لن أتخلي عن حُبِك (بعد التعديل )

الاخير

بعد مرور ثلاثه اسابيع كان الجميع مشغول في تحضيرات زفاف فرح و علي الذي أصر أن يكون زفاف فخم يتحاكي عنه الجميع كما انشغل فرح و علي في تجهيزات منزلهم و مازال الجدال مستمر يوميا بين فرح و علي حول فستان الزفاف

هتفت فرح بغضب وهي تتجه الي الداخل بعدما فتح سليم الباب حيث ذهبوا الي منزل سليم بعدما انتهوا من رؤية بعض الفساتين
- ما هو بالمنظر ده مش هنلاقي فساتين انت كل ما نشوف حاجه تقول لا

دخل علي خلفها و قال بانفعال
- وانا قايلك حاجات مفتوحه لا أن شاء الله لو هنلف مصر كلها

صاحت فرح بانفعال مماثل وقالت
- ياعلي فاضل اسبوع على الفرح وانا مجبتش فستان

هتف سليم قائلا بصوت مرتفع
- ممكن تهدوا و تفهموني في ايه

هتفت فرح بانفعال طفولي قائله
- يا سليم لفينا نص محلات مصر مفيش حاجه موافق عليها كل فستان يطلعلي فيه القطط الفطسانه لا ده مفتوح من الضهر لا ده عريان لا ده رجلك باينه مش لاقيه حاجه تعجبه كل ما يعجبني حاجه ميوافقش

التفتت الي علي و صاحت قائله
- بعدين انت بتيجي معايا ليه انت متعرفش أن العريس لما بيشوف فستان العروسه بيجيب الشوؤم

ضحك علي و ضحك معه سليم فصاحت بغضب
- انتوا بتضحكوا علي ايه

ابتسم علي و اقترب منها قائلا بمرح و مشاكسه
- بنضحك علي هبلك يا روح قلبي ، بزمتك هيبقي فاضل اسبوع عالفرح وانا قاعد برفض كل الفساتين من غير سبب يعني عايزك تتزنقي

رفعت نظرها إليه و التفتت الي سليم قائله
- متخليهوش يكلمني بالغاز انا مش طايقاه خلقه اساسا

ضحك سليم و قال وهو يتابع حركاتها باستمتاع
- قولها يا علي

اقترب منها علي و قبل رأسها بحنان قائلا
- انا حاجزلك فستان الفرح من مصمم ازياء عالمي في فرنسا هيجي قبل الفرح بيوم

توسعت عيناها بصدمه و التفتت الي سليم قائله
- بيهزر صح

هز سليم رأسه بالنفي فنظرت الي علي وقالت
- احلف

ضحك علي قائلا
- و الله ، يخربيت التراست ايشوز اللي هتودينا ف داهيه دي

ضحكت فرح بسعاده و قالت وهي تضرب كتفه
- مش تقول يا حمار سايبني كده و عمالين نتخانق كل يوم

هتف علي قائلا وهو ينظر إلي سليم
- شايف ياسليم اختك المتوحشه والله اكنسل الفستان

احتضنت كتفه مسرعه وقالت
- لا لا بهزر يالولي انت قفوش اوي ، وريهولي بقي

هتف علي بمشاكسه
- هو ايه

قالت فرح بحماس
- الفستان

هز علي رأسه بالنفي وقال
- قبل الفرح بيوم هيبقي عندك وتشوفيه ، انا ماشي هتيجي معايا ولا قاعده