رحلتي إلى الموت

الحلقة 17

#رحلتي_إلى_الموت 💔 الحلقة 17
بعنوان (  ما قبل النكبة  )
#الكاتبة_خلود_شلابي 
خشينا لأماليا و جبنا معانا كل الخير ..
أول ما شفت اللايدة جاني خيال جداي طول رحمة الله عليها 💔
ركبنا لدورنا .. و مدخلنا كان بروحه
و حوش جداي واخده عمي الصغير متزوج فيه زي ما تعرفو ..
و باقي اعمامي كل واحد بحدا حوش جداي ..
خليته واقف يستنى فيا و خطمت خديت لفة نسترجع ف ذكرياتي ..
اهني كنت نلعب 💔
و اهني نلحق ف جداي لما كانت تعجن و ترمي فخبزة التنور .
مشيت لجيهة الفرن لقيته قاعد و معبي رشاد 😞
و كان الجنان معبي غرس و سطول ورد ،، اما توا حيوط و خلاص جيهة الساس كلهم شيمنت ..
كنا قبل لما نخشو ، نشمو ف ريحة الياسمين تفحفح ف هديكا اللايدة ..
قالي .. منذر هي شني
قتله هي يا روحي ..
و ركبنا
منذر جايب اكياس للصغار ..
و كيسة خاصة لولد اخته الصغيرون يزن ..
قتله .. حسني رعشت 😶
قالي .. حتى أني خال مالا شنو ،،
طقطقنا و جي ولد طه الكبير مروان فتحلي الباب ،، عمتي جت عمتي جت ،،
و بوي جيت حضنته و سلمت عليه و جي هشام نضت نجري و حضنته و قعدت نبكي كنت مستاحشاته هلباااااا .. و سلمت على امي و خليتهم يستقبلو في منذر .. و جي طه قالي كيف حالك ،،
اول مرة نرد عليه ،، قتله الحمد لله و جي بيسلم خشيت الداخل فته ..
لقيت غزل و حياة يراجو فيا ،،  جيت نجري سلمت على حياة و حضنتها و سلمت على صغار هشام الاربعة و قعدت نبوس و نعاود .. و جيت لغزل سلمت علاها و شديت يزن كان عمره عشرة شهور ،،  و بنت طه تمشي و تتكلم شوي ف تلاتة سنين و نص و لا اربعة ..
جيناهم مع الجمعة
خشت غزل للمربوعة و معاها يزن بش تسلم على منذر
و جو الصغار كل واحد و كيسته من عمهم منذر فرحانين ..
و اني قعدت مع حياة نهدرزو ،، كيف حالك و شن اخبارك..
قتلي ،، وينكم عطلتو جايينا احني و لا دهواري؟😑😅
قلتلها الزوز ،،
قتلي جت مرت عمك لطفي و بنتها امس هدرزو و قالو لما تجي رغد كلمونا بيجو حتى باقي بناتها المتزوجات..
قلتلها مليح بككل ،، ستحشتهم الحق
زوز من بنات عمي تزوجو و قعدت وحدة ..
حطينا الشاهي و الحلويات ..
و منذر قال منبيش قهوة لان سبق و شربناها الصبح بش نقدرو نتغدو يعني ..
مشو الرجالة للجامع ..
و احني قعدنا نهدرزو كان الغداء واتي ..
عصبان اللي يحبه قلبك و طبيخة فاصوليا و سلايط و خبزة تنور ..
الحمد لله كان حظي ان كل شيء واتي ،، كانو مكبرين بينا هههه ،،
حطينا هديكا الصفرة للرجالة و اني ناكل ف عصبانة وراء التانية 🤤
و امي تقولي سادك كولي معانا ،، قلتلها بنته مش عادية منحباشي يبرد .. 🤤😍
خشو رجالة جبنالهم الابريق و كروانة السلستين بش يغسلو يديهم ..
و جي طه قام السفرة و غزل لحقت الفواكه و المشروب ..
خش بوي و كان جايب للصغار كيسة و اني نشبح فيهم فرحانين ..
و جي مدلي كيستي قالي هادي ليك ، حتى انتي بنيتي صغيّرتي 😅❤
سلمه الغالي حتى معنديش صغار لكن متفكرني ،، قلتله
ان شاء الله نشوف صغاري بين ايديك يا بابا و تعيش و تجيبلهم ..
قالي .. اللهم امين يا بنتي ..
،
،
قلتها هالدعوة بكل حب ،، و بكل ثقة و من غير ما نتحشم منه ..
جت حياة فرشت المفرش ،،
و امي و غزل قايمين السفرة فيها السلايط و الفاصولياء و صونية العصبان قعدة ف المطبخ ،،  و اني نلعب في يزن ..
نقرص فيه من خدوده يعيط ،، تجي غزل تقول خيره 😨
نقوللها لالا مفي شيء يلعب 😶😘..
و تولي للمطبخ و اني نقرص و نعض .. و هو يعيط 😂😂
تي هيا وين العصبان ..
منذر من بعيد يضبّح ..
