දඬු මොණරු ✅

දඬු මොණරු 46

සෝමා නැන්දට අපේ ගේ බලා ගන්න කියල මං මල්ලිත් එක්ක ඉස්කෝලෙ ආවා. ගෙදර දොර වහන්නත් බෑනෙ ඉතිං අද හවස බණ නිසා කට්ටිය ඒකට ලෑස්ති වෙනවනෙ. කෑම බීම, උයන්න ගෙනාව බඩු එහෙම ඔක්කොම තිබ්බෙ අපේ ගේ ඇතුලේ. සීයලගෙ ගෙදර ඔය දේවල් තියන්න මාමලත් බයයි.

මද්දු මාම, චූටි මාමා විතරක් නෙවෙයි ඒ නැන්දලා දෙන්නත් හරිම හොඳයි. සීයගේ, ලොකු මාමගෙ මහ ලොකු වරදක් කියන්න නෑ, එයාලගේ තියෙන එකම වරද ගෑණු දෙන්න මොනව කරත් ඔහේ පාඩුවේ ඉන්න එක. මං කියන්නේ නෑ තමන්ගේ ගෙදර ගෑණිට ගහල බැනලා බය කරන් ඉන්න ඕන කියලා. හැබැයි වැරද්දක් දැක්ක තැන ඒ දේ පෙන්නලා දීල ආයේ ඒ දේවල් නොවෙන තැනට කතා බහ කරලා හදා ගන්න පුළුවන් වෙන්න ඕන. එහෙම නැතුව කරබාගෙන ඉන්න ගියාම පසු තැවෙන්න වෙන්නේ එයාලටම තමයි.

සීයා උනත් ආච්චි අම්මා කරන වැරදි දැක දැක නිහඩ වෙලා ඉදල ඒ දේවල් දරුණු උන තැනකදී විතරක් කතා කරනව. චූටි මාමලා මෙහෙ ඉද්දී එයාලගේ වගාව විනාශ උන වෙලේ කතා කරා තමයි. හැබැයි ඒ ගේ ඇතුලේ චූටි මාමටයි, නැන්දටයි වෙනස්කම් වෙච්ච මුල් කාලේ කතා කරා නම් ඔහොම දෙයක් වෙන්නෙ නෑනෙ, එයාලගේ හිත් රිදෙන්නේත් නෑ.

ආච්චි අම්මලා අපිට කරන වෙනස්කම් උනත් සීයලා දන්නෙ නෑ දැක්කෙ නෑ කියලා හිතන්නත් බෑ. මං ඒ ගැන කෙලින්ම කතා කරපු නිසානේ සීයා එදා ආච්චි අම්මටයි, ලීලා නැන්දටයි අවවාද කරේ, එහෙම නැත්නම් සීයා ඔය ගැන කතා කරන එකක් නෑ. අනිත් එක අපේ වගාවටත් කරන්න හදපු අපරාදෙ.

දවසින් දවස ලී දඬු දිගේ එති එතී උඩට මතු වෙන බුලත් වැල්, එළවළු වැල්, පැල දකිද්දී එදා ආච්චි අම්මලා කරන්න ගිය වැඩේ මතක් වෙලා මගේ පපුව හීරිලා යනවා. සීයයි, ලොකු මාමයි ඒ නපුරු, දුෂ්ට කම් වලට වේලාසනින් කටක් ඇරලා කතා කරා නම් ආච්චි අම්මල උනත් ඔච්චර නපුරු වැඩ කරන එකක් නෑ.

•
•

අදත් පුරුදු විදියටම අපි බයික් වල ඉස්කෝලෙට ආවා.7.30 වෙන්නත් වෙලා තියෙන නිසා අපි තුන් දෙනා මිදුලට බැස්සෙ කෙල්ලො ටික පන්තිය අතු ගාන නිසා. අපි හිටපු තැනට ස්ටාෆ් රූම් එක හොඳට පේනවා. ස්ටාෆ් රූම් එක ඉස්සරහා කොරිඩෝ එකේ සර්ලා හතර පස් දෙනෙක් එකතු වෙලා කතාවක්. අපේ තුන් දෙනාත් ඉන්නෙ ඔය. අපේ බිම් මල කොටට කොටේ එතන පිපිලා ඉන්න හැටි දැක්කම මට හිනා ගියා. තුහින සර් හරි හුරතල් පාටයි, අර හඳට යන්න ගිය ගගනගාමියාවත් මේ මහ පොළවට ආයේ ඇදලා ගත්තෙත් ඔය හුරතලේ දැක්ක නිසා වෙන්න ඇති.... යශ් අයියා නම් එදා කිව්වෙ මාළු පාන් ගෙඩියක් බදාගෙන බෝඩිමේ ගේට්ටුව ළඟ ඉද්දී දැකලා හිත ගිහින් කියලනේ.