° نيالك يا رغد طحتي طيحة مقومة ،، مفروض اتبتي روحك كل سنة تجيبيله عيل ..
•• ردي بالك اللي عنده الفلوس ديما ياخد على مرته ،، و هو بوه متزوج زوز توقعي ياخد عليك حتى انتي ..
مسد يجوك للحوش و فوق منها يعطوك على راسك من الكلام لين تكرهي روحك ..
فات الشهر و نص الاول ..
و امي رجعت لحوشها ،، تحسنت الحمد لله ..
و هشام و حياة يكلمو فيها و قالولها تعالي لألمانيا نعالجوك قالتلهم منذر بارك الله فيه حط يدياته فالجنة عالجني عند اخصائيين كويسين ..
يدها بدت تتحرك و فمها شوية و يرجع احسن من قبل ..
جتها جلطة تعتبر خفيفة زي العرق السابع و انسداد ف يد اليمنى و تحسنت ..
و زي كل مرة الوقت يفووت
لين تخرجت و درت حفلة ف حوشي بسيطة ..
عيلته و عيلتي و مرت بوه و بوه ..
جبتها الأولى ف دفعتي ..
خدالي سيارة بعد ما علمني ،، كان وقت يفضى نطلعو و يخليني نسوق ع قولته للإحتياط فقط  ..
نقوله شن الفايدة كان متبيش تاخدلي يقولي سواقة مفيش .. 😡 و نقعدو حتى نتعاركو و نحمق ..
و هو تاريته يجهز فيا و ع قولته كل شيء فوته حلوو ..
كان مزال يدرس فيا و يشوفني قد العبء و لا مزال منعرفش نتصرف ..
كان كل شيء يدير فيه صح حتى لو اني نشبح فيه متأخر ،، بس فعلا كل شيء جي ف وقته و فتوقيته المناسب ،، 👌🏻
طه رد مرته بعد ما حرجت اربع شهور و خالتي معش تجي لحوش بنتها و لا لامي ،،
يحطها طه قدام حوش اماليها و يروح ،، و هو معش يكلم ف نسيبته لان وصلت ف امه ع قولته ..
و جابتله بنت كيف مزيودة توا ..
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
و اني و منذر لاربع سنين ع قد ما مشينا و سافرنا يقولو مفيكم شيء ..
مرة مرة نشبح ف دمعة منذر 💔 و نتحسر
و اني كنت ماسكة دموعي بالسيف .. منبيش ننهار قدامه ،،
بس لما نقعد فالحوش بروحي نقول كان عندي صغار راهو توا نجري وراهم ،،
كان عندي راهو هادي دارهم ،، موتيهالهم بوهم من يوم ما تزوجنا ،،
عمتي سمية او غزل معمرهاش سألوني او جرحوني بكلمة ..
ديما يقولو الفال ليك و دعوى طيبة من القلب ..
حتى محمد و رونق مسخرلهمش ربي الحال ..
الناس تقوللها خيرهم ولادك الزوز مضنوش ،، و هيا لسانها قاطع كانت تعطي فيهم الكلمة المقومة و اختها ،،
غزل لما حكيتلها قبل ،، ع موضوع خو سلفة لمياء رفضت ،، و كل ما يجيها حد ترفض حتى بعد ما تخرجت ..
قتلي .. منسيتش طه 💔
قلتلها هو عايش حياته ،، و انتي مخلية روحك هكي حازنة عليه ..
قتلي .. يكلم فيا مرة مررة ،، و يقولي نادم و تسرعت ،،
مش مرتاح مع مرته ،، بالذات لما عرفها تعامل ف امك اخخي ،،
قلتلها باهي كان مش مرتاح علاش جايب منها صغار ،، المفروض يطلقها ولاه ؟؟
قتلي .. نصيب هذا متزوج و مرته حلاله ..
قلتلها اي نعرف ،، لكن لي ميبيش حد ميجيبش منه ،، راه طلقها و خداك و دار على خاطرك لقطة ..
قتلي .. قالي بنخطبك ناخدك و نطلقها لكن اني رفضت ،، و قداش من مرة شاد فيا و كلم حتى امي لكن اني منبيش نخرّب على بنت الناس ..
مرة مرة يكلم فيا نرد عليه ،، و خلاص
معش نبي نتزوج ،، 
اني سكتت
.
.
.
ف يوم نبي ندلع روحي كلمت منذر حطني ف مركز تجميل و Spa
مشيت و قعمزت نراجي ف دوري ..
قعدت تهدرز عليا وحدة .. مني منك
وين تشتغلي قلتلها كذا و كذا و منه تسويق لعملي بحكم اغلبيته عرايس و مخطوبات يجو للمركز غادي ..
و الصدفة المش متوقعة تطلع البنت هادي منو؟؟
يتبع ❤❤