هادي بتعطلو علاها راه بتاكلكم 😂😂😂
و اني نقوله ... تي باهي باه
طبعا اني لابسة قفطان شيك ،، و متأنقة و ضيفة ،، هما يجيبو و الله مبيتش انوض و تلصق فيا ريحة الماكلة 😁
جابو صونية العصبان ،، و جو قعمزو ..
قلتلهم و اخيراااا ،، قريب صارلي هبوط 😖
و حياة جديد علاها جوي تضحك و خلاص و امي تقوللها راه حماتك هامعة ..
و شديت الخبزة و يزن لوحته و معش نشبح الا فالغداء ..
نغمس و ناكل و نعدي بالمسير و غزل تاكل بالشوي و شادة ولدها يعيط قلتلها تي احدفيه و كولي قداش ما تعقدي فيا ،، كولي و استمتعي ..
غزل تضحك و تقول باهي ..
عصبانة وراء عصبانة و خبزة التنور اللي زايدة ف تحميرتها و عاطية بنة مدخنة ،، و مع جغمة بيتري ،، متفهمو شيء ..
شبعت و الحمد لله ..
قلتلهم خلبنمشي  بش ينزل العصبان و هربت من الماعين ..
خديت معاي يزن و مشينا للمربوعة قعمزت بحدا بوي نهدرز ..
و طه يناشب في ولده من بعيد ..و هو يضحكله ..
منذر ياكل بالشوي و برزانة كالعادة ..
قالي نوضي اغسلي فمك كله مشروب ..
بوي .. قعدة مبطلتيهاش هالعادة ؟ 🤨
خديت كنينكس و مسحته قتله هاه ،،
بعدين قتله زيد صبلي طاسة نبرد بيها دنيا نو ،،
مدلي هشام حكة بيتري قعدت نشرب و نهدرز مع بوي ..
و مرة مرة يجو الصغار يقاطعو فينا ،، راهو شهد بنت هشام خدت كيستك ..
راهو ميسم بنت طه تلعب ب شنطتك ..
و اني انادي من بعيد ،، يمااااا خودي منهم شنطتي 😤
قام طه و هشام السفرة و ناض منذر للتواليت ،،
و بابا يلعب ف يزن و خشولنا صغار هشام ..
قعدنا نهدرزو و يقولولي وين عمتي لمياء مجتش ..
قلتلهم ولدها رجله انكسرت مقدرتش اتجي ..
جي منذر بوي قاله اتكى و قال للصغار خشو الداخل ..
نضت أني لقيتهم قعدين مقعمزين يهدرزو ..
تحشمت على وجهي خشيت بدلت ،، و طلعت نضم فالمطبخ ..
ليا كم يوم غارقة فالراحة و العسل ،، مفيش باس كان غسلت هالسفرتين ..
و ناضو معاي حلفتلهم قلتلهم ساد ما درتو و الله الماعين الا عليا ني ..
غسلتهم ،، و سيقت مطبخ و درت مطهر
و رجعت دوشت خفيف و لبست بيجامة متع برودة ..
و جيت اتكيت ف حضن ماما الدافي و نبوس و نعاود ..
امي مهما كان عمرها و مهما كبرت ،، نشبح في روحي ولا شيء بدونها .. 😞💔
و قعدنا نقرمو ف لمياء هههه
قتلي امك .. كل شوية تتصل ..
بعدها كلمتني فيديو و قعدت نغيظ فيها لين قعدت تبكي 😂😂 ...
و قتلي صحيتي يا رغد ..
قلتلها نبصر عليك ،، تعرفي خليتي مكانك ..
قتلي .. بجديات ،، قلتلها ايه ،، اليوم غسلت ماعين بروحي تفكرت كيف كنت ندبسلك فيهم ههههه
قتلي .. تي باهي باه فالفرح ينادو ف هادوكا و فالشقاء تعالي يا مبروكة ..
قعدنا نضحكو عليها كيف راقيلها
و حياة تضحك عجبها جونا ما فهمت شيء ..
خشت غزل بدلت لمروان و ميسم ،، دوشتلهم و لبستهم و عطرتهم ،، و هما ما ينادو فيها الا ماما ،،
و مع التهدريز و كل وحدة تقول ف اخر اخبارها حتى فواكه مقدرناش كيف نحطوهم حكايا تعبت فل Full ...
خدينا نعسة ،، و مع العصر ..
منذر قالي بنمشي ندير دورة عندي صاحب اهني ..
قتله .. رد بالك على روحك و متعطلش عليا يا روحي 😘
خدا من يزن بوسات و قال لاخته بلكي تبي حاجة و لا ناقصك شيء ..
قتله .. الحمد لله ☺
و بعد مغرب و بعد تهدريزة العشية و الكبتشينو و الكيكات ..
حياة استأذنت مننا هيا و هشام و بيروحو للشقة  ..
لو تتفكرو هشام ديما عنده صحاب يطلع معاهم قبل لما نجو لدرنة ..
اجر شقة جديدة مفروشة قاعد فيها من واحد صاحبه ..
و قالت نتلاقو  ..
