رحلتي إلى الموت

الحلقة 15

#رحلتي_إلى_الموت 💔 الحلقة 15
بعنوان (  أقدار الله ❤  )
#الكاتبة_خلود_شلابي 
ف يوم نبي ندلع روحي كلمت منذر حطني في مركز تجميل و Spa
مشيت و قعمزت فالإستقبال نراجي ف دوري ..
قعدت تهدرز عليا وحدة .. مني منك
وين تشتغلي قلتلها كذا و كذا و منه تسويق لعملي بحكم اغلبيته عرايس و مخطوبات يجو للمركز غادي ..
و الصدفة المش متوقعة تطلع البنت هادي خطيبة محمد سلفي ..
شبحت لصوابع يدها مكانتش لابسة لا دبلة ،، لا شيء
سألتني كيف حال العيلة و هكي ..
و قتلي سبحان الله ،، من قال نتلاقى معاك ،، محلاك و محلى اسلوبك كان جينا سلفات راهو مدايرين جو ..
و الحق كانت بنية محترمة و تهبببل تمنيته محمد خداها ..
قلتلها بطريقة نبي نجبد منها الدوة .. اهو مع ان خسرناك لكن تهبلي بجد،،  اكيدة تخطيتي الماضي الحمد لله و شفتي لحياتك القدام ☺ 
قتلي ،، تبي الحق ؟
قلتلها .. ايه
قتلي .. لاااا ..
كل يوم ندعي عاللي كان السبب ،، فقيام ليل ،، و ف تراويح ..
مرة مرة نشبح فيه كيف ينزل فالسيارات في معرضه و نقعد نتفرج عليه .. 💔
قتلي ،، تصدقي يكلم فيا لتوا ؟؟ يقولي منعرفش خيرني ؟؟ مسحور و لا مفهمتش ..
و أني نفس الشيء حياتي واقفة ..
أني سكتت بعدين
قلتلها ... هادي مرته راهو كذا و كذا ..
قتلي .. اي نعرف ،، و انتي تتواصلي معاها؟
قلتلها ،، اني !!؟ 😳 مووووستحيل هذا مناقصني ،، هو بعيد عليها و مسلمتش منها يا بال نخالطها .. ان شاء الله ربي يفضحها ،، حتى ني قبل عرسي خشت لشقتي ابصر شن دارت فاها .. شدتها حماتي بالتابت ..
نادو على دوري ..
استأدنت منها ..
و خشيت للصاونة بروحي ..
كيست جسمي و طلعت دوشت و لبست بيجامة شورط طويل للركبة و سوريتها نص كم .. قطنية
قعدو يديرولي ف مساج ..
و كريمات ترطيب لرجليا و يديا و بديكير ..
نظفت وجهي و مع هيدرافيشيال ..
طلعت قعمزت ف الكافيتيريا خديت شاهي مغربي ب نعناع مع فطيرة مطبقة ب عسل و جت بحداي حتى هيا كملت باقتها و كملنا تهدريزنا ..
رن تليفونها ..
و قتلي سبحان الله .. محمد 😅
كلماته و فتحت المايك سمعت صوته .. و الحق كان مفتحتش المايك راه مصدقتش
و مشت بعيد شوية و كأنهم بيتفقو ان يتلاقو ..
سكرت و جتني تاني ..
قتلي الايام هادي كلها نشبح فيه ،،
قلتلها ردي بالك من مرته بسس..
قتلي ..تملح هيا اللي خداته مني و سيوره حيرجعلي
كل ما نتلاقى معاه نعطي فيه ف مية مقرية يشرب منها بالدرقة .. 
قلتلها انتي لما قالولك بيرجعو يديرو العرس علاش قلتي لا ..
قتلي .. مش اني ،، خوي قالي لين يتعالج افرضي ترجعيله و يقتلك و هو يقول منبيهاش منبيهااااش ..
الستة سنين هادو كلها حياتي واقفة ..
سبحان الله هكي مخلانيش ،، كل ما نبي نشوف حياتي مقدرتش ،، قلبي معلق معاه يا رغد 💔
قلت فخاطري عندها الحق لو اني فمكانها و منذر صارله هكي كنت حندير الشيء نفسه ..
