رحلتي إلى الموت

الحلقة 16

#رحلتي_إلى_الموت 💔 الحلقة 16
بعنوان ( رحلة العمر ❤ )
#الكاتبة_خلود_شلابي
قبل كل شيء 👌🏻🔥
اقرو ملاحظة صغيرة 👇🏻
أي وحدة قعدة مبعتتش طلب صداقة ،، تبعتلي توااااا قبل متقرا الرواية ..
الحلقة الاخيرة حتنزل ف ايميلي و حتكون حصرية قبل القروب 👌🏻 و مش حتقدرو تشوفوها لان حسابي برايفت ....
متفاهمين ؟؟
ضفتوني ؟؟؟
خلاص اقرو 🤣😋 ....

فقت قبل ما يرن المنبه 🤣 ..
قعدت نتأمل ف منذر كيف راقد ،، 😚
قلت خلنشوف ساعة كم ،، شبحت لساعة الهاتف لقيتها الأربعة ،،
و هو قالي انوضو اربعة و نص قبل فجر بشوي ..
قعدت نتقلب و ندير ف خطة و نكلم ف روحي ..
انوض للحمام نغسل وجهي و نتوضى للصلاة و ندير سندوتشات و نحطهم في سلة الطريق .. بحكم موتيتها بكل اللوازم ناقصتها سندوتشات و ترمس الشاهي ..
بعدين تلفتت لمنذر بسته و قعدت اناشب فيه ..
ناض لفني و باسني ع خدي و قالي ساعة كم .. شرين المنبه ؟؟
قتله .. و سبقتني الضحكة ..
قالي .. تي نعرفك شكله حتى النوم مرقدتيش .. 😅
قتله .. لا و الله العظيم رقدت غر نضت قبل منبه بنص ساعة ..
شن يا روحي انوضو؟؟
قالي .. حتى ني فرحان هههه هيا انوضو
صارلنا زي الصغار لما نحلمو برحلة المدرسة 🤣🤣
نضنا شطبنا و صلينا ركعتين بنية السفر ..
هو خش يضم فالسرير و يهوي فالدار شوية ..
و اني خشيت للمطبخ طول درت توستات و موتية قلايا حاطتها ف حافظة فالتلاجة ..
و حافظة صغيرة فاها زيتون ..
و سلتي فاها شاهي كيس و فاها حافظة القهوة و نسكافيه جاهزة اكياس و سكر و سكين و ملاعق صغار زوز و كبار زوز .. و بكرج القهوة العربية
و طماطمتين و خيارة مغسولات ع تقريض بس و نعناع مغسول للشاهي .. و طواسي كاغط كبار متع ورق يش يجي فاها للمشروب و الشاهي و متينة خير من البلستك ..
نعجبكم ف الاهتمام بالتفاصيل 👌🏻😋
حطيت التوستات ف سلفر و مسحت الماكينة ..
و سُخنتلي المية اللي فالكتل صبيتها ف الترمس ..
بش وقت نبو شاهي نحط زرف فالطاسة و سكر و وريقات نعناع و خلاص ،، و لا كابتشينو ..
طلعت عصير طبيعي من فريز و حطيتهم ف ترمس حراري المربع و مشروبات حكاك و عصاير ..
بدا منذر ينزل فالبضاعة و يستف ..
نقوله بنفطرو ..
يقولي لالا خلنطلعو فالبرودة خير .. نمشو مسافة و نوقفو فالطريق ..
الفجر قاعد ما ادنش ..
و دنيا ظلام و فيه نسمة بحري تهبببل ..
و بطني تزوي ..
باهي يا منذر خليني نطيب قهوة عربية راسي مكفوخ ..
لالا فالطريق ..
تي كله فالطريق ؟؟
قالي اسكتي عاد حتى ني فرحان نبي نمشي بكري هههه
حسيته بينتقم مني لان نوضته 😣
تأكدت اني طافية الغاز ،، و لبست عبايتي و تحتها سروال واسع .. و تيشيرت قطني ،، لان الطريق تبي عباية عملية ..
و شنطة كبيرة فاها واقي الشمس و كريم ترطيب و وايبس كلينكس مبلل و و كلينكس العادي .. و فرشتي و معجوني و شحني و باور بنك ..
استودعتك منزلي و طلعت ركبت ..
حطيت السلة وراي و ترمس الحراري متع المشروبات و ستيكتين مية ..
و الصلايات وحدة ليا و وحدة ليه بش نصلو فالطريق ..
خطر عليا ايامات كنا نمشو قبل مع بابا و تعلمت التجهيز كله من امي ❤☺
ولع السيارة كانت دفع رباعي و عالية و انطلقنا ..
قرينا دعاء السفر ..
و شادة خاتم التسبيح اني نسبح و هو يسبح ..
الطريق فاضية و جو مصقع مع ان احني فعز الصيف ..
حبيبي نمدلك حاجة تاكلها ؟
هو .. لالا
حبيبي بلكي تبي امية ..
هو .. لالا