قلنالها ان شاء الله
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
( اللي مزال ما بعتتليش طلب صداقة تبعتلي روايتي الجديدة حتكون ف ايميلي بنبدا انزل غادي  👌🏻❤)
اتصلت بمنذر ..
قالي مروح فالطريق ..
جي و حطينا العشاء درنا قلايا كان عشاء خفيف مع فواكه ..
فرشتله و قتله ارتاح ..
و اني خشيت رقدت مع غزل ف داري ..
يزن مرة مررة ينخلع فالليل و ينوضنا ،، قعدت نقول فخاطري قصدك لما نولي ام يبدو ينوضو فيا من النوم؟ 😰
نضنا الصبح حمام طابور ..
ما غير حمام المربوعة ..
تفكرت ايام البساطة ،، و كيف كنا نتلاقو ف حوش جداي و الزحمة و كل شيء بالطابور ..
توا معش فيه حد غريب درنا سفرة فطور وحدة ..
منذر كان نايض بكري جابلنا فطيرة سخونة و عارفني نحب البريوش مع قهوة الصبح  ،،
يفكر في راحتي و شن نحب ❤ مهما كان المكان اللي احني فيه ..
قالي ديريلي قهوة ..
قتله .. حاضر ..
امي .. اهو درت قهوة 😅
هو سكت ،، لكن يحب قهوتي اني فالصبح ..
قلتلها لالا قريب اتم خلندير وحدة جديدة
طبعا كنا جايبين معانا بن متعنا الخاص ،، نوعية كويسة ..
طيبت قهوة و حسبت بابا خشلي للمطبخ و قالي خيانة مدايرين قهوة برواحكم 😁❤
قتله .. لالا غر نسيت مطلعتهاش جايبتها اهني للحوش  ،،
صبيتها ف فناجين و حطيت لبابا فنجانه و خديت بريوش بالمربى و حطيته فالسفرة و قعمزت بحدا راجلي .. لازم صباحي معاه و الا حتكون حاجة ناقصة ..
قالي .. امس شفت واحد يأجر ف شقق ،، قلت ناخدو شقة برواحنا ،، اللي كنت عابي عليه معجبتنيش الشقة متعه ..
قتله اهو الحوش واسع ..
قالي .. لالا نبي بحداي مرتي اني ..
ضحكت و قتله باهي ..
اتصلت لمياء ب بابا و شوره تعاركت مع هاني .. مباش يخليها تلحقنا فالمطار .. تبيه يكلم راجلها ..
و امي حتى هيا كلمتها ..
و كالعادة بابا مستحيل يوقف معانا احني بناويته..
قاللها .. خلاااااص ،، قالك لاااااا ،، يعني لاااا
اسمعي كلام راجلك ..
و هاني اتصل ب بابا يستعذر مشى بابا قاله لالا عندك الحق ،، اللي تبيه يا ولدي ،، خلاص خوها الحمد لله كويس مش لازم تجي ،، و اني ما عاطيهالك الا نعرفك قد الثقة رد بالك علاها سلم ولدي و مش وقت مشاكل راه بيناتكم صغار ..
و هو يقوله عندك الحق يا عمي ،، و الله امي مريضة و الجو ابصر كيف كان هذا انت تعرف اني مش حنقصر ..
قاله .. نعرفك يا ولدي و خيرك سابق ..
و لمياء جت على راسها ..
سكر بابا الخط .. و قال ربي يهدي و خلاص
قتله .. هيا من حقها يا بوي ،، حتى هو ربي يهديه ،،
قالي .. متطلعش المراء من طوع راجلها شن يقول هو يصير 😠
قتله .. خوها ليها سنين متغرب و هي خاطرها تشوفه هذا علاش هيا تأترت ،،
قالي .. اسمعي يا بنتي ،، فهالدنيا لا لاقية بوك و لا خوك و لا عمك و لا خالك ،، ما تلقي الا راجلك ..
الخو بيتزوج بيفوتك ،، و العم و الخال عنده مراء و صغار ،، و البو و الام مش دايمين لحد ،، لكن راجلك هو اللي بتلقيه ،،
اني سكتت و حسيت كلامه منطقي ،،
قتله ،  مستحيل نلقى حد زيك يا بوي ،، تعرف الطريق كلها لما جينا رغم ان تعبانة و كان نلقى ننعس ..
يقولي منذر حطي راسك ارتاحي ،، نقوله مستحيل. نحس كان رقدت و هو مرات ينعس يدير بيا حادث ،، 😅
معمريش رقدت فالسيارة ،، الا لما انت تسوق بيا ،، معنديش ثقة ف حد غيرك ☺
بوي عيونه دمعو ،، و قالي ان شاء الله ربي يعطيك ما في خاطرك يااااارب ..
جي الغداء ،، تغدينا رز مبوخ بالبصلة و التقلية
و قلنا العشية نديرو دورة بالسيارة ..
جت حياة و هشام كانو واخدين سيارة بابا يتحركو بيها ..
رفعنا حاجات العشاء و مشينا نتزردو
درنا شواء و مكرونة ..