قلتلها عندك الحق ،، ان شاء الله ربي يجمعكم ب بعض ، و ردي بالك بس ..
قتلي ان شاء الله .. و خدينا ارقام بعض قتلي عندي صاحبتي تبي ادير ديكور نجمة قلتلها تعاليلي انتي ووياها للشركة و ان شاء الله مش حتكونو الا راضيين ..
طلعت من المركز و ركبت مع منذر ..
و ما حد يقولي خيرك فقشتيها مع البنت ..
لان سبحان الله واضح علاها كويسة و اني نظرتي فالانسان و مع تجاربي الاخيرة خلتني نزبط الحقاني من السفتول ..
حكيت لمنذر قالي سبحان الله ...
و قتله خوك يكلم فاها 😅
قالي .. كان يفتك من هالشكل بسس و ياخدها خير ..
قتله .. ياريت 😂
حطني عند امي و كنت اني و لمياء مخططين نتلاقو فحوش العيلة ،،
لمياء بتبات و اني لا ،، قتلي علاش متبيش تقعدي ؟
قلتلها اني منقدرش ع بعاد منذر قلتلها بنروح نبي راجلي 😌😚👌🏻
و مع صغار نهى قاعدين عند امي ،، كانت حرجانة و مخلية صغارها الزوز ليها اسبوع مهناش ..
و مع صغار لمياء الحوش ولّى روضة ..
قلت لامي خير دعوتها ،، قتلي تمشي تملّح هيا امتى مش حرجانة مخلية حوشها خامر و الصغار خامرين عاركها و قتله نبي اماليا و بنتطلق ..
قاللها نوضي امالا ..
و الصغار قتله منبيهمش زعميتا بتلويله يده قاللها انتي بري و اني تو نعانيهم و انظفهم و نوكلهم خير منك ..
قلتلها ،، مبردها و خلاص ،، سبحان الله مكناش نعرفوهم هكي بالطريقة اهيا ،، صح مرخيين لكن مش لهالدرجة ..
جي ولد خوي يهدرز عليا و كنت جايبتلهم كل واحد حاجة ..
و البنت عشرة شهور ..
شادتها ف حجري نلعب فاها ..
ع خشة طه للحوش ..
شبحني اني تلبكت 😣
معش عرفت نحط بنته و لا نقعد شادتها ..
و الولد يقولي نبي حلوة تاني و يفتح ف شنطتي و ياخد قتله خود باهي ..
خش للمطبخ و طلع..
تعشينا و درنا جو ..
و راسي انتفخ من الصغار ..
خشيت للصالون و هربت من الدوشة ،، نراجي ف منذر بش يروح بيا ..
خشلي طه .. و قال السلام عليكم
اني شبحتله و قعدت مصدومة ..
قالي تاني .. السلام عليكم ..
لفتت وجهي و مبيتش نرد عليه .. 😔
كان يتكلم و متردد و خايف ..
قالي .. عندك الحق اتطنشي ، و اني نبي نتأسف منك ..
مش عارف خيرني ،، و انتي خليتيني نحمق عليك ،،
اني قالبة وجهي للحيط منبيش نشبحله بكككل ..
قالي .. نبي نصلح كل شيء ،، بنبدا ف حياتي من الأول  و نهى بنطلقها ،،
اني ساكتة مخلياته يخرف بروحه ،،
هو حسها و سكت لما لقاني منردش ..💔
بعدين تكلم قالي  .. اني نادم على كل يوم غلطت فيه عليك .. قسوتي هادي راهو مش من فراغ ،،  من كتر ما نحبك و نعزك ..
وجعتني كيف فركست من غزل و انتي تبي تاخدي منهم ..
و مش قصدي ندعي عليك ،، اني كان نلقى نشبح صغارك و نولي خال ليهم ،، و قعد يبكي ..
أني قلبي وجعني و مقدرتش نغفرله قعدت نتفكر ف كل حاجة اخخي دارهالي ،، مقدرتش 💔
اتصل منذر قلت هذا أكيد وصل ..
نضت و خليته ..
و هو ينادي يا رغد ،، يا رغد ..
و قفت بدون ما نتلفت قتله اسفة ..
