وصلوا بيت ابو خالد الي كان مسوي عشا لولده وكان عازم الكل نطقت ليان وهي تناظره يطفي السياره :زايد شكلي حلو
ابتسم وهو ينطق :مو بس حلو الا تهبلينننن و تاخذينننن العقل
ليان ابتسمت ونطقت :جوالي طافي بالله خلي وحده من خواتك تفتح لي الباب قبل
هز راسه وهو يطلع جواله ويرسل لفجر الي ردت ب ابشر نطق وهو يبتسم :خلاص كل شي مثل ماتبين فجر تنتظرك عند الباب لا تتأخرين وبعدين لا تطلعون للحوش
ليان :خير ننحبس بالبيت
زايد :ياحبيبتي ماعجبك الحوش الا الحين بس فيه رجال
هزت راسها ليان وهي تنطق ببراءة :زيودي وصلني للباب
زايد ابتسم وهو ينطق :بشرط
ليان :وشهوا؟
زايد :ماتقولين لي زيودي قدامهم
ليان ضحكت وهي تنطق :وليه خير
زايد :يعني انا ماتناسب هيبتي قدام اهلي
ليان :بشرط
زايد :وشهوا؟
ليان :تقول لي ليان القلب قدامهم عادي
زايد ضحك وهو ينطق :مو بس ليان القلب الا ليان الروح
سمو وهي تتعطر نطقت :رواف خلصت؟
رواف :اي اي جاي الحين
سمو :زين بجيب البخور واجي خلك هنا
هز راسه وهو يضبط شماغه لمن جت سمو بالبخور وهي تتقدم فيه له ضحك رواف وهو ياخده من يدها ونطق :ماتفقنا كذا
سمو ابتسمت وهي تنطق :أجل؟
رواف نزل البخور على الطاوله وهو يسحب سمو له ويمسكها من خصرها وبيده الثانيه ياخذ البخور ويبدأ يبخرها معه
ابتسمت سمو من قربه وهي تنطق :باقي شعري ماعرف ارفعه ولا اخليه نازل كذا
رواف بعد وهو يناظر شعرها الي يوصل نهاية ظهرها ونطق :اممم سويه من تحت مثل الاندومي
عقدت حواجبها سمو بضحك وهي تنطق :شلون؟
رواف نسي اسمه ونطق :مثل دايم لمن تسوين مثل الاندومي تذكرين
سمو بطست ضحك وهي تنطق :شكلك جوعان حتى صرت تشوف الويفي اندومي
ضحك رواف وهو يحك شعره وينطق :اي صح اسمه ويفي
سمو كملت تضحك وهي تطلع السيراميك وتسوي شعرها ويفي وبعد وقت خلصت وهي ترفع بعضه والباقي تخليه مفتوح لفت بابتسامه وهي تنطق :هاه كيف؟
رواف بإعجاب:خياللل
سمو وهي تسحب عبايتها أجل خلص نتوكل
رواف هز راسه بالنفي وهو يسحبها له ويجلس على الكرسي ويجلسها جنبه عقدت حواجبها سمو بعدم فهم لمن نطق :مانطلع قبل مانحصنتس
ضحكت سمو بحب وهي تناظره يحصنها وبعد وقت وقفوا وهم يطلعون متجهين لبيت ابو خالد
بعد وقت في بيت ابو خالد عند الحريم الي كانو قايمين يضيفون فجر وحنان وغلا وسمو معاهم
خلصت فجر من الحريم الكبار وهي تجلس عند البنات وتنزل الدلة وتنطق :خيرررر تنتظروني اصب لكم؟ كل وحده تصب لها وصبوا لي معاكم
ضحكوا عليها البنات لمن نطقت ارياف وهي تصب القهوة :ومين قالتس اننا ننتظرتس
فجر: مالت عليتس بس
سمو وهي تجلس وتناظر ليان مبتسمه وهاديه نطقت :بنات الشمس اليوم طالعه من وين
البنات بعدم فهم نطقوا :ليه؟
ارياف :حبيبتي الشمس من وين تطلع برايتس
سمو :بس بس في شي غريب
ليان بهدوء نطقت :وشهو
سمو :هدوئتس غريب شصاير بالدنيا
ضحكوا لمن نطقت غلا :اي والله صادقه شفيك هاجده
ليان ميلت شفايفها وهي تنطق : خير تبوني اقوم ارقص ترا هاجده بس عشاني توي عروس وأم زوجي جالسه قبالي لا يقركم هدوئي
ضحكوا البنات وهم يناظرون ام خالد قدام ليان ونطق حنان :تبين اريحك من الهدوء ذا
ليان :تسوين فيني خير
ضحكت حنان وهي تقوم لعند امها وتهمس بأذنها انهم هم البنات يروحون المجلس الثاني
وبعدها جت وهي تنطق :بنات مين تجي
ارياف :وين؟
حنان :المجلس الثاني
ارياف وقفت اول وحده وهي تنطق :اكيد انا بس اصبري الم قشي واخذ بزرتي
ضحكوا البنات وهم يجمعون اغراضهم مابين ليان الي قامت بهدوء لمن لفت وشافت عجوز تناظرها بنظرات ماعجبتها ليان صارت تمشي بدلع وهي تمشي قدام البنات لمن نطقت
سمو :حماره امشي زي الناس
ليان:طنشتها وهي تكمل مشي حتى اختفوا من قدام الحريم ورجعت تمشي عادي
فجر :ياخي شفيك
ليان :اف انتي الثانيه
ارياف وهي تنزل بنتها نطقت :الزفته ترف لو جايه كان انبسطنا سوا
سمو ابتسمت :خليها عاد ماتبي
ارياف :اي بس جيبو مسجل اي شي خلونا ننبسط
فجر ضربت كفها بكف ارياف وهي تنطق :ياخي هاذي جوي واجوائي
ليان وهي تضبط شعرها :اي بنات نرقص سوا
فجر وقفت وهي تطلع لغرفتها وتجيب المسجل ورجعت وهي تشغل لهم ونطقت :ليان قومي وبعدين حنا
ليان وهي توقف: خير انا لحالي
نايا بنت وريف ركضت وهي تدخل المجلس وتنطق :انا ارقص معتس
ليان ضحكت وهي تنطق :معتس وحركات
نايا :اكلم مثل عمه سمو
وريف :اي صايره كل ماتتكلم تقول لتس بكل كلمه
سمو ضحكت :حبيبتي نيونتي
ضحكت ليان وهي تمسك يد نايا وتبدأ تهز خصرها مع نغمات الاغنيه واشوي اشوي بدو البنات ينظمون لهم