و لعبو الصغار و ادهورو ..
غزل اتضم و اني معاها و حياة قلنا خيرها ،، حتى الطاية تقوليلها مديها شي شيءء
واخدة تركينة هي و هشام تقول معمرهمش شافو بعض ،،  احني لمن جايين يعني ؟؟ 🤔
،،
،،
و منذر ملقاش شقة او مكان باهي نقعدو فيه ..
قتله خلينا اهني و خلاص هما مزال هالايامات و نروحو ..
طبعا مرة مرة يجي حد من حوش عمامي ما عدا حمزة ،
سلمو على بوي لما جي اول مرة قبلنا ..
،،
كلمنا مرت عمي لطفي بش تجي تهدرز ..
جت هيا و البنات و حياة تغدو عندنا و حصلنا لمة قنينة و جو نساوين عمي التانيات بعد الغداء يهدرزو  ..
قعدو الصغار يتعاركو و اني نحز بيناتهم لين عفلقوني ،
قتلي وحدة من نساوين عمي ،، عندك الحق مش واخدة على دوشة الصغار ،، اني بعد صغاري كبرو معش نتحمل الدوشة نهائي ..
اني حسيتها فسط كبدي ،،
علاش ف اي شيء لازم يجبدولك ان انتي معندكش صغار حتى لو تحزي فالعراك تطلعي متتحمليش الدوشة ؟ 💔😞
ناضت التانية قالتلي ،  مشيتي عاينتي ؟ نحسه خمسة سنين هلباااا مفروض تشوفي وضعك ..
قلتلها ،، الحمد لله ما فينا شيء تو ربي يعطيني ..
و مش عارفة كيف شديت دمعتي ،،
جت شهد شادة طاسة امية و تجري باها قمتها منها و خشيت للمطبخ نبكي 😭 ..
فتحت بلكونة و قعمزت انطويت على روحي و قعدت نهدرز كأن ربي يسمع فيا ❤ ،،
ياااارب خليتها عليك يا من تدبر الامر  ،، ياااارب اني راضية باللي كاتبهولي ،، ياااارب سامحني لما نبكي ،، مش لاني مش راضية ع قضائك و قدرك ،،!! لااااا
أني بس يوجع فيا كلام الناس منعرفش علاش ميختاروش ف ملافظهم و عندهم عادي يحكو ب شيء مليهمش علاقة بيه 😭
ياااارب قويني ،، ياااارب أني عارفة حتعطيني فالوقت المناسب و الزمن المناسب و ان هذا اختبار لصبري ،،
يا رب حنكون قد هالاختبار 🤲🏻👌🏻
يا رب حنكون قد هالاختبار ،، 👌🏻❤ ..
خشت عليا غزل لقت وجهي مقلوب شوي ..
قتلي نوضي اغسلي وجهك قبل ميجي حد ..
قلتلها .. ايه حتى ني نايضة ..
قعدت نغسل ف وجهي ،، و قلتلها شن رأيك نقولو لمنذر يرفعنا لحوش جدك نشوفوه من بعيد و نتفكرو ايامات زمان ..
قتلي .. حتى ني خطرت ف بالي ،، يا ريته ما اجروه كان هذا راه قعدنا فيه ..
خشو باقي البنات و حطينا الكابتشينو و سينابون درته اني و غزل و كيكة باردة زي برادة نساوين عمي 🙃 ..
حياة ،، صغارك خاشين للحمام يلعبو بالصابون ،
حياة ،، ولدك يولع فالغاز  ..
حياة بنتك راسها عالق تحت الجلسة 😰
و هي شيء ، شيء ،،
قعدو للعشاء ..
منذر خش لقاهم مروحوش اتضايق من الزحمة و قالي بنشوف فندق نقعد فيه ..
بسلامته يتحشم و ميحبش يثقل على حد ..
طلع من غير ما نفهم منه و قالي متدورينيش فالعشاء ..
عشيناهم و روحو ،، و روح هشام و مرته و خلو صغارهم عندنا ،، 🙄
و اني نتصل بمنذر رد عليا ..
يقولي ستحشتتتتتتك
نقوله حتى ني .. باهي وين انت ..
قالي بنبات برا ..
قتله وين حصلت فندق ؟؟
قالي .. اي
قتله .. وين ..
قالي .. مكان و خلاص سادك قصقصة ..
قتله .. غر تعالى خليتلك عشاء مليح ..
قالي .. صحتين و الله ما عندي نية ..
نسمع ف صوت سيارة ..
قتله قولي الحق منذر ،، انت قاعد فالسيارة؟
قالي . اي بنبات فاها ..
قتله .. خش يا روحي تو بابا يسمع يزعل منك ..
قالي .. نبي نرقد بروحي خلااااص احتمال نروحو غدوة ..
قتله .. غر خش و نروحو غدوة حاضر ..
قالي .. تعرفي شنو ؟ تعالي اطلعي نتدهورو اني ووياك بالسيارة ..
قتله س 11 و معاها ..
قالي .. و كان 🤨 شن طالع مع صاحبتي ؟
قتله .. تو بيفهمونا غلط ..
