رحلتي إلى الموت

الحلقة 9

#رحلتي_إلى_الموت 💔 الحلقة 9
بعنوان (  لحظة غضب  )
#الكاتبة_خلود_شلابي 
الفترة اللي صارت فيها مشكلة العرس  👇🏻👇🏻

منذر نتصل بيه ميردش و بحكم كنا قعدين جدد في علاقتنا فا كنت رزينة و مثقلة روحي بس بيني و بين نفسي مشغولة عليه .. 😥
استغربت خيره مكلمنيش نهائي هذاكا اليوم ..
لين تاني يوم اتصل بيا و كان صوته واضح مخنوق 💔
منذر يحكيلي ..
مفهمتش خيره حتى الحوش سيبه و تليفوناته مقفل ..
قتله .. بلكي تعاركو و لا حاجة 🥺 ؟؟
قالي .. لالا البنت قالت مافيه شيء كان جوه مليح
.
.
و الله قعدت غر فالحشايم قدام الناس ..
بوي مسد جاي من برا بالسيف فوق من قلبه باش يحضر العرس ،،  و زادنا على ما بينا ،،
قتله خيره .. قالي تعارك هو و امي تاني ،، طلع متزوج هديكا البنت خلاص 😔
و قعد يفضفضلي و أني نصبّر فيه ..
أول مرة نشبحه هكي مهموم و شايل ثقل عيلته ع كتافه 💔 ..
و اللي فهمته ان البنت صارلها انهيار عصبي و تعبت من أثر الصدمة 😢 ، عاد كل شيء واتي و حجوزات و معازيم و زحمة فالحوش   
.. و ف الاخير يجي يوم حمامك يلتغى كل شيء 💔 ؟؟؟   مصعبه الشعور بجديات 💔
رفعوها اماليها سعفوها و رقدوها فالعيادة كان حالها يقطّع القلب ..
جي تاني يوم قعدت نتصل بيه مقفل لليل و اني محصلتاش  و على قد ما حاولت نرقد مقدرتش قلبي كان غامني 💔
نسمعو فالباب يطق ،، ناض طه يجري يفتح فالباب و قعدت نسمع ف صوت دوشة فالجنان ..
طبست من الروشن لقيت زوز نساوين و معاهم شيباني و عزوزة  ..
الثوت مش غريب عليا كأنّ صوت سمية و غزل ،،
كان جايبهم معز  ..
أمي يا ناري كيف كان ناعسها النوم نوضها بوي و انخلعت ..
نزلت اني و لمياء استقبلناهم و قلنالهم اركبو فوق
كان وجههم أسود ،،  يبان ف ظلام هذاكا الليل و باين عليهم البكاء ..
لحقتنا أمي و هيا مصدومة قالتلهم تفضلو ..
و معز يقول لطه بالله عليك اهو جبتهملكم أمانة غر صارولنا شوية مشاكل اهني القعاد اضمن ليهم ..
بوي شده يقوله غر خش للمربوعة تفضل احكيلي شن فيه   ..
معز .. منذر مضروب نبي نلحقه رفعوه الاولاد للحوادث
طه .. استنى امالا تو نجي معاك ..
أني خلاص قلبي بيوقف 😭😔 ..
بوي دخّل الحاج حمد بو سمية ..
و النسون ركبناهم و اني خشيت نجري لداري بكيت بكيييت و قعدت ندعي لربي يقوم بالسلامة ..
زعما بشن انضرب ؟؟ و من ضربه ؟
خشت لمياء و قتلي نوضي امسحي دموعك و خلي روحك عادية ردي بالك تبيني قدامهم ..
نضت غسلت وجهي و كان نلقى نتلوح على سريري نعيّط بكل قوتي 😔
خشيت لقيت سمية تحكي لأمي عاللي صار ..
و امها الحاجة سليمة ترعش 😥 جابتلها لمياء مية بالليمون