بس اني منقدرش نسامحك صعب جدااااا ..
قالي .. عندك الحق .. باه قوليلي شن تبيني ندير باش تسامحيني
طلعت بدون ما نرد عليه ..
كانت الكسرة و الذل ف عيونه ..
مع ان مقدرتش نسامحه لكن بيني و بين نفسي نحبه مهما دارلي 💔
لكن مزال قلبي ما لانش ،،
مزال
يبيله بش نرضى 👌🏻
روحت لحوشي ..
و فاتو يومين ..
صارت ماصة ف حوش خالتي كانو مولعين دفاية فالشتاء ،، و ركبت فاها النار و هما راقدين و نهى توفت  ...
امي مشت باش تعزي لزتها خالتي ..
الناس كلهم عيبو علاها .. قالولها انتي بالك ف وفاة بنتك و لا ف اللزان ؟؟
و طه حمق عليهم و قاللهم الصغار تحلمو و لا تشوفوهم ،،  و هما أصلا قالو منبوش صغاره ،،
و ممشيتش لا اني لا لمياء ..
و حسبي الله فيها ان شاء الله تلقاه و تتلقاه و تتحاسب ف اخرتها و ف قبرها ..
ماتت موتة شنيعة شبه محروقة و مخنوقة ب اول اكسيد الكربون و الدخان متع المس الكهربائي  ..
🏵💎 روايــــات دمــــعتــي تـــــروي مــــــأســـاتــي 💎🏵
الكاتبة|:- 💜 خ ـــلـــود شــــــــــلابـــــي 💜
👑🎶Kd Sha La Bi🎶👑
جتني خطيبة محمد و صاحبتها للمكتب ..
رحبت بيهم و ضيفتهم ،، و حجزت مني ديكور ليلة النجمة و قلتلها لعيون صاحبتك حنديرلك تخفيض ،،
فرحت العروسة و عزمتني و سدت فيا تحلف و تعاود ،، قلتلها سامحيني عندي حالة وفاة قريبتي ،،٠ منقدرش نخش لعراس ..
منعرفش علاش من فمي طلعت ،، حتى و هما ما خلو ما دارو لكن احني لاخر لحظة نديرو فالأصول ..👌🏻😔
فاتو شهرين
الولد مرة بعد قداش باش يقول نبي ماما ..
نقولوله تبي ماما و لا اجديدة .. يقول اجديدة من كتر ما لاقي الاهتمام و الدلع ..
حتى من صغارها ميحبوهاش ،،
و خالتي تبعت مع نساوين خالي صغارهم يربوهم بروحهم ،، قالتلهم امي احني اصلا مناش مخليينهم و لا نفرطو فيهم  ،،😒😡
و بدا طه كل ما يلقاني يسلم و اني نطنش عليه و معش نجي هلباااا لانه بديت نتضايق منه ..
كلم راجلي يبيه يخش بينا صلح ..
قتله يا منذر ،، فكني منه منبيش نشبح وجهه و لا تجيبلي سيرته و منذر يقولي وخيك الله غالب تحمليه سايري و خلاص ..
قتله لااااا .. لا خوي لا نعرفه ..
.
.
.
.
.
و الفترة هديكا كلها ،، انطويت على نفسي ،، بديت شادتها خدمة و دق ،، و كل ما ندير عقد مع زبون نحس بالإنجاز ،، و منذر يقولي وسعي بالك الخدمة مش هاربة ،،
بس أني خلاص لقيته مهربي الوحيد ..
حتى في ايام مفيهمش خدمة يقولي نمشو لمكان نقوله لالا ،، خليني توا منسجمة فالعمل ..
و لما نبدا بروحي فالحوش ،،
نطلّع تست الاختبار لي كان شرطة وحدة و اني زدت عليه شرطة ب خطاط و نتخايل فيه ايجابي و نقعد نبكي و نقول يااااارب ارزقني و ارزق كل محروم ،، يا رب ارزقني و ارزق كل محروم ،،
كان راجلي عارف اني متقوقعة على محيطي ،، نبي وقت بش نبرا ..
و مرة يتحمل ،، و عشرين مررة ينقرز و نتعاركو ،، نقعد نبكي و نقوله افهمني يا منذر اني مضغوطة نفسيا خليني نفش غلي بالله عليك ..