قالي .. منيش مدور حد اهو بنجي نلقاك واتية .. و سكر الخط
و اني نتخضر و نتصفر 😬😰
مشيت خشيت الداخل ..
و امي تقولي وين راجلك عطل ما جاش ..
و طه قال تو نتصل بيه نشوفه وينه ،،
قلتلها .. يما بنطلع ندير دورة عالبحر نحس خلوقي ف شيشة ..
قتلي .. فهالوقت ؟؟ خيرك هبلتي ؟
قلتلها ديما نطلعو موخر فالليل ،، نديرو دورة بالسيارة و نروحو ..
قعدو كلهم يشبحولي ،، و ان شاء الله تفكيرهم ميمشيش شمال ..
لين اتصل باخته و قاللها تطلعي معانا قتله غزل تو نقول لطه ،، و قاللها باهي اطلعي ..
طلعت اني و غزل و يزن و الصغار التانيين امي قالتلها لالا خودي راحتك تو نشدهم عليك بري اتدهوري،،
و يزن يبيه خاله طبعااا ..
و امي قالت ليل مرة تانية نطلع معاكم بكري ..
ركبنا و درنا دورة فالبلاد ..
خشينا شارع الفنار ،، و الدنيا كلها اضواء حلوة و اسراب ضيء ☺😍 ..
و يزن ف حجر خاله يلعّب فيه ..
و غزل تقوله شن رأيك تخطمنا غدوة قدام حوش جدي نبي نسترجع ذكرياتي أني و رغد ..
قاللها .. باهي
خدالنا جيلاطي و يزن يضحك و يشد فالستيرسو يلاحق فيه ..
و اخيرا رضى البش مهندس ان يقعد و يبات فالمربوعة ..
خشت غزل ،، و قتله ستر ربي كلمت اختك ،، كلهم قعدو يفنصو فيااااا ..
قالي .. منعرفش علاش صدري غام عليا كان نلقى نروح ستاحشتك و ستاحشت حوشنا ..
قتله حتى ني يا روحي ..
قالي .. حصلت فندق مليح و نظيف ف الحدائق نقعدو فيه ..
قتله .. تمام
مع ان لينا تلات ايام كيف جايين ،، الراجل فيسع ما قلق
و هديكا الليلة مخلوناش نرقدو معركة طاحنة بين الصغار و امي تندب ،،
و بابا يكشخ عليهم ،، يتجارو و ينقزو ،،
قلتلها  ، علاش شديتيهم يمااا تشبحي فيه الحوش ضيق ،، و صغار طه يتعاركو معاهم 😤
قتلي امي .. اني ما شديت حد ،، هيا قالت خليقعدو عند حوش جدهم اليوم و طلعو  شن بنقوللها يعني ..
قلتلها .. عليك ليلة غبرة و خلاص 😑
قعدنا نهدرزو اني و غزل و طه دارلهم سبتة بش خافو
قتلي ،، موتية اجواء هيا ووياه قالت بندبس جداهم فالصغار ..
قلتلها ،، متفهميهاش كيف زي المزاجية و لا مفهمتش ،، بعدين كانو هما ف المانيا و سنين  ،، جايين زيارة وقت اجواء رومانسية توا ؟؟  و فوق منها لا تضم و لا تحوس عندي احساس ان العصبان هداكا اليوم ما مستش فيه ولا حاجة تره احلفي؟
قتلي .. صح جت قبلك ب شوية نضت بكري اني و عمتي طيبنا الغداء 😂😂
قلتلها ،،  عليك نفخ حتى النوم معش لحقنا عليه يا قعادي اني ووياك رجالاتنا ف مربوعة  😤
و غزل .. تضحك
سبحان الله تغيرت و ع قد ما نقول فيها شوية ..
هيا ك شكل ملاك ،، و بدت ملااااك فعلا .. ❤💓
جي تاني يوم فطرنا كالعادة و طلعنا نمشو جيهة حوش جده ..
و سبحان الله ،،
قعدت نأشرله بصبعي و قلتله اهني عمي الحقير ضربني لما جيتكم و معاي بنته الخنابة ..
و اهني كنا نلعبو ،، تتفكري يا غزل
و غزل تقولي ايه 😅
قالي منذر ،، و اهني كان طه من صغره حاط العين على غزل يعاكس يحساب روحه يفوت فيه 🙄 ..
اني و غزل ضحكنا ههههه منذر خلاص فقشها ..
قرب من حوش جده ،، و قاعد الغرس اخضر و الشجر مثمر .. واضح ان الراجل و عيلته اللي ساكنين فيه مهتمين بيه ..
نزلت غزل للصيدلية خدت حاجات و حطيناها ف حوش بوي ..
و مشينا للفندق ،،
الطريق كلها و هو ماسك يدي و يبوس فاها .. و بقولت ستحشتك ..
قتله هما كلهم تلاتة ايام .. 🙃
قالي .. تقولي عليهم تلات سنين ،،
نزلنا و نزلنا صاكواتنا ..
و لا صار من تخييم لا طياح سعدي ..