نسمعو فالفجر يأذن .
قتله اهو ادن بش نصلو
قالي .. خلنوصلو لمكان فاضي و نصلو ..
قتله باهي ..
قعدت نطلع من شنطتي ف وصلة الشحن حطيتها بحدا مكان شاشة السيارة فالفترينا و درت جهازي فالشحن ..
و طلعت المناديل المبلل و العادي بش نمسحو بيهم فالطريق ..
وصلنا لمكان حوايز ..
قتله هيا نوقفو نصلو ..
وقفنا صليت اني و وياه ..
قتله نبي قهوة 😢
قالي .. مزال بنشربها توا بطني بتتحرك ..
ركبنا و ريحة الكيكة تفحفح تقول كان تجي تاكليني يا رغد بطعمتي تهبببل ..
و هداكا التوست لي فيه التن قداش ما ريحته فالسيارة ..
بطني زو زو زو 🐦🐦🐦
و راسي مكفوخ تعودت ع قهوة ..
قتله ... بالله عليك يا روحي نبي قهوة راسي خلاص ،، مش متعودة انوض و منفطرش 😭😭
قالي باهي اهني طانطات خلنشوف وين ندرس ..
دقيقة حتى درس السيارة و بدا الشفق متع الفجر باين و دنيا تضوي نوعا ما ..
قعد يطيب فالقهوة فالكوفني جايبين معانا بريمس صغير طلياني ..
و اني نزلت نتفرج و نصور فيه 😍 ..
قربت منا طانطا قالي اجري اركبي ..
ركبت و جي مولى الطانطا يخدم ع الخط ،، قاله السلام عليكم صباح الخيرات ..
رد منذر السلام..
الراجل .. بلكي تبي حاجة نساعدك ،، يحسابه سيارة واقفة بينا ..
قاله .. بارك الله فيك غر نطيب فالقهوة ههه
قاله .. تمام طريق السلامة ..
منذر قاله استنى مداما وقفت عليا الا ما تشرب معاي ..
الراجل تحشم و قاله باهي بعد ما حلفله راجلي ..
اني طبعا من غير حتى ميقولي ..
طلعتله طرف كيكة مسكر و شكلاتة و طروف مستكة و شيشتين مية مسكرات و بشكوط حطيتهمله ف كيسة و مديتهم لمنذر يعطيهمله مع القهوة ..
خداهم الراجل و توكل ..
و احني قعدنا نشربو و ناكلو من كيكتي اللي اني مطيبتها .. و قتله هذا وين دماغي تعدل ..
بدت الشمس تطلع و كان منظرها يههههبل ❤☀️
ركبنا و لبسنا نظاراتنا و حطيت شيشات مية ع جنبي و ع جنبه و توكلنا ..
هو يسوق و أني نتفرج عليه و نهدرزو .. تقول بالعين راديو فهداكا الصبح 😂😂
ممشيناش من جيهة الساحل كلها
مشينا فالبداية من جيهة قربولي و خشينا ع جيهة قصر الخيار .. و منها لترهونة ..
و من ترهونة لبني و ليد ،،
لما وصلنا جيهة بني وليد منذر خلاص معش تحمل ريحة الماكلة ..
مديتله طرفين توست و قعدت نوكل فيه و هو يسوق ..
و خطر عليا امي لما كانت تعطي لبابا و هو يسوق بينا 😣💔
شادتله فطوره و نشرّب فيه فالعصير ..
و اني ناكل معاه ..
وصلنا لبني وليد و من بني وليد بدت المعالم الصحراوية تبان ..
دنيا فاااااضية .. و رملة و صخور سوداء ..
كأنك ع سطح المشتري فالفضاء ..
و خشينا جيهة كوبري السدادة ..
قالي كان تبي تخشي جيهة مصراتة تخشي يسار ..
و كان بتخشي يمين و تركبي ع كوبري ترفعك لسرت ..
و طبعا قبل سرت فيه بن جواد و غيره ..
احني منبوش طريق الساحل و الزحمة كملنا عالكوبري
و بدينا نمشووو
نمشوو
طريق رملة تهبببل و البل يرعى و يقص فالطريق ..
قعدت نصور فيه ،، و هو فاتحلي اغاني مرسكاوي و يغني معاه ..
في عيونك كلام ،، ينادي يقول
ذوبني الغرام ، و حق الله و البيت الحرام
تايه دوم ،، ما عارف سبيلي
ما عارف سبيلي ،، احترت معاك ،، هيا دبريلي
احترت معاك ،، هيا دبريلي .. هيا دبريلي .. ❤
و الله ما نهونه ،، و لا نفكر في يوم نخونه
ما يوم نخونه ،، غاليّا اللي سماح اعيونه
لسماح عيونه ،، يا ربي يونسني بيه !!
لا ما نسلم فيه غزالي ،، لا ما نسلم فيه 😚❤