قالي يا عنبو الخدمة و الفلوس و رزق الدنيا ف صحة بنادم ،،
اني كله مش هامني ،، لي يهمني راحتك و منبيكش تحرقي اعصابك ..
لو يخيروني بينك و بين الرزق هذا كله و الشغل ..  يا عنبو الشغل لي يخليني نسيب مرتي و هي متضايقة ..
قتله ،، انت مش متضايق انه قعدين مجوناش صغار ؟
قالي ،، هذا علاش متضايقة ؟؟؟ عادي مناش أول الناس يصيرلنا هكي ،، حتى بعض الانبياء ربي ابتلاهم بالعقم و بموت الابناء ،، و اللي ربي كاتبه ليا راضي بيه ،، جونا باهي ،، مجوناش ،، المهم انتي معاي ..
خليك قنوعة ..
ربي كل حاجة دارهالنا فيها حكمة،،
احمدي ربك ع النعمة و الصحة و امك و بوك حيين و عيلتك مفيهم شيء ،، و طايحة فيا مدلعك و منرضى فيك شيء ،، و طلع لسانه 😝
قداش ما كان يغيرلي ف جوي بأبسط شيء ..
يخلي فيا نحس إني برنسيسة و ملكة زماني و محد يقدرني ،، مستعدة نحارب الكرة الارضية🌍 و نفوز ..
رقدت و خداني ف حضنه و اني نبكي بالسر و نقول يا رب ..
و سبحان الله جانا اتصال و احني راقدين فالليل من عمتي
قالت شدو رونق ،،
طبوها جماعة حصين لضبط السحر و الشعوذة ..
منذر ،، امتى صار
عمتي قالت ،، ماشية بايتة عند اماليها ،، و من غادي طلعو فالليل لمقبرة معاها مها و عمتهم ..
طلع حارس المقبرة متفق معاهم و ياخد ف نسبة شوره مبلغين عليه شدوه جماعة حصين و مع التهديد خلوه يدير كمين لاي حد يتصل بيه من زباينه  بش يشدو السحارين اول يأول  ،،
رونق كلماته بش تجي فالليل ،، و قاللها تم ..
و طربقو عليهم و حولوهم للبحث الجنائي ..
اني فرحانة بنطيررررر .. و قعدت نقول الحمد لله يا ربي
قتله عمتي  .. لازم تمشي غدوة لان محمد ف حالة ما يعلم بيها كان ربي ..
قاللها ... تم يا يما تم ..
و فرحنا و حمدنا ربي ان خدا حقنا من هالفاسدة ..
نضنا صلينا ركعتين شكر ..
و رقدنا احلى نومة ..
سبحان الله ستة سنين و ربي مخليها على راحتها ..
بس ربي ما ينسى حد ،، يمهل و لا يهمل 👌🏻
مع دعوات كل ظالم رح تجيك القاضية و تتحاسب على اذية الناس 😌
جي الصبح منذر طلع يجري ..
و قعد يحكي مع جماعة حصين لقو صورة محمد و طلاسم شوره بيجددوله السحر ..
و مع الجلد من الشرطيات اعترفو بمكانات الدفن و الحارس قعد يوري فيهم ..
لقو صورتي و اني صغيرة مع غزل شوره خانبتها منها
و صورة محمد ،، مكتوب طاعة و تحكم و الخ ،، و طلعو عرم اسحار ماهو عرم ..
جو اللجنة لحوش اهل منذر رقوه و بدو يطلعو فاللي مدسوس ..
و خشو لشقتي لقو وراء دولاب النوم بنبلة سودة بالدبابيس ..
و محمد رقوه و داروله كورس علاج ..
و اني و منذر و سمية و غزل  الحوش كله علاج ..
و سبحان الله بدت تمشي الامور كويس ..
محمد التزم ..
و رجع لخطيبته و تقدملها ،،
و طه قرر يتقدم لغزل و غزل قتله موافقة ..
و دارو عرسهم مع بعض ..
طبعا حضرته و شفت طه كيف يزف ف غزل ..
و قتله عادي نربيلك صغارك و نديرهم زي صغاري ❤🤗