بدينا نرقدو ف الفندق و نجو للعيلة مرات فالعشية و مرات من الغداء و مرات نطلعو نتزردو كلنا ..
و لمياء تكلم فينا فيديو و تبكي 💔 ..
كنت حاسة بيها وخيتي ،، تبي تكون معانا ف لمتنا و بين عيلتها اللي قعدت سنين متشتتة ..
بعد ما كنا كل واحد ف تركينة ، و كل واحد يصارع ف دنيته و مشاكله ، اهو الحمد لله ،،  التم شملنا و درنة جمعتنا ببعض ❤
يوم 8 سبتمبر 2023  فالصبح
و كنا ناويين نروحو اني و منذر ..
اتصلت غزل بمنذر و احني موتين حاجاتنا باش نتسقدو للغرب
قالت عمي تعب من امس رافعينه للمصحة ،،
قعد يشبحلي و اني زي الفاشلة مش قادرة نفطر  كان زي لي ضاربني المكيف و حلقي يوجع فيا ..
نسمع فيه يقول تمام ،، تمام تو نجي باهي
سكر الخط
قتله .. خيرك حبيبي شن فيه ؟
قالي .. لالا شيء ،، خيرك افطري ..
قتله ... كبدي تلعب مكيف هلكني ..
قعد يوكل فيا ب غصب و اني نقوله لا منبيش ..
نضت نجري رجعت فالحمام ،، و نحس ف رقبتي توجع فيا بلغم كله مصكر ..
صبلي شاهي سخون بالقرفة قعدت نشرب فيه على امل ان يهفت عليا الوجع و خديت بنادول ..
وتيت روحي ..
و هو طلع برا ..
بعدين خش للغرفة قام صاكواتنا ،، و نزلنا ركبنا فالسيارة..
قالي .. اسمعي
قتله .. نعم
قالي ..  شوره بوك مرض امس و رفعوه للمصحة ..
قتله .. لا حول و لا قوة الا بالله 😨 ..
و شن حاله توا ..
قالي .. اهو تو نحطك عند اماليك و نلحق هشام ..
مشينا لشقة هشام جيهة جامع الصحابة ..
جيت بنزل صاكوي قالي خليهم توا ..
و ركبت للدور الثالت كان اخر دور ..
امي ف حالة ..
زادت ما خوفتني ،، قلتلها شن فيه ؟؟
قتلي .. تعاودتله الجلطة ناض بيصلي الفجر طاح علينا 💔😭
قعدت نقول لا حول و لا قوة الا بالله .. و من قاعد معاه و شن قالوله ؟
قتلي كيف روحت منه قاعد ف العناية توا
اني اتضايقت و حسيت الدنيا لعبت بيا ..
شرقت بالبلغم و نضت نرجع تاني..
امي تقولي خيرك ؟ قلتلها حصلت ضربة من مكيف 🤧
كلمني منذر و طمني قالي بوك فاق و الحمد لله ..
بيديروله صور اشعة و تحاليل ..
قتله .. متقدرش تجيني نشوفه ؟😢
قالي .. ممنوع زيارة محد خشله ..
قتله .. تمام طمني بالله عليك 😭
قالي .. ان شاء الله ..
مع ال 2 جو خوتي و راجلي ..
و قالو رجليه معش يقدر يحركهم ،، و بيخلوه تاني فالملاحظة ..
و لا عندنا نية ف غداء و لا عشاء ..
روحنا لحوشنا و قعد طه و غزل و الصغار مع حياة ..
و قالو لمنذر خود راحتك فالحوش ..
روحت معانا امي ..
امي يوم كامل مكلت شيء .. خفت علاها و درتلها سندوتش
قلتلها .. انتو الزوز هلبا هكي ،، شدي صحتك اني معش نتحمل نشبح فيكم حاجة 😭
و امي وجهها اسود من الغشاش ..
ع قد ما حلفتلها ما بتش تاكل لين جي منذر و قعد يساير فيها كلت و عطيناها فواكه و هكي بش صحصحت ..
رقدت بحدا منذر فالمربوعة و امي الداخل رقدت بعد ما خدت حبتين راس ..
نضنا الصبح
9/ سبتمبر /2023
ضمينا حوشنا ،، و درتلهم فطور خفيف و النية مسكرة لكن لازم الواحد يقاوم ،، امي لازم تقاوم 👌🏻
درتلهم قهوة بش تعدل راسها و مشينا للمصحة زيارة ،، بابا حتى كلام لااااا ،، معش يقدر يتحرك 😭😭
يشبح فينا بعيونه و خلاص ،،
اني معش قدرت نتحمل قعدت نبكي 😭 ،، و هشام يقولي اسكتي خلاص
خش الدكتور بيشوف حالته .. و احني طلعنا البرا
نسمعو في الممرضات يحكو ان فيه اعصار جاي اسمه دانيال بيجي من اليونان باتجاه ليبيا فالشرق و يحذرو فالناس من الطلوع و الدراسة ..