سمية تقول :
شكله ولاد عمامها و اقاربها هدو على فيلتهم بالرصاص كانو جايين يبو يقتلو محمد ..
طلعلهم منذر و حاول يحز الموضوع معاهم و قبل ميطلع اتصل بصحابه لي يخدمو ف جماعة الأمن لحقو عليهم فالاخير ،،  صارت فاها رماية و سبان و مواضيع و منذر انصاب ف رجله💔
قلتلها امي و محمد وين ..؟
سمية .. قعد عند صحابه و سكّر تليفونه قال معش نباها  اعطوها حاجتها و كل شيء  و انهولي الموضوع خلانا ف المشاكل و تهرّب ..
امي .. بلكي ولدك سمع عليها حاجة و لا حد تبلى علاها ؟
سمية.. و الله سألناه و قلناله غر قوللنا شن هو السبب لكن هو قال هكي اني منبيهاش ..
اتصلت امها كلمتني و قعدت تلوم فيا  و البنت حتى هيا كلمتني قتلي نبي نعرف علاش دار هكي بسس !! 😭 اني شن درتله !!
و انهارت سمية ..
سبحان الله الجبروت اللي كان عندها و قوة شخصيتها مكنتش نعرف انها ممكن حتضعف زي توا ...
غزل عيونها دموع جيت بحداها و تكيتها عليا ..
قلتلها تو ربي يدير طريق انتي توكلي على الله بسس ..
و اني معش قدرت نشد دموعي قعدو يبكو و أني نبكي معاهم ..
و لمياء تجيب فالمية و دارت قهوة جابتها
سمية اتصلت ب معز و قاللها منذر دخلوه فالعمليات ..
أني نضت توضيت و صليت ركعتين دعيت فيهم من كل قلبي ...
و فاتو ساعات
و مرة دموع ،، مرة هدرزة ،، مرة رنة هاتف نتطمنو بيها لين طلع من العمليات و الحمد لله حاله باهي ..
امي .. و ناسكم وين قعدو
قالتلها سمية .. روحو من يوم الحمام لان جو خوتها و دارو مشكلة و قلت لاقاربي روحو مرات تكبر القصة .. و فعلا اهو توا رجعولنا تاني 💔
فرشنالهم ..
و رقدت غزل معاي في داري ..
قعدنا نهدرزو للفجر صلينا و بعدها منعرفش كيف خداني النوم ،، و رقدت
و دموعي ع خدودي 😢
نضنا الصبح قعدنا نوتو فالفطور ..
  روح طه و معز فطرو حتى هما و حصلو نومة بعد تعب الليلة  ،، و بابا مشى بيقعد بحدا منذر
لا لقو خوالهم لا عمامهم  ،، وقت الرصاص كلها كتحت ..
وبوهم قال يوم خطبتو كنت اخر من يعلم دورو من يحزهالكم ،،  اصلا اي حاجة فاها امكم متمشيش القدام ..
محمد مكانش عند صحابه و لا أصلا في حوش أو استراحة ..
لقو سيارته مدرسة ف مكان و قعدة بالمفتاح متعها و تليفوناته ..
و زادت عيلته انشغلت عليه و كبر الموضوع هلبااااا ..
جو عمام منذر بمعارفهم و المرة هادي بوه اتدخل و جو الأمن طبو خوت العروسة و قعدو يحققو معاهم يحسابوهم خاطفينه و لا قاتلينه ..
و امالي البنت قالو هذا فيلم مدايره بش يضحك علينا و و ننضرّوا ..
و عمي الطاهر يقوللهم اما فيلم نبي ولدي وين راح 💔
طبعا غزل و امها و حناها و جدها روحو مننا بعد يومين ..
و سمية تشبح فيا كيف نطبطب علاها و نجيبلها و نحلفلها تاكل و كل شوية نتفقد فاها اعتذرتلي على الموقف هذاكا ..
قلتلها عادي .. زي اميمتي ميجيش بينا شيء ..
سامحت و صفيت نيتي و خليتها على الله ..
المهم منذر بخير منبي من الدنيا شيء 😔❤
تعرفو إنّ السماح أصعب من الكره ..؟
لما حد يغلط فيكم و تبدو تغلو عليه ..!!
و تجي ف مجمع و يتخطاكم فالسلام ،، و لا لما يبدا يدوي عليك غلط و يشوهلك ف سمعتك
و انت على قد ما تبي تعامله بالمتل ،، وقت يجي قدامك تنسى انك قلت حنديرله هكي و هكي
تلقاه تسلم عادي ،،  و تجبد روحك بخيرك و شرّك ،، لا توجعه و لا ادير أي ردة فعل زيه ..
يبدا الشيطان يقولك مفروض درتله هكي ،، و مفروض مسلمتش ،، و مفروض تعاركت معاه ..
لكن انت تقول يلا 😔
خليها على الله تو ربي ياخد الحق
..
..
و بعدين يضربه الحيط و يصيرله موقف يقولك سامحني
و انت تتحشم و تساير ،، صح مش زي قبل و لكن القلب ما يفتّش فيه حد 👌🏻
هادي اللي تشبحو فاها أعظم منزلة في التسامح ربي قال علاها  " كاظمين الغيظ "
و ربي قال تاني ف كتابه الحكيم ..
{ وَلَا تَسْتَوِي الْحَسَنَةُ وَلَا السَّيِّئَةُ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ * وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ }
طبعا مها كلمت غزل تبي تتطمن و قالت تبي تجيها هيا و اختها رونق فحوشنا قلتلها لاااا ..
بحكم سمعتها تكلم فاها و بعدها كلمني منذر يطمّن فيا على صحته حكيتله بتجي صاحبة غزل للحوش قالي مني ؟
قتله مها و اختها .. قالي بتكشيخ قوليلها متجيش 😡
شن المهزلة اهيا تو يروحو و تجيها فالحوش غادي ..
اني قتله وسع بالك خلاص مصار شيء ..
قالي .. تجي يتخلّط شري و شرّك 😡
قعدت ف موقف بايخ
و قلتلها غزل معليشي اني منحبهاش و منبيهاش تجي لحوشنا .. و تصدقو
ان زعلت 😑
مشبحتش للي درتهولها كله و ان فتحتلها حوشنا .. لكن زعلت ان قلتلها مها متجيش .. 🙄
و طه كذلك مرة مررة يخش و تبدا هيا واقفة ف جنان يبدو بلعاني باش يشبحو بعض و يحكو
امي شبحاته خداته ف تركينة و كشخت عليه ..
قتله مش معقولة اماليها مخليينهم عندنا و انت تخون فالامانة 😡 معش نبي وجهك فالحوش لين يروحو
نزلت سفرة الشاهي لبابا و الحاج حمد و قالي بوي قعمزي هدرزي يسأل عليك عمك حمد ..
و قعدت نهدرز و متحشمة و هو يبتسم ..
كان باين عليه الكبر ☺ و العمر أثّر فيه خلاص ..
خلاني بهدرزته و حكاياته نتفكر أيام درنة و العنب و الجنان ...
و تفكرت جداي ،، 💔💔