و كان الجو غبرة شوية هداكا اليوم ،،
روحنا للشقة بحكم هيا قريبة من المصحة ،،
لمياء كلمتني تبكي و تقولي كله من هاني حرمني نشوف حتى بابا ،، 😭
قلتلها .. خلاص نصيب قالك بوك اسمعي كلام راجلك ولاه ؟ خلاص اسمعي كلام راجلك ..😢
جو عمامي قالو السلام و خشو لبابا
و بعدين طلعو قعدو يحكو و جي عمي لطفي هدرز علينا و وجهه اسود و يقول ان شاء الله ربي ينوضه بالسلامة ..
جو كلهم الا حمزة ،، حتى و خوه بين الحياة و الموت ما يبيش يجيه ..
طلع طه و منذر يقوله تو نرفع التحاليل روح انت بالعيلة ..
و هشام قاعد مع بوي ..
ركبت و فوق من نفسي معاه ..
و مشينا لشقة هشام ..
توضيت و صليت و قعدت ندعي لبابا ينوض بالسلامة 😭
قبله بيوم كنت نهدرز معاه و جابلي وردة ،، و قالي اقعدي باتي انتي و منذر علاش قعاد الفنادق ،، قتله مرة تانية 😭😭
يا ريتني ما خليته و لا سمعت كلام منذر و بتنا البرا 💔
قعدت نلوم في نفسي يا ريته درت كذا و مدرتش كذا ..
يا ريتني فعلت كدا راهو توا شبعت من بابا ..
لكن كله مكاتيب من ربي مهما الواحد يدير روحه فالح ،، مش حيتفلح في حاجة بيد ربي 😔
جو نساوين عمامي التلاتة نفسهم و قعدنا بين اللي ماشي و اللي جاي ..
و فالليل روحنا و امي قالت بنقعد فالشقة ..
روحت اني و منذر و قعدنا نتعاركو ..
علاش مرفعتنيش نشوف بوي ..
قالي زحمة و اقاربك رجالة كلهم جايين ..
قتله نبي نشوف بوي ،، شن دخلني فيهم اني ،،
قالي ،، هذا مناقص نخليك تخشي و تقاحري الرجالة كبري عقلك يا رغد راه مش ناقص نفخ ..
كان جاياته شباشب و متعفلق ،،
قالي قلت لهشام خلينا نرفعوه باسعاف لبنغازي و من بنغازي  لطرابلس ،، قاله لالا المصحة يديرو فجهدهم ،، مع ان المصحة طاقمها ضعيف و امكانياتهم بسيطة ..
قتله .. اي كان نرفعوه لبنغازي خير ،،
قالي خوك يحساب روحه فاهم كل شيء 😤 ..
قتله .. يلا تو غدوة نزيد نكلمه ..
قالي .. انتي مدخلكش
قتله .. كيف مدخليش ،، هذا بابا يا منذر
قالي .. تقولي حرف واحد بسس ، نروح بيك للحوش ..
تعفلقت و خشيت لفراشي نبكي ،، و هو المرة هادي مدورنيش نهائي ..
كان راقيله ابصر شن قايله هشام بش يتكهرب ،، 💔
تلفتتله و اني نبكي ،، اول مرة دموعي يهونو عليه هكي ..
قتله خيرك بالزبط ؟
قالي .. متضايق ،،، قلبي غامني قداش يوم .. نبي نروح
قتله ،، بتروح روح اما اني بنقعد مع بابا ..
قالي تقعدي عينك وين انتي وين اني ،،
قتله .. اني بنقعد اهني ..
قالي .. بوك قعاده اهني غلط ..
و فصل الخيط متع التاكو .. و هرب الضي
قتله .. حالة هالضي شوره ما حد قال نصلحه كل ما يسخنو الخيوط يتسكرو ..
نكلم فيه و نبكي و نرعش ..
مسحلي دموعي ،، و قالي معش تبكي ..
قتله .. انت ادير فالعوج
قالي .. شن درت تره ،، ؟ نكلم فيك على مصلحتك،، هو خوك و محترمنيش ،، بتقوليله هكي بيقولك راجلك مقريك و اني راهو منحبش حد يوصل فيا ..
قتله .. خير مصيبته هوا شن قالك ؟
قالي قتله خلينا انزلوه ف اسعاف نعرف مصحة كويسة لي رقدنا فاها امك و نروحو بيه يتعالج ،، قال لالا الامور طيبة اهني ،،
قتله ،، وينها الامور طيبة و مفيش تحسن و لا اهتمام ،، خليني نروح بيه حتى اني ..
قالي .. كان بتروح و شديناك روح .. يعني مسد مخلي مواضيعي  و خايف على عمي يقوللي هكي 😤
قتله .. مرات مقصداشي ،، من كتر ما بوي واجعه و يفكر قالها بدون ما يقصد ..
قالي .. نعرف كويس شن قصده ،، ياسر يقولي بوك خانب من الثورة و فيسع ما بديتو معبيين ،، شوره كان يخنب و يعطي فينا و احني منندروش ☹
حسيته خوي زبلها هلبااااااا ،، و راجلي عنده الحق ..
هشام تغير و خداته الغربة ،، و بدا دابه داب مرته و صغاره ،،
تفكرت نصيحة بوي ..
قتله .. على خاطري اني تحمل هاليومين ،، و اني غدوة نهدرز مع امي ،، كان مزال بيقعدو نروحو و خلاص ..
قصدي بنغازي قريبة ع الاقل نرفعوه غادي ..
قالي .. لالا متجيش نسيب امك ف محنة زي هادي .. انتي توا ارقدي و متخمميش ف شيء ..
خشيت ف حضنه و نسمعو ف صوت القابينة برا تتطربق و شكله فيه مس كهربائي ..
نضت فصلت التاكو و وليت رقدت ..
جي يوم 10 سبتمبر 2023
نضنا ف هذاكا الظلام .. فتحت التاكو تقربع عليا خفت ..
قالي منذر فوتيه الضي ..
درنا قهوتنا و بشكوط و كيكة الجاهزة قعدنا لل12 و مشينا للشقة حطني و مشى للمصحة ..
امي كلمتني ع غير طريق .. قتلي بلكي راجلك قالق و عنده عمل شديناه ..؟
قلتلها ،، شن امالا هشام عبالك راسك 🤨
قتلي .. امس يحكي خوك قال منذر خلنروح بيه و هو حالته متسمحش يطلع ..
قلتلها ،، ولدك هذا لا اسلوب لا منطق ،، قاله مصحة ضعيفة و مش مهتمين بيه بيرفعه باسعاف لبنغازي و لا للمصحة اللي رقدناك فاها عندهم طقم ممتاز،، و الباقي مداما ولدك هكي مفروض منذر معش دخله يتكلم و يفزع و اتطلعوه ف الاخير مينفعش ..
قتلي .. من قال توا انه مينفعش ؟
قلتلها ،، شن معناته كلامك قالق و شديناه ؟
قتلي.. ماهو حتى قعاد ميقعدش و خدا فندق ،
قلتلها .. يما احني من البداية جايين دهواري و تشبحي فينا عمل ،، و نفسية اني كانت صفر ،، و حوش ضيق و ضي كل شوية يفصل و حكايا نو و رطوبة و زحمة كل مرة جاي واحد من الاقارب ،، شن تبيه يقعد فالزحمة ؟؟
خيره ولدك ميقولاش تعالى نطلعو و لا نكسدو ،، يجو من الصبح فطور غداء و الفالحة مقعمزة كله طالع من جلدي و جلد غزل و يقرب المغرب يطب مرته و صغاره ويروح ،،
و فندق خير ،، الراجل يبي خصوصيته و ميبيش يثقل على حد ،،
يلاه توا بتنا برا طلع قالق ؟؟ 😑
علاش ولدك مقعدش معاكم فالحوش و اجر شقة؟؟  و لا الخصوصية لناس دون ناس 😒 ..
قتلي .. لا عنده الحق خوك مفهمنيش كويس ،، تو نكلمه
قتلها بالله فكيني منهم ولادك قداش ما يدرهو الكبد ..
ع خشة حياة و وراها غزل ..
قتلي حياة .. من فيهم اللي ايدره الكبد
قلتلها .. الزوز 😒
قتلي علاش شن دارولك ..
قلتلها ،، خليني ساكتة و خلاص ،،
قتلي ..  لا احكي ،،
قلتلها نهدرز اني و امي ..
شكلها تبي نشاف نضت و خليتها ..
و مرة تقول ضهري ،، و معنديش جهد انوض ..
امي .. قالتلها شدي مطراحك ما حد قالك نوضي منبوش غداء اهو كل شيء قدامنا..
و غزل تشبح و ساكتة ،،
ناضت حياة خشت لدارها اتكت ..
قتلي غزل حسيتها زي لي قلقت مننا ،، بدت جابدة روحها و مقعمزة ف دارها .
قلتلها كان هذا روحي معنا لحوش بوي ..
قتلي .. قال طه خلياخدو راحتهم ..
قلتلها .. اياح علينا مرة هشام و مرة طه راحة شن لي بناخدوها و بوي فالمصحة تاعب .. هذا وقت مرض و كلنا بنصبرو ازمة و تفوت ..
،
،
،
،
خش هشام و طه مع القايلة  ..
و منذر قعد فالمصحة
ناداته حياة و قعدو يحكو فدارهم ..
طه ،، شن مافيش ما ناكلو ..
غزل ،، طيبت مكرونة اهو قريب نحطها ..
حطتله هو و هشام و امي
و اني كلمت منذر ..
قتله اهلين حبيبي
قالي اهلين
قتله وينك .. خيره مجيتش و تغديت
قالي .. لالا صحة كولي انتي و هنيني عليك
قتله تخلي فيا نتغشش قسم بالله 😭
قالي .. خلنكلم الدكتور ،، و نعاودلك
خشيت للصالة و هما متجمعين و حياة مقعمزة ..
قتلي انسوك دراهات الكبد ..
امي فنصت فاها و هما قعدو يشبحولي 😳 ..
يتبع 💔